Month: March 2022

Манай монгол залуус тухайлбал, Дижитал солюшнс компанийн хамт олон виртуал технологийн судалгаа, хөгжүүлэлт дээрээ үндэслэн Монгол туургатнуудын метаверс Гүюг/Guyuk-ийг хөгжүүлж эхлээд байна.

Guyuk метаверсийг хөгжүүлж буй залуучууд өмнө нь виртуал технологид суурилсан олон сонирхолтой төслүүд болох Виртуал Хархорум, Өндөр гэгээн Занабазарын хосгүй бүтээлүүдийн виртуал музей, Шинжлэх Ухаан-100 зэрэг төслүүдийг хэрэгжүүлж олон нийтийн хүртээл болгож байжээ.

Тэдний бүтээж буй метаверс түүх, өв соёлоороо нийлэн нэгдэх, өв соёлоо түгээн дэлгэрүүлэх, хамтран ажиллах, харилцан суралцах, түүх, өв соёлоо ирээдүй хойчдоо өвлүүлэн үлдээх эрхэм зорилготой.

Тиймээс Guyuk Metaverse-ийг найман зууны тэртээгээс дэлхий даяар тархан суурьшсан Монгол туургатныг холбох гүүр, түүх, өв соёлоороо эргэн нэгдэх виртуал ертөнц байна хэмээн төсөөлж болох юм.

Тэд метаверсийнхээ эхний хувилбараар хэрэглэгчдэд:

• Өөрийнхөө аватарыг бүтээх
• Guyuk метаверсийн нээлтэд оролцох
• Виртуал тоглолтонд оролцох
• Виртуал наадамд оролцох
• “Guyuk NFT” Collection-тай болох
• Сонирхлын бүлгийн виртуал уулзалт хийх
• Виртуал сургуулийн анхны сурагч болох
• Дижитал үл хөдлөх хөрөнгө, газар худалдан авах

гэх мэт олон боломжуудыг санал болгож байна.

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд Төв аймгийн хэмжээнд 2021 оны байдлаар 7457 иргэн, 632 аж ахуйн нэгж, байгууллагын оролцоотойгоор 121452 ширхэг мод бут, сөөг тарьж 255,2 сая төгрөг зарцуулжээ.

Төв аймаг нь 2022 оныг “Ногоон хөгжил-Баялаг бүтээгчдийг дэмжих жил” болгон зарласан бөгөөд “Тэрбум мод” үндэсний хөдөлгөөнийг хэрэгжүүлэх ажлын зорилттой нийцсэн цаг үеэ олсон ажил болж байгааг ойн салбарынхан онцолж байна. Өнөөдрийн байдлаар Төв аймагт мод үржүүлгийн 17 аж ахуйн нэгж байгууллага үйл ажиллагаа явуулдаг. “Тэрбум мод” үндэсний хөдөлгөөнийг хэрэгжүүлэх ажлын хүрээнд мод үржүүлгийн аж ахуй нэгж байгууллагуудаа дэмжин хамтран ажиллах хүрээнд 500 га газрыг ой үржүүлгийн чиглэлээр олгож, 20 сая мод тарих ажлыг хэрэгжүүлэх юм.

Төв аймаг нь ойн сан бүхий газар нутгаараа Монгол Улсад тавдугаарт бичигддэг, нэг сая 300 мянган га талбайг хамарсан ойн сантай. Нийт 27 сумаас 22 сумын нутаг дэвсгэрт нарс, шинэс, хус, улиангар зэрэг холимог ой, мод ургадаг.

Төв аймаг жил бүр мод тарих, ойжуулах ажлыг зохион байгуулж, сүүлийн 10 жил 3700 гаруй га талбайд ойжуулалтын ажил хийжээ. “Тэрбум мод” үндэсний хөдөлгөөний хүрээнд 20 сая мод тарихад мэргэжлийн боловсон хүчин, хүний нөөц, техникийн бааз сууриа нэмэгдүүлэх шаардлагатай байгаа талаар албаныхан мэдээлсэн.

Төв аймгийн сум дундын ойн ангийн хувьд аймагтаа таван га ой үржүүлгийн талбайтай, үүнээсээ жилд 35-50 мянган ширхэг тарьц, суулгац авах нөөцтэй. Өнгөрсөн жилд 38 мянган ширхэг тарьц суулгацыг орон нутаг, сумд болон БОАЖЯ-нд нийлүүлсэн байна. Тэгвэл энэ жилд нийтдээ 50 мянган ширхэг тарьц суулгац нийлүүлэх зорилттой ажиллаж байгаа юм.

Мөн Төв аймгийн Байгаль орчин аялал жуулчлалын газраас 4 дүгээр сарын дунд үеэс эхлэн мод тарилт эхэлнэ гэдгийг хэллээ.

Энэ хүрээнд Хөгжлийн бодлогын баримт бичгүүдэд тусгасан тухайн орон нутагт хэрэгжүүлэх зорилтуудыг бодит хэрэгцээ, шаардлага тулгамдсан асуудалд нийцүүлэх үйл ажиллагааг орон нутагтаа хамтран хэрэгжүүлэх “Улсын төсвийн хөрөнгө оруулалтаар хэрэгжүүлэх төсөл арга хэмжээг үнэлэх, эрэмбэлэх сонгох аргачлал”-аар зааварчилгаа өгөх зэрэг чиглэлээр энэ сарын 25-ны өдөр сургалт зохион байгууллаа.

Сургалтад Увс, Баян-Өлгий, Говь-Алтай, Завхан, Ховд аймгийн төсвийн хөрөнгө оруулалтын төлөвлөлт, хэрэгжилт санхүүжилтийн үйл ажиллагаанд оролцогч болон хариуцагч 70-аад төрийн албан хаагч хамрагдав.

Мөн тус ажлын багийнхан төсвийн хөрөнгө оруулалтаар Ховд аймагт хэрэгжүүлж байгаа төсөл, арга хэмжээний явц, гүйцэтгэлийг газар дээр нь очиж танилцан, заавар зөвлөмж өгөв.

Тухайлбал, Хүүхдийн 50 ортой эмнэлгийн барилгын засварын ажил, Спорт заал, Цэвэрлэх байгууламжийн ажлын явцтай танилцжээ.

Энэ үеэр улсын төсвийн хөрөнгө оруулалтаар барьж буй барилгын гүйцэтгэгч тал болон барилгын ажлыг шалгаж, хүлээн авч байгаа мэргэжлийн байгууллагууд аль аль талдаа маш хариуцлагатай ажиллах шаардлагатай байгааг албаныхан онцоллоо.

Дэлхий дахинаа жил бүр зохион байгуулагддаг “Эх дэлхийн цаг” үйл ажиллагаа өнөөдөр буюу гуравдугаар сарын 24-нд 20:30-21:30 цагийн хооронд болно.

Уур амьсгалын өөрчлөлтөд дэлхий нийтийн анхаарлыг хандуулж, улам шавхагдаж буй нөөцөө хамгаалахад нэгдэхийг уриалдаг “Эх дэлхийн цаг” буюу “Earth Hour”-ийг Дэлхийн байгаль хамгаалах сангаас жил бүр зохион байгуулдаг.

Монгол Улс 2010 оноос уг хөдөлгөөнд нэгдэж эхэлсэн бөгөөд зөвхөн Улаанбаатар хот төдийгүй, 21 аймгийн залуус өөрсдийн дуу хоолойгоо нэгтгэж, байгаль эх дэлхийнхээ төлөө жил бүр нэгэн зэрэг дуугарч, залуучууд, олон нийтийн оролцоог дээшлүүлэхээр зорин ажилладаг.

2022 оны гуравдугаар сарын 26-ны өдрийн 20:30-21:30 цагийн хооронд 60 минутын турш гэрлээ унтрааж, эх дэлхийн цагт нэгдэхийг уриалж байна.