Month: July 2022

УИХ-ын гишүүн Ж.Бат-Эрдэнэ нарын 22 гишүүн зургадугаар сарын 17-нд өргөн мэдүүлсэн Хүнсний хангамжийг нэмэгдүүлэх, чанар аюулгүй байдлыг хангах, хөдөө аж ахуй үйлдвэрлэлийг дэмжих түр хороо байгуулах тухай тогтоолын төслийг Үйлдвэржилтийн бодлогын байнгын хороо дэмжлээ.

Ж.Бат-Эрдэнэ гишүүн төслөө танилцуулахдаа “Манай улсын хүн амын хүнсний хэрэгцээг дотоодын үйлдвэрлэсэн мах, махан бүтээгдэхүүнээр 97, төмсөөр 100, гурилаар 98.3, хүнсний ногоогоор 60.7 хувийг хангаж байна. Сүүлийн жилүүдэд дотоодын үйлдвэрлэлийн хүчин чадал сайжирч, хүнсний хангамж нэмэгдэж байгаа боловч хүнсний аюулгүй байдал алдагдаж, хүнснээс хамаарсан өвчлөл, хүнсний хорлогод өртөгсдийн тоо ихээхэн нэмэгдэж байна. Мэргэжлийн хяналтын ерөнхий газрын хяналтын итгэмжлэгдсэн лабораториудын нэгдсэн сүлжээний хэмжээгээр 2020 оны байдлаар хүнсний хими, нян судлал, хор судлал, ургамал хорио цээр, цацрагийн бохирдлын чиглэлээр 310.5 мянган үзүүлэлтээр шинжилгээ хийснээс 6.7 мянган сорьц Монгол Улсын стандартын шаардлага хангаагүй, бохирдлын түвшин 2.1 хувь байна. Төрийн аудитын газраас хийсэн Хүнсний аюулгүй байдлыг хянах өнөөгийн тогтолцоо, төсвөөс зарцуулсан хөрөнгийн үр дүнд хийсэн гүйцэтгэлийн тайлангаас үзвэл Төрөөс хүнс, хөдөө аж ахуйн талаар баримтлах бодлого, урт болон дунд хугацааны хөгжлийн баримт бичиг, үндэсний хөтөлбөрүүдэд зорилт, арга хэмжээг хэсэгчлэн тусгасан боловч шалгуур үзүүлэлт, суурь түвшин, хүрэх түвшнийг оновчтой тодорхойлоогүйгээс зорилт, арга хэмжээ бүрэн хэрэгжээгүй, үр дүнд хүрээгүй байна. Мөн гол нэрийн зургаан төрлийн хүнсний бүтээгдэхүүнийг дотоодын үйлдвэрлэлээр бүрэн хангаж байгаа боловч импортын хамаарал 42.1 хувь буюу хүнсний бие даасан байдал алдагдсан хэвээрээ байна” гэв.

Монгол Улсын Гадаад харилцааны сайд Б.Батцэцэг, ОХУ-ын Гадаад хэргийн сайд Сергей Викторович Лавров нар албан ёсны хэлэлцээ хийлээ. Уг хэлэлцээний дүнгийн талаар хоёр улсын Гадаад харилцааны сайд нар хэвлэлийн хурал хийж танилцуулав.

Гадаад харилцааны сайд Б.Батцэцэг “Монгол, ОХУ дипломат харилцаа тогтоосны 100 жилийн ойг хоёр тал цар тахлын нөхцөл байдлыг үл харгалзан ноднин Улаанбаатар болон Москва хотод тэмдэглэж, энэ жил хоёр орны харилцааны шинэ зууныг эхлүүлээд байна. Манай хоёр улс цар тахлын хүндрэл бэрхшээлийг хамтран даван туулж, харилцаагаа идэвхжүүлж байгаад бид баяртай байна. Монгол, ОХУ-ын хамтын ажиллагааг Иж бүрэн стратегийн түншлэлийн үзэл санааны дагуу хоёр талын хүчин чармайлттайгаар урагшлуулах талаар ОХУ-ын Гадаад хэргийн сайд Сергей Викторович Лавровтой санал солилцлоо. Бидний харилцаа цар тахлын өмнөх байдалд эргэн орж, төмөр зам, агаарын харилцааг сэргээснээр иргэдийн харилцан зорчих урсгал болон худалдааны хэмжээ мэдэгдэхүйц нэмэгдэж байна. ОХУ-ын Гадаад хэргийн сайд Сергей Викторович Лавровтой хийсэн хэлэлцээний үеэр өнгөрсөн жил Монгол Улсын Ерөнхийлөгч У.Хүрэлсүхийн ОХУ-д хийсэн айлчлалын үеэр тохиролцсон ажлын хэрэгжилтийг ярилцаж, харилцааны өнөөгийн байдлыг дүгнэж, цаашдын хамтын ажиллагаа, өндөр, дээд түвшний харилцан айлчлал, томоохон төслүүдийн талаар санал солилцлоо.

Түүнчлэн шийдлээ хүлээж буй олон жил яригдаж байгаа зарим асуудлыг ч ярилцаж, цаашид хэрэгжүүлэх ажлын төлвийг тодорхойллоо. Монгол, Оросын харилцан итгэлцсэн хамтын ажиллагааг улам бэхжүүлэх сонирхлоо хоёр тал нотолсон. Энэ хүрээнд худалдаа, эдийн засгийн хамтын ажиллагааг эрчимжүүлэх, тэнцвэржүүлэх, хамтарсан төслүүдийн явцыг урагшлуулах, хоёр талын байгуулсан баримт бичгийн хэрэгжилтэд анхаарах тал дээр санал нийлж ярилцлаа. Манай хоёр улсын худалдааны хэмжээ 2021 онд 2 тэрбум ам.доллар давсан. Энэхүү үзүүлэлтийг улам сайжруулах бүрэн боломжтой гэж үзлээ. Сүүлийн үед хоёр улсын бүс нутгийн харилцаа эрчимжиж, хамтын ажиллагааны өргөн боломжууд нээгдэж, бизнес эрхлэгчид идэвхтэй хамтран ажиллаж байгааг тэмдэглэхэд таатай байна.

Нэн ялангуяа Алтанбулаг, Цагаан нуур чөлөөт бүсэд Оросын талаас хөрөнгө оруулах, хамтарсан үйлдвэр байгуулах, тээвэр логистикийн төвүүдийг бий болгоход хамтран ажиллах сонирхол манайд байгаа.

Мөн Монгол Улсын хилийн боомтуудыг шинэчлэн өргөжүүлэх, ачаа тээвэрлэлт, иргэдийн урсгалыг нэмэхэд анхаарал хандуулахаар тохирлоо. ОХУ-ын Гадаад хэргийн сайд Сергей Викторович Лавровтой хоёр улсын хэрэгжүүлж байгаа хамтарсан төслүүдийн талаар санал солилцсон. Монгол, ОХУ, БНХАУ-ын Эдийн засгийн коридор байгуулах хөтөлбөрийн хүрээнд хэрэгжүүлж байгаа Оросоос Хятад руу байгалийн хий нийлүүлэх хоолойг Монгол Улсын нутаг дэвсгэрээр дамжуулан тавих төслийн ажил хуваарийн дагуу хэвийн явж байна. Мөн төмөр замаар манай улсын зүүн болон баруун хэсгээр хоёр улстай холбогдох коридоруудын талааар хөндөж ярилцлаа. “Улаанбаатар төмөр зам” ХНН-ийн үйл ажиллагааг эрчимжүүлэх, төмөр замын техникийн шинэчлэлийг хэрэгжүүлэх зорилгоор тус нийгэмлэгийн дүрмийн санг нэмэх ажил ахицтай байгаа. Эрчим хүчний салбарт эрчим хүчний обьектуудын шинэчлэл, өргөтгөлийн хамтарсан төслүүдийг үргэлжлүүлэн хэрэгжүүлэхээр ярилцлаа. Хөдөө аж ахуйн салбарт Монгол Улсын газар тариалангийн техникийн шинэчлэл хөтөлбөр болон Монгол малыг эрүүлжүүлэх хөтөлбөрийн 3 дугаар үе шатыг хамтран хэрэгжүүлж, үр тарианы элеватор барих, мал сүргээ дархлаажуулах чиглэлээр хамтран ажиллах талаар ярилцлаа.

Хүмүүнлэгийн салбарын хамтын ажиллагааны хүрээнд Монгол, Оросын хамтарсан ерөнхий боловсролын сургууль байгуулах ажлыг эрчимжүүлэх, хөрсний доройтол, цөлжилтийн эсрэг хамтран тэмцэх, “Тэрбум мод” үндэсний хөтөлбөрийн хүрээнд хамтран ажиллах, сансар судлалын салбарын хамтын ажиллагааг сэргээхээр тохирлоо.

Өнөөдрийн хэлэлцээний дүнд сэтгэл хангалуун байна. ОХУ-ын Гадаад хэргийн сайд Сергей Викторович Лавровын Монгол Улсад хийж буй айлчлалын үеэр хоёр орны харилцааны зарим асуудлыг шийдвэрлэж, бидний анхаарлыг шаардаж байсан асуудлуудууар үр дүнтэй ярилцаж, зарим оновчтой шийдлийг гаргаж чадсан гэж дүгнэж байна. Бидний цаашдын хамтын ажиллагаа үр өгөөжтэй үргэлжилнэ гэдэгт эргэлзэхгүй байна” хэмээв.

ОХУ-ын Гадаад хэргийн сайд Сергей Викторович Лавров “Гадаад харилцааны сайд Б.Батцэцэгтэй хийсэн хэлэлцээ харилцан найрсаг уур амьсгалд маш үр дүнтэй боллоо. Манай хоёр улсын сайн хөршийн харилцаа хамтын ажиллагаа олон жилийн түүхэнд суурилж идэвхтэй хөгжиж байгаа.

Хоёр ард түмэн Дэлхийн II дайны он жилүүдэд байгуулсан нөхөрлөлийг сайнаар санаж байгаа. Өнөөдрийн уулзалтаар бид Монгол Улсын тус ялалтад оруулсан хувь нэмрийг дахин өндрөөр үнэлсэн.

Хоёр талын болон олон улсын харилцааны олон асуудлаар санал солилцож, Улаанбаатар хотноо 2019 онд Найрсаг харилцаа, хамтын ажиллагааны иж бүрэн стратегийн түншлэлийн хэлэлцээрийн дагуу хамтын ажиллагааг улам бүр өргжүүлэх хүсэлтэйгээ хоёр тал илэрхийлсэн. Өнгөрсөн оны 12 дугаар сард Монгол Улсын Ерөнхийлөгч У.Хүрэлсүхийн хийсэн айлчлалын үеэр хүрсэн тохиролцооны хэрэгжилтийн талаар санал солилцлоо. Түүнчлэн цар тахлын хоргийг цуцалсны дараа хоёр орны хамтын ажиллагааг сэргэж эхэлснийг онцлон тэмдэглэж, Гадаад харилцааны сайд Б.Батцэцэгийн ОХУ-д хийсэн айлчлалыг өндрөөр үнэлсэн. Хоёр талын худалдаа эрс өсөн нэмэгдэж байгаа. Өнгөрсөн онд өмнөх үеэсээ 30 гаруй хувиар нэмэгдсэн. Мөн энэ оны эхний хагас жилд өмнөх оны мөн үеийнхээс 45 хувиар нэмэгдсэн байна. Мөн эрчим хүч, байгаль орчин, хүмүүнлэг, сансар судлалын салбарын хамтын ажиллагааны талаар санал солилцлоо. Худалдаа, эдийн засаг, шинжлэх ухаан, техникийн Монгол, Оросын Засгийн газрын комиссын үйл ажиллагааг дэмжих болсон бөгөөд тус комиссын ээлжит хурал энэ жил ОХУ-д болно.

Олон улсын асуудлаарх манай байр суурь ойрхон байгаа. Юуны түрүүнд манай хоёр улс НҮБ-ын Үндсэн дүрмийг дээдэлж, тэр дундаа тусгаар улсуудын эрхийг хүндэтгэж, хамтын ажиллагааны бүхий л чиглэлээр дэмжих явдал юм. Өөрийн зүгээс өнөөдрийн дэлхий дахины хурцадмал байдлын шалтгааныг нарийвчлан тайлбарлаж, шийдвэрлэх боломжийн талаар нарийн ярилцлаа. Хамгийн эрсдэлтэй үйл явдал бол сүүлийн жилүүдэд Украин улсыг Оросын эсрэг чиглэсэн шинэ нацист дэглэмтэй улс болгон хувиргаж, Украины нутгаас ОХУ-д аюул занал учруулж байгаа. Өөрийн зүгээс Донбасс болон Украины бусад нутгуудын цэргийн тусгай үйл ажиллагааны талаар мэдээлэл өгсөн.

Бид Украинд болж байгаа үйл явдлыг хэрхэн өрнөж байгаа тухай үнэн бодит мэдээллийг дэлгэхийг хүсэж байгаа. Харамсалтай нь зарим орон үнэн бодит, бие даасан, хараат бус мэдээллийн эх сурважлийг хязгаарлаж байна. Бусад олон улсын хамтын ажиллагааны хувьд гэвэл НҮБ, ЕАБХАБ-ын хүрээнд харилцан уялдаатай ажиллахаар тохирсон. Монгол Улс ШХАБ болон ЕвроАзийн эдийн засгийн холбоотай холбоо харилцаагаа улам илүү өргөжүүлэх талаар тодорхой санал хэлсэн. Монгол, Оросын хамтын ажиллагааны нөөц бололцоог бүрэн ашиглах, олон улсын тавцанд хамтын ажиллагаагаа улам илүү нягт уялдуулах хүсэл эрмэлзлийг харуулсан өнөөдрийн яриа хэлэлцээнд сэтгэл хангалуун байгаа гэлээ.

Энэ сарын 4-нд буюу өчигдөр цагдаагийн байгууллагын 102 дугаарын утсанд нийт 1744 гомдол мэдээлэл бүртгэгджээ. Үүнээс зөрчлийн дуудлага мэдээлэл 1465, хулгайтай холбоотой 36, хүүхэд, гэр бүлийн хүчирхийллийн дуудлага 109, гэмт хэргийн шинжтэй 99 мэдээлэл бүртгэгдсэн байна.

Үүнээс гадна автомашин согтуу жолоодсон 149, олон нийтийн газар зүй бусаар биеэ авч явж, танхайрсан 108, хүний биед халдсан 60, Архидан согтуурахтай тэмцэх тухай хууль зөрчсөн 82, эрүүлжүүлэх байранд хоносон 150, оршин суугчдын амгалан тайван байдал алдагдуулсан 77 тохиолдол гарчээ.

Улсын хэмжээнд өнгөрсөн хоногт хийсэн коронавирусийг илрүүлэх PCR шинжилгээгээр 72 тохиолдол шинээр батлагджээ. Энэ нь өмнөх өдөр илэрсэн тохиолдлоос 43-аар нэмэгдсэн үзүүлэлт юм.

Батлагдсан тохиолдлуудын

• 41 нь Улаанбаатар хотод,
• 31 нь орон нутагт бүртгэгдсэн байна.

Ингэснээр нийт бүртгэгдсэн халдварын тоо 929,311 болж нэмэгдэв.

Орон нутагт илэрсэн халдварыг аймаг тус бүрээр авч үзвэл, Баян-Өлгийд нэг, Дархан-Уулд гурав, Дорноговьд долоо, Ховдод нэг, Өмнөговьд 19 бүртгэгджээ.

Мөн сүүлийн 24 цагийн хугацаанд 79 хүн эдгэрсэн бол одоогоор 656 хүн хяналтад байна.

Энэ оны долдугаар сарын 04-ний өдрийн 08 цаг 30 минутын орчимд Хэнтий аймгийн Цэнхэрмандал сумын 3-р багийн нутаг дэвсгэр Бэлчрийн энгэр гэх газарт Г /34 настай, эмэгтэй/ жолоочтой Toyota Prius 20 маркийн автомашин онхолджээ.

Ослын улмаас зорчигч Ч /59 настай, эмэгтэй/ нас барж, Ч /9 настай, эрэгтэй/, Ц /7 настай, эмэгтэй/, Ц /4 настай, эмэгтэй/ нар гэмтсэн зам тээврийн осол бүртгэгдэж цагдаагийн байгууллагаас шалгалтын ажиллагааг явуулж байна.

Жолооч та бүхэн Замын хөдөлгөөний дүрмийг баримтлан өөрийн болон бусдын аюулгүй байдлыг хангаж, аюултай нөхцөл үүсгэхгүйгээр Замын хөдөлгөөний дүрэмд заасан хурдыг замын нөхцөлд тохируулж хөдөлгөөнд оролцоно уу.

ЭХЭМҮТ-д 2022 оны зургаадугаар сарын 19-ний өдөр долоон настай хүүхдэд элэг шилжүүлэн суулгах мэс засал амжилттай хийжээ. Энэ нь Монгол Улсад хүүхдэд элэг шилжүүлэн суулгасан долоо дахь мэс засал бөгөөд ЭХЭМҮТ-д хийсэн анхны мэс засал юм байна.

ЭХЭМҮТ-ийн Ерөнхий мэс заслын тасаг болон УНТЭ-ийн дэргэдэх мэс засалч О.Сэргэлэн ахлагчтай Элэг шилжүүлэн суулгах үндэсний багийнхан хамтран энэ нарийн түвэгтэй мэс заслыг амжилттай хийж, охин хүнд өвчнөөсөө ангижирчээ.

Долоон настай охины ээж нь донор болсон бөгөөд эх, хүүхдийн бие сайн байна. Охинд элэг шилжүүлэн суулгасан мэс заслын дараах эмчилгээг үргэлжлүүлэн хийж байна. Харин донор болсон 29 настай ээжийнх нь бие сайжирч эмнэлгээс гарчээ.

Охин цөсний битүүрэлтэй төрсөн бөгөөд төрөөд 45-хан хоногтой байхдаа тус эмнэлгийн Ерөнхий мэс заслын тасагт элэг шилжүүлэн суулгах мэс заслын урьтал хагалгааг хийлгэж, эмчийн хяналтад өнөөг хүртэл байсан аж. Хүүхдэд элэг шилжүүлэн суулгах энэ мэс заслын өртгийг Эрүүл мэндийн даатгалын сангаас бүрэн хариуцжээ.

ЭХЭМҮТ-д анх удаа хүүхдэд элэг шилжүүлэн суулгасан мэс заслын талаар маргааш /2022.07.05/ 10.45 цагт тус эмнэлэгт мэдээлэл хийнэ.

Улсын хэмжээнд одоогийн байдлаар 140 мянган тонн шатахуун байгаагаас 68 мянган тонн буюу 48 хувийг дизель түлш, 54 мянган тонн буюу 38 орчим хувийг Аи-92 автобензин эзэлж байна. УУХҮЯ-ны мэдээллээр өнөөдрийн байдлаар А-80 автобензинийн 59 хоногийн, Аи-92 автобензинийн 40 хоногийн, дизель түлшний хувьд 25 хоногийн тус тус нөөцтэй байна.

Засгийн газрын тогтоолоор өмнө нь улсын хэмжээнд 30 хоногийн шатахууны ердийн хэрэглээний нөөц бүрдүүлэх үүргийг тусгай зөвшөөрөл эзэмшигч ААН-үүдэд хүлээлгэдэг байсан бол өнгөрсөн онд гарсан Засгийн газрын 311 дүгээр тогтоолоор дунджаар 45 хоногийн нөөц бүрдүүлдэг болсон юм.

Улсын их баяр наадмын өдрүүдээр шатахууны хомсдол үүсэх талаар олон нийтийн сүлжээгээр цацагдсан мэдээллийн талаар УУХҮЯ-ны Газрын тосны бодлогын хэрэгжилтийг зохицуулах хэлтсээс тайлбар өглөө. Тодруулбал, баяр наадмын өмнө газрын тосны бүтээгдэхүүний хангамж тасалдахгүй, хомсдол үүсэхгүй гэдгийг салбарын яамнаас албан ёсоор мэдэгдэж байна. ОХУ-ын “Роснефть” компани манай улсад хөнгөлөлттэй үнээр шатахуун нийлүүлж, худалдах эсэх нь наадмын дараа тодорхой болно гэдгийг нэмж мэдээлсэн юм.