Month: January 2023

Монгол Улсын Ерөнхийлөгчийн 2022 оны 12 дугаар сард Япон Улсад хийсэн айлчлалын мөрөөр эрүүл мэнд, анагаах ухааны салбарт харилцан ашигтай хамтын ажиллагааг дэмжин, хоёр орны иргэдийн эрүүл мэндийг сайжруулах чиглэлээр Японы талтай идэвхтэй хамтран ажиллахаар боллоо.

Хуурамч диплом, оюуны өмчийн хулгай гардаг цоорхойг бөглөж, цаашид хуурамчаар диплом олгодог хууль бус үйл ажиллагааг эцэслэх блокчэйн үйлчилгээ нэвтрэхэд бэлэн болжээ.

Боловсролын ерөнхий газар, Боловсролын мэдээллийн технологийн төв, Корэкс ХХК хамтран их, дээд сургуулиудын дипломыг блокчэйнээр дамжуулан бүртгэх үйлчилгээний хөгжүүлэлтийн ажил дууссан байна.

Эхний туршилтыг Монгол Улсын Их сургуулийг түшиглэн зохион байгуулсан бөгөөд тус сургууулийн 2022 оны төгсөлтийн 2300 орчим оюутны боловсролын баримт бичгийг блокчэйнээр бүртгээд байна.

Өнөөдрийн байдлаар блокчэйн үйлчилгээг нэвтрүүлэхээр СЭЗИС гэрээ байгуулсан бол 13 сургууль уулзалт хийж хүсэлтээ ирүүлээд байна. Энэ жил их дээд сургууль төгсөх 10 сургуулийн 5400 оюутны дипломыг блокчэйнээр бүртгэх бэлтгэл ажлыг хангажээ.

“Баян-Өлгий аймагт хойлог шувуу тээвэрлэж байна” гэсэн дуудлага энэ сарын 4-нд буюу өчигдөр 17:00 цагийн орчимд цагдаагийн байгууллагад бүртгэгджээ. Уг мэдээллийн дагуу тус аймгийн цагдаагийн газрын алба хаагчид шалгалтын ажиллагаа явуулж, Баян-Өлгий аймгийн оршин суугч 35 настай, Ж гэх эрэгтэй Ховор амьтны жагсаалтад багтсан нэг хойлог шувуу хууль бусаар тээвэрлэж байсныг илрүүлж үргэлжлүүлэн мөрдөн шалгаж байна.

Энэ хэрэгтэй холбогдуулан иргэдийг хууль бус ан агнахгүй байх, хууль бус ангийн гаралтай түүхий эд хадгалахгүй, худалдахгүй, худалдан авахгүй, тээвэрлэхгүй байхыг цагдаагийн байгууллагаас анхаарууллаа.

Энэ сарын 4-нд буюу өчигдөр цагдаагийн байгууллагын 102 дугаарын утсанд нийт 1689 гомдол мэдээлэл бүртгэгджээ. Үүнээс зөрчлийн дуудлага мэдээлэл 1370, хулгайтай холбоотой 28, хүүхэд, гэр бүлийн хүчирхийллийн дуудлага 113, гэмт хэргийн шинжтэй 88 мэдээлэл бүртгэгдсэн байна.

Үүнээс гадна автомашин согтуу жолоодсон 53, хүний биед халдсан 50, эрүүлжүүлэх байранд хоносон 104 тохиолдол гарчээ.

Цар тахал аялал жуулчлалын салбарын хэв маягийг өөрчилж, шинэ сэргэлтийг бий болгож байна.

Энэ хэрээр Монгол Улс аялал жуулчлалын салбарынхаа стратегийг улам боловсронгуй болгон шинийг сэдэж, гадны жуулчдыг татахад анхаарч эхэллээ. Монгол Улсын Засгийн газраас аялал жуулчлалын салбарыг эдийн засгийн тэргүүлэх эгнээнд авч үзэн 2023-2025 оныг “Монголд зочлох жил”-ээр зарлаад байна. Энэ хүрээнд “Аялал жуулчлалыг хөгжүүлэх үндэсний хороо”-г байгуулсан бөгөөд Монгол Улсын Ерөнхий сайд Л.Оюун-Эрдэнэ тэргүүлж ажиллаж байгаа юм. Монгол Улс аялал жуулчлалаа хөгжүүлэхийн тулд улс орноо олон улсад сурталчлах нэгдсэн бодлого, уриа үг, бэлгэ тэмдэгтэй байхаас гадна үндэсний өв соёл, онцлогийг харуулсан аялал жуулчлалын жилийн хуанлиг гаргалаа.

Улмаар аль ч улсын жуулчид Монголд саадгүй зорчих агаарын тээвэр, тав тухтай, аюулгүй, сэтгэл ханамжтай үйлчилгээ үзүүлэх нэгдсэн стандартыг бий болгох зорилгоор Аялал жуулчлалыг хөгжүүлэх үндэсний хороог байгуулан ажиллаж байна. УИХ-аас Аялал жуулчлалын тухай хуулийг шинэчлэн батлахаар ажиллаж буй бөгөөд ажлын хэсгийг Монгол Улсын сайд, Засгийн газрын хэрэг эрхлэх газрын дарга Д.Амарбаясгалан ахалж байгаа юм. Аялал жуулчлалын тухай хуулиар тус салбарт хэд, хэдэн чухал зохицуулалтуудыг шийдэх шаардлагатай байгаа. Манай улсын дотоодын нийт бүтээгдэхүүний 10 хувийг дангаараа бүрдүүлдэг эл салбарын хувьд эдийн засагт үзүүлэх үр өгөөжийг дээшлүүлэхэд анхаарна хэмээн Засгийн газрын тэргүүн мэдэгдсэн. Энэ хүрээнд Монгол Улс аймгуудаа өөр, өөрийнх нь онцлогт тохируулан аялал жуулчлалын бүс болгож хөгжүүлэх зорилт тавиад байна. Тодруулбал, манай улс аялал жуулчлалыг газар зүйн байрлал, байгаль, түүх, соёлын нөөцдөө тулгуурлан бүсчилж хөгжүүлэхээр болов. Тухайлбал, зүүн бүсэд түүхэн аялал жуулчлал хөгжүүлэх өндөр боломжтой гэдгийг мэргэжилтнүүд хэлж байна. Энэ хүрээнд тухайн бүсүүдэд зочид буудлын хүрэлцээ зэрэг аялал жуулчлалын дэд бүтцийг сайжруулах шаардлагатай нүүр тулж байгаа. Энэ бүхнийг Аялал жуулчлалын тухай хуулийн шинэчлсэн найруулгад тусгаж буйгаараа онцлогтой. Түүнчлэн аялал жуулчлалыг хөгжүүлэх хүрээнд агаарын тээврийн либералчлалыг эхлүүлж, аялал жуулчлалын экспортын шинэ боломжийг нээхэд анхаарах юм. Тухайлбал, агаарын тээврийг төрөлжүүлэх хүрээнд 4-5 агаарын тээврийн боомтыг бий болгох замаар Хөвсгөл, Хэнтий аймгийг аялал жуулчлалын бүс нутаг болгон хөгжүүлнэ. Энэ хүрээнд олон улсын шууд нислэг үйлдэх боломжийг бүрдүүлэх юм. Түүнчлэн Улаангом хотоос ОХУ-ын хотууд руу шууд нислэг үйлдэхээс гадна хөвсгөл, хэнтий аймагт 4с зэрэглэлийн нисэх буудлыг бий болгон хөгжүүлэхээр тусгаад байна.

Үр өгөөжтэй, эдийн засагт чухал үүрэгтэй, байгаль орчинд хор нөлөөгүй аялал жуулчлалын салбарт цар тахлаас үүдэлтэй бууралт бий болсон ч эргээд сэргэх хандлага ажиглагдаж байгаа. Тус салбарт хийсэн судалгаа, дүн шинжилгээгээр жуулчдын тоо бага байгаа нь гурван шалтгаантай гэж үзжээ. Нэгдүгээрт, гадагш чиглэсэн маркетинг нэгдсэн бодлогоор хангах, нисэхийн либеральчлалыг яаралтай хийх, олон орны жуулчдын онцлогт тохирсон үйлчилгээний стандартыг бий болгох нь чухал гэсэн дүгнэлтэд хүрсэн юм. Тиймээс Монгол Улс 2023-2025 онд жуулчдын тоог нэмэгдүүлэх зорилт дэвшүүлэн 2023 онд нэг сая жуулчин хүлээн авах зорилт тавиад байна.

Цар тахлаас хойш аялагчдын хандлага тэс өөр болж ирсэн. Дэлхий дахинаа аялал жуулчлал хурдацтай хөгжиж, аяллын нэгдсэн үйлчилгээ онлайн хэлбэрт шилжсэн. Чамгүй хөрөнгө оруулалт, технологийн хөгжүүлэлт шаардсан энэхүү салбарт дотоод, гадаадын аялал жуулчлалд онлайн захиалгын цогц үйлчилгээг нэвтрүүлэхээс эхлээд монголчууд шинэчлэлүүд хийж эхэллээ.