НИТХ-ын Тэргүүлэгчид өчигдөр хуралдаж, “Монгол наадам” цогцолборын бүтээн байгуулалтын ажилд шаардагдах хөрөнгийг шийдвэрлэсэн гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ. Бүтээн байгуулалтын ажилд шаардагдах 2,45 тэрбум төгрөгийг шийдвэрлэхээр НИТХ-ын тогтоол гарчээ. Хүй долоон худагт “Монгол наадам” цогцолбор байгуулахтай холбоотойгоор өнгөрсөн жил энд шинээр хоёр үйлчилгээний талбай, хатуу хучилттай 7000 автомашины зогсоол 361-ийн гармаас Хүй долоон худаг хүртэл 8,5 км автозамыг барьж ашиглалтад оруулсан. Харин энэ жилийн баяр наадмаас өмнө Хүй долоо худгийн наадмын үйлчилгээний талбайг холбосон 4м өргөн, 2 талдаа тус бүр 1.5 м өргөн хайрган хөвөөтэй 2.7 км авто зам, 800 метр урт, 3 метрийн өргөнтэй явган зорчигчдод зориулсан зам, 500 машины хатуу хучилттай зогсоолыг шинээр барих юм.
Түүнчлэн энэ жилээс эхлэн Хүй долоон худаг руу Railbus буюу төмөр замын автобусыг явуулахаар болсон. Наадамчдыг тээвэрлэх Railbus нь Давааны өртөөн дээр зогсох бөгөөд энэ зогсоолоос наадмын талбай хүрэх 2 км орчим зайд хайрган түр зам хийхээр боллоо. Энэ замаар Railbus-аар үйлчлүүлсэн иргэдийг наадмын талбай руу эко автобусаар тээвэрлэхээр төлөвлөж байна.
Энэхүү бүтээн босголтын хөрөнгийн асуудлыг нийслэлийн төсвийн тодотголд тусгаж, шийдвэрлэсэн байна.