Month: August 2021

Төрийн тахилгат хайрхануудыг тахих ёслол Covid-19 нөхцөл байдалтай холбоотойгоор хойшлоод буй. Олон нийтийг хамарсан үйл ажиллагааг зохион байгуулахыг Улсын онцгой комиссоос хориглож, зургадугаар сард хойшилсон Отгонтэнгэр хайрханы тахилга наймдугаар сарын 22-нд болохоор төлөвлөжээ.

Уламжлалын дагуу Отгонтэнгэр, Сутай хайрханыг энэ жил тахина. Тодруулбал, төрийн тахилгат хайрханыг таван жилд нэг удаа тахьдаг бөгөөд Отгонтэнгэр хайрханыг тахих ёслолыг наймдугаар сарын билэгт сайн өдөр зохион байгуулахаар болсон аж.

Ёслол хүндэтгэлийн арга хэмжээнд сүсэгтэн олон олноор зорин очдог. Энэ жил халдвар хамгаалалтын дэглэмийг баримталж цөөн хүн оролцуулахаар төлөвлөсөн аж. Тахилгын үед:

• Амьтны амь таслахгүй байх
• Хараал хэлэхгүй, хэрүүл хийхгүй байх
• Архи огт хэрэглэдэггүй, газар ухах мод огтлох, жимс ногоо, өвс түүх, усанд орохыг ихэд цээрлэдэг.
• Тахилгад өл халзан морьтой очдоггүй
• Бадархундага нуурт бүсгүй хүн ойртохыг цээрлэдэг
• Явган болон чулуун дээр сандайлж суудаггүй
• Муу зүйл хийхгүй байх нь чухал
• Тахилгын үед цагаан хоол идэх ёстой байдаг аж.

Мөн тахилгын үеэр Бадархундага нууранд хүмүүс хадаг өргөл, сэлт өргөдөг уламжлалтай билээ. Энэ жилийн хувьд цэвэр мөнгөн эдлэлээс бусад зүйл өргөхгүй байх уриалгыг гаргажээ. Хадаг болоод бусад зүйлс нуурын усыг маш ихээр бохирдуулдаг бөгөөд сүсэгтэн олны буян заяагаа даатган өргөсөн усыг бохирдуулахуйц зүйлсийг нутгийн ард цэвэрлэх, эс цэвэрлэх асуудал тулгардаг байна. Иймд сүсэгтэн олон та бүхэн нуурандаа өргөх зүйл дээр маш их анхаарч хадаг өргөхгүй байх уриалга, мэдэгдлийг Завхан аймгийн засаг даргын тамгын газраас цахим хуудастаа гаргажээ.

Халдваргүйжүүлэлт:

Улсын хэмжээнд нийт 171 аж ахуйн нэгж, байгууллага, нийтийн эзэмшлийн гудамж талбайд хийгдсэн 654.548 м2 талбайд хийсэн урьдчилан сэргийлэх халдваргүйжүүлэлт, 185 объектын 46.989 м2 талбайд хийгдсэн голомтын эцсийн халдваргүйжүүлэлтэд хяналт тавин ажилласан. Хяналт шалгалтаар зөрчил илрээгүй байна. Өмнөговь аймгийн Даланзадгад сумын үерт автаад байсан нийтийн эзэмшлийн гудамж талбайд хийгдсэн урьдчилан сэргийлэх халдваргүйжүүлэлтэд хяналт тавин ажиллав.

Авто тээврийн шалган нэвтрүүлэх товчоо:

Улсын хэмжээнд авто замын шалган нэвтрүүлэх постод 308 байцаагч ажиллаж нийт 6,763 авто машинаар нэвтэрсэн 17,374 иргэнд коронавируст халдвараас урьдчилан сэргийлэх зөвлөгөө өглөө. Улаанбаатар хотын авто тээврийн шалган нэвтрүүлэх товчоодоор /2021.08.03-ны 17:00 цагийн байдлаар/ хот руу орох чиглэлд 600 тээврийн хэрэгслээр 1181 зорчигч, хотоос гарах чиглэлд 948 тээврийн хэрэгслээр 1632 зорчигч нэвтэрсэн байна.

Хилийн хяналт шалгалт:

Улсын хилээр орсон 758 тээврийн хэрэгсэл, 660 жолооч, зорчигчид эрүүл мэндийн тандалт хийж сэжигтэй есөн тохиолдлыг тусгаарлан ажиглалтад шилжүүлсэн. Улсын хилээр гарсан 700 тээврийн хэрэгсэлд халдваргүйжүүлэлт хийж, хяналт тавьж, 651 зорчигч, жолоочид эрүүл мэндийн тандалт хийв.

Улаанбаатар хотын гүний гаалийн хяналтын бүсэд 39 аж ахуйн нэгжийн 763.8 тн бараа, түүхий эд, бүтээгдэхүүнийг хилийн хяналтад хамруулан нэвтрүүлж, Алтанбулаг боомтоор нэвтэрсэн 21 тир автомашины гадаргууд мэргэжлийн байгууллагаар халдваргүйжүүлэлт хийлгэн, халдвар хамгааллын дэглэмийг мөрдүүлэн ажиллав.

Халдвар хамгааллын дэглэм, түр журмын хэрэгжилт:

Монгол Улсын Засгийн газрын 2021 оны 118 дугаар тогтоол, Улсын Онцгой комиссын даргын 2021 оны 41 дүгээр тушаалаар батлагдсан Covid-19-өөс сэргийлэх арга хэмжээг зохион байгуулах түр журам”, Нийслэлийн Засаг даргын 2021 оны А/357, А/477 захирамжийг хэрэгжүүлэхээр 2021 оны наймдугаар сарын 3-ны өдөр нийслэлд 705 аж ахуйн нэгж байгууллага, иргэнийг хамруулан хяналт шалгалтыг хийж гүйцэтгэлээ. Шалгалтын явцад 65 зөрчлийг илрүүлэн 45 буюу 69 хувийг арилгуулав.

Илэрч буй дутагдлыг дурдвал:

• Коронавируст халдвар /Ковид-19/-аас сэргийлэх арга хэмжээг зохион байгуулах түр журмыг зөрчсөн -50
• Тусгай нөхцөл шаардлага зөрчсөн – 6
• Хязгаарласан үйл ажиллагаа эрхэлсэн -2
• Гар дээрээс согтууруулах ундаа худалдаалсан – 7

Эх сурвалж: МХЕГ

Монгол Улсын хэмжээнд нийт хүн амын 61.1 хувь нь коронавирусийн эсрэг вакцины 2-р тунд хамрагдаад байна.

Нийслэлд коронавирусийн эсрэг вакцины I тунд нийт хүн амын 72.3 хувь II тунд нийт хүн амын 66.0 хувь хамрагдаад байна.

Өчигдөр нийслэлийн хэмжээнд I тунд 2055, II тунд 976, нийт 3031 иргэнийг дархлаажууллаа. Вакцинжуулалт эхэлснээс хойш нийслэлийн 18-аас дээш насны 1.084.249 иргэн I тунд, 988.810 иргэн II тунд хамрагдаад байна. Мөн нийт 2050 жирэмсэн эх, 12-15 насны 31.344 /30.9%/, 16-17 насны 16.448 /48.5%/ хүүхэд тус тус II тунд хамрагдлаа.

Наймдугаар сарын 3-нд орсон борооны улмаас Яармаг орчмын зам дээр уулын ус түрэн орж, үерийн ус тогтсон. Үүнээс гадна Хан-Уул дүүргийн 8-р хорооны нутаг дэвсгэр, Жаргалантын амны хөндийгөөс их хэмжээний ус авто зам руу урсан оржээ. Үерийн уснаас үүдэлтэй замын эвдрэлийг тодорхойлох, шаардлагатай арга хэмжээг авахаар Нийслэлийн Зам, тээврийн асуудал хариуцсан төслүүдийн удирдагч Б.Одсүрэн, Нийслэлийн Авто замын хөгжлийн газрын дарга Г.Баярсайхан болон Геодези, усны барилга, байгууламжийн газрын орлогч дарга З.Бямбажав нар газар дээр нь ажиллалаа.

Яармагийн замд ус зайлуулах шугам тооцоо, судалгааны дагуу хийгдсэн боловч уулын ус түрж орох, гуу жалга, шуудууг хааж, барилга, байгууламж барьснаас үүдэн усны голдирол өөрчлөгдөн, зам руу хальж орж байгаа нь ийнхүү ус зайлуулах шугам сүлжээний ачааллыг нэмэгдүүлжээ. Иймээс өчигдөр үүссэн үерийн 160 тонн гаруй усыг гурван автомашинаар соруулан ажиллав. Өнөөдрийн байдлаар үерийн усаар дамжин ус зайлуулах хоолойд орсон хог, шороог цэвэрлэн, зам дээр тогтсон шаврыг зайлуулах ажлыг гүйцэтгэж байна.

Геодези, усны барилга, байгууламжийн газрын орлогч дарга З.Бямбажав “Улаанбаатар хотын хэмжээнд Геодези, усны барилга, байгууламжийн газрын хариуцдаг 156 км орчим ус зайлуулах суваг, далан бий. Энэ удаагийн Яармагийн зам дээр үүссэн үерийн ус тус 156 км далан сувгийг сэргээн засварлах, шинээр нэмэгдүүлэх шаардлагатай гэдгийг харууллаа” хэмээн хэлсэн бол Нийслэлийн Зам, тээврийн асуудал хариуцсан төслүүдийн удирдагч Б.Одсүрэн “Үер усны далан, шуудууг шинээр хийх ажлыг Улаанбаатар хотын Захирагчийн ажлын албатай хамтран хийхээр төлөвлөж байна. Байгалийн давагдашгүй хүчин зүйлд байнгын бэлтгэлтэй байж, урьдчилан сэргийлэх тооцооллуудыг гаргаж ажиллана” хэмээлээ.

Мөн аж ахуй нэгж, байгууллагууд үерийн далан, шуудуу хааж барилга, байгууламж барихгүй байх, барилгын ажил эхлүүлэхээсээ өмнө үер усны далан, суваг, шуудууг нэн тэргүүнд байгуулж байх шаардлагатайг албаныхан анхаарууллаа.