Баянгол дүүргийн нутаг дэвсгэр, Гурвалжингийн гүүрний ойролцоо байрлах “Цахилгаан дамжуулах үндэсний сүлжээ” ТӨХК-ийн харьяа 110 кВ-ын агаарын шугамын тулгуурт согтуу хүн авирсантай холбогдуулан Баруун, Умард, Сэлбэ 110 кВ-ын дэд станцуудын хүчдэлийг бүрэн салгав.
Эдгээр станцаас цахилгаан хангамжийн үүсвэртэй 1, 10, 3, 4-р хороолол, Хайлааст, Яргайт, Чингэлтэй, Долоон буудал, Дэнжийн мянга, Дамбадаржаа орчмын бүх хэрэглэгчид цахилгаан эрчим хүчээр түр хязгаарлагдаад байсан юм.
Цахилгааны шугаманд авирсан хүнийг буулгаж аврахаар Онцгой байдлын аврах алба, Цахилгаан дамжуулах үндэсний сүлжээ ТӨХК-ийн ажилтнууд, Яаралтай түргэн тусламжийн төвийнхөн газар дээр нь ажиллаж, шугам дээр гарсан хүнийг буулгасан байна.