Шинжлэх ухааны академийн Физик Технологийн Хүрээлэн болон МУИС-ийн Физикийн тэнхимийн дэмжлэгтэйгээр “Бүдэг цэнхэр цэг”, “Quantum Mongolia Podcast”, “Gej Yu Ve?” шинжлэх ухаан сонирхогчдын хүрээллүүд хамтран “Хигс Бозон” олон нийтэд зориулсан шинжлэх ухаан, танин мэдэхүйн өдөрлөгийг зохион байгуулсан юм.
Тус өдөрлөг нь “Онолын физикийн зуны сургууль, бага хурал-2022” үйл ажиллагааны үргэлжлэл бөгөөд олон нийтэд зориулсан хэсэг нь юм. Өдөрлөгөөр Хигс бозон бөөмийг нээсний 10 жилийн ойд зориулан салбарын мэргэжилтэн, судлаач эрдэмтэд мэдлэг, туршлагаасаа хуваалцлаа.
Өдөрлөгийн талаар “Gej Yu Ve?” сувгийн хамтран үүсгэн байгуулагч Б.Ганцацралаас тодрууллаа.
-Энэ өдөрлөгийн онцлог, зорилго юу вэ?
-Онолыг гаргасан хүнийх нь Хигс гэж нэрлэсэн. Хигс бозоныг нээсний 10 жилийн ойд зориулан шинжлэх ухаан сонирхогчдын өдөрлөг болж байна. Электроноос жижиг мөртлөө электрон дотор байгаа жижиг зүйлсийг масстай болгож байгаа зүйлийг нээж туршилтыг бодитоор баталсны 10 жилийн ой гэсэн үг.
-Хигс бозон гэж яг юу болох талаар тайлбарлаж өгөөч?
-Атом электрон протоныг задлахаар жижиг эгэл бөөмс бий. Эйнштейн “Масс нь энергитэй тэнцүү” гэж үздэг. Тэгэхээр энергитэй биетүүдийг хигс бозон гэдэг зүйл масстай болгодог. Цөмийн физикийн эгэл бөөмсийн нэг болох Хигсийн бозоныг 1964 онд Петр Хигс болон бусад таван физикч анх таамаглаж тодорхойлсныг 2012 оны долдугаар сарын 4-нд Швейцарийн Цөмийн Хурдасгуурын олон улсын эрдэмтдийн багийнхан баталж зарласан. Энэ нээлтээр Стандарт Загварыг судлахад чухал ач холбогдолтой Хигсийн орчин үнэхээр оршдог болохыг баталж цаашлаад яагаад зарим үндсэн эгэл хэсгүүдийн симметрийн харилцаагаар массгүй нь ажиглагддаг боловч масстай байдаг, яагаад сул хүч нь цахилгаан соронзон хүчнээс богино үйлчлэлийн зайтай байдгийг илүү тайлбарлах боломжууд гарна гэсэн үг.
-Яг юуг судалдаг юм бэ?
-Хигс бозон бөөмийг “Бурханы бөөм” гэж хочилдог. Тэгэхээр Эйнштейний масстай биеэс энерги, энергитэй биеэс масстай биеийг үүсгэж болно гэсэн томьёо байдаг. Цөмийн энерги нь маш их хэмжээний энергийг цөмийн харилцан үйлчлэлээс гаргаж авдаг. Тэгээд цөмийн зэвсэг, цөмийн цахилгаан станцыг бүтээж байна. эсрэгээрээ ертөнц анх үүсэхэд ямар нэг масстай биет огт байгаагүй, их тэсрэлтийн онолоос бүх зүйл үүссэн гэж ярьдаг шүү дээ. Массгүй энергүүд яаж явж байгаад масстай болоод биет болчихов гэдгийг судалсан. Гэтэл бурхны бөөм буюу хигс бозон гэдэг нь энергийг масстай болгож, элементүүдийг бүрдүүлдэг зүйл юм байна гэж тогтоосон.
-Хаана?
-CERN гэдэг бидний ашиглаж буй интернэт, анхны вэб хуудас хийгдсэн газар. Швейцарь болон Францын хил дээр хил залгаа оршдог судалгааны төв. Тэнд дэлхийн хамгийн том физикчид очиж судалгааны ажлуудаа хийдэг. Дэлхийн II дайны үед эрдэмтэд шоконд орж л дээ. Тэдний гаргаж ирсэн судалгааг цөмийн зэвсэг, химийн биологийн зэвсэг хийх гэх мэт муу зүйлд ашиглаад байсан. Тэгэхээр эрдэмтэд шинжлэх ухаан гэдэг зүйлийг өөр талаас нь ашиглах хэрэгтэй гээд ихэвчлэн европын орнууд хоорондоо нэгдэж 23 орноос бүрдсэн судалгааны төвийг 1954 онд байгуулсан. Судалгааны төв нь газар дор 100 метрийн гүнд 27км-ийн радиустай хоолой байгуулж дотор нь жижиг электрон, протоныг мөргөлдүүлсэн. Мөргөлдүүлснээр дотор нь бүрдүүлдэг эгэл бөөмсийг гаргаж авдаг. 2012 оноос өмнө хигс бозон гэдэг нь онолын түвшинд яригддаг байсан зүйл.
Бээжингийн Их Энергийн физикийн хүрээлэн, CERN LHCB-ын эрдэм шинжилгээний ажилтан Ц.Баасансүрэн “Хигсийн физик шинж чанаруудыг олоод сонин болгож гаргахад ойролцоогоор 10 тэрбум швейцарь франкийн төсөв гардаг. Хигсийн шинж чанар, массын талаар хоёр сонин хэвлүүлэхийн тулд 10 тэрбум швейцарь франк зарцуулсан гэсэн үг. Суурь судалгааны салбар учраас үүнийг дагаад дам бус байдлаар маш олон салбарыг хөгжүүлж байна. Хонгилын дор 1230 орчим хагас дамжуулагч, соронзон орон байгаа” гэж ярив.
Биднийг атом, цөмүүд бүрдүүлдэг. Тэр атом, цөмүүд бүтэцтэй. Эгэл бөөм гэдэг бүтцийг үүсгэж байгаа хамгийн жижиг нэгж. Бидний мэддэг элементүүдийг үүсгэхэд шаардлагатай бөөмсийн хамгийн бага нэгжийг эгэл бөөмс гэдэг аж. Ертөнцөд байгаа бүх электрон яг адилхан масстай, тэднийг ялгахын аргагүй. Олон төрлийн масстай электрон гэж байдаггүй. Атомын цацаж байгаа гэрэл бүгд адилхан. Ертөнцийг бүтээж байгаа эгэл бөөмс яг ижил, хаа сайгүй оршдог байна.
Хигс бозоныг баталсны ач холбогдлын талаар ШУА-ийн Физик технологийн хүрээлэн ба их энергийн физикийн лабораторийн эрхлэгч, доктор Ц.Энхбат “Шинэ юмыг нээхийн тулд шинэ багаж хэрэгтэй. Шинэ технологийн үсрэлт болох ёстой. Тэндээс гарах мэдээллийг боловсруулах асар том сүлжээ хэрэг болно. Жишээлбэл, хүн төрөлхтөн хөгжлийнхөө машин техник нээхээс өмнөх үед байна гэж бодъё. Зөвхөн морин тэргээр явдаг ч юм уу, тэр үед бид шинэ технологи нээхгүйгээр зогсчихсон бол илүү сайн морин тэрэг хийгээд л болино шүү дээ. Тэгэхээр бид одоо хэрэггүй гэж бодож байгаа ч ирээдүйг мэдэхгүй. Тэр үед юуг ч өөрчлөхийг таашгүй. Шинжлэх ухааны фронтыг хөдөлгөсөн нь өөрөө хөгжил юм” хэмээв.