Month: August 2022

ОХУ-ын ерөнхийлөгч Владимир Путиний ойрын холбоотон, философич Александр Дугиний охин хорлогдсон тухай Оросын хэвлэлүүд мэдээлж байна.

Александр Дугин нь Оросын хэт үндсэрхэг үзлийг номлогч бөгөөд “Путиний тархи”, “Путиний Распутин” гэх зэргээр хочлогддог нэгэн юм.

Бямба гарагийн орой Дугин охинтойгоо хамт Москвад болсон нэгэн арга хэмжээнд оролцоод гэртээ харьж явсан юм байна. Эхлээд тэд нэг автомашинаар буцах гэж байсан ч Дугин эцсийн мөчид тусдаа явахаар шийдэж байжээ.

Ингээд Дарья Дугинагийн жолоодож явсан автомашин замдаа дэлбэрсэн байна.

Телеграм сүлжээнд тарсан дүрс бичлэгт цочролд орсон Дугиний царай болон шатсан автомашиныг харуулжээ.

Москвагийн ойролцоо Большие Вяземы тосгоны ойролцоо эмэгтэй хүн жолоодож явсан SUV ангиллын автомашин дэлбэрсэн тухай хуулийн байгууллага мэдээлснийг ТАСС агентлаг дамжуулсан байна. Харин хохирогч хэн байсан талаар албаны эх сурвалж дурдаагүй юм.

Дугиний 30 настай охин Дарья Дугина нь алдартай сэтгүүлч, Украины дайныг дэмжигч нэгэн байсан юм.

Тавдугаар сард өгсөн ярилцлагадаа тэр Украины дайныг “соёл иргэншлүүдийн мөргөлдөөн” хэмээн нэрлэж, Өрнөдийн эдийн засгийн хоригт аавын хамт багтсаныг бахархан ярьж байжээ.

Философич Александр Дугиний номлол ерөнхийлөгч Владимир Путиний ертөнцийг үзэх үзэлд гүнзгий нөлөөлсөн гэлцдэг. Тэрбээр олон жилийн турш Орос улс дэлхийн тавцанд илүү түрэмгий бодлого явуулах ёстой хэмээн ухуулж, Украинд явуулж буй дайныг талархан дэмжиж байв.

Эх сурвалж: BBC

“Замын цагдаагийн газрын ойролцоох гүүрэн гарц барих төсөл”-ийн хүрээнд Явган хүний гүүрний 42 урт метр дам нурууны угсралтын ажлыг гүйцэтгэж байна.

Иймд Нарны замын хөдөлгөөнийг 2022 оны наймдугаар сарын 20-ны 23:00 цагаас наймдугаар сарын 22-ний 06:00 цаг хүртэл хааж, тээврийн хэрэгслийн хөдөлгөөнийг хязгаарлах юм.

Тиймээс иргэд, жолооч та бүхэн дээрх хугацаанд Нарны замаас бусад замыг сонгон хөдөлгөөнд оролцохыг хүсье.

Малчид, иргэд, тариаланчдад зориулсан мэдээ: Өнөө маргаашдаа нутгийн хойд хэсгээр бороо орж, ихэнх нутгаар сэрүүн байна.

2022 оны 08-р сарын 21-ний 20 цагаас 08-р сарын 22-ны 20 цаг
хүртэлх цаг агаарын урьдчилсан мэдээ

Хур тунадас: Ихэнх нутгаар солигдмол үүлтэй. Шөнөдөө баруун, төв, зүүн аймгуудын нутгийн хойд хэсгээр, өдөртөө баруун аймгуудын нутгийн баруун, төв болон зүүн аймгуудын нутгийн хойд хэсгээр бороо орно. Бусад нутгаар бороо орохгүй.

Салхи: Ихэнх нутгаар баруун хойноос секундэд 6-11 метр, нутгийн зарим газраар секундэд 14-16 метр хүрч ширүүснэ.

Агаарын температур: Шөнөдөө Дархадын хотгор, Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчмоор 2-7 хэм хүйтэн, Хэнтийн уулархаг нутаг, Идэр, Тэс, Эг, Үүр, Орхон, Сэлэнгэ, Хараа, Ерөө, Туул, Тэрэлж, Онон, Улз голын хөндийгөөр 1 хэм хүйтнээс 4 хэм дулаан, говийн бүс нутгийн хойд болон зүүн хэсгээр 9-14 хэм, говийн бүс нутгийн баруун өмнөд хэсгээр 15-20 хэм, бусад нутгаар 3-8 хэм дулаан, өдөртөө Дархадын хотгор, Хөвсгөл, Хэнтийн уулархаг нутаг, Тэрэлж, Онон, Улз, Халх голын хөндийгөөр 9-14 хэм, говийн бүс нутгийн баруун өмнөд хэсгээр 25-30 хэм, Их нууруудын хотгор болон говийн бүс нутгийн зүүн өмнөд хэсгээр 20-25 хэм, бусад нутгаар 13-18 хэм дулаан байна.

УЛААНБААТАР ХОТ ОРЧМООР: Үүлшинэ. Бороо орохгүй. Салхи баруун хойноос секундэд 6-11 метр. Шөнөдөө 3-5 хэм, өдөртөө 14-16 хэм дулаан байна.

БАГАНУУР ОРЧМООР: Үүлшинэ. Бороо орохгүй. Салхи баруун хойноос секундэд 7-12 метр. Шөнөдөө 2-4 хэм, өдөртөө 14-16 хэм дулаан байна.

ТЭРЭЛЖ ОРЧМООР: Үүлшинэ. Бороо орохгүй. Салхи баруун хойноос секундэд 6-11 метр. Шөнөдөө 0 хэм орчим, өдөртөө 12-14 хэм дулаан байна.

2022 оны 08 дугаар сарын 23-наас 08 дугаар сарын 26-ныг
хүртэлх цаг агаарын урьдчилсан төлөв

23-нд баруун болон төвийн аймгуудын нутгийн зарим газар, говийн аймгуудын нутгийн хойд хэсгээр, 24-нд баруун аймгуудын нутгийн хойд хэсэг, төв болон зүүн аймгуудын нутгийн зарим газраар, 25-нд төвийн аймгуудын нутгийн зүүн хэсэг, зүүн аймгуудын нутгийн зарим газраар, 26-нд нутгийн зарим газраар бороо, уулаараа нойтон цас орно. Салхи ихэнх хугацаанд секундэд 6-11 метр, нутгийн зарим газраар секундэд 14-16 метр хүрч ширүүснэ. Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Эг, Үүр голын хөндийгөөр шөнөдөө 3-8 хэм хүйтэн, өдөртөө 8-13 хэм, говийн бүс нутгийн баруун өмнөд хэсгээр шөнөдөө 12-17 хэм, өдөртөө 24-29 хэм, Их нууруудын хотгор болон говийн бүс нутгийн зүүн хойд хэсгээр шөнөдөө 6-11 хэм, өдөртөө 19-24 хэм, бусад нутгаар шөнөдөө 1-6 хэм, өдөртөө 13-18 хэм дулаан байна.

Ардын хувьсгалын 100, 101 жилийн ойн үндэсний их баяр наадмаар 10 даван түрүүлж, Монгол Улсын аварга болсон Оргихын Хангай Ховд нутагтаа аав, ээжийнхээ тарьсан тарвасыг нийслэлд авчирч худалддагийг бөх сонирхогчид хэдийнэ мэдэх болсон.

Шинэ аварга О.Хангай энэ жил тарвасаа зарахгүй, тарвасаараа та бүхнийг дайлна гэжээ. Тэрбээр өөрийн цахим хуудаснаа “Олон жил Ховдын брэнд болсон тарвасаа борлууллаа. Энэ жилийн тарвасаараа та бүхнийг дайлна аа, зарахгүй” хэмээгээд хүссэн хүнийг хүрэлцэн ирэхийг урьсан байна.

Шинэ аварга Хан-Уул дүүрэг дэх Говь компанийн үйлдвэрийн дэлгүүрийн гадаах талбайд өнөөдөр буюу наймдугаар сарын 21-ний 14:00-18:00 цагт өөрөө үйлчилж эхэлжээ. Талбайд олон хүн цугларчээ. Улсын аварга О.Хангай “Хүүхэд байхаасаа аавдаа тусалж тарвас тарьж эхэлсэн. Энэ жил тарвасаараа иргэдээ дайлъя гэж наадмын дараагаас л бодож эхэлсэн. Өнөөдөр төсөөлснөөс ч олон хүн ирсэн байна. Маш их баярлалаа. Би 18:00 цаг хүртэл энд байна. Хүссэн хүн бүртэй хамтдаа зургаа даруулна” гэж ярилаа.