Month: December 2021

Өнөө маргаашдаа нутгийн зүүн хэсгээр жавартай хүйтэн байна.

2021 оны 12 сарын 29-ний 20 цагаас 12 сарын 30-ны 20 цаг хүртэлх цаг агаарын урьдчилсан мэдээ

Хур тунадас: Шөнөдөө зүүн аймгуудын нутгаар солигдмол үүлтэй, бусад нутгаар багавтар үүлтэй. Хэнтийн уулархаг нутаг болон Халх гол орчмоор цас орж, явган шуурга шуурна. Өдөртөө баруун аймгуудын нутгаар үүлшинэ, бусад нутгаар багавтар үүлтэй, нийт нутгаар цас орохгүй.

Салхи: Шөнөдөө нутгийн зүүн хагаст хойноос, бусад нутгаар баруунаас, өдөртөө баруун аймгуудын нутгийн хойд хэсгээр баруун өмнөөс хойш эргэж, бусад нутгаар баруун өмнөөс секундэд 4-9 метр, Алтайн салбар уулс болон тал, хээрийн нутгаар секундэд 12-14 метр хүрч ширүүснэ.

Агаарын температур: Шөнөдөө Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс, Байдраг голын хөндийгөөр 33-38 хэм, Хангай, Хөвсгөл, Хэнтийн уулархаг нутаг, Эг, Үүр, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр 26-31 хэм, цас багатай энгэр ээвэр газар болон говийн бүс нутгаар 15-20 хэм, бусад нутгаар 20-25 хэм, өдөртөө Увс нуур болон Дархадын хотгор, Завхан голын эх, Идэр, Тэс голын хөндийгөөр 23-28 хэм, Их нууруудын хотгор болон Хангай, Хөвсгөл, Хэнтийн уулархаг нутаг, Хүрэнбэлчир орчим, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын хөндийгөөр 12-17 хэм, цас багатай энгэр ээвэр газар болон говийн бүс нутгаар 2-7 хэм, бусад нутгаар 9-14 хэм хүйтэн байна.

УЛААНБААТАР ХОТ ОРЧМООР: Шөнөдөө үүл багасна, өдөртөө багавтар үүлтэй. Цас орохгүй. Салхи шөнөдөө хойноос, өдөртөө баруунаас секундэд 4-9 метр. Шөнөдөө Яармаг-Сонгины орчмоор 29-31 хэм, бусад хэсгээр 21-23 хэм, өдөртөө 10-12 хэм хүйтэн байна.

БАГАНУУР ОРЧМООР: Шөнөдөө үүл багасна, өдөртөө багавтар үүлтэй. Цас орохгүй. Салхи шөнөдөө хойноос, өдөртөө баруунаас секундэд 5-10 метр. Шөнөдөө 22-24 хэм, өдөртөө 13-15 хэм хүйтэн байна.

ТЭРЭЛЖ ОРЧМООР: Шөнөдөө үүл багасна, ялимгүй цас орно. Өдөртөө багавтар үүлтэй, цас орохгүй. Салхи хойноос секундэд 5-10 метр. Шөнөдөө 26-28 хэм, өдөртөө 12-14 хэм хүйтэн байна.

2021 оны 12 дугаар сарын 31-нээс 2022 оны 1 дүгээр сарын 04-нийг
хүртэлх цаг агаарын урьдчилсан төлөв

31-нд баруун аймгуудын нутгийн хойд хэсэг, төвийн аймгуудын нутгийн зарим газраар, 1-р сарын 01-нд төвийн аймгуудын нутгийн зүүн, зүүн аймгуудын нутгийн зарим газраар цас орж, цасан шуурга шуурна. Салхи 31-нд нутгийн зарим газраар, 1-р сарын 01-03-нд говь, тал, хээрийн нутгаар секундэд 13-15 метр хүрч ширүүснэ. Увс нуур болон Дархадын хотгор, Завхан голын эх, Хүрэнбэлчир орчим, Идэр, Тэс, Байдраг, Халх голын хөндийгөөр шөнөдөө 33-38 хэм, өдөртөө 22-27 хэм, Хангай, Хөвсгөл, Хэнтийн уулархаг нутаг, Эг, Үүр, Хараа, Ерөө, Туул, Тэрэлж, Хэрлэн, Онон, Улз, Халх голын хөндий, Дорнод-Дарьгангын тал нутгаар шөнөдөө 25-30 хэм, өдөртөө 12-17 хэм, цас багатай энгэр ээвэр газар болон говийн бүс нутгаар шөнөдөө 13-18 хэм, өдөртөө 3-8 хэм, бусад нутгаар шөнөдөө 19-24 хэм, өдөртөө 9-14 хэм хүйтэн байна. 2022 оны 1 дүгээр сарын 2-ноос нийт нутгаар өдөртөө хүйтний эрч бага зэрэг суларна.

Хүнсний барааны бүлгийн үнэ өмнөх оны мөн үеэс 19.6 хувь өсч инфляцын 5.1 нэгж хувийг бүрдүүлжээ. Үүний 2.1 нэгж хувийг мах, махан бүтээгдэхүүн, 0.9 нэгж хувийг хүнсний ногоо, 0.7 нэгж хувийг талх, гурил, будаа, 0.6 нэгж хувийг сүү, өндөг, 0.9 нэгж хувийг бусад хүнс тус тус бүрдүүлж байна. Хүнснээс бусад барааны бүлгийн үнэ өмнөх оны мөн үеэс 6.5 хувь өсөж, инфляцын 4.9 нэгж хувийг бүрдүүлжээ. Үүний 2.0 нэгж хувийг бензин, 0.6 нэгж хувийг зочид буудал, нийтийн хоол, дотуур байрны үйлчилгээ, 0.4 нэгж хувийг согтууруулах ундаа, тамхи , 0.4 нэгж хувийг боловсролын үйлчилгээ, 0.3 нэгж хувийг эм, тариа, эмнэлгийн үйлчилгээ, 0.2 нэгж хувийг хувцас, бөс бараа болон гутал, -0.4 нэгж хувийг орон сууц, ус, цахилгаан, хийн болон бусад түлш 1.4 нэгж хувийг бусад хүнс тус тус бүрдүүлж байна.

Хэрэглээний үнийн улсын индекс 2021 оны арваннэгдүгээр сарын байдлаар сарын инфляц 1.3 хувь, жилийн 10.5 хувь байна. Жилийн инфляцыг авч үзвэл 5.7 нэгж хувийг хүнснээс бусад бараа, 4.8 нэгж хувийг хүнсний барааны үнийн өсөлт бүрдүүлж байна. Улаанбаатар хотын хэрэглээний үнийн индекс арваннэгдүгээр сарын байдлаар сарын 1.5 хувь, жилийн 10 хувь байгаа бөгөөд үүний 5.1 нэгж хувийг хүнсний бараа, 4.9 нэгж хувийг хүнснээс бусад бараа бүрдүүлж байна. Хүнсний барааны бүлгийн үнийн өсөлтөд мах, махан бүтээгдэхүүний үнийн өсөлт голлон нөлөөлж, хүнснээс бусад барааны үнийн өсөлтөд бензиний үнэ өссөн нь нөлөөлжээ.

Хотын захиргааныхан Хан-Уул дүүрэгт шинээр баригдсан байр руу нүүх ажил үргэлжилж байна.

Нийслэлийн Засаг даргын хэвлэлийн төлөөлөгч Н.Сугар “Ерөнхий сайдын өгсөн үүрэг, чиглэлийн дагуу нийслэлийн төр захиргааны байгууллагууд үе шаттай нүүж байна. Өнөөдөр гэхэд өглөөний 06:00 цагаас нүүж эхэлсэн. Нийт 400 хүний ажлын байрыг Яармаг руу нүүлгэж байна. Нүүлгэлтийн зардалд 1.5 тэрбум төгрөг биш 90 сая төгрөг зарцуулж байгаа” хэмээн мэдээллээ.

Эргэн сануулахад энэ сарын 25-нд нийслэлийн Хот байгуулалт, хөгжлийн газар, Газар зохион байгуулалтын алба шинэ байр руугаа нүүж оржээ.

Сүүлийн 24 цагт улсын хэмжээнд 218 тохиолдол батлагджээ.

Шинээр илэрсэн тохиолдлуудын 41 нь гаднаас зөөвөрлөгдсөн бол үлдсэн нь дотоодын халдвар байна.

Дотоодын халдвар:

• 118 нь Улаанбаатар хотод,
• 59 нь орон нутагт бүртгэгдсэн байна.

Мөн хугацаанд коронавируст халдварын улмаас нэг хүн нас баржээ. Өнөөдрийн байдлаар COVID-19 халдварын улмаас нийтдээ 1,984 хүн эндээд байна. Талийгаачдын гэр бүл, төрөл төрөгсдөд гүн эмгэнэл илэрхийлье.

Коронавируст халдварын улмаас улсын хэмжээнд 1,775 иргэн эмнэлэгт хэвтэн эмчлүүлж байгаа бол хөнгөн хэлбэрийн оноштой 3,138 хүн Өрхийн эмчийн хяналт дор гэрээр эмчлүүлж байна.

Эмнэлэгт хэвтэн эмчлүүлж буй иргэдийн биеийн байдлыг үнэлбэл:

• Хөнгөн-648
• Хүндэвтэр-909
• Хүнд-195
• Маш хүнд-23 хүн байна.