Month: July 2022

Жил бүр уламжлал болгон зохион байгуулдаг залуу монгол судлаачдын зуны сургууль эхэллээ. Зуны сургууль нь ирээдүйн залуу судлаачдыг монгол ахуй орчинтой танилцуулж, хэл соёлын амьд харилцааны дунд сургах зорилготой юм. Энэ нь монгол судлалын залгамж холбоог бэхжүүлэх зорилтыг хэрэгжүүлэхэд бодит үр дүн болох аж. 2022 оны залуу монгол судлаачдын зуны сургуульд Орос, Америк, Герман, Польш, Чех, Хятад, Турк, Япон, Лаос, Мозанбик, Тайвань зэрэг 10 улс, 1 орны 17 их сургууль, судалгааны төвөөс 30 залуу судлаач, оюутнууд оролцож байна.

Энэ удаагийн зуны сургуулийг монгол ахуй, монгол судлалын сургалт-эрдэм шинжилгээний төв гэсэн хоёр өөр орчинд зохион байгуулж буй. Залуу судлаачид хөдөө малчны ахуй амьдралын дунд монгол бичгийн хэл, монгол ярианы хэл, монгол ахуйтай танилцах хичээлийг үзэхээс гадна Улаанбаатар хотод Шинжлэх Ухааны Академи, Монгол Улсын Их Сургууль зэрэг монгол судлалын сургалт-эрдэм шинжилгээний гол төв болон гадаадын монгол судлаач нэртэй эрдэмтдийн лекцийг сонсоно. Монгол судлаачид бол монгол орон, монголчуудын тухай шинжлэх ухааны үндэслэлтэй бодит мэдээллийг түгээж, биднийг дэлхий ертөнцтэй зөв замаар холбох чухал гүүр нь болдог байна. Гадаад орнуудад монгол судлалыг хөгжүүлэх, хамрах хүрээг өргөжүүлэх чиглэлээр төрөөс тодорхой бодлого боловсруулж, үе шаттайгаар хэрэгжүүлж байгаа нь бодит үр дүнгээ өгч буй. Цаашид монгол судлалын тодорхой чиглэлээр суралцах хүсэлтэй гадаадын оюутан залуусыг Монгол улсын их сургуулиудад тэтгэлгээр суралцуулах, магистрант докторант нарыг богино хугацааны мэргэжил дээшлүүлэх тэтгэлэгт хамруулах зэрэг ажлыг төлөвлөж байна гэж Боловсрол, шинжлэх ухааны яамнаас мэдээллээ

Монголын дугуйн холбооноос стандартын шаардлага хангасан дугуйн зогсоолыг Тусгаар тогтнолын ордны өмнөх талбайд барьж угсарсан байна.

Тус холбоо ийнхүү дугуйн зогсоол барьж бусад компаниуд, нийслэлийн удирдлагууд, үйлчилгээний газруудад сурталчлан таниулж дугуйтай иргэдийн эрх ашгийг хамгаалж ажиллаж байгаа аж.

Түүнчлэн дугуйн холбооны дэргэдэх шигшээ багийн тамирчид олон улсын тэмцээнээс хүрэл медаль хүртжээ. ОУХМ С.Түмэндэмбэрэлээр ахлуулан долдугаар сарын 9-10-нд Азербайжаны нийслэл Баку хотноо болсон олон улсын тэмцээнд амжилттай оролцон хүрэл медаль хүртсэн байна.

Уг тэмцээнд найман орны 14 багийн 79 тамирчид хоёр өдөр өрсөлдөж, уулын бөөн гараат 71 км-ийн уралдаанд ОУХМ Б.Идэрболд хүрэл медалийн эзэн болж мөн багийн дүнгээр гуравдугаар байрт орж багаараа хүрэл медаль хүртлээ хэмээн Монголын дугуйн холбооноос мэдээллээ.

Долоодугаар сарын 23, 24-ний өдрүүдэд Тээврийн цагдаагийн албаны жижүүрийн шуурхай удирдлагын хэлтэст зам тээврийн ослын шинжтэй нийт 389 дуудлага мэдээллийг бүртгэжээ.

Бүртгэгдсэн зам тээврийн ослын улмаас нийслэл 2, орон нутагт 5 хүн гэмтэж бэртжээ. Ноцтой зам тээврийн ослын улмаас 4 хүний амь хохирсны 1 нийслэлд, 3 орон нутагт бүртгэгдсэн байна.

Хүн гэмтсэн ослыг хэлбэрээр нь авч үзвэл:

Нийслэлд:

• Явган зорчигч мөргөх хэлбэрээр 2 осол бүртгэгдэж, 2 хүн гэмтсэн,
• Мөргөлдөх хэлбэрээр 1 осол бүртгэгдэж, 1 хүний амь хохирсон,

Орон нутагт:

• Онхолдох хэлбэрээр 5 осол бүртгэгдэж, 3 хүн гэмтэж, 2 хүний амь хохирсон.
• Мөргөлдөх хэлбэрээр 2 осол бүртгэгдэж, 2 хүн гэмтсэн,
• Машин дээрээс унах хэлбэрээр 1 осол бүртгэгдэж, 1 хүүхдийн амь хохирсон.
• Амралтын өдрүүдэд хүүхэд өртсөн 4 осол бүртгэгдэж, 3 хүүхэд гэмтэж, 1 хүүхдийн амь хохирсон байна.

Дээрх хүүхдүүдийн 1 явган зорчигч хэлбэрээр хөдөлгөөнд оролцсон бол 2 нь мотоцикл жолоодож бие даан хөдөлгөөнд оролцох үедээ онхолдох, мөргөлдөх байдлаар гэмтэж бэртэж, 1 хүүхэд машины тэвшин дээр явах үедээ унаж амь хохирсон байна. Насны хувь 8-17 насны хүүхдүүд байна.

Амралтын өдрүүдэд хүн гэмтсэн 11 осол хэрэг бүртгэгдсэний 6 мотоцикл хэрэглэсэн үедээ хөдөлгөөний аюулгүй байдлыг хангаагүйн улмаас эрүүл мэнд, амь насаа алдсан байна.

Эцэг эхчүүд та бүхэн хүүхдээ тавих хараа хяналтыг сайжруулах 10 хүртэлх насны хүүхдийг бие даан хөдөлгөөнд оролцуулахгүй байхыг анхааруулж байна.

Хүүхдийг тээврийн хэрэгсэлд авч явахдаа аюулгүй байдлыг ханган, хүүхдийг урд суудалд өвөр дээрээ авч суухгүй байх, арын суудалд зориулалтын суудалд тээвэрлэх, хүүхдийн өндөр 140 см-ээс дээш бол суудлын бүсийг зүүлгэн хүүхдийн аюулгүй байдлыг хангахыг цагдаагийн байгууллагаас та бүхэнд зөвлөж байна.

Гудамж замд зохион байгуулсан хяналт, шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 267 зөрчил бүртгэгдсэний нийслэлд 197, орон нутагт 70 зөрчил тус тус илрүүлж, учирч болох эрсдэлээс урьдчилан сэргийлэн ажилласан.

Архи согтууруулах ундааны төрлийн зүйл хэрэглэсэн бол тээврийн хэрэгсэл жолоодохгүй байхыг цагдаагийн байгууллагаас анхааруулж байна.

Орон нутгийн замд хөдөлгөөнд оролцохдоо тээврийн хэрэгслийн бүрэн бүтэн байдлыг хангах, хэт их ядарсан хүнээр тээврийн хэрэгсэл жолоодуулахгүй байх, зам орчны байдалд хурдаа тохируулах, өөрийн болон зорчигчийн суудлын бүсийг зүүж, хүүхдийг зориулалтын суудалд суулгаж хэвшихийг цагдаагийн байгууллагаас анхааруулж байна.

Зоонозын Өвчин Судлалын Үндэсний Төв (ЗӨСҮТ), Увс аймгийн ЗӨСТ, ОХУ-ын Эрхүү хотын Сибирь, Алс дорнодын тарваган тахал эсэргүүцэн судлах эрдэм шинжилгээний хүрээлэнгийн мэргэжилтүүдээс бүрдсэн баг зургаадугаар сарын 29-нөөс долдугаар сарын 14-ний хооронд тарваган тахлын голомтод тандалт судалгаа хийлээ.

Тодруулбал, Увс аймгийн Бөхмөрөн, Сагил сум, хил орчмын нутагт хийсэн тандалт судалгааны үр дүнд тарваган тахлын үүсгэгч илэрч, дээрх сумдын нутаг дахь тарваган тахлын байгалийн голомтын идэвх нэмэгдсэн, тархвар судлалын эрсдэл үүсэх магадлалтай байгааг тогтоов.

Увс аймгийн ЗӨСТ нь аймгийн төвийн эрсдэлтэй бүлгийн хүн амыг тарваган тахал өвчний эсрэг дархлаажуулалтад хамруулж, боом, тарваган тахал өвчний санамж материалыг тараажээ.

Тарваган тахал өвчнөөс урьдчилан сэргийлэх дараах зөвлөмжийг өгч байна.

• Тарваганы түүхий эдийг уламжлалт эмчилгээний зорилгоор хэрэглэхгүй байх
• Тарвага агнахгүй махыг нь идэхгүй байх
• Тарваган тахлын вакцинд хамрагдах
• Тарваганы сэг зэм болон үхэж байгаа тарвагатай тааралдвал харьяа газрын Эрүүл мэндийн төвд яаралтай мэдэгдэхийг зөвлөлөө.

Эх сурвалж: Увс аймгийн ЗӨСҮТ

Зэвсэгт Хүчний Жанжин Штабаас цаг үеийн асуудлаар мэдээлэл хийж байна.

Тус штабын Хэвлэл мэдээллийн албаны дарга, хурандаа Б.Отгонбаяр “Зэвсэгт хүчний 167 дугаар ангийн хугацаат цэргийн алба хаагч амиа алдсан хэрэгт холбогдуулан тус ангийн захирагч болон захирагчийн нэгдүгээр орлогчийг албан тушаалаас нь чөлөөллөө.

Талийгаачийн нас барсан шалтгааныг тодруулахаар Өмнөговь аймгийн цагдаагийн газарт тус хэргийг шалгаж байгаа учир дэлгэрэнгүй мэдээлэл өгөх боломжгүй.

Талийгаачийн ойр дотнынхон, ар гэрийнхэнд дахин гүн эмгэнэл илэрхийлье” гэлээ.

Цэцэрлэгийн хүртээмжийг сайжруулах ажлын хэсэг амралтын өдрүүдэд Баянгол дүүрэгт ажиллажээ. Тус дүүрэг цэцэрлэгийн насны 21,200 хүүхэдтэй. Үүнээс 17,500 хүүхэд тогтмол цэцэрлэгт хамрагдаж байгаа бол 6,000 гаруй хүүхэд цэцэрлэгийн гадна үлддэг байна.

Зургаадугаар сараас хойш өнөөдрийг хүртэл хугацаанд ажлын хэсэг ажиллаж 4,500 хүүхдийг нэмэлтээр цэцэрлэгт хамруулах боломжийг бүрдүүлсэн байна. Үлдэж байгаа 1,500 хүүхдийн асуудлыг хэрхэн шийдвэрлэх талаар зөвлөлдөж, цэцэрлэгийн зориулалтаар ашиглаж болох барилгуудын эзэдтэй уулзжээ. Ингэснээр долоон барилга түрээслэн 750 хүүхдийг цэцэрлэгт хамруулах шийдэлд хүрсэн тухай БШУЯ-наас мэдээллээ.

Тус дүүргийн тухайд цэцэрлэгийн хүртээмжийг сайжруулах, түгжрэл бууруулах гэсэн хоёр том асуудлыг хамтад нь шийдвэрлэнэ гэж тооцоолжээ. Тиймээс хотхон дотор нь цэцэрлэг байгуулах түрээсийн байр түлхүү хайж байгаа аж.

Баянгол дүүрэгт:

1. Төмөр замын бүс
2. 10 дугаар хорооллын замын урд хэсэг
3. Хархорин зах орчим буюу Эрин хороолол
4. Алтай хотхон
5. Нарны хороолол зэрэг газарт цэцэрлэгийн хүртээмж муу байна.