Month: December 2021

Цар тахлын нөхцөл байдлаас шалтгаалан Хятад улс халдвар дамжихаас сэргийлэх зорилгоор Эрээн хилийн боомтоор гаргах экспорт, импортын ачаа барааг хүний (жолоочийн) оролцоогүйгээр явуулах, чингэлэг тээврээр татан авах, гаргах шийдвэр гаргасан. Энэ дагуу манай улс Эрээнтэй хиллэдэг Замын-Үүд боомт дээр чингэлэг тээврээр ачаа барааг татан авах, гаргах ажлын зохион байгуулах бэлтгэлийг бүрэн хангасан.

2021 оны 12 сарын 11-ний өдрөөс эхлэн халдвар хамгаалын шинэ зохион байгуулалт дор хоёр улсын хилээр ачаа бараа, Эрээн боомтод ачаатай байгаа 150 автомашин, хилийн дундын бүсэд саатсан манай улсын иргэдийн өмчлөлийн ачаатай болон ачаагүй 28 автомашин, хятад улаас худалдан авсан ч хил дээр хүлээгдэж байсан уул уурхайн 10 хүнд машин механизм, жип ангилалын шинэ 16 автомашинуудыг хилээр нэвтрүүлэх ажлыг эхлүүлээд байна.

Эхний ээлжинд Эрээн хотод түр саатсан манай улсын иргэдийн эзэмшлийн 150 ачааны автомашин, уул уурхайн машин механизмаас өчигдөр Хятадын талаас хилийн 0 цэг дээр байршуулсныг хүйтний улиралтай холбогдуулан манай хил гаалийнхан аль болох цаг алдалгүй шуурхай зохион байгуулж ажиллан шөнийн 23:00 цаг хүртэл Замын-Үүдээр нэвтрүүлсэн байна.

Өнөөдөр маргаашдаа багтаан үлдсэн ачааны машин, өөрөө явагч механизмыг энэ журмаар татан авч дууссаны дараа цаашдаа өдөрт 50 ачаатай чингэлэгийг хоёр талын хилийн боомтоор гаргах, байнгын ажиллагаанд оруулах байдлаар ажиллах юм.

Ийнхүү цөөнгүй хоног саатсан ачаа бараа, машин механизм, техник тоног төхөөрөмж Эрээн-ЗамынҮүдийн боомтоор нэвтэрч эхэллээ гэж Шадар сайдын Ажлын албанаас мэдээллээ.

Сүүлийн 24 цагийн хугацаанд улсын хэмжээнд 157 иргэн коронавирусийн халдвараар өвчилсөн нь PCR шинжилгээгээр батлагджээ.

Шинээр илэрсэн тохиолдлуудын хоёр нь гаднаас зөөвөрлөгдсөн бол 75 нь Улаанбаатар хотод, 80 нь орон нутагт бүртгэгдсэн байна.

Мөн өнөөдрийн байдлаар COVID-19 халдварын улмаас нийтдээ 1,960 хүн эндээд байна.

Одоогоор коронавируст халдварын улмаас улсын хэмжээнд 3,246 иргэн эмнэлэгт хэвтэн эмчлүүлж байгаа бол хөнгөн хэлбэрийн оноштой 6,090 хүн Өрхийн эмчийн хяналт дор гэрээр эмчлүүлж байгаа.

Эмнэлэгт хэвтэн эмчлүүлж буй иргэдийн биеийн байдлыг үнэлбэл:

• Хөнгөн-1,267
• Хүндэвтэр-1,571
• Хүнд-345
• Маш хүнд-63 хүн байна.

Шатрын спортыг түгээн дэлгэрүүлэх, хөгжүүлэх, шатар сонирхогчдыг дэмжих зорилгоор Нийслэлийн ИТХ-аас жил бүр Шатар сонирхогчдын нийслэлийн аварга шалгаруулах тэмцээнийг зохион байгуулдаг уламжлалтай. Тус тэмцээн бямба гарагт эхэлсэн бөгөөд хоёр өдөр үргэлжилнэ. Тэмцээнд дүүргийн аварга шалгаруулах тэмцээнээс шалгарсан 54 шатарчин оролцож байна.

Энэхүү тэмцээнээс 2021 оны Нийслэлийн аварга шатарчдыг шалгаруулж, улмаар 12 шатарчин Улсын Их Хурлын ивээл дор зохион байгуулах шатар сонирхогчдын Улсын аварга шалгаруулах тэмцээнд оролцох эрхтэй болно.

Шатар сонирхогчдын 2021 оны нийслэлийн аварга шалгаруулах тэмцээнийг нийслэлийн ИТХ-ын дарга Ж.Батбаясгалан нээж үг хэлэхдээ “Дүүргийнхээ шатар сонирхогчдоос оюун ухаанаараа манлайлан шалгарсан Та бүхэндээ Хурлын байгууллагын нэрийн өмнөөс болон хувиасаа халуун баяр хүргэе.

Мөн өнөөдрийн тэмцээнд нийслэлийн нутгийн захиргааны байгууллагуудаас төлөөлөл болж долоон төрийн албан хаагч оролцож байна. Өнөөдрийн тэмцээндээ амжилт гаргаж, Улсын аварга шалгаруулах тэмцээнд нийслэлийнхээ нэрийг өндөрт гаргаж оролцоно гэдэгт найдаж байна. Шатрын спортыг улс орон даяар жигд хөгжүүлэхэд үнэтэй хувь нэмэр оруулж буй УИХ-ын дарга, УИХ-ын Тамгын газар, Монголын шатрын холбоо, нийслэлийн шатрын холбооны хамт олонд Нийслэлийн ИТХ-ын зүгээс болон шатар сонирхогчдынхоо өмнөөс талархаж байгаагаа илэрхийлье” гэв.

Шатар сонирхогчдын 2021 оны нийслэлийн аварга шалгаруулах тэмцээний аваргууд энэ сарын 12-ны өдөр буюу маргааш тодорно.

Нийслэлийн ИТХ-ын ХМОНХТ

Шүүхийн сахилгын хороо арванхоёрдугаар сарын 9-ний өдрийн зөвлөгөөнөөр эрх бүхий байгууллагаас ирүүлсэн хоёр хүсэлтийг хэлэлцэн, нэг шүүгчийн бүрэн эрхийг сэргээж, гурван шүүгчийг огцруулах шийдвэрийг гаргажээ. Тодруулбал, Монгол Улсын Шүүхийн тухай хуулийн дагуу шинээр байгуулагдсан сахилгын хороо өргөдөл гомдлын дагуу санал хүсэлт хүлээн авч сахилгын хэргийг хянан шийдвэрлэсэн байна.

Монгол Улсын Шүүхийн тухай хуульд тус хороо нь шүүгчийг албан тушаалаас нь түдгэлзүүлэх, огцруулах болон сахилгын бусад шийтгэл ногдуулах чиг үүрэг бүхий бие даасан байгууллага байхаар хуульчилсан бөгөөд орон тооны есөн гишүүнтэй.

Тус хороо өнгөрсөн хугацаанд нийт зургаан удаагийн зөвлөгөөн зохион байгуулсан. Эдгээр зөвлөгөөнөөр Сахилгын хорооны зөвлөгөөний дэг, Сахилгын хэрэг, өргөдөл, мэдээлэл, гомдол, эсэргүүцэл, санал хүсэлт хүлээн авах, хуваарилах болон сахилгын хэрэг хянан шийдвэрлэх гишүүн, бүрэлдэхүүнийг томилох журам, Сахилгын хорооны ажлын албаны дүрэм, зарим шийдвэрийн загвар зэргийг баталсан байна.

Монгол Улсын Зэвсэгт хүчний Агаарын цэргийн командлал болон АНУ-ын Номхон далайн Агаарын хүчнүүд хоорондын зөвлөлдөх уулзалтыг Зэвсэгт хүчний Агаарын цэргийн командлал анх удаа бие даан эх орондоо амжилттай зохион байгуулж явууллаа.

Зөвлөлдөх уулзалтад Монгол Улсын Зэвсэгт хүчний Агаарын цэргийн командлагч хошууч генерал О.Энхбаяр, хурандаа Б.Энхзоргол, АНУ-ын Номхон далайн агаарын хүчний командлагчийн Үндэсний гвардын орлогч дарга хошууч генерал Дэвид Бурги болон Монгол Улсын Батлан хамгаалах яам, Зэвсэгт хүчний Жанжин штаб, Агаарын цэргийн командлал, АНУ-ын Номхон далайн Агаарын хүчний штаб, АНУ-ын Энэтхэг-Номхон далайн цэргийн командлал, Аляска мужийн Агаарын хүчний үндэсний гварди, шуурхай хариу үзүүлэх 36 дугаар хороо, АНУ-ын Агаарын цэргийн төв штабын Олон улсын харилцааны газар, Монгол Улс дахь АНУ-ын Элчин сайдын яамны Батлан хамгаалахын хамтын ажиллагааны албанаас тус тус төлөөлөгчид оролцлоо. Мөн Аляскийн нисэх хүчний үндэсний гвардын командлагч бригадын генерал Трэси Смит цахимаар оролцсон юм.

Зөвлөлдөх уулзалтыг Монгол Улсын Зэвсэгт хүчний Агаарын цэргийн командлагч хошууч генерал О.Энхбаяр, АНУ-ын Номхон далайн агаарын хүчний командлагчийн Үндэсний гвардын орлогч дарга хошууч генерал Дэвид Бурги нар удирдан харилцан айлчлал, хамтын ажиллагаа, хамтарсан сургууль, дадлага, ар талын хангалт, эрүүл мэнд зэрэг сэдвийн хүрээнд явууллаа.

Энэхүү зөвлөлдөх уулзалтын үр дүнд хоёр талын харилцаа, хамтын ажиллагаа улам батжиж, Агаарын цэргийн офицер, ахлагч нарын хамруулах сургууль, дамжааны тоо, төрлийг нэгдүүлэхээр зөвшилцөлд хүрсэн ба Номхон далайн бүс нутагт явагддаг олон улсын хээрийн сургуулиудад оролцох Монгол Улсын статусыг нэмэгдүүлэх, иргэн цэргийн хосолмол зориулалттай нисэх буудлын үйл ажиллагааг ханган явуулахад шаардагдах техник тоног төхөөрөмжийн дэмжлэг үзүүлэх зэрэг хоёр талын хамтын ажиллагааг өргөжүүлэхэд түлхэц болсон гэж үзэж байна.

Зөвлөлдөх уулзалтад оролцсон АНУ-ын хүндэт зочид, төлөөлөгчдийг БХЯ-ны Төрийн нарийн бичгийн дарга бригадын генерал Ганхуяг, ЗХЖШГ-ын эвсэгт хүчний Жанжин штабын дарга дэслэгч генерал Д.Ганзориг нар хүлээн авч уулзан хоёр орны хамтын ажиллагааны талаар тэр дундаа Агаарын цэрэг хоорондын цаашдын хамтын ажиллагааны талаар санал солилцсон юм гэж Агаарын цэргийн командлалаас мэдээллээ.

Улсын хэмжээнд галт зэвсгийн тооллого үргэлжилж байна. Галт зэвсгийн тооллого нь энэ сарын 14-нийг хүртэл үргэлжлэх бөгөөд заасан хугацаанд галт зэвсгээ тооллого, бүртгэлд хамруулаагүй тохиолдолд Зөрчлийн тухай хуулийн дагуу хариуцлага тооцно гэдгийг ЦЕГ-аас мэдээлсэн.

Энэ талаар Нийтийн хэв журам хамгаалах, олон нийтийн аюулгүй байдлыг хангах албаны ахлах мэргэжилтэн, цагдаагийн хошууч Г.Гүррагчаа “Монгол Улсын галт зэвсгийн тухай хуульд заасны дагуу болон Хууль зүй, дотоод хэргийн сайдын 2015 оны галт зэвсгийн тооллого явуулах журмын дагуу иргэдийн галт зэвсгийг тоолох ажил арга хэмжээг цагдаагийн байгууллагаас жил бүр зохион байгуулдаг. Галт зэвсгийн тооллого орон нутагт 69, нийслэлд 71 хувьтай буюу улсын хэмжээнд 70 орчим хувьтай үргэлжилж байна” хэмээжээ.