Month: July 2022
Улсын баяр наадамтай холбоотойгоор аялал, амралтын бүсэд зорчих хөдөлгөөн эрс нэмэгдсэн тул цагдаагийн байгууллагаас цагийн менежментээр хяналт шалгалтыг зохион байгуулж буй.
Өнөөдөр буюу долдугаар сарын 11-ний өдөр тээврийн хэрэгслийн зөвшөөрөгдөх хурдыг хэтрүүлсэн 415 зөрчлийг илрүүлж, газар дээр нь хариуцлага тооцсон байна.
Баяр наадмын өдрүүдэд орон нутгийн замд 50 гаруй цэгт 100 гаруй алба хаагч, мөн цагийн менежментийн 89 цэгт 185 алба хаагч, хөдөлгөөний аюулгүй байдлыг ханган замын хөдөлгөөний дүрмийн хэрэгжилтэд хяналт тавин ажиллаж байна.
Цаашид цагдаагийн байгууллагаас гарч байгаа осол хэрэг түүнээс үүдэлтэй хүний амь нас, эрүүл мэндэд учирч байгаа хохирлыг багасгахад анхаарч хурд хэтрүүлэх зөрчилд газар дээр нь хариуцлага тооцон ажиллах болно гэж Тээврийн цагдаагийн албанаас мэдээллээ.
Зөрчлийн тухай хуулийн 14.7 дугаар зүйлийн:
- 31 дэх хэсэгт Жолооч замын хөдөлгөөний дүрэмд заасан тээврийн хэрэгслийн хурдыг зөвшөөрөгдсөн дээд хязгаараас 10-50 хүртэл хувиар хэтрүүлсэн бол хүнийг тавин нэгжтэй тэнцэх хэмжээний төгрөгөөр торгоно.
- 32 дахь хэсэгт Жолооч замын хөдөлгөөний дүрэмд заасан тээврийн хэрэгслийн хурдыг зөвшөөрөгдсөн дээд хязгаараас 50-иас дээш хувиар хэтрүүлсэн бол тээврийн хэрэгсэл жолоодох эрхийг зургаан сарын хугацаагаар хасаж хүнийг тавин нэгжтэй тэнцэх хэмжээний төгрөгөөр торгоно хэмээн тус тус заажээ.
Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмын үндэсний бөхийн барилдааны гурвын даваа үргэлжилж байна. Энэ даваанд улсын арслан Э.Оюунболд өвдөг шороодлоо. Тэрээр аймгийн начин Ё.Улсболдыг амлан барилдсан юм.
Допингийн асуудалд холбогдож барилдах эрхээ хасуулаад байсан улсын арслан Э.Оюунболд наадмын өмнөх сорилго барилдаанд үзүүрлэж бэлтгэл сайтай байгаагаа харуулаад байлаа. Гэвч гурвын даваанд өвдөг шороодсон нь наадмын тааврыг эвдсэн үйл явдал боллоо
Он гарсаар арван аймгийн 17 сум, нийслэлийн таван дүүрэгт 33 хүн усанд осолдож, амь насаа алдсан бөгөөд ихэнх нь амралт зугаалгаар явж байх үедээ согтууруулах ундаа хэтрүүлэн хэрэглэсэн, бага насны хүүхдийг хараа хяналтгүй орхисноос шалтгаалжээ. Иймд Онцгой байдлын ерөнхий газар гол, мөрөн, нуурын эрэг дагуу нутаглаж буй иргэд, малчид, аж ахуйн нэгж байгууллага, аялал зугаалгаар яваа хүмүүс үер, усны аюулаас байнга сонор сэрэмжтэй байх, согтууруулах ундаа хэрэглэсэн үедээ ус руу орохгүй байх, бага насны хүүхдэд тавих хараа хяналтыг сайжруулах, зам товчлох, цаг хожих зорилгоор гүүр гарамгүй газраар гол, ус гатлахгүй байхыг онцгойлон анхааруулж байна.
Үүнтэй холбогдуулан нийслэлийн Онцгой байдлын газрын Аврах ангийн штабын дарга, дэд хурандаа Б.Гансүхтэй ярилцлаа.
-Усанд живэхгүйн тулд хамгийн түрүүнд юуг анхаарах ёстой вэ?
-Сэлж чаддаг ч гэсэн ус ихтэй томоохон гол, нууранд орж сэлэхээс сэрэмжлэх хэрэгтэй. Нэн ялангуяа согтууруулах ундаа хэрэглэсэн үедээ.
-Нэгэнт хөл алдаж живээд эхэлбэл яавал зохилтой бол?
-Тийм тохиолдолд сандарч тэвдэлгүй тайван байж, биеэ сул тавин амьсгаагаа түгжиж өөрийгөө мэдрэн усыг зөөлөн татан гаргах нь чухал.
-Усанд живсэн хүнд үзүүлэх нэн яаралтай анхны тусламж гэвэл?
-Ходоод болон уушгинд орсон усыг яаралтай гаргахын тулд хэвлий хэсгээр шахаж, хэрэв амьсгалгүй болж зүрх зогссон бол зүрхний иллэг, хиймэл амьсгалыг цаг алдалгүй тасралтгүй хийх нь зүйтэй.
-Он гарсаар 33 хүн усанд живж осолджээ. Тэдгээрийн дийлэнх нь согтууруулах ундаа хэтрүүлэн хэрэглэж амь насаа алдсан гэнэ. Үүнээс үзвэл согтуу хүн усанд живж осолдох эрсдэлийг дутуу үнэлж хайхрамжгүй болдог хэрэг үү?
-Ер нь тэгж үзэж болно. Угаасаа согтууруулах ундаа хэрэглэсэн үед ус руу ороход хүний анхаарал сэрэмж сарниж, биеэ хянах явдал алдагддагаас гадна хөл гарын шөрмөс татах, ус залгих нь элбэг тохиолддог. Тэр бүгдээс болж хөл алдаж живэх аюултай. Энд тэмдэглэхэд, хөдөө гадаа явахдаа цаг агаарын урьдчилан сэргийлэх мэдээ, сонордуулгыг тогтмол хүлээн авч байхад илүүдэхгүй.
-Амралт зугаалгаар явахдаа бага насны хүүхдүүдээ хараа хяналтгүй орхисноос усанд живсэн тохиолдол ч нэлээд гарчээ. Балчир хүүхдүүд усны аюулыг мэдэрч эмээдэггүй хэрэг үү. Ер нь хүүхдэд усанд живэх аюултайг хэрхэн ойлгуулж тайлбарлах нь зохилтой вэ?
-Иргэд гол мөрөн, нуур цөөрмийн ойролцоо амарч зугаалахдаа анхаарал болгоомжтой байж, бага насны хүүхдэдээ тавих анхаарлаа дээшлүүлэх нь маш чухал. Хүүхэд усанд живэх аюулыг мэдэрдэггүй тул үүнийг сайтар ойлгуулан байнга сэрэмжлүүлэх хэрэгтэй. Хамгийн гол нь байнгын хараа хяналттай байлгах нь зөв.
-Мөн зам товчлох, цаг хожих гээд гүүр гарамгүй газраар гол мөрөн гаталж машинтайгаа живж харамсалтайгаар амь насаа алдсан байх юм. Гүн усанд машин осолдвол хамгийн түрүүнд хэрхэн арга хэмжээ авах нь зөв бэ?
-Сүүлийн өдрүүдэд бороо хур их орсонтой холбогдуулан анхааруулахад иргэд баталгаагүй зам гарцаар гол гатлахгүй байвал зохилтой. Урьд нь усны түвшин бага байхад машинтай гаталж байсан ч гэнэт ихэссэн байх нь цөөнгүй. Иймд иргэд эд хөрөнгө болон амь насаа алдах аюултайг анхааруулж байна. Баталгаатай зам гарцаар л гарч байх хэрэгтэй.
Усархаг ширүүн борооны улмаас цөөнгүй зам, гүүр эвдрээд байгаа тул аян замд гарахдаа сонор сэрэмжтэй байж, мэргэжлийн байгууллагаас өгч буй заавар зөвлөмжийг сайтар сахин биелүүлэх шаардлагатай.
Малчид, иргэд, тээвэрчид, аялагчид, наадамчдын анхааралд:
Өнөөдөр нутгийн зүүн хагаст усархаг бороо, дуу цахилгаантай аадар бороо орох тул болзошгүй үер ус, нөөлөг салхи, мөндөр, аянга цахилгааны аюулаас сэрэмжтэй байхыг анхааруулж байна.
Ихэнх нутгаар үүлшинэ. Баруун аймгуудын нутгийн баруун, говийн аймгуудын нутгийн зүүн болон хойд хэсэг, төвийн аймгуудын нутгийн зарим газар, зүүн аймгуудын ихэнх нутгаар бороо, дуу цахилгаантай аадар бороо орно.
Салхи нутгийн зүүн өмнөд хэсгээр баруун өмнөөс баруун хойш эргэж, бусад нутгаар баруун хойноос секундэд 6-11 метр, говь, талын нутгаар секундэд 13-15 метр, борооны өмнө түр зуур ширүүснэ.
Хангай, Хөвсгөл, Хэнтийн уулархаг нутаг, Туул, Тэрэлж, Хэрлэн голын хөндийгөөр 14-19 градус, говийн бүс нутгийн баруун өмнөд хэсгээр 29-34 градус, Их нууруудын хотгор болон говийн бүс нутгийн зүүн өмнөд хэсэг, Дарьгангын тал нутгаар 24-29 градус, бусад нутгаар 18-23 градус дулаан байна.
Эх сурвалж: ЦУОШГ
Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмын гурван даваа эхэллээ.
Хэнтий аймгийн Өмнөдэлгэр сумын харьяат бөх, дархан аварга Б.Бат-Эрдэнэ энэ жилийн наадамд барилдан, монгол түмнээ баясгаж буй. Цагийг эзлэсэн их аварга тэрбээр улсын наадамд 15 жилийн дараа барилдаж буй.
Гурвын даваанд алдар цолоо дуудуулж, наадамчин олны бахархал, бахдалыг төрүүллээ. Ингэснээр Б.Бат-Эрдэнэ аварга 15 жилийн төрийн наадамд цолоо дахин дуудууллаа.
Тулгар төрийн 2230, 2231, Их Монгол Улсын 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмын өнөөдрийн хөтөлбөрийг танилцуулж байна.
Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ойн баяр наадамд улс, аймгийн аварга, арслан цолтон тэргүүлсэн хүчит 1024 бөх зодоглож байна.
Улсын баяр наадамд арван жил тутам Их Монгол Улс байгуулагдсаны болон Ардын хувьсгалын тэгш ойг давхцуулан 1024 бөх, бусад баяр наадамд 512 бөх барилддаг.
Үндэсний их баяр наадмын тухай хуульд зааснаар Улсын баяр наадамд барилдах бөх 16 насанд хүрсэн байх ёстой.
21 аймгийн баяр наадмын нэгдсэн хөтөлбөрийг танилцуулж байна.
Үндэсний их баяр наадмын хурдан морины уралдааны соёолон насанд 344 хүлэг уралдахаар бүртгүүлжээ.
Эдгээр хүлгүүдийн сэрвээний өндрийг 140 сантиметр байхаар тогтоон таван замд хэмжиж, хэмжилтийг хоёр цэгт хяналаа. Ингэснээр 300 орчим үрээ гарааны зурхай руу хөдөлж байна.
Морьд 18-20 километрийн зайд уралдана.