2024 онд Францын нийслэл Парис хотноо болох зуны олимп, паралимпийн наадмыг зохион байгуулах хорооноос наадмын албан ёсны уриаг танилцууллаа.

“Парис-2024” наадмын уриагаар англи хэлээр “Games wide open” /үгчилбэл “Өргөн дэлгэр нээлттэй наадам” эсвэл “Хүн бүрд нээлттэй наадам”), франц хэлээр “Ouvrons grand les jeux” (үгчилбэл “Наадмыг өргөн дэлгэр нээцгээе”) гэсэн хэллэгийг сонгожээ.

ОУОХ-ны тэргүүн Томас Бах уриаг танилцуулсантай холбогдуулан мэдэгдэхдээ, “Энэхүү урианаас наадмын загварыг 2020 оны олимпын хөтөлбөрт нийцүүлэн шинэчилж, аль болох олон хүнд нээх Парисын хүсэл эрмэлзэл тодорхой харагдаж байна. Сена мөрний эрэг дээрх нээлтийн ёслол, хот даяарх алдартай газруудад зохиогдох тэмцээн уралдаан, Парисын үйл ажиллагаа нь хүмүүсийг биечлэн төдийгүй цахимаар нэгтгэх болно” гэсэн байна.

Зуны олимпын наадам Парис хотноо 2024 оны долоодугаар сарын 26-наас наймдугаар сарын 11-ний өдрүүдэд болох бол паралимпын наадмыг наймдугаар сарын 28-наас есдүгээр сарын 8-ны хооронд зохион байгуулна.

“Даншиг наадам Хүрээ цам 2022” шашин соёлын наадмыг наймдугаар сарын 6,7-нд Хүй долоон худагт зохион байгуулахаар болжээ. Даншиг наадам нь анх 1639 онд Өндөр гэгээн Занабазарыг Монгол түмний шашны тэргүүн, анхдугаар Богд Жавзандамба хутагтын ширээнд өргөмжлөн залах үеэс эхлэлтэй бөгөөд Монголын шашин соёлын томоохон баяр наадам юм. Уламжлал ёсоор жил бүр зохион байгуулдаг тус наадмыг энэ жил илүү өргөн хүрээнд буюу Хүй долоон худагт тэмдэглэхээр болсон байна. Даншиг наадмаар морины уралдаан, бөхийн барилдаан, урлагийн тоглолтуудыг зохион байгуулах аж.

Барилгын гол материалын нэг цементийн нийлүүлэлт, тээвэрлэлтийн талаар УБТЗ ХНН-ээс өнөөдөр мэдээллээ. УБТЗ-ын Тээвэр зохион байгуулалтын албаны орлогч дарга С.Батдөл дараахь тодруулгыг өгч байна.

Тэрээр, манай байгууллага бүтээн байгуулалтын улиралд үндэсний үйлдвэрүүдийн цементийн тээвэрлэлтийг саадгүй түргэн шуурхай зохион байгуулахын тулд бүх хүчин чадлаар ажиллаж байна. Битүү бүх вагоныг зөвхөн цементийн тээвэрт ашиглаж байна гэдгийг тодотгов. УБТЗ Хөтөл өртөөн дэх “Цемент шохой” ТӨХК-иас гадна Олон-Овоо өртөөн дэх “МАК” болон Өргөн өртөөн дэх “Монцемент” ХХК-ийн цементийн тээвэрлэлтийг гүйцэтгэдэг байна. Цементийн тээвэрлэлтийг энэ сарын 25-ны байдлаар танилцуулбал:

• Олон-Овоо өртөөн дэх “МАК” ХХК УБТЗ-д 250 битүү вагоны захиалга өгснөөс 187 вагоноор хангалт хийж 187 вагон цемент ачсан. Тус компанийн цементийн үйлдвэр хэвийн ажиллаж, ачилтыг хоногт тогтмол хийж гүйцэтгэж байна.
• Өргөн өртөөнд “Монцемент” 50 битүү вагоны захиалга өгснөөс 36 вагоны хангалт хийж, 36 вагон цемент ачсан. Хоног бүр ачилтыг хэвийн хийж гүйцэтгэжээ.
• Хөтөл өртөөн дэх “Цемент шохой” ТӨХК УБТЗ-д 242 вагоны захиалга өгснөөс 182 битүү вагоны хангалтыг хийсэн. Үүнээс цемент ачсан 159 вагон, үйлдвэр өөрөө ачиж амжаагүй 23 вагон байна.

Тус үйлдвэрт 7 дугаар сарын 2-6-ны өдрүүдэд захиалгын дагуу вагон өгсөн боловч үйлдвэрт жагсаал, цуглаан гарсан болон бусад шалтгаанаар ачилт хийгээгүй байна. Мөн 11,12,17,18-нд тоног төхөөрөмж эвдэрсэн шалтгаанаар ачилтыг дутуу хийсэн зэрэг нь битүү вагоны эргэлт болон цементийн тээвэрт сөргөөр нөлөөлж байна. Ер нь цементийн үйлдвэрүүд маань техникийн сааталгүй богино хугацаанд ачилтыг хийж гүйцэтгэж байвал вагонуудын хэрэгцээ, ашиглалт түргэсч, цементийн тээврийн эргэлт тэр хэмжээгээр хэвийн, сайжрах болно гэв.

Прокурорын байгууллага долдугаар сарын 18-22-ны өдрүүдэд хэрэг хянан шийдвэрлэх ажиллагаанд оролцогчдоос гаргасан 44 гомдол, хүсэлтийг шийдвэрлэж, мөрдөгч болон зөрчлийн хэрэг бүртгэх эрх бүхий албан тушаалтанд тодорхой ажиллагаа гүйцэтгүүлэхээр 273 даалгавар бичгээр өгчээ.

Хүүхэд мориноос унаж гэмтэх, амь насаараа хохирох тохиолдол гарсаар байна.

Тухайлбал, Сүхбаатар аймагт болсон хурдан морины уралдааны үеэр 10 настай охин мориноос унаж амиа алдсан харамсалтай явдал өчигдөр болжээ.

Энэ талаар Цагдаагийн байгууллагаас тодруулахад “Тус аймгийн Түвшинширээ суманд уяачдын галын наадам зохион байгуулах үеэр 10 настай охин өөрийнхөө морийг унаж байгаад мориноосоо унаж, нас барсан” гэв.

Мөн 2022 он гарснаас хойш улсын хэмжээнд нийт 835 уралдаан зохион байгуулагдаж, давхардсан тоогоор 33,818 уралдаанч хүүхэд оролцжээ. Тухайн уралдаанч хүүхдүүдээс 292 хүүхэд хөнгөн бэртэл, 12 хүүхэд хүнд бэртэл авсан байна. Үүнээс зургаан хүүхэд эмнэлгийн байгууллагад хүргэгдэж, эмнэлгийн тусламж үйлчилгээ авсан бол зургаан хүүхэд уралдааны үеэр нас барсан тухай тоо баримтыг Гэр бүл, хүүхэд, залуучуудын хөгжлийн газрын эх сурвалж хэллээ.

Эдгээр хүүхдүүд нь эцэг эх, асран хамгаалагчийн зөвшөөрөлтэй, гэнэтийн ослын даатгалд хамрагдсан, хамгаалалтын иж бүрэн хувцастай уралдаанд оролцсон байгаа юм.

Түүнчлэн энэ оны 4-6 сард хурдан морины уралдаанаас гадна ахуйн хүрээнд хүүхэд мориноос унасан, бэртсэн, чирэгдсэн гэх 13 тохиолдол Цагдаагийн байгууллагад бүртгэгдсэн байдаг.

Ялангуяа эцэг, эхчүүд хүүхдээ зуны амралтаар нь хөдөө хамаатан садан, эмээ өвөөгийнх рүү нь явуулчихдаг. Очсон хүүхэд нь морь сайн унаж сураагүй байж хонинд явахдаа морь унах зэрэг хайхрамжгүй байдал гаргадаг. Энэ байдлаас болж зөвхөн хурдан морины уралдаанаас шалтгаалахгүйгээр мориноос унаж гэмтэж байгааг гэдгийг ЦЕГ-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн дарга Э.Баярбаясгалан өмнө нь анхааруулж байсан юм.

Баянзүрх дүүргийн 26-р хорооны нутаг дэвсгэрт энэ жилдээ багтаан улсын цэцэрлэг, сургууль ашиглалтад оруулахаар болжээ. Тус дүүргийн харьяа

• 2-5 насны 1,563
• 6-17 насны 4,157 хүүхэд амьдардаг байна.

Өнөөдрийг хүртэл 26 дугаар хороо нь улсын цэцэрлэг, сургуульгүй байсан талаар Баянзүрх дүүргээс мэдээлэв.

Тус дүүргийн хэмжээнд цэцэрлэгийн насны 35,000 хүүхэд байгаагаас өнгөрсөн хичээлийн жилд 26,000 нь цэцэрлэгт хамрагджээ. Сургуулийн өмнөх боловсролын үйлчилгээг тэгш, хүртээмжтэй болгох үүднээс энэ онд дүүргээс зургаан байр худалдан авч, 17 байр түрээслэхээр болсон байна.

Эх сурвалж: Баянзүрх дүүрэг