Month: August 2022

2022 оны наймдугаар сарын 6-наас наймдугаар сарын 10-ныг хүртэлх цаг агаарын урьдчилсан төлөв:

Наймдугаар сарын 6-нд төвийн аймгуудын нутгийн зарим газар, зүүн аймгуудын ихэнх нутгаар, 7-нд говь болон зүүн аймгуудын нутгийн зарим газраар, 9-нд баруун аймгуудын нутгийн зарим газраар бороо, дуу цахилгаантай аадар бороо орно. Салхи ихэнх хугацаанд секундэд 5-10 метр, 6, 7-нд говь, тал, хээрийн нутгаар секундэд 12-14 метр, нутгийн зарим газраар борооны өмнө түр зуур ширүүснэ. 6-нд нутгийн хойд хэсгээр, 7-нд нутгийн зүүн хагаст сэрүүсэж Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Эг, Үүр, Тэрэлж голын хөндийгөөр шөнөдөө 1 градус хүйтнээс 4 градус дулаан, өдөртөө 16-21 градус, Их нууруудын хотгор, говийн бүс нутгийн хойд хэсгээр шөнөдөө 11-16 градус, өдөртөө 25-30 градус, говийн бүс нутгийн өмнөд хэсгээр шөнөдөө 17-22 градус, өдөртөө 29-34 градус, бусад нутгаар шөнөдөө 6-11 градус, өдөртөө 19-24 градус дулаан байна. Найманд нутгийн баруун хэсгээр, есөнд ихэнх нутгаар хална.

Аялал жуулчлалын өвөрмөц бүтээгдэхүүн болсон “Даншиг наадам-Хүрээ цам 2022” шашин, соёлын наадмын үйл ажиллагаа энэ амралтын өдрүүдэд Хүй долоо худагт болно. Үүнтэй холбоотойгоор иргэд, жуулчдад Хүй долоон худаг руу зорчих нийтийн тээврийн хэрэгслээр үйлчлэх юм.

Наймдугаар сарын 6,7-ны өдрүүдэд “МУБИС- Хүй долоон худаг” чиглэлд гурван автобус дараах цагуудад 1500 төгрөгөөр үйлчилнэ.

НИЙТИЙН ТЭЭВРИЙН ҮЙЛЧИЛГЭЭНИЙ ХҮЙ 7:2 “МУБИС- ХҮЙ-7” ЧИГЛЭЛИЙН ЦАГИЙН ХУВААРЬ

“ДАНШИГ НААДАМ- ХҮРЭЭ ЦАМ 2022”-ЫН ШИНЭЧИЛСЭН ХӨТӨЛБӨР

Боловсрол шинжлэх ухааны сайдаар ахлуулсан цэцэрлэгийн хүртээмжийг сайжруулах ажлын хэсэг Налайх дүүрэгт ажиллажээ. Дүүргийн хэмжээнд цэцэрлэгийн насны 3416 хүүхэд байна. Тэдний 2286 нь буюу 67 хувь нь сургуулийн өмнөх боловсролд хамрагдаж байжээ. Цэцэрлэгийн хүртээмжийг нэмэгдүүлэх зорилтын хүрээнд зохион байгуулалт хийж хамрагдалтыг 85 хувьд хүргээд байв.

Хэдийгээр хамрагдалт нэмэгдсэн ч 630 хүүхэд цэцэрлэгийн гадна үлдэхээр байсан юм. БШУ-ны сайдаар ахлуулсан ажлын хэсэг тус дүүрэгт ажиллах үеэрээ дүүргийн засаг дарга болон холбогдох албаны хүмүүстэй хамтран түрээслэх байруудын тоог нэмэгдүүлж, удаашралтай байгаа бүтээн байгуулалтын ажлуудыг энэ онд багтаан ашиглалтад оруулах зохицуулалт хийлээ. Ингэснээр үлдээд байсан 600 гаруй хүүхдийг цэцэрлэгт хамруулах боломжийг нээж байгаа юм. Налайх дүүргийн тухайд нийт 8 хороотой. Үүнээс 3,4,7,8 дугаар хороодод нөхцөл байдал хүндрээд байсан юм.

Мөн Налайх дүүргийн Голомт цогцолборын барилгыг буулгаж, бүтээн байгуулалт удааширч байгаатай холбоотойгоор 2500 орчим сурагчийн асуудал хөндөгдсөн. Төрийн байгууллагуудын барилга, талбайд зохицуулалт хийснээр ахлах ангийн 12 бүлгийн хичээлийн байрыг шийдвэрлэхээр боллоо. Боловсрол шинжлэх ухааны сайд энэ үеэр мөн Герман Монголын хамтарсан их сургууль, политехник коллежийн үйл ажиллагаатай танилцаж, хичээлийн жилийн бэлтгэл хэрхэн хангаж байгаатай танилцлаа.

Улсын хэмжээнд өнгөрсөн хоногт коронавируст халдварын 349 тохиолдол шинээр батлагдаж, нэг хүн энджээ. Ингэснээр нийт халдварын тохиолдол 956,553 болж эндэгдэл 2,122-т хүрлээ.

Илэрсэн тохиолдлуудын

• 189 нь Улаанбаатар хотод,
• 160 нь орон нутагт бүртгэгдсэн байна. Эдгээр нь Омикроны ВА5 хувилбар гэдгийг эрүүл мэндийн салбарынхан мэдээлээд буй.

Орон нутгийн хувьд 10 аймагт халдварт өвчний тохиолдлууд бүртгэгджээ. Үүнээс Дархан-Уул, Дорноговь, Өмнөговь аймагт коронавирусийн халдварын тархалт өндөр байгааг дараах жагсаалт харууллаа. Өнгөрсөн хоногт уг өвчний улмаас гарсан эндэгдэл нь Булган аймагт байна.

Халдварын тархалт нэмэгдэж байгаа тул амны хаалтаа зүүх, гараа халдваргүйжүүлэх зэрэг ДЭМБ-аас өгсөн зөвлөмжийг дагаж мөрдөх нь халдвараас сэргийлэх хамгийн энгийн арга болохыг эрүүл мэндийн байгууллагаас зөвлөж байна.

Улаанбаатар хотын түгжрэлийг бууруулах төсөл арга хэмжээний хүрээнд Шар хадны автобусны эцсийн зогсоолоос Гачуурт хүртэл 4.27 км засмал зам тавихаар болсон.

Энэ хүрээнд өнөөдрийн 23:00 цагаас 14-ний өдрийн 23:00 цаг хүртэл Улиастайн хуучин эцсээс Гачуурт хүртэлх авто замын хөдөлгөөнийг хязгаарлан, хучилт хийх гэж байгаа юм.

Үүнтэй холбогдуулан дээрх хугацаанд нийтийн тээврийн зарим чиглэлд өөрчлөлт орох гэж байна. Тодруулбал,

• Нийтийн тээврийн үйлчилгээний Ч:31 “Улиастай – Баянбүрд – Зам гүүрийн авто бааз” чиглэл богино эргэлтээр эргэнэ.
• Улиастайн шинэ эцэс болон Улиастайн хуучин эцэс гэсэн автобусны зогсоолууд дээр зогсох боломжгүй тул Шар тал дэлгүүр зогсоолоор эргэнэ.
• Ч:32А “Улиастай – Офицеруудын ордон” чиглэл дээрх хугацаанд түр зогсоно.

Иймд иргэд зам хаах хугацаанд Ч:31 “Улиастай-Баянбүрд-Зам гүүрийн авто бааз”, Ч:36 “Гачуурт -Офицеруудын ордон-Жуковын музей” чиглэлүүдээр үйлчлүүлнэ үү.

Эх сурвалж: Нийслэлийн Сургалт, судалгаа, олон нийттэй харилцах газар

АНУ-ын Өвчний хяналт, урьдчилан сэргийлэх төвөөс гаргасан хамгийн сүүлийн үеийн мэдээллээр сармагчны цэцэг өвчин дэлхийн 87 оронд тархаад байна. Эндээс 80 нь сармагчны цэцэг өвчин огт бүртгэгдэж байгаагүй бол долоо нь түүхэндээ сармагчны цэцэг өвчин бүртгэгдэж байсан улс аж. Наймдугаар сарын 3-ны мэдээллээр дэлхий даяар 26208 тохиолдол бүртгэгдээд байна.

Халдварын тохиолдлын тоогоор АНУ тэргүүлж буй бөгөөд 6616 тохиолдол бүртгэгджээ. Үүний араас Испанид 4577, Германд 2781, Их Британид 2759, Францад 2239, Бразилд 1474 тохиолдол тус тус бүртгэгдсэн. Манай хойд хөрш ОХУ-д нэг тохиолдол бүртгэгдээд байна. Өмнөд Солонгос, Филиппин, Судан, Турк, Венесуэл зэрэг нийт 22 оронд одоогоор нэг л тохиолдол бүртгэгджээ.

АНУ дахь тохиолдлын 47 хувь нь Калифорниа, Иллинойс, Нью-Йорк мужуудад байна. Энэ дундаас Нью-Йорк нь дэгдэлтийн голомт болоод буй бөгөөд Даваа гаригийн байдлаар 1400 орчим тохиолдол батлагджээ. Тиймээс өнгөрсөн Баасан гаригаас эхлээд дээрх мужууд ээлж дарааллан онц байдал зарласан.

Сармагчны цэцэг өвчин үхэлд хүргэх нь харьцангуй ховор боловч тууралтаас болж тэвчишгүй өвдөлт мэдэрдэг аж. Энэ вирус өмнө нь баруун болон төв Африкт мэрэгч амьтдын дунд бага түвшинд тархаж байжээ.