Нийслэлийн Засаг даргын захирамжийн хүрээнд иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, заасан байршилд гарааш буулгаж, нийтийн зориулалтаар тохижуулах ажлууд үргэлжилж байна. Тухайлбал, Баянзүрх дүүргийн 25 дугаар хорооны байрны замын эсрэг талын 24 гараашийг буулгаж, газрыг чөлөөлөн, нийтийн зориулалтаар тохижууллаа.

Тус 126.2 ам метр талбайд авто зогсоол, явган хүний зам, сандал, сүүдрэвч хийж, гэрэлтүүлэг суурилуулан, хогийн сав байршуулжээ.

Эх сурвалж: Нийслэлийн сургалт, судалгаа, олон нийттэй харилцах газар

Архангай аймгийн Тариат сумын Тэрх багийн Цагаан-Овоо гэдэг газарт сумын төвөөс баруун хойд зүгт Завхан аймгаас Улаанбаатар хотын чиглэлд зорчиж явсан автобус шатсан тухай мэдээллийг өчигдрийн 13:29 цагт онцгой байдлын албаныхан хүлээн авчээ.

Улмаар тус аймгийн Онцгой байдлын газрын Гал түймрийн улсын хяналтын байцаагч, Тариат сум дахь Цагдаагийн хэсгийн мөрдөгчид мөн өдрийн 17:50 цагт тухайн газарт очиж, нөхцөл байдалтай танилцсан байна. “Аэробус” загварын аяллын зориулалтаар тохижуулсан автобус шатсан байжээ.

Тухайд үед зорчиж явсан найман хүн автобуснаас буусан байсан хэмээн Онцгой Байдлын Ерөнхий Газраас мэдээллээ.

Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн Г.Отгонтамир баяр наадмын өдрүүдэд хурд хэтрүүлсэн жолооч нарын талаар мэдээлэл өглөө.

Энэ сарын 9-ны өдрөөс 18-ны өдөр хүртэл 988 жолооч орон нутгийн замд хурд хэтрүүлсэн зөрчил гаргажээ.

Зөрчлийг газар дээр нь цагдаагийн албан хаагч нар зохицуулсан бөгөөд 120-164 км/ц хурд хэтрүүлсэн 28 жолооч жолоодох эрхээ хасуулсан байна.

Мөн нийслэлд хүний амь эрсэдсэн осол бүртгэгдээгүй. Харин орон нутагт зургаан хүний амь эрсэджээ. Үүний гол шалтгаан нь жолооч нар хурд хэтрүүлж, гүйцэж түрүүлэх үйлдэл гаргаж байгаа явдал гэдгийг албаныхан хэлж буй юм.

Ерөнхий сайд Л.Оюун-Эрдэнэ энэ сарын 16-17-нд Баян-Өлгий аймагт ажиллалаа. Тэрээр өчигдөр Баян-Өлгий аймгийн Сагсай сумын нутаг дэвсгэрт байрлах Даянгийн боомтын үйл ажиллагаатай танилцлаа.

“Шинэ сэргэлтийн бодлого”-ын Боомтын сэргэлтийн хүрээнд Ерөнхий сайд Л.Оюун-Эрдэнийн ажиллаж буй 10 дахь боомт Даян юм. Даян боомт 1992 онд нээгдэж, БНХАУ-ын Шинжаан Уйгурын өөртөө засах орны Алтай аймгаас цемент, барилгын материал, жимс жимсгэнэ зэрэг 10 гаруй төрлийн бараа бүтээгдэхүүн нэвтрүүлж байсан ч 2010 оноос хойш үйл ажиллагаа нь доголдож ажиллаагүй байна.

Ерөнхий сайд Л.Оюун-Эрдэнэ тус боомтод ажиллах үеэрээ “Даянгийн боомт Шинжаан Уйгурын өөртөө засах оронтой хиллэдэг учраас эдийн засгаа тэлэх тэр дундаа аялал жуулчлал хөгжүүлэх боломжтой бүс нутаг. 1992 оноос тус боомтоор барилгын материал нэвтрүүлэхээс эхлээд эдийн засгийн томоохон урсгалууд чиглэж байсан ч дэд бүтцийн тал дээр бид хангалттай хөрөнгө оруулж чадаагүйгээс төдийлөн сайн хөгжөөгүй. БНХАУ Даян боомттой хиллэдэг талаасаа авто замаар холбочихсон байгаа. Өлгий сумаас Даянгийн боомт хүртэл 180 орчим километр. Шинэ сэргэлтийн бодлогын хүрээнд Цагааннуур, Даянгийн боомтыг авто замаар холбохоор ажиллаж байна. Энэ бол баруун босоо тэнхлэгийн Шивээхүрэн Арцсуурь төмөр замын наад талд Баян-Өлгий аймгийн хамгийн богино хугацаанд гурван улсыг холбосон авто замын боомт болох юм. Баруун бүс нутагт өргөн хэрэглээний бараа бүтээгдэхүүний үнэ нийслэл хоттой харьцуулахад өндөр байдаг. Боомтуудыг авто замаар холбосноор өрсөлдөх чадвар сайжирч, эдийн засгийн болоод стратегийн хувьд туйлын чухал ач холбогдолтой болно” гэлээ.
Цагааннуур, Даянгийн боомт авто замаар холбогдсоноор гурван улсын ачаа тээврийн коридор үүсэж, Новосибирскээс дөрөв хонож ирдэг ачаа тээврийн машин нэг хоногт ирэх боломж бүрдэх юм байна.

Завхан аймгийн Тэлмэн сумын Нуур багийн Их шийрийн дөрвөлж гэх газар гэр бүлийн 12 хүн аялж явснаас хоёр том хүн, нэг хүүхэд Тэлмэн нуурын усанд сэрүүцэх гэж ороод живж нас баржээ.

Ашигт малтмал, газрын тосны газраас мэдээлснээр, улсын хэмжээнд 2022 оны долдугаар сарын 15-ны өдрийн байдлаар дунджаар А-80 автобензиний 51 хоног, АИ-92 автобензиний 36 хоног, АИ-95 автобензиний 39 хоног, дизель түлшний 24 хоног, ТС-1 онгоцны түлшний 15 хоногийн ердийн хэрэглээтэй тэнцэх үлдэгдэл, нөөцтэй байна.

Монгол Улсад 2022 оны нэгдүгээр сараас долдугаар сарын 8-ны хугацаанд нийт 946.3 мянган тонн газрын тосны бүтээгдэхүүн импортолсны 872.3 мянган тонн шатахуун аж.

Үүнээс А-80 автобензин 19.7 мянган тонн, Аи-92 автобензин 314.8 мянган тонн, Аи-96/98 автобензин 15.3 мянган тонн, ДТ 472.9 мянган тонн, ШШТ 20.6 мянган тонн, ТС-1 онгоцны түлш 28.7 мянган тонн тус тус импортолсон байна.

Баяр, амралтын өдрүүд буюу энэ сарын 08-18-ны өдрүүдэд төв, орон нутгийн онцгой байдлын байгууллагын алба хаагчид аюулт үзэгдэл, ослын 36, объектын гал түймрийн 39, нийт 75 удаагийн дуудлагаар 17 иргэний амь насыг авран хамгаалж, 120 гаруй иргэнд тусламж үйлчилгээ үзүүлж, аюулгүй байдлыг ханган ажилласан байна. Гал түймэр, аюулт үзэгдэл, ослын улмаас нийт 29 хүн /24 том хүн, 5 хүүхэд/ нас барж, 15 хүн /8 том хүн, 7 хүүхэд/ гэмтэж бэртжээ.

Тодруулбал, баяр, амралтын өдрүүдэд объектын гал түймэр, усны осол, зам тээврийн ослын дуудлагууд зонхилж, төв, орон нутгийн онцгой байдлын байгууллагын алба хаагчид усны ослын 18 удаагийн дуудлагаар амь насаа алдсан 21 иргэнийг эрэн хайх ажиллагааг зохион байгуулан, 20 иргэний цогцсыг олж цагдаагийн байгууллагад хүлээлгэн өгсөн бол нэг иргэнийг эрэн хайх ажиллагаа үргэлжилж байна. Эдгээр иргэдийн 18 нь том хүн, 3 нь хүүхэд байгаа юм.

Зам тээврийн ослын 5 удаагийн дуудлагаар ажиллаж, автомашины төмөр хийцэд хавчуулагдан амь насаа алдсан 2 иргэний цогцсыг гарган цагдаагийн байгууллагад, бэртэж, гэмтсэн 15 иргэний амь насыг авран хамгаалж, анхны тусламж үзүүлэн эмнэлгийн байгууллагад шилжүүлэн өгсөн байна.