Украины нөхцөл байдлын талаар ГХЯ-ны бодлого, төлөвлөлтийн газрын захирал Г.Бямбасүрэн өнөөдөр мэдээллээ.

Тэрбээр “Украинд нөхцөл байдал амаргүй хэвээр байгаа. Өнгөрсөн 24 цагийн хугацаанд “Их 7” болон НҮБ-ын Аюулгүйн Зөвлөлийн зэрэг хэд, хэдэн уулзалт олон улсын түвшинд явагдсаныг хэвлэл, мэдээллийн байгууллагууд мэдээлж байгаа. Өнөөдөр үүрээр хүртэлх хугацаанд НҮБ-ын Аюулгүй Зөвлөл Оросын үйл ажиллагааг буруутгасан тогтоолыг батлах асуудлаар хэлэлцсэн ч өнөөдөр тодорхой шийдэлд хүрээгүй хэвээр байна.

Сөргөлдөгч холбогдох талуудын зүгээс яриа, хэлэлцээний ширээний хойно сууя гэдэг санаачилгууд гарсан. Гэхдээ өнөөдрийн байдлаар тодорхой үйл ажиллагаа явагдсан, энэ чиглэлээр ахиц гарсан зүйл ажиглагдахгүй хэвээр байгаа. Энэхүү нөхцөл байдлыг бид анхааралтай ажиглаж байгаа нь ойлгомжтой. ГХЯ-ны зүгээс иргэдээ татан авах асуудалд бүх бололцоогоо дайчлан ажиллаж байна” хэмээн ярилаа.

ГХЯ-наас Украинд байгаа иргэдийг татан авах ажлын талаар мэдээлэл өглөө.

ГХЯ-ны Консулын газрын захирал Б.Болд “Өчигдөр Монгол Улсын дөрвөн иргэн Польшийн хилээр нэвтэрсэн. Гурав нь өнөөдөр Монгол руу ниссэн бол нэг иргэн хувийн ажлаар өөр улс руу зорчсон. Өнөөдөр дөрвөн монгол иргэн Польш улсын хилээр нэвтэрч, Варшав дахь ЭСЯ-ны ажилтан тосож авсан. Удахгүй Варшав руу хөдөлнө. Нэг иргэнээ Польш-Украины хилийн бүсээс олж авсан байгаа. Ингээд өнөөдрийн байдлаар нийт найман иргэн Польшийн хилээр нэвтрээд байна.

Киевээс 13 монгол иргэн буюу 11 оюутан, хоёр байнгын оршин суугч иргэн, Одесс хотоос гурван монгол иргэн Украины хил рүү одоо ирж байгаа. Эдгээр иргэдийг авахаар Унгар, Чех дэх манай ЭСЯ-ны ажилтнууд Польшийн хил дээр ирээд байна. Иргэдээ авахад туслалцаа дэмжлэг үзүүлэх зорилгоор төвөөс буюу ГХЯ-наас нэмэлтээр орос, польш хэлтэй консулын ажлын туршлагатай хүмүүсээ өнөөдөр Варшав руу явуулсан байгаа.

Нутаг буцах хүсэлтээ гаргасан иргэдээс Киевт дөрөв, Харьковт 23, Киевоградад хоёр монгол оюутан байгаа. Киевоградад байгаа хоёр оюутныг ойрын хугацаанд Өргөмжит консултайгаа хамтран татан авч Польш улсад аваачихаар ажиллаж байна. Эдгээр иргэд болон ар гэрийнхэнтэй нь холбоотой байгаа.

Би сая Харьковт байгаа монгол оюутантай холбогдсон. Ерөнхийдөө өнөөдөр нөхцөл байдал харьцангуй намжсан, хоргодох байрнаасаа гараад оюутны байрандаа ирсэн мэдээллийг өглөө.

Украины нөхцөл байдал сүүлийн үед хүндэрсэнтэй холбогдуулаад зарим иргэн нутаг буцах хүсэлтээ гаргаж байна. Зарим бичиг баримттай холбоотой хүндрэлүүд гарч байгааг газар дээр нь шийдвэрлээд явж байна.

Өнөөдрийн байдлаар Украинд 250,000 гаруй гадаадын иргэн байгаа бөгөөд үүнээс 155 орны 76,000 орчим оюутан бий гэсэн мэдээлэлтэй.

Бусад улсуудын хувьд манайхтай адил зөвлөгөөг иргэддээ өгч байна. Тухайлбал АНУ, Герман зэрэг Европын орны зүгээс агаарын хил хаалттай байгаа тул иргэдээ газраар хил залгаа орнууд руу гарахыг зөвлөж, тэндээсээ иргэдээ татан авах ажлыг зохион байгуулж байгаа” гэсэн мэдээллийг өглөө.

Засгийн газрын 2022 оны хоёрдугаар сарын 16-ны өдрийн 73 дугаар тогтоолын дагуу Итали улсад зохион байгуулагддаг “Венецийн дүрслэх урлагийн олон улсын биенналь”-д, Францын “Каннын кино наадам”-д Монгол уран бүтээлчид Соёлын яамны дэмжлэгтэйгээр оролцох боломжтой болсон билээ.

Энэ дагуу 75 дахь удаагийн “Каннын кино наадам”-ын дэргэдэх “Marché Du Films” платформд Монголын арилжааны болон арт хаус шинэ бүтээлийг сурталчлах талбайг Соёлын яам албан ёсоор ажиллуулахаар болсон. Энэ талаар удахгүй дэлгэрэнгүй мэдээлэл өгч, “Каннын кино наадам”-д сурталчлах кино санал авна.

Мөн “Каннын кино наадам”-ын бүрэн болон богино хэмжээний уран сайхны киноны уралдаант хэсэгт бүтээлээ илгээх гэж байгаа уран бүтээлчдийн бүртгэлийн төлбөрийг Соёлын яам хариуцах бөгөөд “Каннын кино наадам”-д өрсөлдөхөөр шалгарсан тохиолдолд бүх талаар дэмжин ажиллана.

Дараах шаардлагыг хангасан кино уран бүтээл Каннын кино наадамд бүртгүүлэх эрхтэй байдаг. Соёлын яамнаас бүртгэлийн талаар мэдээлэл, зөвлөгөө тусламж авах боломжтой.

Бүтээл хүлээн авах эцсийн хугацаа 2022 оны гуравдугаар сарын 1-ний өдөр байна.

Бүрэн хэмжээний уран сайхны кино нь сонгон шалгаруулалтад оролцохдоо дараах шалгуурыг заавал хангасан байна. Үүнд:

1. Каннын кино наадмаас өмнөх 12 сарын хугацаанд бүтээгдсэн байх
2. Монгол Улсаас өөр улсад гараагүй байх
3. Кино нь 60 минутаас дээш урттай байх
4. Олон улсын аливаа уралдаан, соёл урлагийн арга хэмжээнд нэр дэвшин оролцоогүй байх; (Өмнө нь өөр кино наадамд оролцсон тохиолдолд Каннын кино наадамд оролцох боломжгүй байдаг)
5. Интернэтэд тавигдаагүй, “DVD”-нд хуулагдан гараагүй байх.

Богино хэмжээний кино нь сонгон шалгаруулалтад оролцохдоо дараах шалгуурыг заавал хангасан байна. Үүнд:

1. Наадмаас өмнөх 12 сарын хугацаанд бүтээгдсэн байх
2. Богино хэмжээний киноны урт нь кредитийг оруулаад 15 минутаас хэтрэхгүй байх
3. Монгол Улсаас өөр улсад гараагүй байх
4. Олон улсын аливаа уралдаан, соёл урлагийн арга хэмжээнд нэр дэвшин оролцоогүй байх; (Өмнө нь өөр кино наадамд оролцсон тохиолдолд Каннын кино наадамд оролцох боломжгүй байдаг)
5. Интернэтэд тавигдаагүй, “DVD”-нд хуулагдан гараагүй байх юм хэмээн тус яамнаас мэдээллээ.

Уулзалтаар охид, эмэгтэйчүүд гэр бүлдээ хайр дүүрэн, амар тайван, аз жаргалтай амьдрахад юунд илүү анхаарлаа хандуулах, хүний эрхийн зөрчил түүний шийдэл хийгээд, эрүүл чанартай, бүтээлч, идэвхтэй амьдрахын утга учрын талаар оролцогчдод мэдээлэл хийсэн юм. Мөн аймаг орон нутгийн шийдвэр гаргагчид уулзалтад оролцож, охид, эмэгтэйчүүдийн өмнө тулгамдсан асуудал, шийдлийн талаар дуу хоолойгоо хүргэж, нөлөөллийн арга хэмжээг хамтран зохион байгуулсан юм. Тус уулзалтад Улаангом, Бөхмөрөн, Давст, Зүүнхангай сумын охид, эмэгтэйчүүдийн төлөөлөл оролцлоо.

Энэ үеэр “Мэдье, оролцъё, манлайлъя” сэдэвт уулзалтад оролцогчдын төлөөлөлтэй уулзаж, сэтгэгдлийг нь сонслоо.

-“Жендэрт суурилсан хүчирхийллийг багасгахад олон нийтийн хандлагыг өөрчлөх, эмэгтэйчүүдийг эрсдэлд оруулахгүй байх, охидоо хамгаалах чиглэлээр анхаарал хандуулах цаг болсон. Энэхүү зөвлөлдөх уулзалт нь цаг үеэ олсон, тулгамдсан олон асуудлыг хөндсөн, шийдэх арга замыг эрэлхийлсэн, сайшаалтай ажил болж байна. Хүрэлцэн ирсэн эмэгтэйчүүд болон санаачлан зохион байгуулсан “Сайн тус төв” ТББ-д талархал илэрхийлье” хэмээн аймгийн ИТХ-ын дарга Ц.Батболд хэллээ.

-“Би энэхүү уулзалтад сумынхаа охид, эмэгтэйчүүдийг төлөөлөн оролцохоор 360 км-ийн цаанаас зорин ирлээ.

Охид, эмэгтэйчүүдийн эрх, хамгаалал, жендэрт суурилсан хүчирхийллийн эсрэг тэмцэх ажилд бид бүхний оролцоо маш чухал. Энэ талаар мэдээлэл, туршлага хуримтлуулан бусдадаа нөлөөлж ажиллахыг хүсэж байна. Алслагдсан бүс нутаг гэлтгүй, улс даяар жендэрт суурилсан хүчирхийлэл үйлдэгдсээр байна. Иймд эмэгтэйчүүд бид дуу хоолойгоо нэгтгэж, хамтарч ажиллах шаардлагатай” хэмээн Зүүнхангай сумын ИТХ-ын төлөөлөгч Ц.Ганбаатар хэлсэн юм.

-“Энэхүү уулзалтад өсвөр үеийн төлөөлөл болон оролцож байна. Миний хувьд өмнө нь энэ төрлийн уулзалт, сургалтад хамрагдаж байгаагүй. Мэдэхгүй олон зүйлээ олж мэдсэн, үр дүнтэй уулзалт байлаа. Ялангуяа хүний эрхийн талаарх ойлголтоо дээшлүүлсэн. Манай суманд өсвөр үеийнхний дунд жендэрт суурилсан хүчирхийллийн талаарх мэдээлэл хомс байдаг. Иймд уулзалтаар олж авсан мэдлэгээ сумандаа очоод үеийн найзууддаа хуваалцах болно” хэмээн Давст сумын ЕБС-ийн сурагч Б.Нандин-Эрдэнэ хэллээ.