Month: July 2022

Баяр наадмын үеэр Цагдаагийн байгууллага хэрхэн ажиллаж байгаа талаар ЦЕГ-ын Хэвлэл мэдээллийн төвийн дарга, цагдаагийн хурандаа Б.Баатархүү мэдээлэл өглөө.

Тэрбээр “Цар тахлаас үүдэлтэйгээр баяр наадам хоёр жил өнжсөн. Үүнтэй холбоотойгоор энэ жилийн наадам нэлээд өргөн дэлгэр зохион байгуулалттай болж байна.

Цагдаагийн байгууллагын хувьд, ЦЕГ-ын дарга, Дотоодын цэргийн командлагчийн тушаалаар нийт цагдаа, дотоодын цэргийн алба хаагчид өндөржүүлсэн бэлэн байдлын нэгдүгээр зэрэгт шилжин ажиллаж байна.

Мөн хөдөө орон нутагт сум, аймгуудын наадам ч зэрэг болж байгаа учраас тэнд мөн хамгаалалтын ажлыг зохион байгуулж байгаа.

Үндэсний их баяр наадам болж буй Төв цэнгэлдэх хүрээлэн болон Хүй долоон худагт цагдаагийн байгууллагын нийт 3,000 гаруй алба хаагч наадамчин олныгоо гэмт хэрэг, зөрчилгүй дэг журамтай сайхан наадах чиглэлд ажиллах байна.

Мөн баярын өдрүүдэд амралтын олон хоног давхцаж байгаа тул хотын ойролцоо Туул гол болон рашаан сувилал, амралт зугаалгын газруудаар аюул ослоос урьдчилан сэргийлэх чиглэлд, орон нутгийн замд хөдөлгөөний эрчим их байгаатай холбоотойгоор Тээврийн цагдаагийн алба хаагчид хөдөлгөөнд зохицуулалт хийж, зам тээврийн ослоос сэргийлэхээр ажиллаж буй.

Нэг зүйлийн онцолж хэлэхэд, жил ирэх тусам иргэд дэг журам, ухамсартай наадаж байна. Та бүхэн санаж байгаа бол маш олон цагдаагийн хамгаалалт гардаг байсан бол одоо командлагчийн зүгээс аль болох цагдаагийн алба хаагч цөөн хүчээр, ингэхдээ бэлэн байдлыг хангуулан ажиллаж байгаа.

Жилээс жилд наадамчин олон маань ч дэгтэй сайхан наадаж байгаад баяртай байна. Гэхдээ магадгүй халаасны хулгай, хүүхэд төөрөх зэрэг асуудлууд бий. Энэ бүхэн дээр цагдаагийн алба хаагчид урьдчилан сэргийлэн ажиллана” гэв.

Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмын нээлтийг үзэж сонирхсоныхоо дараа Монгол Улсын Ерөнхийлөгч Ухнаагийн Хүрэлсүх, УИХ-ын дарга Гомбожавын Занданшатар, Ерөнхий сайд Лувсаннамсрайн Оюун-Эрдэнэ сурын талбай, шагайн асарт зочилж, цэц мэргэнээ сорьж буй эрхий мэргэн харваачдад амжилт хүслээ.

Энэ үеэр ерөнхийлөгч эртний уламжлалын дагуу дуут сумаар, Г.Занданшатар Шагайн асарт цэц мэргэнээ сорьж мэргэн харваачид, наадамчин олондоо хүндэтгэл үзүүлэв.

Монгол Улсын Ерөнхийлөгч хоёр сум тавьснаас нэг удаа оножээ.

Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой тохиож байгаа билээ.

Баяр наадмын их насны морьдын уралдаанд 330 их насны морьд гарааны зурхайгаас эргэснээс түрүү магнайд Баянхонгор аймгийн Баацагаан сумын уугуул Аймгийн алдарт уяач Сүрэнжавын Энхтөрийн Дүүгүүр хээр морь хурдаллаа.

Аман хүзүүнд Говь-Алтай аймгийн Халиун сумын уугуул Монгол улсын Манлай уяач Гантөмөрийн Чинзоригийн цавьдар морь, гуравт Завхан аймгийн Тосонцэнгэл сумын уугуул Монгол улсын Тод манлай уяач Төмөрбаатарын Ууганбаярын цавьдар морь тус тус давхилаа.

Үндэсний их баяр наадмын нээлтийн талаар ерөнхий найруулагч Н.Наранбаатар сэтгүүлчдэд мэдээлэл өгөв.

Үндэсний их баяр наадмын өдрүүдэд Хүй долоо худагт “Цагдаагийн түр хүрээ” байгуулагдсан бөгөөд үүнд цагдаа, дотоодын цэргийн 1000 гаруй алба хаагч хэв журмын хамгаалалт, зохицуулалт хийж байна.

Цагдаагийн албан хаагчид Хүй долоо худагт байрлан ажиллаж байгаа бөгөөд наадамчин олон, уяачид, үйлчилгээ үзүүлж буй байгууллагын алба хаагч нарын аюулгүй байдлыг хамгаалах, гэмт хэрэг, зөрчлөөс урьдчилан сэргийлэх зорилгоор эргүүл хийж байгаа аж.

Мөн хурдан морьдыг шүдлэх, хурдан морьд гараанаас барианд орох зайнд гадны машин, иргэд нэвтрэхээс урьдчилан сэргийлэн ажиллаж байна. Одоогийн байдлаар Хүй долоо худагт ямар нэгэн гэмт хэрэг, зөрчил илрээгүй хэмээн ЦЕГ-ын Хэвлэл мэдээллийн төвийн чиглэлийн ахлах мэргэжилтэн, Цагдаагийн хошууч Б.Дэлгэрхангай мэдээллээ.