Month: October 2021

Нийслэлийн нутгийн захиргааны байгууллагуудаас коронавирусийн халдварын үеийн тусламж, үйлчилгээнд дэмжлэг үзүүлэн ажиллах хуваарийг Нийслэлийн Онцгой комисс /НОК/-ын дарга баталсан. Үүний дагуу өнөөдрөөс төрийн албан хаагчид нийслэлийн төвийн зургаан дүүрэгт ажиллаж эхэллээ. Нийт 29 байгууллагын 417 албан хаагч коронавирусийн халдварын үеийн тусламж, үйлчилгээнд дэмжлэг үзүүлэн ажиллах юм. Тухайлбал, НЗДТГ-ын 10 албан хаагч НОК-т, Нийслэлийн Архивын газрын 19, Нийслэлийн Агаарын бохирдолтой тэмцэх газраас 12, Нийслэлийн Авто замын хөгжлийн газрын 35 албан хаагч Баянгол дүүрэгт, дүүргийн дуудлага мэдээллийн төв, Өрхийн эрүүл мэндийн төв /ӨЭМТ/-ийн түр бүлэг, эмийн багц савлах зэрэг ажил хийж байна.

Нийслэлийн Агаарын бохирдолтой тэмцэх газрын ажилтан Г.Энхжаргал “Баянгол дүүргийн дуудлага мэдээллийн төвд ирж байгаа дуудлагын дийлэнх нь иргэд эмнэлэгт хэвтэх хүсэлтэй байгаа болон шинж тэмдэг илэрч байгаа талаар, мөн өрхийн эмч нар эмнэлэгт хэвтэн эмчлүүлэх шаардлагатай иргэдийн мэдээллийг өгч байна” гэлээ.

НОК-оос гэрийн хяналт ажиглалтыг сайжруулах, түүний хүртээмжийг нэмэгдүүлэх зорилгоор хэд хэдэн ажил зохион байгуулж байна. ӨЭМТ-үүд үндсэн үйл ажиллагаа болон ковидын тусламж үзүүлэх үйл ажиллагааг зохион байгуулж байгаа юм.

НОК ковидын тусламж үзүүлэх үйл ажиллагааг дэмжлэгт удирдлагаар ханган ажиллаж байна. Нэг хороонд коронавирусийн 300 хүртэлх тохиолдол бүртгэгдвэл тухайн хорооны ӨЭМТ-ийн эмч, ажилчид хариуцан ажиллана. Харин 300-гаас дээш тохиолдол бүртгэгдвэл нэмэлт багийг ажиллуулж байна гэдгийг Нийслэлийн Эрүүл мэндийн газрын дарга Б.Бямбадорж хэллээ. Мөн тэрбээр “Өнөөдрийн байдлаар Баянгол дүүрэгт 900-гаас дээш тохиолдол бүртгэгдсэн нэг хороо, 300-гаас дээш тохиолдол бүртгэгдсэн дөрвөн хороо байна. Дүүрэг бүрийн ачаалал долоо хоногоор өөрчлөгддөг. Өмнөх долоо хоногт Баянзүрх дүүрэг анхаарал татаж байсан бол энэ долоо хоногт Баянгол дүүрэг анхаарал татаж байна. Тиймээс НОК-оос нэмэлт багийг тухайн үед нь менежмент хийн ажиллуулна” гэсэн юм.

Коронавирусийн шинэ мутаци нь анхны омогтой харьцуулахад агаар дуслын замаар амархан дамждаг болохыг АНУ -ын Үндэсний эрүүл мэндийн хүрээлэнгийн судалгаа нотолжээ. “The New York Times” сонинд бичсэнээр тус хүрээлэнгийн судлаачид шишүүхэйг туршилтад ашиглаж, SARS-CoV-2 вирусийн эхэн үеийн “альфа” хувилбар болон “дельта” омгоор халдварлуулж үзэхэд вирус нь агаар, дуслын замаар илүү хурдан халдварлаж байгааг тогтоожээ. Ингэхдээ маш түргэн хугацаанд хувьсан өөрчлөгдөж, дасан зохицож буйг тул амны хаалтыг илүү боловсронгуй болгох шаардлагатайг эрдэмтэд онцолсон байна.

Анх Энэтхэг улсад илэрсэн “дельта” хувилбар одоо дэлхий дахинд давамгайлж байна. Энэ хувилбарын нууц үе маш богино хугацаанд үргэлжилдэг гэдгээрээ бусад хувилбараас ялгаатай. Үүнээс гадна “дельта” хувилбараар халдварласан өвчтөнд хоол боловсруулах эрхтэн тогтолцоо гэмтэх шинж тэмдэг илэрдэг ажээ.

Дэлхийн улс орнуудын уур амьсгалын асуудал хариуцсан төлөөлөгчид хүлэмжийн хийг бууруулж, дэлхийн дулаарлыг цельсийн 1.5 хэмд тогтоон барихын тулд илүү их хүчин чармайлт гаргах хэрэгтэй байгаад санал нэгджээ.

НҮБ-ын Уур амьсгалын өөрчлөлтийн асуудлаарх бага хуралд /COP26/ бэлтгэх ажлын хүрээнд Италийн Милан хотноо бямба гарагт зохион байгуулсан уулзалтын үеэр талууд ийнхүү тохиролцсон байна.

2015 онд байгуулсан Парисын уур амьсгалын хэлэлцээрээр дэлхийн агаарын дундаж температурыг аж үйлдвэрийн өмнөх үеийнхээс цельсийн 1.5 хэмд тогтоон барих зорилт дэвшүүлсэн юм.

Миланд болсон уулзалтын дараа “COP26” бага хурлыг даргалах Алок Шарма, “Улс орнууд Парисын хэлэлцээрээр дэвшүүлсэн зорилтод хүрэхэд илүү их хүчин чармайлт хэрэгтэй байгаад санал нэгдлээ” хэмээн мэдэгдэв.

Мөн уур амьсгалын өөрчлөлтэй тэмцэх үйлсийг жилд 100 тэрбум ам.доллароор санхүүжүүлэх үүрэг амлалтаа биелүүлэхийг хөгжингүй орнуудын Засгийн газар, хувийн хэвшлийнхэнд уриалжээ.

Дэлхийн улс орнуудын хувьд хүлэмжийн хийн ялгарлыг бууруулах, хөгжиж буй орнуудад үзүүлэх санхүүгийн тусламжийн талаар санал зөрөлдсөн хэвээр байгаа юм.

Тийнхүү Их Британид аравдугаар сарын 31-нээс эхлэх “COP26” хурлаар уур амьсгалын өөрчлөлттэй тэмцэх чиглэлд дорвитой шийдэлд хүрэх эсэх нь олны анхаарлын төвд байна.

2021 оны 10 сарын 03-ны 20 цагаас 10 сарын 04-ний 20 цаг хүртэлх цаг агаарын урьдчилсан мэдээ

Хур тунадас: Ихэнх нутгаар солигдмол үүлтэй. Хангай, Хөвсгөл, Хэнтийн уулархаг нутгаар ялимгүй хур тунадас орно.

Салхи: Нутгийн баруун хэсгээр баруун өмнөөс, бусад нутгаар баруун хойноос секундэд 5-10 метр, говь, талын нутгаар секундэд 12-14 метр хүрч ширүүснэ.

Агаарын температур: Шөнөдөө Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Байдраг, Эг, Үүр, Тэрэлж, голын хөндийгөөр 8-13 хэм, Хараа, Ерөө, Туул, Хэрлэн, Онон, Улз голын хөндийгөөр 3-8 хэм хүйтэн, говийн бүс нутгийн өмнөд хэсгээр 2-7 хэм дулаан, бусад нутгаар 3 хэм хүйтнээс 2 хэм дулаан, өдөртөө Алтай, Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс голын хөндийгөөр 1-6 хэм, говийн бүс нутгийн өмнөд хэсгээр 11-16 хэм, бусад нутгаар 5-10 хэм дулаан байна.

УЛААНБААТАР ХОТ ОРЧМООР: Багавтар үүлтэй. Хур тунадас орохгүй. Салхи баруунаас секундэд 5-10 метр. Шөнөдөө Яармаг-Сонгины орчмоор 6-8 хэм, бусад хэсгээр 3-5 хэм хүйтэн, өдөртөө 8-10 хэм дулаан байна.

БАГАНУУР ОРЧМООР: Багавтар үүлтэй. Хур тунадас орохгүй. Салхи баруунаас секундэд 6-11 метр. Шөнөдөө 6-8 хэм хүйтэн, ө­дөртөө 7-9 хэм дулаан байна.

ТЭРЭЛЖ ОРЧМООР: Багавтар үүлтэй. Хур тунадас орохгүй. Салхи баруунаас секундэд 5-10 метр. Шөнөдөө 8-10 хэм хүйтэн, өдөртөө 5-7 хэм дулаан байна.

Монгол Улсын Ерөнхийлөгч У.Хүрэлсүх 2021 оны есдүгээр сарын 22-ны өдөр НҮБ-ын Ерөнхий Ассамблейн 76 дугаар чуулганд оролцох үеэрээ “уур амьсгалын өөрчлөлт, цөлжилтийг сааруулах хамгийн үр ашигтай арга бол мод тарих явдал мөн” гэдгийг онцолж, 2030 он гэхэд Монгол Улс 1 тэрбум мод тарих хөдөлгөөнийг эхлүүлж байгааг мэдэгдсэн.

Тэгвэл Онцгой байдлын ерөнхий газар, нийслэлийн хүрээний Онцгой байдлын газар, хэлтэс, анги, байгууллагын бие бүрэлдэхүүн энэхүү мод тарих хөдөлгөөнд нэгдэн Хан-Уул дүүргийн 14 дүгээр хорооны нутаг дэвсгэрт 2500 гаруй мод суулгах бэлтгэл ажлыг хангаж, мод тарих ажлыг эхлүүллээ гэж Онцгой байдлын ерөнхий газраас мэдээллээ.