Монгол түмний эрх ашгийн төлөө АН хүчтэй сөрөг хүчин байх ёстой. Даанч энэ үүргээ 2020 оны сонгуулиас хойш умартсан. Хоорондын зодоон цохион, хов жив, хэрүүл нь ч туйлдаа хүрч ёроол руугаа унав. Яг үнэндээ АН-ын зөрчилдөөн бол хувь хүн, бүлэглэлийн ашиг сонирхолын л тод илрэл. Энд үзэл баримтлалаараа ялгараад байгаа гэдэг нэр томьёо зүгээр л халхавч. Иймд АН гэх туган дороо буцаж бүтэн болъё гэвэл “ах нар”-ын хүслээс хамаарах болчихлоо.
АН-ын сунжирсан хэрүүл, талцал юунд хүргэхийг тэд мэдэхийн дээдээр мэдмээр юм, уг нь. Энэ намд итгэл үнэмшил, үзэл баримтлалаараа нэгдсэн намын жирийн гишүүд, идэвхтэн дэмжигчид эргэж буцахааргүй болтлоо залхчихжээ. Олон үйл явдлаас тод харагдах болов. Долдугаар сарын эхээр чуулсан намын их хурлын дараа хэсэг залуу өөр нам сонгосон сурагтай. С.Эрдэнийг хурлын индэр дээр байхад нь зодож нүдсэн асуудлыг харсан тэд “АН хурлаа ч хийж чадахаа байлаа. Цаашид энэ намд зүтгэх итгэл найдвар нурлаа. Хүний эрх, ардчиллын амин сүнс болсон нам маань өөрөө үзэл баримтлалаасаа ухарч байна. Хурлын үеэрээрээ нэгнээ балбаж, хүний эрхийн ноцтой зөрчил үйлдлээ. Эдний тэмцэл хэзээ ч дуусахгүй юм байна” гэж өөр хоорондоо ярилцаж тохиролцоод намын батлахаа “чулууджээ”. Ингээд зогсохгүй ХҮН-д элсэхээр шийдсэн гэлцэх. МАН-ын санхүүжилттэй ХҮН үзэл баримтлалаа баруун төвийнхөөр сольж, өнгөө өөрчилсөн. Үүгээрээ ХҮН бол АН-ын байр суурийг булаацалдаж байгаагаа зарлачихав. Тиймээс АН-ын аль өнгөтэй, өөдтэй гэсэн болгоныг өөртөө хялбархан урвуулж чадна. АН ч арчаагүй байдлаасаа бол потенциаль сайтай лидерүүдээ алдаад дуусч мэдэхээр байна.
Өөр нэг жишээ ч байна. АН-ын шинэ үеийн оюуны чадамжтай залуусын төлөөлөл болсон Б.Дөлгөөн гэдэг залуу МАН-д орсноо хэвлэлд өгсөн ярилцлагаараа тодотгосон байна лээ. Үндэсний хөгжлийн газрын дэд даргаар ажиллаж байсан тэрбээр сүрхий сийрэг толгойтой нэгэн. Эдийн засагч мэргэжилтэй, гадаад, дотоодын коллежид амжилттай суралцаж, АНУ-ын Харвардын их сургуулийг дүүргэсэн. Хөрөнгө, санхүүгийн байгууллагуудад менежерээс удирдах албан тушаал хүртэл хашиж байсан ажлын арвин туршлагатай. Анх түүнийг улс төрд хөтөлж оруулсан хүн бол Н.Алтанхуяг гэлцдэг. Тэрбээр Ерөнхий сайд байхдаа Б.Дөлгөөнийг дэргэдээ авчирч, зөвлүүлж байв. Одоо тэрбээр “Шинэ сэргэлтийн бодлогын хурдасгуур төв”-ийн гүйцэтгэх захиралаар ажиллаж байна. МАН түүний мэдлэгийг улсынхаа хөгжлийн төлөө зориулахад том боломж олгосон учраас эрх баригч хүчний намыг сонгосон гэнэ лээ.
АН-ын хамгийн том алдаа бол шинэ залуу үеэ усалж, тордож чаддаггүй байдал. Дэргэд нь МАН дараагийн үеэ маш сайн бэлдэж, гаргаж ирдэг. Одоогоос долоо, найман жилийн өмнө залуучуудаа өндөр хөгжилтэй орнууд руу явуулж, намын зардлаар сургаж байв. Тод жишээ нь Ерөнхий сайд Л.Оюун-Эрдэнэ байна. Түүнтэй нэгэн үед явсан 80-аад оныхон одоо яам, тамгын газарт газрын дарга, ТНБД гээд удирдах албан тушаалд сууж байна. Гэтэл АН-ын байгаа царайг хар даа. Засаглаж байх үедээ Удирдлагын академид суралцсан залуусынхаа тал зардлыг дөнгөн данган даасан. Одоо тэд үсрээд л аймаг, сумдын засаг дарга хийж байх жишээтэй. Арай дөмөгхөн боловсролтой, олон хэлтэй, оюунлаг залуус нь намаасаа дайжих боллоо. АН-ынхан минь учир зүйгээ олж, бушуухан аль нэг талдаа гарахгүй бол шинэ цагийн сэхээтнүүдээ алдаад дууслаа шүү дээ. Төд удахгүй гашуун үнэнтэйгээ нүүр тулж, толгой руугаа шаах вий.