Month: July 2022

Долоодугаар сарын 7-10-ны өдрүүдэд зохион байгуулагдсан “Playtime” хөгжмийн фестивальд оролцсон зарим хүнийг хар тамхины хэргээр шалгаж эхэлжээ. Тодруулбал, ЦЕГ-ын Хар тамхитай тэмцэх хэлтсээс шалгалт явуулахад 20 гаруй хүн мансууруулах бодис хэрэглэсэн, хадгалсан байж болзошгүй нөхцөл тогтоогдсон байна.

Түүнчлэн, тэдний дундаас артист 168 буюу Х.Тэнгис, “Vanquish” хамтлагийн Пангасс, DJ OJ буюу О.Ганболд нар хар тамхи хэрэглэсэн нь тогтоогдсон талаар Zindaa.mn сайт мэдээлжээ.

“Playtime” фестиваль цар тахлын хоёр жилд завсарлаж, өнөө жил 20 жилийн ойгоо тэмдэглэсэн. Үүний өмнөх буюу 2019 оны фестивалийн үеэр рок хамтлагийн 19 настай гитарчин хар тамхи хэрэглэсэн нь тогтоогдож, ял авч байв.

Цагдаагийн байгууллагад энэ оны эхний зургаан сарын байдлаар мориноос унаж гэмтсэн, нас барсан нийт 23 тохиолдол бүртгэгджээ. Үүнээс эхний зургаан сарын хугацаанд 10 хүүхэд хурдан морины үсэргээ сунгааны үед унаснаас гэмтсэн зургаа, нас барсан дөрөв, бусад 13 тохиолдлын найм нь нас барсан, таван хүүхэд гэмтсэн байна.

Тухайлбал зарим хүүхдийн хувьд малдаа явж байхдаа, эмнэг сургасан, моринд өшиглүүлсэн зэрэг ахуйн хүрээнд гэмтэж бэртжээ.

Энэ жилийн баяр наадмын өдрүүдэд Хүй долоон худагт хурдан морины уралдааны үед мориноос хоёр хүүхэд унаж гэмтэн ГССҮТ-д хүргэгдсэн хэмээн Нийслэлийн Цагдаагийн Удирдах Газраас мэдээллээ.

Малчид, иргэд, тээвэрчид, аялагчидын анхааралд: Өнөө маргаашдаа төв болон зүүн аймгуудын нутгаар, ялангуяа Төв аймаг, Хэнтий, Дорнодын нутгаар ахиухан хэмжээний бороо, дуу цахилгаантай аадар бороо орох тул болзошгүй мөндөр, нөөлөг салхи, аянга цахилгаан, үер усны аюулаас сэрэмжтэй байхыг анхааруулж байна.

2022 оны 07-р сарын 15-ны 20 цагаас 07-р сарын 16-ны 20 цаг хүртэлх
цаг агаарын урьдчилсан мэдээ

Хур тунадас: Нутгийн зүүн хагаст үүлэрхэг, бусад нутгаар солигдмол үүлтэй. Шөнөдөө төвийн аймгуудын нутгийн зүүн, говийн аймгуудын нутгийн хойд хэсэг, зүүн аймгуудын ихэнх нутгаар, өдөртөө баруун аймгуудын нутгийн хойд, төвийн аймгуудын нутгийн зүүн хойд хэсэг, зүүн аймгуудын ихэнх нутгаар бороо, дуу цахилгаантай аадар бороо орно. Бусад нутгаар бороо орохгүй.

Салхи: Нутгийн зүүн хагаст баруун өмнөөс хойш эргэж, бусад нутгаар баруун хойноос секундэд 6-11 метр, говь, тал, хээрийн нутгаар секундэд 13-15 метр, борооны өмнө түр зуур ширүүснэ.

Агаарын температур: Дархадын хотгор болон Алтай, Хангай, Хөвсгөлийн уулархаг нутаг, Хүрэнбэлчир орчим, Завхан голын эх, Идэр, Тэс, Эг, Үүр голын хөндийгөөр 1-6 хэм, Алтайн өвөр говь болон говийн бүс нутгийн зүүн хэсэг, Дорнод-Дарьгангын тал нутаг, Халх голын хөндийгөөр 15-20 хэм, бусад нутгаар 8-13 хэм, өдөртөө Дархадын хотгор болон Монгол-Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Туул, Тэрэлж, Хэрлэн голын хөндийгөөр 16-21 хэм, Их нууруудын хотгор болон говийн бүс нутгийн өмнөд хэсгээр 28-33 хэм, бусад нутгаар 22-27 хэм дулаан байна.

УЛААНБААТАР ХОТ ОРЧМООР: Үүлэрхэг. Шөнөдөө бороо, өдөртөө бага зэргийн бороо орно. Салхи шөнөдөө баруун өмнөөс баруун хойш эргэж, өдөртөө баруун хойноос секундэд 6-11 метр, борооны өмнө түр зуур ширүүснэ. Шөнөдөө 11-13 хэм, өдөртөө 19-21 хэм дулаан байна.

БАГАНУУР ОРЧМООР: Үүлэрхэг. Шөнөдөө бороо, өдөртөө бага зэргийн бороо орно. Салхи шөнөдөө баруун өмнөөс баруун хойш эргэж, өдөртөө баруун хойноос секундэд 6-11 метр, борооны өмнө түр зуур ширүүснэ. Шөнөдөө 11-13 хэм, өдөртөө 18-20 хэм дулаан байна.

ТЭРЭЛЖ ОРЧМООР: Үүлэрхэг. Шөнөдөө бороо, өдөртөө бага зэргийн бороо орно. Салхи шөнөдөө баруун өмнөөс баруун хойш эргэж, өдөртөө баруун хойноос секундэд 6-11 метр, борооны өмнө түр зуур ширүүснэ. Шөнөдөө 8-10 хэм, өдөртөө 17-19 хэм дулаан байна.

2022 оны 07 дугаар сарын 17-ноос 07 дугаар сарын 21-нийг
хүртэлх цаг агаарын урьдчилсан төлөв

17-нд баруун болон төвийн аймгуудын нутгийн хойд хэсэг, зүүн аймгуудын нутгийн зүүн хэсгээр, 18-нд баруун аймгуудын нутгийн хойд хэсэг, төвийн аймгуудын нутгийн зарим газар, зүүн аймгуудын нутгийн зүүн хэсгээр, 19-нд баруун аймгуудын ихэнх нутаг, төвийн аймгуудын нутгийн баруун хэсгээр, 20-нд баруун болон төвийн аймгуудын нутгийн зарим газраар бороо, дуу цахилгаантай аадар бороо орно. Салхи ихэнх хугацаанд секундэд 6-11 метр, 18-нд баруун аймгуудын нутгийн зарим газраар секундэд 15-17 метр, бусад хугацаанд зарим газраар борооны өмнө түр зуур ширүүснэ. Монгол-Алтайн уулархаг нутгаар шөнөдөө 0-5 хэм, өдөртөө 13-18 хэм, Дархадын хотгор, Алтай, Хангай, Хөвсгөл, Хэнтийн уулархаг нутаг, Хүрэнбэлчир орчим, Туул, Тэрэлж голын хөндийгөөр шөнөдөө 3-8 хэм, өдөртөө 16-21 хэм, говийн бүс нутгийн өмнөд хэсгээр шөнөдөө 18-23 хэм, өдөртөө 30-35 хэм, бусад нутгаар шөнөдөө 9-14 хэм, өдөртөө 23-28 хэм дулаан байна.