Month: February 2022

Японы автомашин үйлдвэрлэгч “Toyota Motor” компани “COVID-19” цар тахлын улмаас үйлдвэрлэл саарч, чипний хомсдол нүүрлээд байгаатай холбогдуулан жилд үйлдвэрлэх автомашины зорилтоо хагас саяар бууруулж буйгаа өнөөдөр мэдэгдлээ.

“Манай компани ирэх гуравдугаар сарын 31 хүртэлх санхүүгийн жилд 8.5 сая тээврийн хэрэгсэл үйлдвэрлэхээр төлөвлөж байгаа нь өмнөх тооцооноос /9 сая/ буурсан үзүүлэлт болж байна” гэж дэлхийн автомашин үйлдвэрлэгч хамгийн том компани мэдээлжээ. Тус компанийн үйл ажиллагааны ашиг өнгөрсөн оны сүүлийн улиралд 21 хувиар буурсан юм.

“Бид чипний нийлүүлэлт богино хугацаанд тогтворжино гэж үзэхгүй байгаас гадна коронавирусний цар тахлын нөхцөл байдал тодорхойгүй байгааг харгалзан ийнхүү шийдвэрлэсэн. Мөн тодорхойгүй байдлыг ирэх санхүүгийн жилийг дамнан үргэлжилж болзошгүй хэмээн таамаглаж байна” гэж “Toyota” компанийн төлөөлөгч сэтгүүлчдэд мэдээлжээ.

Энэ санхүүгийн жилд дэлхийн хэмжээнд 9.3 сая тээврийн хэрэгсэл үйлдвэрлэхээр төлөвлөж байсан “Toyota” нь дэлхийн бусад томоохон автомашин үйлдвэрлэгчдийн нэгэн адил “COVID-19” цар тахлын үр дагаврын улмаас үйлдвэрлэлийн зорилтоо бууруулахаас өөр аргагүйд хүрсэн юм. Мөн тээврийн хэрэгсэл тутмаас олох орлогоо нэмэгдүүлэхийн тулд зардлаа бууруулсан байна.

Засгийн газрын хуралдаанаас гаргасан шийдвэрийн талаар холбогдох албаныхан мэдээллээ. Энэ үеэр тэтгэврийн нэмэгдэл ба хөдөлмөрийн хөлсний доод хэмжээг хэрхэн уялдуулах талаар сэтгүүлчийн асуултад Сангийн сайд Б.Жавхлан “Сүүлийн хоёр жил тэтгэврийн нэмэгдэл хийгдээгүй байсан. Тулгамдаж буй эрсдэлтэй асуудлуудтай уялдуулан тэтгэврийн нэмэгдлийг хийсэн. Мөн хөдөлмөрийн хөлсний доод хэмжээг эргэн харах шаардлага үүсч буй юм. Энэ жил тэтгэвэр нэмсэнтэй холбоотойгоор бүтээн байгуулалтуудын хөрөнгө оруулалт дээр хэмнэлтийг хийхээр төсөвтөө тодотгол хийж байгаа юм. Энэ нь ирэх жилийн төсөв дээр орж ирнэ гэсэн үг.

ХНХЯ-наас хөдөлмөрийн хөлсний доод хэмжээтэй холбоотой асуудлуудыг судална. Хөдөлмөрийн хөлсний доод хэмжээ нь тэтгэврийн хэмжээнээс доогуур байж болохгүй нь ойлгомжтой. Үүнийг судалж байж шийдэх ёстой. Энэ бол цаг хугацааны л асуудал” гэлээ.

Монгол Улсын шүүхийн тухай хуулийн 25.8.7-д заасны дагуу Үндсэн хуулийн цэцийн гишүүнд нэр дэвшүүлэх асуудлыг Улсын дээд шүүхийн нийт шүүгчийн хуралдаанаар хэлэлцэх бэлтгэл ажлын хүрээнд Үндсэн хуулийн цэцийн гишүүний албан тушаалд нэрээ дэвшүүлэх хүсэлтэй иргэдийн материалыг 2022 оны хоёрдугаар сарын 11-ний өдрийн 17:30 цаг хүртэл хугацаанд хүлээн авахаар Улсын дээд шүүхийн цахим хуудсаар мэдээлсэн.

Гэвч, Үндсэн хуулийн цэцийн гишүүний тогтоолоор нэр бүхий иргэний мэдээлэлд үндэслэн маргаан хянан шийдвэрлэх ажиллагаа үүсгэж, улмаар Үндсэн хуулийн цэцийн гишүүнд нэр дэвшүүлэх ажиллагааг түдгэлзүүлсэн тухай Улсын дээд шүүхэд мэдэгдсэн тул Монгол Улсын шүүхийн тухай хуулийн 25.8.7-д заасны дагуу явагдаж байсан Үндсэн хуулийн цэцийн гишүүнд нэр дэвшүүлэх ажиллагаа түдгэлзэх болсныг мэдэгдэж байна.

Эх сурвалж: Улсын дээд шүүхийн Тамгын газрын Хэвлэл мэдээлэл, олон нийттэй харилцах хэлтэс

Байгаль орчин, аялал жуулчлалын яамны Төрийн нарийн бичгийн дарга Э.Баттулгаар ахлуулсан Ажлын хэсэг НҮБ-ын Хөгжлийн хөтөлбөрийн Монгол дахь суурин төлөөлөгч Элейн Конкиевич болон түүний баг бүрэлдэхүүнийг хүлээн авч уулзлаа.

Уулзалтаар байгалийн нөөцөөс хамааралтай хөдөөгийн иргэдийн уур амьсгалын өөрчлөлтөд дасан зохицох чадамжийг дээшлүүлэх зорилгоор “Уур амьсгалын өөрчлөлтөд Монгол орны хөдөөгийн иргэдийн дасан зохицох чадамж болон эрсдэлийн менежментийг сайжруулах нь” төслийн 2021 оны явц, үйл ажиллагааг хэрхэн эрчимжүүлэх, 2022 оны төлөвлөлт, тулгамдсан асуудлын талаар харилцан санал солилцов.

2021-2028 оны хооронд Дорнод, Сүхбаатар, Завхан, Ховд аймгийн 68 суманд хэрэгжих уг төсөл нь

• Үндэсний болон бүс нутгийн түвшинд газар, усны ашиглалтыг уур амьсгалын мэдээлэлд тулгуурлан төлөвлөж, хэрэглэдэг болох,
• Уур амьсгалын өөрчлөлтөд зохицсон ус, хөрсний менежментийн арга ажиллагааг өргөн хүрээнд нэвтрүүлэн байгалийн нөөцийн менежментэд малчдын оролцоог нэмэгдүүлэх,
• Гарал үүсэл нь тогтвортой, уур амьсгалын өөрчлөлтөд тэсвэртэй малын гаралтай бүтээгдэхүүнийг зах зээлд нийлүүлэх малчдын чадавхыг нэмэгдүүлж, бэхжүүлэх гэсэн үндсэн гурван бүрэлдэхүүн хэсгээр хэрэгжинэ.

Үүний үр дүнд:

• Уур амьсгалын өөрчлөлтөд эмзэг иргэд, орон нутаг, бүс нутгийн өртөмтгий байдал багасч, даван туулах чадвар нэмэгдсэн байна.
• Мөн эко системийн даац, үйлчилгээ сайжирсан байна.
• Түүнчлэн уур амьсгалын мэдээлэлд түшиглэсэн төлөвлөлтийг дэмжсэн институцийн болон зохицуулалтын тогтолцоо бэхэжсэн байх юм.

Монгол-Японы эмнэлгийг Анагаахын шинжлэх ухааны үндэсний их сургуулийн харьяанд шилжүүлж, тус эмнэлгийн үйлчлэх хүрээг тогтоох, их сургуулийн эмнэлгийн тогтолцоог хөгжүүлэх, үйл ажиллагаанд нь хяналт тавьж ажиллахыг Боловсрол, шинжлэх ухааны сайд, Эрүүл мэндийн сайд нарт даалгажээ. Их сургуулийн эмнэлэг нь эмнэлгийн болон бусад мэргэшлээр суралцаж буй оюутан, эмч, эрүүл мэндийн ажилтанд анагаах ухаан болон эрүүл мэндийн боловсрол олгох, эмнэлгийн мэргэжилтнийг мэргэшүүлэх, давтан сургах, эрдэм шинжилгээ судалгааны ажил эрхлэхийн зэрэгцээ үндсэн болон төрөлжсөн мэргэшлээр эрүүл мэндийн тусламж үйлчилгээ үзүүлэх юм

Дэлхий даяар бүртгэгдсэн коронавирусний халдварын тохиолдлын тоо цар тахал дэгдсэнээс хойш 400 сая давсан тухай АНУ-ын Жонс Хопкинсийн Их сургууль мэдээлжээ.

Мягмар гаргийн шинэчилсэн мэдээллээр, дэлхий даяар коронавирусний халдварын 400 244 031 тохиолдол бүртгэгдэж, 5 761 208 хүн халдварын улмаас нас барсан байна.

Коронавирусний халдварын тохиолдлын тоо сар гаруйхны өмнө буюу нэгдүгээр сарын 7-ны өдөр 300 саяыг давсан байна. Өнгөрсөн сард халдварын хамгийн тохиолдол АНУ-д (15 149 517) бүртгэгдсэн бол Франц (8 623 947) хоёрдугаарт, Энэтхэг улс гуравдугаарт (6 463 821) оржээ.

2022 оны нэгдүгээр сарын 23-ны өдрөөс эхлэн Монгол Улс нь өндөр эрсдэлтэй улсын жагсаалтад орсон бөгөөд ХБНГУ-д нэвтрэх тохиолдолд 10 хоног тусгаарлагдах юм байна. Улаанбаатар хот дахь ХБНГУ-ын Элчин сайдын яамны Визийн хэлтсээс одоогийн байдлаар шинээр “C” ангиллын (айлчлал, бизнес, аялал жуулчлалын виз, хойшлуулж болох эмчилгээ) визийн мэдүүлгийг хүлээн авах боломжгүй хэвээр байгааг мэдэгдлээ. Эрүүл мэндийн шалтгаанаар болон өөр онцгой үндэслэл бүхий тохиолдолд визийн мэдүүлгийг хүлээн авах аж.