Энэ оны эхний долоон сарын байдлаар усны ослоор 20 хүн амь насаа алджээ. Тодруулбал, усанд осолдож 13 том хүн, 7 хүүхэд эндсэн талаар Нийслэлийн Онцгой Байдлын Газраас мэдээллээ.

Гол, усны осол нь ихэвчлэн иргэдийн анхаарал болгоомжгүй байдал, бага насны хүүхдийг хараа хяналтгүй орхисноос, эцэг, эхчүүдийн сонор сэрэмжгүй байдлаас, согтууруулах ундаа хэрэглэсэн үедээ гол усанд орох зэрэг шалтгаанаас үүдэлтэй байна.

Иймд:

• Мэргэжлийн байгууллагаас өгч байгаа заавар, зөвлөмжийг дагах,
• Гол, мөрөн нуурын ойролцоо амарч зугаалахдаа сонор, сэрэмжтэй байх,
• Гэр бүл найз нөхөд, хамт олноороо амралт зугаалгаар явахдаа нэгдсэн зохион байгуулалттай, нэгнийгээ бүртгэдэг байх,
• Хүүхдийг гол усны эрэг дагуу явуулж, тоглуулахгүй байх, хүүхдэд тавих хараа, хяналтаа сайжруулах,
• Согтууруулах ундаа хэрэглэсэн үедээ гол усанд орохгүй байх,
• Баталгаатай гүүр, гарам, гарцтай газраар автомашинтай зорчиж гол, усны ослоос урьдчилан сэргийлэхийг анхааруулж байгаа юм.

Эх сурвалж: НОБЕГ

Соёлын яам 2022 оны УИХ-аар батлагдсан төсвийн хүрээнд мэргэжлийн урлагийн болон түүхэн, архитектурын дурсгалт Улсын драмын эрдмийн театр, Улсын дуурь бүжгийн эрдмийн театр, Чойжин ламын сүм музей, Богд хааны ордон музей зэрэг түүхэн дурсгалт барилгуудаа хүчитгэх, их засвар хийхээр төлөвлөсөн бөгөөд засвар шинэчлэлийн ажлууд үргэлжилж байна.

Тухайлбал, Богд хааны ордон музейн сэргээн засварлалтын ажил гүйцэтгэх тендер шалгаруулалтад “Энэржин” ХХК шалгарснаар наймдугаар сарын 1-ний өдрөөс сэргээн засварлалтын ажлыг эхлүүлэхээр болжээ.

Богд хааны ордон музейн Лавиран, Найдан, Бурхадын сүмийн засварын ажлын зураг төсөл өнгөрсөн онд Барилгын хөгжлийн төвөөр батлагдан гарсан бөгөөд дурсгалт барилгыг задалж буулгах, вааран дээврийг 100 хувь засварлах, хуучин банзан шал, дүүжин тааз, хаалга цонх зэргийг сэргээн засварлах юм байна.

Түүхэн дурсгалт барилгын сэргээн засварлалтын ажил эхэлж байгаатай холбогдуулан Соёлын яамны харьяа Соёлын өвийн үндэсний төв БНСУ-аас түүхэн дурсгалт барилга, архитектурын дурсгалыг сэргээн засварлагч мэргэжилтнүүдийг урьж ажиллуулах аж.

Мэргэжилтнүүд Соёлын яамтай хамтран барилгын сэргээн засварлалтын ажилд хяналт тавьж, зөвлөгөө тусламж үзүүлэх, сэргээн засварлалтын чиглэлээр сургалт, семинар хийхээр төлөвлөж байгаа юм байна.

ДЭМБ: Дэлхий даяар сармагчны цэцэг өвчний 18 мянга гаруй тохиолдол бүртгэгдсэн байна.

Дэлхийн Эрүүл Мэндийн Байгууллагын мэдээлснээр дэлхийн 78 улс, нутаг дэвсгэрт сармагчны цэцэг өвчний 18,000 гаруй тохиолдол бүртгэгджээ. ДЭМБ-ын ерөнхий захирал Тедрос Адханом Гебрейюс лхагва гарагт сэтгүүлчдэд өгсөн хэвлэлийн бага хурлын үеэр “ Нийт тохиолдлын 70 гаруй хувь нь Европын холбоо, 25 хувь нь Америк тивд бүртгэгдсэн ба Африкт энэ өвчний улмаас таван хүн нас барсан” гэж мэдэгдсэн байна. Нийт бүртгэгдсэн тохиолдлын 98 хувь нь ижил хүйстэн эрэгтэйчүүдээс илэрсэн гэж тэрбээр мэдэгдэлдээ дурджээ.

Дэлхийн Эрүүл Мэндийн Байгууллагын тэргүүний хэлснээр сармагчны цэцэг өвчин нь ойр дотно харилцаа үүсгэх, бохирдсон алчуур, ор дэрний цагаан хэрэглэл зэргээр дамжин халдварладаг байна. Сармагчны цэцэг өвчнийг зөвхөн тодорхой бүлэгт хамаарах өвчин гэж тодорхойлохгүй байхыг мөн тэрээр анхааруулсан.

Дэлхийн эрүүл мэндийн хяналтын байгууллага өнгөрсөн долоо хоногт тус вирусийг “олон улсын анхаарал татсан нийгмийн эрүүл мэндийн яаралтай асуудал” гэж зарласан. АНУ болон Европын орнууд сармагчны цэцэг өвчний дэгдэлтийг зогсоохын тулд иргэдээ вакцинжуулж эхлээд байгаа.

Европын комисс, Данийн биотехнологийн Баварийн Нордик компанийн бүтээсэн салхин цэцэг өвчний вакциныг, одоо дэлхий нийтэд тархаад байгаа, сармагчны цэцэг өвчний эсрэг дархлаажуулах зөвшөөрөл олгосны дагуу тус компанийн бүтээсэн, Имванекс вакцин нь, сармагчны цэцэг өвчний вирусээс насанд хүрсэн хүнийг хамгаалах чадвар 90-ээс дээш хувьтай гэсэн шинжлэх ухааны дүгнэлтийг Европын эмийн агентлагаас гаргаад байгаа юм.

Уул уурхай, олборлох салбараас 2022 оны эхний 6 сарын байдлаар улсын төсөвт 1,738.5 тэрбум төгрөг татвар, хураамж хэлбэрээр төвлөрүүлсэн байна. Үүнээс:

➢ Зэс 936.7 тэрбум төгрөг,

➢ Нүүрс 562.0 тэрбум төгрөг,

➢ Алт 112.3 тэрбум төгрөг,

➢ Цайр 53.8 тэрбум төгрөг,

➢ Төмөр 26.6 тэрбум төгрөг,

➢ Хайлуур жонш 11.3 тэрбум төгрөг,

➢ Бусад ашигт малтмал 35.9 тэрбум төгрөг байна.

Дараах ашигт малтмалын улсын төсөвт төвлөрүүлсэн орлого өмнөх оны мөн үеэс өссөн үзүүлэлттэй гарсан байна. Үүнд:

➢ Нүүрс 130.6 (30.3%) тэрбум төгрөг,

➢ Цайр 8.8 (19.6%) тэрбум төгрөг,

➢ Алт 6.1 (5.7%) тэрбум төгрөг,

➢ Бусад 15.5 (76.3%) тэрбум төгрөг.

Харин дараах ашигт малтмалын улсын төсөвт төвлөрүүлсэн орлого өмнөх оны мөн үеэс буурсан үзүүлэлттэй гарсан байна. Үүнд:

➢ Зэс 736.0 (44.0%) тэрбум төгрөг,

➢ Төмөр 43.4 (62.0%) тэрбум төгрөг,

➢ Хайлуур жонш 40.4 (78.1%) тэрбум төгрөг байна гэж Уул уурхай, хүнд үйлдвэрийн яамнаас мэдээллээ.

Монголын чөлөөт бөхийн үндэсний шигшээ багийн шинэ бүрэлдэхүүн болох зургаан дасгалжуулагч, 27 тамирчин өнгөрсөн баасан гарагт тангаргаа өргөсөн. Монголын чөлөөт бөхийн холбооны ерөнхийлөгч Х.Бадамсүрэн энэ сарын 24-нд Үндэсний цэцэрлэгт хүрээлэнд шигшээ багийн бэлтгэл дээр очиж уулзан санал бодлоо солилцсон байна.

Чөлөөт бөхийн насанд хүрэгчдийн Дэлхийн аварга шалгаруулах тэмцээн есдүгээр сарын 10-18-нд Сербийн нийслэл Белград хотод болно. Монголын чөлөөт бөхийн холбооны 60 гаруй хүний бүрэлдэхүүнтэй баг Орхон аймгийн “Сэлэнгэ” амралтын баазад ДАШТ-ий бэлтгэлээ базаахаар маргааш Улаанбаатар хотоос хөдлөхөөр болжээ.

“2022 оны II улирлын НӨАТ-ын буцаан олголтыг өнөөдрөөс иргэдийн дансанд шилжүүлж эхэллээ” хэмээн Татварын Ерөнхий Газраас мэдээллээ.

Тодруулбал 1.13 сая иргэнд 61.4 сая төгрөгийг буцаан олгох юм байна.

Харин буцаан олголтоороо 22,028 иргэн 260.6 сая төгрөгийн бусад татвар, төлбөр хураамжаа төлжээ.

Монгол Улсын иргэд НӨАТ-ын буцаан олголтоор тухайн улиралд худалдан авсан барааны нийт дүнгийн 2%-ийг буцаан авдаг болоод зургаан жил болж байна.