Статистик дурдвал, улсын хэмжээнд 16 аймгийн 181 голомтод шүлхий өвчний улмаас хорио цээрийн дэглэм тогтоогоод байгаа юм. Энэ хүрээнд шүлхийн ил шинж тэмдэгтэй 22,300 мал байна.

Тэгвэл шүлхийгээр өвчилсөн малын махыг идвэл хүний эрүүл мэндэд сөргөөр нөлөөлдөг гэсэн ойлголт иргэдийн дунд бий. Тэгвэл Мал эмнэлгийн ерөнхий газрын Мал эмнэлгийн хяналт, эрсдэлийн үнэлгээний газрын дарга Б.Болдбаатар “Дэлхийн мал амьтны эрүүл мэндийн байгууллагын хуурай газрын амьтны кодод зааснаар шүлхий өвчин туссан малыг шинж тэмдэг нь арилаад 28 хоносны дараа хүнсэнд хэрэглэхийг зөвшөөрдөг. Ингэхдээ дулааны аргаар боловсруулах, боловсруулалтад зориулсан аргаар худалдахыг зөвшөөрдөг юм. Үүнд сөрөг заалт байдаггүй.

Гол нь антибиотикийн үлдэгдэл бий юу гэдгийг тандах ажил хийгдэж байгаа. Түүнээс шүлхий өвчнөөс болоод хүний эрүүл мэндэд сөрөг, аюултай байдал үүсэхгүй” гэсэн байна.

Өнөөдрийн байдлаар манай улс коронавирусийн эсрэг 5,539,357 хүн тун вакцин хийсэн байна. Үүнээс

• I тунд 2,270,107 иргэн буюу хүн амын 69.8 хувь,
• II тунд 2,171,173 иргэн буюу хүн амын 66.7 хувь,
• III тунд 1,011,388 иргэн буюу хүн амын 31 хувь,
• IV тунд 86,689 иргэн буюу хүн амын 2.7 хувь нь тус тус хамрагджээ.

Манай улсад халдварын оргил үе буурсан гэж үзсэн тул Засгийн газраас өчигдөр хичээл, сургалтын үйл ажиллагааг 100 хувь танхимд шилжүүлэхээр шийдвэрлэсэн.

Гэхдээ зарим улс оронд Омикрон хувилбараар өвчилсөн иргэд дахин өвчилж байгаа тохиолдол олноороо бүртгэгдэж байгаа тул дархлаажуулалтад идэвхтэй хамрагдаж, халдвар хамгааллын дэглэмээ сайтар баримтлахыг УОК, Эрүүл мэндийн яамнаас уриалж байгаа юм.

Тэрбээр “Манай улс коронавируст халдварын эмчилгээнд асар их хөрөнгө зарж байна. Үүнийг хувийн хэвшлийн эмнэлгүүдэд хариуцуулах асуудлаар өмнө нь төр засагт хандсан ч үр дүнд хүрээгүй. Тиймээс өнөөдөр олон нийтэд мэдээлэл хийхээр боллоо.

Өнөөдөр КОВИД-19 халдварыг эмчлэх төгс эмчилгээ дэлхий нийтэд гараагүй. Гэхдээ энэ өвчлөлийн хүндрэл нь ДОХ-оос ч илүү хоруу чанартай. Энэ тухай би өмнө нь “ХОВС био орон зайн өвчлөл, эмчилгээ” гэх номд онолын хувьд бичсэн юм. Мөн би өмнө нь 2008 онд ДОХ-ыг эмчлэх асуудлаар хэвлэлийн хурал хийж байв.

Вирусийг хэн ч хэзээ ч устгаж чадахгүй. Гагцхүү бичил эргэлтийн системийг хэвийн хэмжээнд оруулснаар эмчлэх бололцоотой. Гэвч Монголын болон дэлхийн эрдэмтэд бичил эргэлтийн систем гэж юу болохыг ярихгүй байна.

Би олон хүний коронавирусийн дараах хүндрэлийг эмчилсэн. Энэ өвчнийг тусахаар цус өтгөрдөг гэж ярьж байна. Цус өтгөрнө гэдэг нь чөмөг зэрэг цусыг боловсруулдаг эрхтнүүд нь өөрөө тэжээлгүйдсэнээс болж өвчилсөн гэсэн үг. Мөн дархлаа уналаа гэж яриад байгаа нь дархлаа бий болгодог эд, эсүүд өөрөө тэжээлээ авч чадахгүй болчхоод байгаа юм. Бид ердөө иймхэн зарчмыг ойлгохгүй байна.

Хэрэв үүнийг ойлгоод хүмүүс цусны эргэлтээ хэвийн байдалд оруулчихвал ямар ч вирусээр хүн үхэхгүй. Энэ мэтээр вирусийг эмчлэх тухай ХОВС номынхоо 2,3 дугаар дэвтрийг бичих гэсэн ч санхүүжилт байхгүй байна. Энэ тухайгаа Засгийн газар, Эрүүл мэндийн яаманд хандсан ч хариу өгөөгүй.

Өнөөдөр Монголын Засгийн газар, Эрүүл мэндийн яам коронавируст халдвараар далимдуулж мөнгө угааж байна. Би 2020 оноос хойш эмнэлгээ өргөжүүлэхээр санхүүжилт хүссэн ч өгөөгүй зөвхөн улсынхаа эмнэлгүүдэд л хөрөнгө оруулалт хийж байна. Гэтэл улсын эмнэлгүүд нь бичил эргэлтийн системийн талаар ямар ч онол байхгүй тул эмчилгээ хийж чадахгүй байна.

Дэлхий нийт ч коронавирусийг алахын тулд витамин С уулгаж, антибиотик тарьж байгаагаас өөр зүйлгүй. Урьдчилсан сэргийлэх чиглэлээр ганц ч эмчилгээ хийхгүй байгаад нь би их харамсаж байна.

Иймд би Монголын төр засаг, эмч нартай уулзалт хийж, хэн нь буруу ярьж байгааг нүүр тулж ярилцмаар байна.

Гадаадаас орж ирсэн асар их тусламж нь жинхэнээсээ эмчилж чадаж байгаа эмч нар, хувийн хэвшлүүдэд хүрэхгүй байгаа, бидэнд өгөхгүй байгаа юм.

Вирусийг эмчлэхэд хамгийн чухал зүйл бол дархлаа. Гэвч дархлааг үүсгэдэг цус төлжүүлэх процессын алдагдлыг өнөөдөр ярихгүй байна. Үүнийг л эмчилчихвэл ямар ч вирусээр өвдөхгүй. Энэ талаар дэлхийн эрдэмтэдтэй нээлттэй хэлэлцүүлэг хийгээд ялж чадна гэдэгтээ би итгэлтэй байгаа. Вирусийг 3-5 хоногт эмгүйгээр эмчлэх бүрэн бололцоотой” хэмээн ярилаа.

Түүнчлэн “Амьд амьтан мутацад ороод, амьдрах эрхийн төлөө тэмцэж байгаа. Үүнтэй адилаар вирус дахиад л мутацад орсоор байна. Тэр вирусийн мутац сул эсвэл хүчтэй байж болно. Ямар ч тохиолдолд мутацын шинэ тохиолдол бүрд бид вакцин хийж чадахгүй.

Цаашид хэчнээн ч мутац гарч ирэхийг мэдэхгүй тул хүмүүс өөрийнхөө биеийн эсэргүүцлээр вирустэй тулахаас өөр аргагүй.

Миний хувьд яг коронавирусээр нас барсан гэж ярихыг хүлээн зөвшөөрөхгүй. Учир нь бичил эргэлтийн системийн алдагдал нь зүрхний үрэвсэл, уушгины хатгаа үүсгэдэг.

Өөрөөр хэлбэл, коронавирус нь далд болон ил хэлбэрийн архаг суурь өвчнийг хүндрүүлсний улмаас өвчилсөн хүн нас барж байна. Түүнээс яг коронавирусийн улмаас нас баралт бүртгэгдэж байгаа гэдэгт итгэхгүй байна” гэсэн юм.

Монгол Улсын Засгийн газраас нийслэлийн хүн амын 2022 оны хаврын улирлын хэрэгцээнд зориулан нөөцийн мах бүрдүүлэхэд анхаарч байна.

Энэ хүрээнд 13 мянган тонн махны нөөц бүрдүүлэхээр 23 аж ахуйн нэгж ажиллаж, бэлтгэл ажил 90 гаруй хувьтай үргэлжилж байгаа юм. Өнөөдрийн байдлаар аж ахуйн нэгжүүд 12 мянган тонн мах нөөцөлжээ.

Нөөцийн махны худалдааг ирэх гуравдугаар сард Улаанбаатар хотын захирагчийн ажлын албатай хамтран зохион байгуулна хэмээн ХХААХҮЯ-наас мэдээллээ.

Монгол Улсад өнөөдрийн /2022.02.10/ байдлаар 123 улсын 16,389 гадаад иргэн түр, албан болон хувийн хэргээр оршин сууж байна.

Гадаадын иргэн, харьяатын газар 2022 оны нэгдүгээр сард 1,027 гадаад иргэнд визийн зөвшөөрөл, 47 иргэнд виз олгожээ.

“Evisa.mn” цахим системээр нийт 14 улсын 59 иргэнд цахим виз олгож, эрх бүхий байгууллагын зөвшөөрлийг үндэслэн гадаадын 695 иргэнд Монгол Улсад оршин суух зөвшөөрөл олгож, 4,627 иргэний оршин суух зөвшөөрлийн хугацааг сунгасан байна.

Мөн 300 аж ахуйн нэгж, байгууллагын 757 гадаад иргэний хүсэлтийг цахимаар (eimmigration.mn) хүлээн авч, шийдвэрлэжээ.

Лукашенкогийн дэглэмийн дарамт шахалтын улмаас Беларусийн ирээдүйтэй цаначин гэр бүлийн хамт гадаадад дүрвэжээ.

Гүйлтийн цанын тамирчин 17 настай Дарья Долидович одоо гэр бүлийн хамт Польш улсад байгаа юм байна.

Цанын энэ төрлөөр долоон удаа олимпын наадамд оролцож байсан түүний аав Сергей Долидович охиноо дасгалжуулдаг юм.

2020 оны ерөнхийлөгчийн сонгуулийн үр дүнг эсэргүүцсэн иргэдийн жагсаалд Дарья оролцож байжээ. Уг сонгуульд Беларусийг бараг 30 жил захирсан Александр Лукашенко үнэмлэхүй ялалт байгуулж байв.

Өнгөрсөн сард Беларусийн Цанын Холбоо түүний Олон Улсын Цанын Холбоонд бүртгэлтэй хувийн дугаарыг нь (FIS code) идэвхгүй болгожээ. Ингэснээр улсынхаа хамгийн ирээдүйтэй цаначдын нэг гэгддэг Дарья олон улсын тэмцээн уралдаануудад оролцох эрхгүй болсон юм.

2020 оны сонгуулийн үр дүнг эсэргүүцсэн Беларусийн олон алдартай тамирчин шоронд хоригдох, үндэсний шигшээ багаасаа хөөгдөх зэргээр шийтгүүлсэн юм.

“Дарья олон улсын уралдаан тэмцээнд оролцох эрхгүй болсон. Түүний спортын замналыг Беларусьт үргэлжлүүлэх боломжгүй болсон гэж би бодож байна. Бид ердөө жагсаалд оролцож, уриа хашхирсныхаа төлөө шоронд хоригдох магадлалтай болоод байгаа. Ердөө гурван сарын өмнө би эх орноосоо дүрвэнэ гэж зүүдлээ ч үгүй явлаа” гэж Сергей Долидович ярьжээ.

Монгол хэлний тухай хуулийн дагуу 2025 оны нэгдүгээр сарын 1-нээс эхлэн төрийн болон нутгийн өөрөө удирдах байгууллага албан хэргээ кирилл болон үндэсний хос бичгээр хөтлөн явуулах учиртай.

Үүнтэй холбоотойгоор Монгол Улсад амьдарч буй өвөрмонгол иргэд төрийн албаны шат шатны ажилтнуудад үнэ төлбөргүйгээр монгол бичиг заах уриалга гаргаж, “YesMongolbichig” аяныг эхлүүлэх гэж байгаагаа өнөөдөр мэдээллээ.

Аяныг санаачлагч Б.Балжинням “Монгол Улс 2025 оноос монгол бичгээ сэргээж байгаа тул миний бие энэ төслийг санаачлан эхлүүлэх гэж байна. Монгол бичиг бол манай сүр сүлд. Монгол үндэстнийг илэрхийлэх хамгийн гол бэлгэ тэмдэг бол монгол бичиг. Өөрийн бичгийг заавал сурч, сэргээх ёстой. Зарим хүн өөрийнхөө нэрийг монгол бичгээр бичиж чадахгүй байна. Иймд сэргээх ёстой гэж бодож байна. Сургалт гуравдугаар сарын 1-нээс эхэлнэ” гэлээ.

Аяны хүрээнд 21 аймгаар явж, дунд сургуулиудын багш нар болон төрийн албаныханд сургалт явуулах юм байна. Харин нийслэлд хүсэлтээ гаргасан аж ахуйн нэгж, албан байгууллагад үе шаттайгаар сургалт явуулахаар төлөвлөжээ. Уг аянд монгол бичгийн хичээлийг 10 гаруй зааж буй багш нар нэгдэхээ илэрхийлсэн байна.