Газар хөдлөлт Улаанбаатарын 18.05 цагт болсныг ШУА-ийн Одон орон, геофизикийн хүрээлэн мэдээллээ.

Манай улс төв Азийн газар хөдлөлтийн идэвхтэй бүсэд оршдог. Өнгөрсөн зуунд 7 болон түүнээс дээш магнитудын хүчтэй газар хөдлөл 20 гаруй удаа болжээ. Магнитуд нь 8 хүрсэн нэн хүчтэй газар хөдлөлт манай оронд 4 удаа бүртгэгдсэн байдаг аж.

Монгол орны нутаг дэвсгэрт 2021 онд 159 396 удаа газар хөдөлсөнөөс хүнд мэдрэгдэх хэмжээний буюу 3.5 түүнээс дээш хүчтэй газар хөдлөл 430, үүнээс хоёр удаа 6 магнитудын хүчтэй газар хөдөлснийг дагасан давтан чичирхийлэл болсоор байгаа. Нийслэл хот орчмын нутаг дэвсгэрт 2021 онд 1123 газар хөдөлсөн бөгөөд 3.5 болон түүнээс дээш магнитудын хүчтэй газар хөдлөл 5 удаа бүртгэгджээ.

Ташрамд мэдээлэхэд, магнитуд гэдэг нь газар хөдлөлтийн төвд багажаар хэмжсэн үзүүлэлт бол, газрын хөрсөн дээр хүн болон барилга байгууламжид нөлөөлөх хүчийг баллаар хэмждэг. Газар хөдлөлтийн баллын хэмжээ 3-4 байвал хүнд мэдрэгдэх боломжтой, 6 баллаас хэтэрвэл барилга байгууламжид эвдрэл үүсэх магадлалтай, арваас хэтэрвэл барилга байгууламж нурах аюултай.

Монгол Улсын Ерөнхийлөгч У.Хүрэлсүхийн урилгаар НҮБ-ын Ерөнхий нарийн бичгийн дарга Антониу Гутерреш наймдугаар сарын 8-11-ний өдрүүдэд Монгол Улсад албан ёсны айлчлал хийж байна. Энэхүү айлчлалын хүрээнд Монгол Улсын Ерөнхий сайд Л.Оюун-Эрдэнэ НҮБ-ын Ерөнхий нарийн бичгийн дарга Антониу Гутеррешийг өнөөдөр хүлээн авч уулзлаа.

Уулзалтын эхэнд Ерөнхий сайд Л.Оюун-Эрдэнэ НҮБ-ын Ерөнхий нарийн бичгийн дарга Тантай Бээжин-2022 Өвлийн Олимпын наадмаас хойш Монгол Улсад дахин уулзаж байгаадаа баяртай байна гээд НҮБ цар тахлын үед КОВАКС хөтөлбөрийн хүрээнд “AstraZeneca”, “Pfizer” вакциныг цаг алдалгүй нийлүүлснээр манай улс хүн амаа вакцинжуулж, энгийн амьдралын хэмнэлдээ бүрэн шилжсэн Ази-Номхон далайн бүсийн анхны орнуудын нэг болж чадсан гэдгийг дурдлаа.

Мөн тэрбээр “Тантай Бээжингийн Олимпын үеэр манай улсын анхны усан цахилгаан станцын чухал төсөл болох Эгийн голын усан цахилгаан станцын талаар ярилцаж байсан. Энэ төслийг 2016 оноос БНХАУ-ын нэг тэрбум ам.долларын хөнгөлөлттэй зээлээр хэрэгжүүлэхээр барилга угсралтын ажил эхэлсэн ч ОХУ ЮНЕСКО-ийн Дэлхийн өвийн хороонд гомдол гаргаснаар ажил саатсан. Өнгөрсөн хугацаанд хийсэн судалгаагаар энэ төсөл ОХУ-ын Сэлэнгэ мөрөн, Байгаль нуурын усны нөөц горимд сөрөг нөлөө үзүүлэхгүй гэсэн дүгнэлт гарсан. Мөн манай улс олон улсын тендер зарлаж, Франц Улсын компаниар биологийн нөлөөллийн судалгаа хийлгэж байна. Эдгээр судалгааны дүнг ирэх оны ЮНЕСКО-ийн Дэлхийн өвийн хорооны хурлаар оруулж шийдвэр гарвал Эгийн голын усан цахилгаан станц төсөл үргэлжлэх боломж бүрдэнэ” гээд Монгол Улсын эрчим хүчний аюулгүй байдлыг хангахад чухал үүрэг гүйцэтгэх энэ төслийн асуудлыг шийдвэрлэхэд идэвхтэй дэмжлэг үзүүлэхийг хүсэв.

НҮБ-ын Ерөнхий нарийн бичгийн дарга, ноён Антониу Гутерреш найрсаг дотноор хүлээн авч уулзсанд Ерөнхий сайд Л.Оюун-Эрдэнэд талархал илэрхийлээд хөгжиж буй орнууд эрчим хүчний хараат байдалд байж болохгүй. Тиймээс ЮНЕСКО-ийн Дэлхийн өвийн 46 дугаар чуулганаар судалгааны үр дүнтэй танилцаад, НҮБ энэ тал дээр бодлогын дэмжлэг үзүүлэхээ илэрхийлэв. Мөн Монгол Улсын Засгийн газар авлигын индексийг бууруулахын тулд төрийн үйлчилгээгээ цахимжуулж, цахим засаглалд ахиц гаргаж буйг сайшаав.

Монгол Улсын Засгийн газар 2024 он гэхэд төрийн үйлчилгээний 90-ээс доошгүй хувийг “Цахим Монгол” нэгдсэн платформд оруулан, “Дижитал үндэстэн” болох зорилт дэвшүүлээд байгаа юм.

Засгийн газраас дэвшүүлсэн “Шинэ сэргэлтийн бодлого”-ын Хот, хөдөөгийн сэргэлтийн хүрээнд хотын хүн амын төвлөрлийг сааруулах, орон нутгийг хөгжүүлэх, тэнд ажлын байр олноор бий болгох бодлого баримталж буй. Энэ хүрээнд НҮБ хот, хөдөөгийн төвлөрлийн үнэлгээ хийж өгөхөөр талууд уулзалтын төгсгөлд тохиролцлоо.

Эх сурвалж: Засгийн газрын Хэвлэл мэдээлэл, олон нийттэй харилцах газар

“Мон Бийф” ХК-ийн нийтэд санал болгон гаргаж буй энгийн хувьцааны анхдагч зах зээлийн арилжааны цан цохих ёслол боллоо. Ёслолд Санхүүгийн зохицуулах хорооны Ажлын албаны дарга Т.Жамбаажамц, Үнэт цаасны газрын дарга Б.Дөлгөөн, Хөрөнгийн биржийн гүйцэтгэх захирал Х.Алтай болон холбогдох бусад албаныхан оролцлоо.

Цан цохих ёслолыг нээж Санхүүгийн зохицуулах хорооны Ажлын албаны дарга Т.Жамбаажамц “Хөгжиж буй орнуудын үндэсний томоохон компаниуд нь тухайн орныхоо хөрөнгийн бирж дээр бүртгэлтэй, олон нийтийн хувьцаат компани байдаг. Энэ жишгээр манай улсын томоохон компаниуд болон тэдгээрийн охин компаниуд олон нийтийн болох хандлага сүүлийн хоёр жил эрс нэмэгдсэн. Үүний тод жишээ нь Таван богд группийн охин компани болох үндэсний үйлдвэрлэгч хүнсний чиглэлээр үйл ажиллагаа эрхэлдэг “Мон Бийф” ХК нь өнөөдөр нийт хувьцааныхаа 30 хувийг олон нийтэд хөрөнгийн биржээр дамжуулан санал болгож байна. “Мон Бийф” ХК-ийн удирдлагууд, үүн дээр ажилласан бусад дэд бүтцийн компаниудад баяр хүргэе. Санхүүгийн зохицуулах хороо хөрөнгийн зах зээлийн зохицуулалтын орчныг олон улсын жишигт нийцүүлэн шинэчлэх, хөрөнгийн зах зээлийг тэлэх, үнэт цаас гаргагчдад тохирсон шаардлагуудыг тодорхой болгох түүнчлэн УИХ-аас баталсан бодлогын томоохон арга хэмжээнүүдийг үе шаттайгаар авч хэрэгжүүлсэн. Энэ ажлуудын хүрээнд Монгол Улсын хөрөнгийн зах зээлд хувьцаа гаргах компаниудын оролцоо нэмэгдсэн”-ийг онцоллоо.

“Мон Бийф” ХК нь нийт хувьцааныхаа 30 хувь буюу 64,285,700 ширхэг хувьцааг тогтоосон үнийн аргаар нэг бүрийг нь 45 төгрөгөөр олон нийтэд санал болгож, 2,892,856,500 төгрөг татан төвлөрүүлэх юм.

2022-2023 оны хичээлийн шинэ жил эхлэхэд цөөн хоног үлдлээ. Үүнтэй холбоотойгоор төрийн өмчийн их, дээд сургуулийн сургалтын төлбөр ямар үнэтэй байгаа талаар тодрууллаа.

“Энэ жил төрийн болон төрийн бус их дээд сургуулиуд нийт 30,000 орчим шинэ оюутнаар нэмэгдэх бөгөөд төрийн өмчит их, дээд сургуулиудын төлбөрийг нэмэхгүй байх зарчмыг баримтална” гэдгийг Боловсрол, шинжлэх ухааны сайд Л.Энх-Амгалан өмнө нь хэлж байсан юм.

АШУҮИС-ийн шинэ элсэгчийн сургалтын төлбөр дээд тал нь 117,610 төгрөг байна

Анагаахын шинжлэх ухааны үндэсний их сургуулийн энэ хичээлийн жилийн нэгдүгээр курсийн оюутны төлбөр аль ангид орсноос шалтгаалан нэг кредит нь 40,700-117,610 төгрөгийн хооронд байна.

ШУТИС-ийн сургалтын төлбөртэй холбоотой тушаал гараагүй байна

Шинжлэх ухаан, технологийн их сургуулийн тухайд, шинээр элсэгчийн нэг кредитийн төлбөр 138,000 төгрөг, 2019-2021 онд элссэн оюутнуудынх 105,056 төгрөг, 2018 болон түүнээс өмнө элссэн оюутнуудынх 95,325 төгрөг болж нэмэгдсэн тухай мэдээлэл цахим орчинд гараад байгаа.

Дээрх үнийн талаарх мэдээлэл бодитой эсэхийг тус сургуулийн элсэлт бүртгэлийн мэдээллийн ажилтантай холбогдож асуухад, одоогоор төлбөртэй холбоотой тушаал шийдвэр ирээгүй байна. Албан ёсоор тушаал шийдвэр нь гарсны дараа буюу наймдугаар сарын 15-наас хойш тодорхой болно” хэмээн хэлэв.

МУИС-ийн сургалтын төлбөрт одоогоор өөрчлөлт ороогүй байна

МУИС-ийн тухайд хамгийн сүүлд, Удирдах зөвлөлийн 2018 оны зургаадугаар сарын 6-ны өдрийн хурлын тогтоолоор сургалтын төлбөр, дотуур байрны үйлчилгээний төлбөр, үйлчилгээний бусад хураамж, хамтарсан болон зэргийн бус сургалтын төлбөрийн хэмжээг шинэчлэн тогтоосон бөгөөд түүнээс хойш одоогоор өөрчлөлт ороогүй байгаа аж.

Батлагдсан төлбөрийн хэмжээнээс харвал, тухайн оюутан ямар ангид элсэн орсноос шалтгаалан 60,800-120,800 төгрөгийн хооронд байна.

МУБИС-ийн сургалтын төлбөр 78,000-92,000 төгрөг байна

Монгол Улсын боловсролын их сургуулийн дотуур утсаар холбогдоход, аль ангийн оюутан гэдгээс шалтгаалан нэг кредитийн төлбөр 78,000, 86,000, 92,000 төгрөг байгаа гэдгийг хэллээ.

Харин тус сургуулийн Сургалтын албаны ажилтан “Энэ хичээлийн жилийн сургалтын төлбөртэй холбоотой мэдээлэл хараахан тодорхой биш байна” хэмээн хэлсэн юм.

ХААИС-ийн нэг кредитийн төлбөр 100,000-135,000 төгрөг байна

Хөдөө аж ахуйн их сургуулийн элсэлтийн албатай холбогдоход ямар ангид орсноос шалтгаалан кредитийн төлбөрийн үнэ харилцан адилгүй бөгөөд ерөнхийдөө 100,000-135,000 төгрөгийн хооронд байгаа гэдгийг хэллээ.

СУИС-ийн оюутны сургалтын төлбөрийн хэмжээ тодорхой болоогүй

Соёл урлагийн их сургуулийн төлбөртэй холбоотой мэдээлэл одоогоор тодорхойгүй болоогүйг тус сургуулийн оюутнуудад мэдээлэл өгөх мэргэжлийн багш хэллээ.