Month: March 2022

2022 онд нийслэлд улс, нийслэлийн төсөв, нийслэлийн замын сангийн хөрөнгө болон орон нутгийн хөгжлийн сангийн хөрөнгөөр хэрэгжих 605 төсөл, арга хэмжээ батлагдсан. Үүнээс 576 төсөл, арга хэмжээний эрхийг шилжүүлж, 21-ийнх нь эрх шилжүүлэх ажил бэлтгэл шатандаа яваа юм. Эрх шилжүүлэх үйл явц 96.5 хувийн гүйцэтгэлтэй байгаа бөгөөд өмнөх долоо хоногоос 5.7 хувиар өссөн дүн гарчээ. Захирамж гарч, эрх шилжсэн 576 төсөл, арга хэмжээний 119 нь он дамжин хэрэгжиж буй.

Шуурхай зөвлөгөөний төгсгөлд Нийслэлийн Засаг дарга бөгөөд Улаанбаатар хотын Захирагч Д.Сумъяабазар “Энэ жилийн хувьд гадаад нөхцөл байдлаас шалтгаалсан хүндрэл биднийг тойрохгүй, дайрах нь тодорхой боллоо. Өнгөрсөн хоёр жилийн турш цар тахлын амаргүй нөхцөлд ажиллаж ирсэн бол энэ жилийн хувьд БНХАУ-ын дотоодод ковид дахин сэргэж байгаа болон ОХУ, Украины цэрэг дайны нөхцөлтэй холбоотойгоор бэрхшээл учрах нь тодорхой байна. Дэлхийн захуудын ханш маш савлагаатай байна. Хоёр хөршийн нөхцөл байдал биднээс шалтгаалахгүй байгаа хэдий ч улсын ажил, нийслэлийн хөрөнгө оруулалт тасалдах ёсгүй. Одоо бидэнд цаг хугацаа алтнаас үнэтэй. 2022 он бол хамгийн чухал он. Тэр дундаа энэ оны дөрөв, тавдугаар сар маш хариуцлагатай сар шүү. Улаанбаатар хот эдэлбэр газар, автомашин, үл хөдлөх хөрөнгөө тоолж, өөрсдөө бүртгэдэг, татвар хураамжийг нь авдаг, биржийн үйл ажиллагааг ч өөрсдөө явуулдаг болох хэрэгтэй байна. Ингэж цэгцлэхгүй бол Улаанбаатар хот эзэнгүй айл шиг байна.

Үндэсний статистикийн хороос мэдээлснээр, төлбөрийн тэнцэл энэ оны нэгдүгээр сард 340.9 сая ам.долларын алдагдалтай гарч, алдагдал өмнөх оны мөн үеийнхээс 180.2 сая ам.доллараар нэмэгдсэн бол төлбөрийн тэнцлийн урсгал данс энэ оны нэгдүгээр сарын урьдчилсан гүйцэтгэлээр 402.7 сая ам.долларын алдагдалтай гарчээ. Энэ алдагдал өмнөх оны мөн үеийнхээс 350.7 (7.7 дахин) сая ам.доллараар нэмэгдсэн үзүүлэлт юм.

Үүнд бараа худалдааны алдагдал 251.5 сая, анхдагч орлогын алдагдал өмнөх оны мөн үеийнхээс 60.8 сая ам.доллараар нэмэгдсэн нь нөлөөлжээ.

Үйлчилгээний худалдааны орлого энэ оны нэгдүгээр сарын урьдчилсан гүйцэтгэлээр 52 сая, зарлага 170.2 сая ам.доллар болж, орлого өмнөх оны мөн үеийнхээс 9 сая ам.доллараар багасч, зарлага 33.9 сая ам.доллараар нэмэгдсэн байна. Үйлчилгээний худалдааны алдагдал нэгдүгээр сард өмнөх оны мөн үеийнхээс 42.9 сая ам.доллараар нэмэгдэж, 118.2 сая ам.доллар болжээ.

Хөрөнгийн данс энэ оны нэгдүгээр сарын урьдчилсан гүйцэтгэлээр 6.1 сая ам.долларын ашигтай гарч, өмнөх оны мөн үеийнхээс 3.4 сая ам.доллараар багассан байна. Санхүүгийн дансны тэнцэл мөн сард 73.1 сая ам.долларын алдагдалтай байсан бол энэ оны нэгдүгээр сард, өмнөх оны мөн үеийнхээс 179.4 сая ам.доллараар нэмэгдэж, 106.2 сая ам.долларын ашигтай гарчээ.

Нийслэлийн Онцгой байдлын газраас Хот байгуулалт, хөгжлийн газрын томилгоот бүрэлдэхүүний бэлэн байдлыг шалгаж, иж бүрэн сургуулийг өнөөдөр зохион байгуулав. Тус үзлэг, сургууль нь болзошгүй гамшгийн аюулаас хүн ам, хүрээлэн байгаа орчныг хамгаалах, гамшгаас урьдчилан сэргийлэх үйл ажиллагаанд аж ахуйн нэгж байгууллага, иргэдийг сургах, харилцан хамтын ажиллагааг хангах зорилготой юм.

Хот байгуулалт, хөгжлийн газрын дарга Ц.Тулга “Нийслэлийн Засаг даргын 2022 оны A/59 тоот захирамжийн дагуу түр орон байраар хангах албанд гамшгаас хамгаалах бэлэн байдлын үзлэгийг хийж байна. Гамшгийн үед түр орон байраар хангах алба Хот байгуулалт, хөгжлийн газарт бий. Мөн Нийслэлийн Орон сууцны корпораци ХК, Нийслэлийн Аялал жуулчлалын газар, Нийслэлийн Боловсролын газар зэрэг дөрвөн байгууллага хамтарч ажилладаг. Гамшиг тохиолдсон үед иргэд нэн тэргүүнд түр цугларах талбайд цуглах ёстой. Үүний дараа түр хоргодох орон байраар хангах, иргэдийг гамшгийн эрсдлээс авран хамгаалахад Нийслэлийн Онцгой байдлын газартай хамтарч, НЗДТГ-ын харьяа байгууллагууд өөрийн чиг үүргийн дагуу оролцдог” хэмээн ярилаа.

Нийслэлийн Онцгой байдлын газрын дэд дарга бөгөөд Гамшгийн шуурхай удирдлагын хэлтсийн дарга Э.Эрдэнэбаатар “Энэхүү бэлэн байдлын үзлэгээр Монгол Улсын Үндэсний аюулгүй байдлын зөвлөлийн зөвлөмжийн хүрээнд хяналт, үзлэгийг хийнэ. Түүнчлэн ерөнхий боловсролын 34, 75 дугаар сургуульд түр орон байрны үзлэг хийж, бэлэн байдлын үзлэгийн дүнг гаргах юм. Өнөөдрийн байдлаар нийслэлийн хэмжээнд газар хөдлөлтийн гамшиг болсон тохиолдолд цугларах 182 түр талбай байна. Эдгээр талбайг томилгоожуулснаас гадна түр орон байраар ашиглах боломжтой объектуудыг судалж байна. Аливаа гамшиг болоход арга хэмжээ авах мэргэжлийн чиг үүрэг бүхий байгууллага бэлэн байдлаа хэрхэн хангаж байгааг шалган, тухайн үзлэгийг хийж байна” гэлээ.

Хот байгуулалт, хөгжлийн газрын Барилга байгууламжийн чанарын хэлтсийн дарга Н.Тамир “Тус албаны гамшгийн төлөвлөгөө, албан хаагч бүрийн гамшгийн үед хэрэглэх үүргэвч, дотор нь байх ёстой 15 эд зүйлийг Нийслэлийн Онцгой байдлын газраас шалгаж байна. Түр орон байраар сургууль, цэцэрлэг, аялал жуулчлал, зочид буудал зэрэг дөрвөн төрлийн 631 байгууламжийг сонгон авсан. Эдгээр барилгыг түр орон байрны стандарт, норм дүрэмтэй болсны дараа түр орон байрны тоог эцэслэн гаргаж, НИТХ-аар эсвэл Нийслэлийн Засаг даргын захирамжаар баталгаажуулдаг” хэмээв

Онцгой байдлын ерөнхий газраас улсын хэмжээнд тохиолдож байгаа усны ослын тоо хохирлыг бууруулах, бага насны хүүхдүүдэд тавих эцэг, эхийн хараа хяналтыг сайжруулах, иргэдийн сонор сэрэмжийг дээшлүүлэх, мэргэжлийн байгууллагуудын хамтын ажиллагааг уялдуулах зорилгоор “Үер, уснаас үрсээ хамгаалъя” аяныг зохион байгуулж байгаатай холбогдуулан хэвлэлийн бага хурал хийлээ.

Хэвлэлийн хуралд ОБЕГ-ын Урьдчилан сэргийлэх газрын хэлтсийн дарга, хурандаа Д.Бат-Эрдэнэ, БШУЯ-ы Боловсролын ерөнхий газрын дарга Ж.Болормаа, Далайн Захиргааны усан замын тээврийн бүртгэл, хяналтын албаны ахлах мэргэжилтэн Т.Олонбаяр, МУЗН-ийн Сайн дурын идвэхтний төвийн зохицуулагч С.Намсрайжав нар оролцсон юм.

Сүүлийн таван жилийн тоон мэдээгээр усны ослоор 553 хүн амь насаа алдсаны 437 буюу 79,0 хувь нь том хүн, 124 буюу 22,4 хувь нь хүүхэд байна.

Усны ослоор амь насаа алдагсдын шалтгаан нөхцлийг нь судлан үзэхэд хүүхдээ хараа хяналтгүй орхисон, амралт зугаалгаар явах үедээ гол, нуурын усанд орсон, архидан согтуурсан, малчид үертэй болон ус ихтэй үед гарамгүй газраар гол гаталсан зэрэг шалтгаан 70 хувийг эзэлж байгаа юм.

Аяны хүрээнд гол, мөрөн, нуурын эрэг дагуу аялал жуулчлал, амралт, зугаалгын чиглэлээр үйл ажиллагаа явуулдаг аж, ахуйн нэгжүүдэд тавих хяналт шалгалтыг үр дүнтэй зохион байгуулах, заавар, зөвлөмжөөр хангах, хүн олноор цуглардаг болон эрсдэл бүхий газруудад усанд осолдохоос урьдчилан сэргийлэх, анхааруулах самбар байрлуулж, иргэдэд хэвлэл мэдээллийн хэрэгслээр мэдээ, мэдээллийг хүргэн ажиллах юм.

Мөн төрийн болон төрийн бус байгууллага, аж ахуйн нэгж, байгууллагуудын ажилтан алба хаагч нарт гол, усны аюулаас урьдчилан сэргийлэх, анхаарах асуудал, анхан шатны тусламж үзүүлэх сургалтыг үе шаттайгаар зохион байгуулж, ерөнхий боловсролын сургуулийн сурагчдыг бассейнд буюу усан спорт сургалтын төвд усанд сэлэлтийн анхан шатны сургалтад хамруулахад бодлогоор дэмжлэг үзүүлэхэд хамтран ажиллана гэж Онцгой байдлын ерөнхий газраас мэдээллээ.

Хөвсгөл аймгийн төвөөс зүүн зүгт 138 км-т, Тариалан сумын төвөөс баруун урд зүгт 22 км-т, малын өвөлжөө шатжээ.

Тус аймгийн Онцгой байдлын газрын Тариалан сум дахь Гал түймэр унтраах, аврах 46 дугаар ангийн алба хаагчид очин иргэн П-ын 8х8 метрийн хэмжээтэй өвөлжөө шатаж байсныг нэг цаг есөн минут ажиллаж унтраасан байна. Гал гарсны улмаас долоон ишиг, зургаан хурга хорогджээ.

Сүүлийн 1-2 жилд барааны үнэ эрс нэмэгдэж байгааг хүн болгон анзаарч байна. Амтай болгон нь үнийн өсөлт, хөөрөгдөлтийн талаар ярих болсон. Энэ нь тээвэрлэлтдээ байна уу, эсвэл худалдаа эрхлэгчид дуртай үнээ хэлэн барааныхаа үнийг өсгөөд байна уу?

Энэ талаар зах, худалдааны төвүүдийн худалдаа эрхлэгчдээс тодрууллаа.

Гэр ахуйн барааны худалдаа эрхлэгч н.Далай “Хүнсний уут 1000 төгрөгөөр ирдэг байсан. Одоо 2500 төгрөг болсон. Улавчийг л гэхэд 800 төгрөгөөр аваад 1500 төгрөгөөр зардаг байсан. Одоо 3000 төгрөгөөр аваад 500 төгрөг нэмж зарж байна. Цаад үйлдвэрүүддээ бага зэрэг нэмэгдсэн л байх гэхдээ тээвэрлэлтэд маш их нөлөөлж байна. Тиймээс бид ч бас үнээ нэмэхээс өөр арга алга. Жижиг бараанууд 1000-2000 төгрөгөөр нэмэгдсэн бол өртөг өндөртэй тогоо, цахилгаан бараанууд 10-20 мянган төгрөгөөр нэмэгдсэн. Ер нь л юм зарах хэцүү, зарахгүй байх хэцүү тийм л байдалтай байна. Ингээд юмны үнэ өсөөд байхаар худалдан авагчид ч гэсэн эрс багасах юм. Бараа бүтээгдэхүүний үнэ нь нэмэгдээд байгаа мөртлөө цалин нь огт нэмэгдэхгүй болохоор арга ч үгүй биз” гэв.

Гар утасны дагалдах хэрэгсэл худалдаа эрхлэгч н.Бямбажаргал “Ханш аймар өөрчлөлттэй байна. Мөн тээврийн үнэ өссөн. Жишээ нь нэг цэнэглэгч 5000 төгрөгөөр ирдэг байсан бол одоо тээврийн зардал ханшны өсөлтөөс хамаарч бага зэрэг нэмэгсэн. Нэг жижигхэн хайрцагтай барааг 80.000 төгрөгөөр авдаг байсан бол одоо 300-400 мянган төгрөгөөр авч байна. Тэгэхээр тээвэрлэлт бараг 5-6 хувиар өссөн гэсэн үг. Овор ихтэй бараа авдаг худалдаачид бол үнээ нэмэхээс өөр аргагүй байгаа байх. Учир нь 1 м.куб барааг 150 мянган төгрөгөөр авдаг байсан бол одоо яг 1 сая төгрөгөөр авч байна” гэлээ.

Сүү, сүүн бүтээгдэхүүний худалдаа эрхлэгч н.Элбэгбаяр “Жил хагасын өмнө 12.000 төгрөгөөр ирдэг байсан 700 гр-тай ааруул одоо 14.000 төгрөг болж өссөн. Үйлдвэрүүдийн сүү гэхэд л энэ жил хоёр удаа нэмэгдчихлээ. 3000 төгрөгөөр ирдэг байсан сүү 3300 төгрөг болсон. Ер нь л дийлэнх нь 2000 төгрөгөөр нэмэгдсэн дээ. Дээр нь бид 200-1000 төгрөг нэмж зарна” гэв.

Чихэр, жимсний худалдаа эрхлэгч Б.Цэцэг “Цар тахлын өмнөх үед барааны үнэ харьцангуй гайгүй байсан. Цар тахал эхлээд 10-20 хувиар нэмэгдэж байгаад одоо бол 40 хувиар нэмэгдсэн.Бүх бараан дээр л үнийн өсөлт харагдаж байна. Худалдан авагчид ч хамаагүй багассан. 10.000 төгрөгөөр ирдэг байсан бараа одоо 14.000 төгрөгөөр ирж байна” гэсэн юм.