Month: October 2021

Монголын шатахуун хэрэглэгчдийн холбооны гүйцэтгэх захирал Б.Сайнбаяртай цаг үеийн асуудлаар ярилцлаа.

-Улсын хэмжээнд шатахууны хомсдолд орсон нь юунаас үүдэлтэй гэж та бодож байна вэ?

-Шатахуунтай холбоотой үүсээд буй хүндрэл бол төрийн харалган бодлогын илрэл. Энэ асуудлыг би АМГТГ-тай холбоотой гэж харж байгаа. Тус агентлаг өөрийн чиг үүргийн хүрээнд улсын нөөцийг бүрдүүлж, хүрэлцээнд нь хяналт тавих ёстой. Тэд сар бүр мэдээ авч, бүртгэл явуулдаг. АМГТГ-ын дэд дарга Ц.Эрдэнэбаяр шатахууны хомсдол үүсэхээс долоо хоногийн өмнө хоёр удаа хэвлэлийн хурал хийхдээ худлаа ярьсан болж таарч байна. Анх хоёр долоо хоногийн шатахууны нөөц байгаа гэж мэдэгдэж байснаа дараа нь долоо хоногийн нөөцтэй хэмээн мэдэгдсэн. Хариуцлагатай албан тушаал хашиж байгаа хүмүүс ийм хариуцлагагүй мэдээлэл хийх нь асар их хор уршигтай.

Нийгэмд шатахууны хомсдол үүсэх гэж байна гэсэн худал мэдээлэл тарааснаас Улаанбаатар хотын замын хөдөлгөөнд өдөр тутам оролцдог 600 мянган тээврийн хэрэгслийн жолооч нарын дийлэнх нь банкийг дүүргэсэн. Тиймээс байсан жаахан нөөц нь богино хугацаанд багассан. Улсын стратегийн гол бараа бүтээгдэхүүний нөөцийг бүрдүүлээгүй хүмүүст хариуцлага хүлээлгэх ёстой. Хариуцлага хүлээлгэх хүмүүсийн нэрс нь ч тодорхой байна. Баримтгүй, худлаа ярьдаг дарга нарыг төрөөс зайлуулах хэрэгтэй. Шатахуун импортлогч компаниуд 2021 оны хоёрдугаар сараас эхлэн алдагдалтай ажилласан.

Тэд үнэн учраа хэлээд байхад Монгол Улсын Засгийн газраас иргэдэд таалагдахын тулд үнийг хүчээр бариулсан. Үүний гор өнөөдөр гарч байна. Сонгуулийн өмнө шатахууны үнийг хүчээр барьдаг уламжлалтай болж байна. Үүнийгээ болих хэрэгтэй. Үнийг нь чөлөөлөх хэрэгтэй. Монгол Улсын хэмжээнд газрын тосны шатах тослох материалын 120 мянган тонн агуулахтай. Өөрөөр хэлбэл, улсынхаа сарын хэрэглээг ч нөөцлөх агуулах сав байхгүй гэсэн үг.

-Нийт 120 мянган тонн агуулахын нөөцийн хэдэн хувь төрийн мэдэлд, хэдэн хувь нь хувийн аж ахуйн эзэмшилд байна вэ?

-Нийт 120 мянган тонн агуулахын 108 мянган тоннын агуулахыг хувийн аж ахуйн нэгжүүд бүрдүүлдэг. 2017 онд Концессын гэрээгээр шатахууны агуулах барих асуудлыг Засгийн газар ярьж байсан. Бүр гэрээг нь үзэглэсэн. Гэтэл өнөөдрийг хүртэл хэрэгжихгүй байгаа. Энэхүү 100 мянган тоннын агуулахын ажил хэдэн хувьтай явж байгааг салбарын сайдаас асуух хэрэгтэй. Ер нь төр нефтийн үйлдвэр гэж ярихаас өмнө саваа бэлдэх хэрэгтэй. Нөөц бүрдүүлэх ёстой. Яг үнэнийг хэлэхэд Ц.Эрдэнэбаярын яриад байгаа Монгол Улс шатахууны тэдэн өдрийн нөөцтэй гэж хэлдэг мэдэгдлүүд нь баттай эх сурвалжийн мэдээлэл биш шүү. Тиймээс нэн тэргүүнд 2022 оны эхний улиралд багтааж Монгол Улсын Засгийн газар 100 мянган тонн агуулахаа ашиглалтад оруулах хэрэгтэй. Үнэндээ Монгол Улс тэрбум мод тарина гэж байхаар сая тонны шатахууны агуулах сав барих хэрэгтэй. Монгол Улсын Ерөнхийлөгч НҮБ-ын индэр дээрээс тэрбум мод тарина гэж байхаар гуравхан сая иргэдийнхээ амьдралд тулгамдаад байгаа шатахууны асуудал, тэр дундаа агуулах савны асуудалд анхаарсан нь дээр.

-Хотын дарга хэдэн өдрийн өмнө мэдээлэл хийхдээ манайд 17 мянган тонн шатахууны нөөц байсан хэмээн мэдэгдсэн. Тэгэхээр нөөц байсаар байтал шатахуун импортлогчид хомсдол үүсгэсэн юм биш үү?

-Хотын дарга Д.Сумъяабазарын хувьд 17 мянган тонн шатахууны нөөц байсан гэж бүдүүн тойм мэдээлэл хийсэнд би хувьдаа харамсаж байгаа. Улстөрчид нэр хүнд олохын тулд, өөрөө баатар болж тодрохын тулд нийгмийн анхааралд байгаа асуудлаар баталгаагүй, судалгаагүй дуугардгаа болих хэрэгтэй. Үнэхээр 17 мянган тонн шатахууны нөөц байсан юм бол АМГТГ дээр аль аль компанийн ямар агуулах саванд байгаа талаарх мэдээлэл нь байх ёстой. Улсдаа томоохон агуулах эзэмшдэг Тэс, МТ, Петровис юмуу яг аль компанид байсныг нээлттэй зарлах хэрэгтэй. Тэр ч бүү хэл иргэд хонон өнжин хэдхэн шатахуун түгээх станцын гадаа дугаарлахаас өмнө зарлах хэрэгтэй биз дээ. Бүхэл бүтэн нийслэл хотыг удирдаж байгаа хүний амнаас тийм хариуцлагагүй үг гардаг байж болохгүй. Үнэхээр тийм хэмжээний нөөц байсан юм бол шатахуун импортлогч компаниуд нөөцөө гаргах ёстой. Ямар нэгэн байдлаар тооцоо судалгаатай, баримттай юм ярихгүй бол хэн нэгний цуурхлаар асуудалд хандаж болохгүй. Бүх зүйл цаасан дээр тооцоотой, нотолгоотой л байх ёстой.

-Шатахуун импортлогчид үгсэн хуйвалдаж үнээ нэмдэг асуудал яригддаг. Энэ тал дээр юу хэлэх вэ?

-Тэднийг үгсэн хуйвалдахаас өөр аргагүйд төр өөрөө хүргэдэг. Ерөнхийлөгчийн сонгуулийн өмнө “Роснефть” үнээ нэмээд нефть импортлогчдыг алдагдалд оруулж байна. Төр энэ асуудал дээр эрт төлөвлөж, бодлогын зохицуулалт хийгээд явчихсан бол өнөөдөр ийм байдал үүсэхгүй. Гэтэл компаниуд аргаа бараад дампуурлын ирмэгт ирээд 600 төгрөгөөр үнээ нэмэхээр төр тэднийг буруушааж байгаа нь утгагүй. Өнөөдөр шатахуун импортолж байгаа компаниудаас нэг нь л дампуурахад энэ салбарт томоохон доголдол үүснэ. Ер нь төр оролцоно гэдэг сайн менежер хийхийг хэлээд байгаа юм.

-Шатахууны үнийг дагаад өргөн хэрэглээний бараа бүтээгдэхүүний үнэ өсдөг. Эргээд шатахууны үнэ буурсан ч бараа бүтээгдэхүүний үнэ буудаггүй асуудлаас үүдэн иргэдийн нуруун дээр ачаалал ирдэг шүү дээ?

-Шатахууны хомсдолоос үүдэн үнэ нэмэгддэг асуудалд ШӨХТГ-аас анхаарал хандуулж ажиллах хэрэгтэй. Манай байгууллагаас хуурч шатахууны асуудлыг баталгаатай, нотолгоотой дэлгэн гаргаж ирж байсан. Гэтэл ШӨХТГ-аас хуурамч шатахуун Монголд байхгүй хэмээн мэдэгдэж байсан. Тэд ийм хариуцлагагүй мэдэгдэл хийж байхынхаа оронд шатахууны хомсдолоос үүдсэн үнийн хөөрөгдлийг арилгах ёстой. Өнөөдөр иргэд зөвхөн АИ-92 гэсэн шатахуунд ач холбогдол өгөөд байна л даа. Энэ төрлийн шатахуун Монгол Улсын нийт хэрэглээний 25 хувийг л эзэлдэг буюу жилд 400-500 мянган тонныг хэрэглэдэг. Өргөн хэрэглээний бараа бүтээгдэхүүний үнэ өсөх, тээврийн хөлс нэмэгдэнэ гэдэг бол дизелийн түлштэй холбоотой асуудал. Дизелийн түлшний үнэ тогтвортой, хомсдол үүсээгүй байхад үнэ нэмэгдэж байгаа асуудал бол үгсэн хуйвалдаж, зохиомлоор үнээ нэмсэн гэдэг асуудал хүнсний бүтээгдэхүүн импортолж байгаа комданиудтай холбоотой асуудал. Энэ компаниудыг ШӨХТГ шалгалт хийж торгох ёстой. Иргэд АИ-92 хомсдоод тээврийн хөлс нэмэгдсэн гэж ойлгоод байдаг. Тийм юм байхгүй, үнэ өсөх үндэслэлгүй гэдгийг манай байгууллага судалгаагаар тогтоосон. Мэргэжлийн хяналтын байгууллагууд энэ асуудалд анхаарал хандуулж, ажлаа хийх хэрэгтэй.

-Шатахууны чанартай холбоотой асуудлын талаар танай байгууллага байнга шүүмжлэлтэй ханддаг ч холбогдох төрийн байгууллагууд танай мэдээллийг үгүйсгэсэн хариу өгдөг нь ямар учиртай юм бол?

-Манай холбоо Шударга өрсөлдөөн хэрэглэгчдийн төлөө газартай хамтраад энэ оны дөрөвдүгээр сард шалгалтаар явсан. Бидний хувьд дээж авах процесст нь оролцсон. Түүнээс хойш ажлын дүгнэлт гаргах явц дээр Ашигт малтмал газрын тосны газрын алба хаагчид өөрсдөө оролцоод явж байсан. Энэ шалгалтаар шатахууны чанар үнэхээр муу байгаа гэсэн дүгнэлтийг Мэргэжлийн хяналтаас тогтоочихоод байхад Шударга өрсөлдөөн хэрэглэгчийн төлөө газрын дарга нь өөрөө “Монголд өнөөдөр хуурамч шатахуун байхгүй ээ” гээд өөрийнхөө хийсэн ажлыг үгүйсгэчихэж байгаа юм. Хоёрдугаарт, АМГТГ нь “Энэ ажлын хэсгийн дүгнэлт хууль бус” гээд өөрсдийнхөө явсан ажлыг бас үгүйсгэчихэж байгаа юм. Гуравт, Мэргэжлийн хяналтын байгууллагын дүгнэлтийг хүчингүй болгуулах гээд импортлогч компаниуд Захиргааны хэргийн шүүхэд хандсан. Хэрвээ энэ акт хүчингүй болох юм бол Монгол Улсад бензин, дизелийн түлшний чанар стандарт гэж яриад хэрэггүй.

-Цаашид дахин улсаараа шатахууны хомсдолд орохгүйн тулд бид юу хийх ёстой вэ?

-Шатахуун, шатах тослох материалууд нь Монгол Улсын стратегийн бүтээгдэхүүн. Энэ асуудал дээр яалт ч үгүй төрийн оролцоо чухал. Гэхдээ төр оролцоно гээд ирэхээрээ үнэ ярьдаг. Үнийг барих гэж оролддог. Тэгэхээр “Үнэ дагаж чанар юм уу, чанар дагаж үнэ юм уу” гэсэн асуудал урган гарна. Төр оролцохдоо хэрэглэгчдэдээ сонголт өгчих.

Өнөөдөр Монголд нефтийн үйлдвэрлэлийн тусгай зөвшөөрөлтэй найман үйлдвэр бий. Тэр найман үйлдвэр дээр үйлдвэрлэл явуулаад “Монгол 92” нэртэй шатахуун гаргачих. Үнэхээр ОХУ-аас импортолж байгаа сайн чанарын түлш байвал түүнийгээ “Роснефтийн түлш” гээд тодорхой үнэ тавьчих. Гарал үүсэл нь тодорхойгүй бүх төрлийн бензинийг нэг саванд хийгээд нэг үнээр шахдагаа л больчих юм бол хэрэглэгчид хохирохгүй гэдгийг бид удаа дараа хэлж байгаа. Энэ зарчмаар зах зээлийн сонголт өгөх хэрэгтэй. Гэтэл өнөөдөр төр хэтэрхий их туйлширч үнийг нь бариад байна. Өнөөдөр Монголд нефть импортолдог 118 компани бий. Тэдний дунд томоохонд тооцогдох 14 аж ахуйн нэгж байгаа. Тэдгээр компани Монгол Улсын нийт шатахуун, шатах тослох материалын 80 хувийг импортолж байна. Монгол Улсын төсвийн 15.5 хувийг бүрдүүлж байна. Тэдний хүчинд Монгол Улс шатахуунаар тасарчихгүй байгааг санах хэрэгтэй.

Өнөөдөр бид нефтийн үйлдвэр гээд яриад байгаа ч уг үйлдвэр хаанахын ямар технологиор шатахуун үйлдвэрлэж, боловсруулах юм бэ гэдэг асуудал ч тодорхой болоогүй байна. Монголын нефть энэ үйлдвэрийн технологийн шаардлагад нийцэж байгаа эсэх талаар хэн ч сөхөж ярихгүй байна. Энэхүү салбарын эрдэмтэд энэ асуудалд анхаарал хандуулах хэрэгтэй. Дэлхий дээр 4-5 төрлийн нефть бий. Монголын нефть тосорхог учраас бензинд зориулсан уу, дизель түлшинд зориулсан уу гэдгийг өнөөдөр нефтийн үйлдвэрийнхэн ч тайлбарлаж чадахгүй байна. Тэгэхээр бид нефтийн үйлдвэр гэж сүржигнэхээсээ өмнө улсын мэдлийн сая тонны шатахууны агуулахтай болчих хэрэгтэй. Ингэж чадвал Монгол Улс дотоодынхоо зургаан сарын хэрэглээг нөөцөлчихнө гэсэн үг.

П.БАТЗАЯА

Нийслэлийн Эрүүл мэндийн газрын дарга Б.Бямбадорж “Цар тахлын шинээр бүртгэгдэх тохиолдол улсын хэмжээнд буурахгүй, нас баралт өмнөх өдрүүдээс нэмэгдсээр байна. Нэг хороонд коронавирусийн 300-гаас дээш тооны батлагдсан тохиолдол илэрвэл тус хороонд тусламжийн нэмэлт баг ажиллуулах зохион байгуулалтыг хийж байгаа юм. Ийм хороо нийслэлийн хэмжээнд 35 байна. Түүнчлэн эмнэлгүүдэд хүний нөөцийн судалгаа хийхэд 167 эмч, 146 сувилагч, туслах ажилтан, бусад 195 ажилтан өөрийн хүсэлтээр ажлаасаа гарсан байна” гэж мэдээлсэн. Үүнээс үүдэн 600 орчим эмч, эмнэлгийн ажилтан улсын хэмжээнд шаардлагатай байгаа аж. Бид энэ асуудлын хүрээнд зарим дүүрэг, хорооны эмнэлгийн дарга, ажлаасаа гарсан эмч, сувилагч нартай холбогдож ярилцлаа.

Баянзүрх дүүргийн нэгдсэн эмнэлгийн дарга Д.Урнаа: Баянзүрх дүүргийн нэгдсэн эмнэлгээс одоогоор нэг ч эмч, сувилагч ажлаасаа гараагүй

Баянзүрх дүүргийн нэгдсэн эмнэлгийн даргатай холбогдоход “Одоогоор нэгдсэн эмнэлэг дээр ажлаасаа гарсан эмч, сувилагч алга. Өрхийн эмнэлгүүд л хэцүү байна, залуу эмч нар ч их шантарч гараад байгаа ажиглагдсан. Түүнчлэн жирэмсний амралттай байсан хүмүүс хүүхдээ ой гарантай болгоод эргээд ажилдаа орчихдог байсан бол одоо ийм их ачаалалтай үед орохгүй гэж хэлж байна” гэлээ.

Баянзүрх дүүргийн 26 дугаар хорооны эмнэлгийн дарга Ё.Сугарсүрэн: Наймдугаар сараас хойш манай өрхийн эмнэлгээс гурван эмч, нэг сувилагч ажлаасаа гарсан

Баянзүрх дүүргийн 26 дугаар хорооны өрхийн эмнэлгийн даргатай холбогдож ярилцлаа.

-Улаан бүсэд ажиллаж байгаа 500 гаруй эмч, сувилагч өөрийн хүсэлтээр ажлаасаа гарсан байна. Баянзүрх дүүргийн 26 дугаар хороо хүн ам ихтэй шүү дээ. Хорооны эмнэлгийн ачаалал ямар байна вэ?

-Баянзүрх дүүргийн 26 дугаар хороо 40 гаруй мянган хүн амтай. Хүн ам ихтэй бөгөөд коронавирусийн тархалт, өвчлөл хамгийн өндөр байна. Өдөрт 92-250 тохиолдол илэрч, эмч сувилагч нар их ачаалалтай ажиллаж байна. Манай өрхийн эмнэлэг долдугаар сараас эхлээд хүний нөөцийн дутагдалд ороод эхэлчихсэн.

-Танай хорооны эмнэлэг нийт хэчнээн эмч, эмнэлгийн мэргэжилтэнтэй вэ. Одоогоор хэдэн хүн ажлаасаа гарсан бэ?

-Манайх хуучин 26 эмч, эмнэлгийн ажилтантай байсан. Наймдугаар сарын сүүлээр нэг эмч, нэг сувилагч ажлаа хаяад явсан. Сая есдүгээр сард хоёр эмч ажлаасаа гарсан. Мөн өнөөдрийн байдлаар хоёр эмч, хоёр сувилагч коронавирусийн халдвараар өвдчихсөн, одоо бол хүний нөөцийн хомсдолд орчихлоо. Ажилд авна гэсэн зар тавьсан боловч ирэх эмч, эмнэлгийн мэргэжилтнүүд олдохгүй байна.

-Тусламж үйлчилгээ авч байгаа иргэдийн хэчнээн хувь нь бүртгэлгүй хүмүүс байна вэ?

-Энэ хороонд бүртгэлтэй иргэдээсээ илүү бүртгэлгүй явуулын, хөдөө орон нутгаас ирсэн, байр түрээсэлдэг 20 мянга гаруй хүн бий. Хүмүүс Баянзүрх дүүргийн 26 дугаар хороонд шилжилт хөдөлгөөн хийж ирдэггүй шалтгаан нь хангалттай сургууль, цэцэрлэг байхгүйтэй холбоотой. Ганц сургуультай, тэр нь хүрэлцээ муу. Хүмүүс хүүхдээ сургууль, цэцэрлэгтэй байлгахын тулд хуучин хаягаасаа шилжиж ирдэггүй. Нөгөө талаараа настай, группт байдаг хүмүүс бас ирэхгүй. Шалтгаан нь Баянзүрх дүүрэг хамгийн олон хүн амтай дүүрэг учраас эмнэлгийн тусламж үйлчилгээ авахад төвөгтэй, ачаалал ихтэй газар. Коронавирусийн халдвар аваад манай хорооноос тусламж үйлчилгээ авч байгаа хүмүүсийн 62 орчим хувь нь түр оршин суудаг, явуулын хүмүүс байна.

-Наймдугаар сараас хойш гурван эмч, нэг сувилагч ажлаасаа гарсан гэж байна. Эмч, сувилагч нар юунаас болоод ажлаасаа гарч байна вэ?

-Тийм. Наймдугаар сарын сүүлээр эмч, сувилагч хоёр ажлаа хаяад, утсаа унтраагаад ор сураггүй алга болсон. Тодорхой хугацааны дараа холбогдоод ажлаас гарсан шалтгааныг нь тодруулахад тариа хийлгүүлж байсан хүн нь “Та нар хэтэрхий удаан байна” гэж загнаад сувилагчийг барьсан тортой юмаараа цохисон гэж байгаа юм. Ер нь коронавирусийн халдвараар өвдсөн хүмүүс эмч, эмнэлгийн ажилтан л ам руу нь коронавирус шахчихсан юм шиг уур, уцаараа гаргадаг. Харин ажлаасаа гарсан эмчийн өрөөнд коронавирусээр өвдсөн өвчтөн орж ирж загнаад, сандлаар цохино гэж далайсан байгаа юм. Түүнээс болоод эмч айгаад дахиж ажилдаа ирэхээ больчихсон. Ер нь ажлаас гарч байгаа эмч, сувилагч нарын гол шалтгаан бол иргэдийн ёс зүйгүй харилцаа хандлага юм.

-Коронавирусийн халдвар тархсанаас хойш эмнэлгийн байгууллага, эмч, эмнэлгийн ажилчид маш их ачаалалтай ажиллаж байгаа. Ажилласныхаа хэрээр цалингаа авч чадаж байгаа юу?

-Одоо хийж гүйцэтгэж байгаа ажилдаа таарсан цалин авч чадахгүй байгаа шүү дээ. Өглөө найман цаг гэж ажилдаа ирээд орой таван цаг 30 минутад тарах ёстой. Гэтэл өдөр цайны цагаараа ч цайгаа ууж чадахгүй, орой найман цаг гээд л ажлаасаа буудаг. Гэр бүлийнхэн нь татгалзаад ажлаас нь гаргаж байна.

-26 дугаар хорооны эмнэлэг хүний нөөцийн хомсдолд аль наймдугаар сараас орсон юм байна. Цаашдаа яах вэ, яаж хүний нөөц бүрдүүлэх вэ?

-Ажлын зар тавиад ч хүн ирэхгүй байна л даа. Бид ажилд авна гэсэн зар тавихдаа зөвхөн хөдөлмөрийн насны хүн гэж бичихгүй байгаа. Тийм байхад ч ажиллах хүн ирэхгүй байна. Өмнө нь бол сайн дураараа ажиллах гээд ирдэг байсан, одоо огт ирэхээ больсон. Тэгэхээр ойрын өдрүүдэд Анагаахын их, дээд сургуулиудтай хамтын ажиллагааны гэрээ байгуулаад төгсөх курсийн оюутнуудыг тодорхой хугацаанд ажиллуулж байна. Яваандаа хүний нөөцөө бүрдүүлэхэд хэцүү болоод л байна. Цаашдаа юу болохыг үнэндээ би хэлж мэдэхгүй.

Үргэлжлүүлэн Баянзүрх дүүргийн 26 дугаар хорооны эмнэлэгт их эмчээр ажиллаж байгаад ажлаасаа өөрийн хүсэлтээр гарсан эмч Д-тэй холбогдож ярилцлаа. Тэрбээр нэрээ нууцлахыг хүссэн юм.

-Сайн байна уу. Та эмнэлэгтээ хэдэн жил ажилласан бэ, яагаад ажлаасаа гарахаар болов?

-Би өрхийн эмнэлэгтээ их эмчээр хоёр жил гаруй ажилласан. Манай 26 дугаар хорооны хувьд нэлээн хүн ам ихтэй. 40 гаруй мянган оршин суугчтай, гэвч хороондоо ганц л өрхийн эмнэлэгтэй. Манай хорооны 20 гаруй мянган хүн л үндсэн оршин суугчийн бүртгэлтэй. Гэтэл түр оршин суугчдад эм, эмнэлгийн тусламж үзүүлэх санхүүжилт нь орж ирдэггүй. Түүнээс гадна хэл ам ихтэй. “Та нар миний татварын мөнгөөр цалинждаг хэрнээ яагаад олигтой ажилладаггүй юм” гээд эмч нараа барьж авч зодно. Ковидын энэ үед бүр ч их эрсдэлтэй болчихсон. Залуу эмч нар шантрахаас өөр аргагүй болсон шүү дээ. Шөнө орой амраахгүй, утсаар зөвлөгөө өгөхөөр дарамтална. Энэ мэт шалтгаануудаас болоод ажлаасаа гарсан даа.

-Зарим иргэд цахим хуудсаар “Эмч хүн тангараг өргөсөн бол буцах ёсгүй” гэхчлэн их л шүүмжлэлтэй хандах юм?

-Хүмүүс эмчийн ёс зүй л гэж их ярьдаг. Гэтэл урьдаар хувь хүний ёс зүйг ярих ёстой, энэ талаар огт ярьдаггүй. Юм л бол “Чамайг хэлдэг газар нь хэлнэ, ажилгүй болгоно” гэдэг. Коронавирус гараагүй байхад ачаалал харьцангуй гайгүй байсан бол одоо маш их ачаалалтай. Түүний хажуугаар сэтгэл санааны

дарамттай, над руу цөөнгүй удаа юм авч шидэж байсан, миний мэдэх хоёр, гурван ч сувилагчийн биед халдсан. 11 цагаас нааш тарахгүй, уг нь бид ч гэсэн ардаа амьдралтай, үр хүүхэдтэй хүн шүү дээ.

-Ачаалал маш их байгаа, ажилласан цагаараа цалингаа авч чадсан уу?

-Цалингийн хувьд харьцангуй гайгүй. Цалингаас гадна төрөөс ирж байгаа санхүүжилт муу. Жишээлбэл, гадуур коронавирусийн халдвар авсан иргэдэд өрхөөс нь 160 мянган төгрөгийн эм бэлдмэл өгч байгаа. Гэтэл манай хороонд амьдарч байгаа 40 мянган хүний 20 мянган нь түр оршин суух хаягтай учир энэ хүмүүст 160 мянган төгрөгийн санхүүжилт ирдэггүй. Ингээд эерэг гарсан хүн болгонд эм бэлдмэлээ хүргэхийн тулд санхүүжилтээ танаад байдаг. Энэ мэт асуудлаас болоод иргэд их бухимдаж уурладаг.

-Тантай хамт ажиллаж байсан эмч, сувилагч нараас гарсан хүн бий юү?

-Надтай хамт ажиллаж байсан хоёр гурван ч эмч ажлаасаа гарсан.

-Та одоо юу хийж байгаа вэ. Өөр ажилд орох бодол бий юү?

-Одоо суръя л гэсэн бодолтой байна. Гэхдээ нэг ачаалал багатай газар анкет бөглөчихсөн байгаа. Одоогоор бол гэртээ хүүхдээ хараад л сууж байна.

-Зөвхөн Баянзүрх дүүргийн 26 дугаар хороонд гэлтгүй хаа сайгүй л эмч, эмнэлгийн ажилчид ажлаасаа гарсаар л байна. Цаашид эмч, эмнэлгийн ажилчдыг ажлаас нь гаргахгүйн тулд юун дээр анхаарах шаардлагатай байна?

-Эмч, эмнэлгийн ажилчдыг хамгаалах хууль эрх зүйн орчин байх ёстой. Мөн тухайн эмчийн ажлын ачааллыг зохицуулж өгөхгүй бол цаашид улам хүний нөөцийн хомсдол үүснэ. Нэг иргэн миний өрөөнд орж ирээд намайг харааж, дарамтлах үед ядаж намайг хамгаалдаг хуультай байх хэрэгтэй байна.