Month: February 2022

УИХ-ын хаврын чуулганд өргөн барихаар төлөвлөж буй Улс төрийн намын тухай хуулийн төслийн агуулгад намын дотоод зохион байгуулалт ардчилсан зарчимд нийцсэн байх, хөрөнгө оруулалт, санхүүжилт болон зарцуулалтын ил тод байдлыг хангах, эмэгтэй, эрэгтэй улстөрчдийн тэгш гарааны нөхцөлийг хэрхэн хангах талаар санал солилцох “Улс төрийн нам ба тэгш гараа” уулзалт, хэлэлцүүлэг болов.

Энэ үеэр УИХ-ын гишүүн Ц.Мөнхцэцэг “Намд хэдий хэмжээний санхүүжилт орсон, хэрхэн олон нийтэд тайлагнадаг нь тодорхойгүй байна. ХҮН нам анх санхүүжилтээ ил болгож байсан бол МАН хоёрдугаар сарын 1-нээс санхүүжилтээ ил болгосон. Улс төрийн намууд санхүүжилтээ тайлагнахгүй байгаа нь хууль бусаар санхүүжих эрсдэлийг дагуулж байна. Тиймээс улс төрийн намын санхүүжилт, бүх орлого, зарлагыг ил болгох ёстой гэж үзэж байна.

Тухайн намууд хөгжлийн бэрхшээлтэй иргэд, эмэгтэйчүүдийн улс төрийн оролцоог дэмжсэн тохиолдолд нэмэлт санхүүжилтийг олгодог болно. Намын санхүүгийн дэмжлэгийг зөвхөн УИХ-д суудалтай намуудад олгодог байдлыг өргөжүүлж өгсөн.

Нам бүх зардлын тайлангаа сонгуулийн төв байгууллагад хүргүүлнэ. Сонгуулийн төв байгууллага тухайн намуудад хэрхэн санхүүжилт хуваарилах, санхүүгийн тайланд алдаа байна гэдэгт үндэслэж дараагийн санхүүжилтийг олгоно. Намын санхүүгийн үйл ажиллагаанд намын дарга захиран зарцуулах эрхтэйгээр оролцохыг хориглож байгаа. Өөрөөр хэлбэл, нам болгон санхүүгийн асуудал хариуцсан удирдах ажилтан ажиллана.

“Монголын ардчилсан холбооны гишүүд, үүсгэн байгуулагчдын үндэсний зөвлөгөөн” гэгчийг зохион байгуулсан нэр бүхий иргэдийн үйл ажиллагаа нь гэмт хэргийн шинжтэй гэж үзэж байгаа тул МоАХ-оос мэдээлэл хийж байна.

МоАХ-ны төлөөлөл “С.Эрдэнэ, Б.Бурмаа, Л.Ганхөлөг, Д.Монголхүү, Д.Рэнцэнтавхай, Д.Цогтбаатар, М.Зундуйдаваа, А.Цэрэнбат нар нь хоёрдугаар сарын 18-нд Монголын Үйлдвэрчний эвлэлийн соёлын төв ордонд “Монголын Ардчилсан холбооны гишүүд, үүсгэн байгуулагчдын үндэсний зөвлөгөөн” гэх Монгол Улсын хууль тогтоомж, Монголын Ардчилсан холбооны дүрмийг илэрхий зөрчсөн, гэмт хэрэг, зөрчлийн шинжтэй хууль бус үйл ажиллагааг зохион байгуулж, Монголын Ардчилсан холбоо НҮТББ-ын гишүүд, дэмжигч иргэдийг залилсан байх тул энэхүү гомдлыг гаргаж байна.

Монголын Ардчилсан холбооны дүрэм, журмыг илт зөрчиж, бусдыг төөрөгдөлд оруулж, Монголын Ардчилсан холбоо гэдэг байгууллага шинээр байгуулж буй,зохион байгуулалтыг нь өөрчилж буй мэтээр дураараа загнаж байгаа үйлдэл нь Монгол Улсын Эрүүгийн хуульд зааснаар гэмт хэргийн шинжтэй байна гэж үзээд Цагдаагийн байгууллагад албан ёсоор гомдол гаргаж байгаа юм. Иргэдийг төөрөгдөлд оруулж, зориудаар улс төрийн намын үйл ажиллагаандаа МоАХ-г ашиглахын тулд залилан мэхлэх гэмт хэргийн шинжтэй үйлдлүүд хийж байна.

Цаашид МоАХ-ны тамга, тэмдэг нэр лого-г дураараа ашиглаж байгаа үйлдлийг таслан зогсоохгүй бол улс төрийн намын үйл ажиллагаанд ашиглаж байгаа зүйл гарч байна. МоАХ улс төрийн нам биш” гэж мэдээллээ.

Авлигатай тэмцэх газраас Хөгжлийн банкны зээлдэгч нарыг шалгаж байгаа билээ. Тус газрын Мөрдөн шалгах хэлтсээс Хөгжлийн банкны асуудалтай холбогдууланУИХ-ын гишүүн Г.Амартүвшин, Х.Ганхуяг, Г.Дамдинням нарт эрүүгийн хэрэг үүсгэн шалгаж эхэлсэн талаар эх сурвалж мэдээллээ.

Тодруулбал, УИХ-ын гишүүн Г.Амартүвшин Хөгжлийн банкны гүйцэтгэх захирлаар ажиллаж байх үедээ УИХ-ын гишүүн Г.Дамдинням, Х.Ганхуяг нарын “Вертекс майнинг партнер” ХХК-д 33 тэрбум төгрөгийн зээлийг эрх мэдэл, албан тушаалаа урвуулан ашиглан хууль бусаар олгосноос гадна авсан зээлээ зориулалтын бусаар ашигласан байж болзошгүй гэх баримтад тулгуурлан шалгаж эхэлсэн байна.

УИХ-ын гишүүний бүрэн эрх хуулиар хамгаалагдсан байдаг тул бүрэн эрхийг нь түр түдгэлзүүлж шалгадаг. Дээрх гурван гишүүний бүрэн эрхийг түдгэлзүүлж, яллагдагчаар татан шалгах саналыг Ерөнхий прокурорын газраас УИХ-д гаргах учиртай. Өнөөдрийн байдлаар УИХ-ын гишүүний бүрэн эрхийг түдгэлзүүлэх саналыг хүргүүлсэн эсэхийг тодруулахад “Одоогоор тийм санал гаргаагүй байна” гэж прокуророос мэдээлэ

Бүх шатны сургууль, цэцэрлэг хичээллэж байгаа учир эцэг эхчүүдийг хүүхдэдээ тавих хараа хяналтаа сайжруулах, 10 хүртэлх насны хүүхдийг бие даалган хөдөлгөөнд оролцуулахгүй байхыг анхааруулж байна.

“Явган зорчигч 10 хүртэлх насны хүүхдийг замын хөдөлгөөнд харгалзаж явахдаа өөрөөсөө салгахгүй хөтлөх, тэврэх, үүрэх, хүүхдийн тэргэнд түрэх зэргээр авч явахаар заасан” байдаг тул эцэг, эх, асран хамгаалагч нар хүүхдийнхээ аюулгүй байдлыг хангаж хөдөлгөөнд оролцоно уу.

Хүүхдийг зохион байгуулалттай тээвэрлэх, автомашинд тээвэрлэх зорчигчдын тоо нь үйлдвэрээс тавьсан суудлын тооноос илүүгүй байх бөгөөд суудал бүр нь хамгаалах бүсээр тоноглогдсон байна. Суудлын автомашинд болон ачааны автомашины жолоочийн бүхээгт 10 хүртэлх насны хүүхдийг тээвэрлэхдээ биеийн жин, өсөлтөд нь тохирсон зориулалтын нэмэгдэл суудал буюу хамгаалах хэрэгсэл ашиглана гэсэн замын хөдөлгөөний дүрмийн 23.7, 8 дахь заалтыг баримтлан хөдөлгөөнд соёлтой оролцохыг уриаллаа.

Монгол Улсын Замын хөдөлгөөний дүрмийн тавдугаарт “Явган зорчигчийн үүрэг: “5.6. Явган зорчигч нь явган хүний гарц буюу гармаар зам хөндлөн гарна. Хэрэв үзэгдэх хүрээнд явган хүний гарц, гарам байхгүй бол замын дагуу хоёр тийш сайн харагдах, хайс, хашилтгүй хэсгээр, ойртон ирж яваа тээврийн хэрэгслийг өнгөрүүлэн эгц хөндлөн гарна” гэж заасан байдаг.

Мөн дүрмийн 5.2-д “Харанхуй үед гэрэлтүүлэггүй замд болон үзэгдэлд хангалтгүй нөхцөлд зорчих хэсгийн зах буюу хөвөөгөөр явах тохиолдолд явган зорчигч нь жолоочид харагдах нөхцөлөө сайжруулах үүднээс аль болох тод гэгээлэг өнгийн, боломжтой бол гэрэл ойлгох шинж чанар бүхий хувцас хэрэглэл, эд зүйлстэй явбал зохино” гэсэн зөвлөмжийн шинжтэй заалт байдаг.

Явган зорчигч хэлбэрээр хөдөлгөөнд оролцох үедээ явган хүний гарцаар, тээврийн хэрэгслийг бүрэн гүйцэд зогссоны дараа аюулгүй байдлаа хангаж зам хөндлөн гарах, жолоочид харагдах нөхцөлөө сайжруулах үүднээс гэрлээр анхааруулж зам хөндлөн гарахыг цагдаагийн байгууллагаас зөвлөлөө.

Түүнчлэн тээврийн хэрэгслийн жолооч нарыг “Явган хүний гарцын өмнө тээврийн хэрэгсэл зогссон буюу хурдаа хасаж байвал зэрэгцээ эгнээнд араас нь ирсэн жолооч мөн хурдаа хасах буюу зогсож, Замын хөдөлгөөний дүрмийн 16.1, 16.2-т заасныг баримталж хөдөлгөөнөө үргэлжлүүлнэ” гэсэн заалтыг баримталж хөдөлгөөндөө соёлтой оролцохыг Тээврийн цагдаагийн албанаас анхаарууллаа.

Өнгөрсөн амралтын өдрүүдээр Тээврийн цагдаагийн албаны жижүүрийн шуурхай удирдлагын хэлтэст нийт 568 дуудлага мэдээлэл иржээ. Үүнээс зам тээврийн ослын шинжтэй 446 дуудлага мэдээллийг хүлээн авч шийдвэрлэж ажилласан байна. Бүртгэгдсэн зам тээврийн ослын улмаас 11 хүн гэмтэж, бэртсэний ес нь нийслэлд, хоёр нь орон нутагт бүртгэгдсэн байна. Ноцтой зам тээврийн ослын улмаас орон нутагт нэг хүний амь нас хохирсон байна.

Хүн гэмтсэн ослыг хэлбэрээр нь авч үзвэл:

Нийслэлд:

• Явган зорчигч мөргөх хэлбэрээр долоон осол бүртгэгдэж, долоон хүн гэмтсэн.
• Мөргөлдөх хэлбэрээр хоёр осол бүртгэгдэж, хоёр хүн гэмтсэн.

Орон нутагт:

• Мөргөлдөх хэлбэрээр нэг осол бүртгэгдэж нэг хүн гэмтсэн.
• Явган зорчигч мөргөх хэлбэрээр нэг осол бүртгэгдэж, нэг хүн гэмтэж, нэг хүн амиа алджээ.

Өнгөрсөн долоо хоногт хүүхэд өртсөн гурван осол бүртгэгдэж, гурван хүүхэд гэмтэж бэртсэн байна. Явган зорчигч нь 10 хүртэлх насны хүүхдийг замын хөдөлгөөнд харгалзаж явахдаа өөрөөсөө салгахгүй хөтлөх, тэврэх, үүрэх, хүүхдийн тэргэнд түрэх гэх мэт авч явахаар заасан байдаг тул эцэг, эх, асран хамгаалагчид хүүхдийнхээ аюулгүй байдлыг хангаж хөдөлгөөнд оролцохыг ТЦА-аас анхаарууллаа.

Түүнчлэн гудамж замд зохион байгуулсан хяналт, шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 150 зөрчил бүртгэгдсэний нийслэлд 111, орон нутагт 39 зөрчил тус тус илрүүлж, учирч болох эрсдэлээс урьдчилан сэргийлэн ажиллажээ. Монгол Улсын Замын хөдөлгөөний дүрэмд жолооч нь зам болон цаг агаарын нөхцөл байдлаас шалтгаалан тээврийн хэрэгслийг зогсоох боломжтой бага хурдтай зорчхоор заасан байдаг. Иймд замын хөдөлгөөнд оролцогч та бүхэн өвлийн улиралд тээврийн хэрэгслийнхээ дугуйг зориулалтын өвлийн улирлын дугуйгаар солих, халтиргаа гулгаатай замд хурдыг зөвшөөрөгдсөн хэмжээнээс 20-30 хувиар бууруулж зорчихыг Тээврийн цагдаагийн албанаас анхаарууллаа.

Нийслэлийн хэмжээнд энэ оны хоёрдугаар сарын 14-20-ны өдрүүдэд ахуйн гал түймрийн 34, аврах ажиллагааны хоёр, нийт 36 удаагийн дуудлага бүртгэгджээ. Дуудлагын дагуу нийслэлийн Онцгой байдлын алба хаагчид үүргээ гүйцэтгэж, таван иргэний амь, 323 сая төгрөгийн өмч хөрөнгийг авран хамгаалсан байна. Он гарсаар нийслэлийн хэмжээнд ахуйн 381 гал түймэр, 24 аврах ажиллагааны буюу 405 удаагийн дуудлагатай байгаа нь өнгөрсөн оны мөн үетэй харьцуулахад 27,3 хувиар өссөн үзүүлэлттэй байна гэж нийслэлийн Онцгой байдлын газраас мэдээллээ.