Архангай аймагт өчигдөр буюу долдугаар сарын 12-ны өдөр хүчтэй аадар бороо орж, Тамирын голын гүүрний зарим хэсгийн далан сэтэрч, эвдрэл үүссэн юм. Улмаар орох, гарах хөдөлгөөнийг хязгаарласан талаар бид өмнө нь мэдээлсэн.
Тэгвэл Архангай аймгийн Замын цагдаагийн тасгийн алба хаагчид, Архангай азза ТӨХК-тай хамтран засварлаж зорчих хэсгийн хөдөлгөөнийг нээжээ.
Токиогийн олимпод Монголын 43 тамирчин өрсөлдөх эрхээ аваад буй. Тэгвэл түүхэндээ анх удаа эмэгтэй тамирчид багийн бүрэлдэхүүний дийлэнхийг бүрдүүлжээ.
Тухайлбал, энэ олимпод 25 эмэгтэй, 18 эрэгтэй тамирчин улсаа төлөөлөн өрсөлдөхөөр болоод байна. Эмэгтэй тамирчид Монголын багийн бараг 60 хувийг бүрдүүлсэн юм.
Швейцарын хөгжлийн агентлаг, Монголын бэлчээр ашиглагчдын нэгдсэн холбооныхон “The HU” хамтлагтай хамтран ажиллахаар боллоо.
Олон улсын хэмжээнд сая сая үзэгч, шүтэн бишрэгчидтэй “The HU” хамтлаг нийгмийн хариуцлагынхаа хүрээнд Монгол орны газар нутгийн 80 гаруй хувийг эзэлдэг тал хээр нутгийн экосистемийн тэнцвэрт байдал, унаган төлөв байдлын хадгалан хамгаалах, нүүдлийн мал аж ахуйн тогтвортой байдлын үндэс суурь болсон бэлчээр нутгийг эрүүл байлгах, малчдын амьжиргааг дээшлүүлэх үйлсийг дэмжихээр боллоо.
Швейцарын хөгжлийн агентлагийн Ногоон алт, малын эрүүл мэнд төслийн хүрээнд хөгжүүлсэн нүүдлийн мал ахуйн тогтвортой үйлдвэрлэлийн стандарт, түүний цахим мөшгих систем “Хариуцлагатай нүүдэлчин”-ийг онцгойлон дэмжихээ илэрхийлжээ.
Уг төслийн хүрээнд бэлчээр нутгаа сэлгэж амраан ашиглах уламжлалт арга ухаан, сайн туршлагууд нэн ялангуяа бэлчээрийг доройтож эхлэхээс өмнө урьдчилан сэргийлж нөхөн төлжих боломж олгосноор 20 сая га талхлагдсан бэлчээр унаган төлөв байдалдаа аажмаар эргэн шилжсэн байна. Малчид, орон нутгийн удирдлага, Засгийн газрын хэрэгжүүлэгч агентлагуудтай хамтран бий болгосон “Хариуцлагатай нүүдэлчин” стандарт дэлхийн зах зээлд Монголын байгалийн эрүүл бэлчээр, нутгийн үүлдрийн малын гаралтай бүтээгдэхүүний бусдаас онцгойрох шинж чанаруудыг баталгаажуулах, гарал үүслийг аймаг, сум, баг, малчин өрхөөр ялган харуулах боломж олгож байгаа юм.
Эх сурвалж: Швейцарын хөгжлийн агентлаг
Бороо орсны улмаас Мөрөнгөөс Хатгал, Хатгалаас Жанхай орох замын гол, сайруудын усны түвшин ихсэж үерлэн тээврийн хэрэгсэл гарах боломжгүй болсон тул иргэд, жолооч та бүхнийг зорчихгүй байхыг анхааруулж байна.
Одоогоор Хөвсгөл аймгийн цагдаагийн газраас Хатгалаас Жанхай орох замын зорчих хөдөлгөөнийг хязгаарлаад байна.
Мөн Хатгалын Өлхөний сайр үертэй байна. Цаг агаарын байдлаас шалтгаалж зам, даваа үерийн усанд автагдаж, халтиргаа гулгаа гарч байгаа тул замын хөдөлгөөнд оролцохгүй байхыг анхааруулж байна.
Ерөнхий сайд Л.Оюун-Эрдэнэ, Шадар сайд С.Амарсайхан, Эрүүл мэндийн сайд С.Энхболд нар өчигдөр УОК-ын Шуурхай штабад ажиллав. Энэ үеэр Шадар сайд С.Амарсайхан дараах мэдээллийг өглөө:
-Одоогийн байдлаар эмнэлгийн нийт орны 18 хувь нь сул байна. Эмнэлгүүдэд хүчилтөрөгчийн бэсрэг үйлдвэр суурилуулж эхэлсэн. Баянгол дүүргийн эмнэлэгт суурилууллаа. ХӨСҮТ-ийн хүчилтөрөгчийн үйлдвэр хэвийн ажиллаж байна. Өнөөдөр эмнэлгүүдэд хүчилтөрөгчийн 2000 баллон шинээр нийлүүллээ.
Аймгуудад вакцинжуулалт 69 хувьтай байна. Хоёр дахь тундаа хамрагдах иргэдийн идэвх сул байна. Хоёр дахь тундаа хамрагдаагүй 200 мянган иргэн байна. 12-17 насны 150 мянган хүүхэд вакцинд хамрагдсан. Энэ насны нийт 290 мянган хүүхэд бий. Вакцин хийлгэсэн жирэмсэн эхчүүдийн тоо 4800 болсон. Ирэх долоо хоногоос вакцинжуулалт үргэлжилнэ.
Нийслэлд явуулын 40 амбулатори ажиллаж байна.
Энэ сард нийт 30 нислэгээр 4800 иргэнээ хилийн чанадаас татан авчирна. Энэ сард 1400 иргэн ирээд байна. Тэдний 650 нь тусгаарлах байранд байна. Дельта хувилбарын мутацаас урьдчилан сэргийлэхийн тулд хилийн чанадаас ирэх иргэдээс сүүлийн 72 цагийн дотор PCR шинжилгээ өгсөн байхыг шаардана. Мөн ирээд хяналтад байна.
Иргэд аймгууд руу олноороо зорчиж байна. Энэ сарын 9-нөөс хойш 30 мянган иргэн нийслэлийн товчоодоор орж гарчээ. Долоон аймаг, 60 суманд хөдөлгөөний хязгаарлалттай байна. Эдгээрээс бусад аймгууд руу иргэд чөлөөтэй нэвтэрч болно. Аймгийн төв рүү орох иргэдээс л PCR шинжилгээ авах шаардлага тавьж байна. 119 тусгай дугаарын баг өдөрт 1500 дуудлага хүлээн авч байна. Баяр наадмаас өмнө өдөрт 5000 орчим дуудлага хүлээн авдаг байв. Хэдий дуудлага, эмнэлгүүдийн ачаалал буурсан ч наадмын дараа халдвар дахин нэмэгдэх эрсдэлтэй. Иймд хөдөө явсан иргэд аль болох хүн багатай газруудаар аялаарай.
Эрүүл мэндийн сайд С.Энхболд дараах мэдээллийг өглөө:
-Аймгууд дахь хүнд өвчтөний тоо мөн буурч байна. Хөдөө явсан иргэд аймгуудад очоод халдвар авсан гэх мэдээлэл одоогоор алга. ДЭМБ-ын зөвлөснөөр бид үндэсний баг бүрдүүлэн, аймгуудад шуурхай тусламж үзүүлэх зорилгоор илгээхээр бэлтгэл хангаж байна. Орон нутгаас биеийн байдал хүнд хоёр хүнийг нийслэл рүү онгоцоор авчирна. Наадмын өдрүүдэд шуурхай штабад 185 хүн ажиллаж байна.
Монгол Улсын гадаад худалдааны эхний зургаан сарын статистик мэдээлэл гарчээ.
Тодруулбал, экспортын хэмжээ өмнөх оны мөн үеэс 45,4 хувиар өссөн бол импортын хэмжээ өмнөх оны мөн үеийнхээс 32.6 хувиар өссөн байна. Гадаад худалдааны тэнцэл 850.2 сая амдолларт хүрч өмнөх оны мөн үеэс 2.3 дахин нэмэгджээ.
Харин нүүрсний экспорт 9,2 сая тоннд хүрч, 1,017.0 сая ам долларын орлого олсон байна. Энэ нь өнгөрсөн оны мөн үеэс 634.4 мян тонноор өссөн үзүүлэлт юм.
Мөн экспортын орлогын 70 хувийг бүрдүүлж байгаа зэсийн баяжмал, нүүрс, төмрийн хүдрийн экспортын нийлбэр 2.8 тэрбум амдолларт хүрч өмнөх оны мөн үеэс 1,2 тэрбум ам доллараар нэмэгджээ.
Монгол Улсын Ерөнхий сайд Л.Оюун-Эрдэнэ АНУ-аас Монгол Улсад суугаа Онц бөгөөд Бүрэн эрхт Элчин сайд Майкл Клеческиг 2021 оны долдугаар сарын 12-ны өдөр хүлээн авч уулзлаа.
Монгол Улсын Ерөнхий сайд Л.Оюун-Эрдэнэ УОК-ын Шуурхай штабт ажиллах үеэрээ Засгийн газар Авлигын индексийг бууруулах комисс байгуулахаар болсныг хэллээ.
Засгийн газар баяр наадмын өдрүүдэд ажиллаж байгаа бөгөөд ирэх баасан гарагт ээлжит бусаар хуралдах юм. Хуралдаанаар Авлигын эсрэг комисс байгуулахаар болжээ.
Засгийн газраас гарч байгаа шийдвэр анхан болон дунд шатанд хэрэгжихгүй байгаагаас иргэдэд төрийн үйлчилгээ хүрэхдээ хүнд суртал, авлига дагуулж байна.
Энэ нь саяхан Замын-Үүдийн асуудлаас харагдсан гэдгийг Ерөнхий сайд Л.Оюун-Эрдэнэ хэлсэн юм. Замын-Үүдэд Засгийн газар бүрэн эрхэт төлөөлөгчөө томилсон бөгөөд төрийн алба хаагчдаас шалтгаалсан ачаа барааны бөөгнөрөл үүссэн байдал цэгцэрч байна. Харин БНХАУ-ын талаас хилээр гаргах автомашины хязгаарлалтай холбоотой асуудал байна. Засгийн газар БНХАУ-ын талтай яриа хэлэлцээ хийж байгааг Ерөнхий сайд Л.Оюун-Эрдэнэ онцоллоо.
Архангай аймгийн Эрдэнэбулган сумын Хоршоолол багийн “Хунгийн булаг” гэдэг газарт долдугаар сарын 12-ны өдрийн шөнө 23:45 цагийн орчим усархаг аадар бороо орсны улмаас уруйн үерт автомашин урссан тухай дуудлагыг долдугаар сарын 13-ны өдрийн 00:10 цагт аймгийн Онцгой байдлын газар хүлээж авсан байна.
Тус аймгийн Онцгой байдлын газрын алба хаагчид 02:00 цагт очиход Баянхонгор аймгаас тус аймгийн Ихтамир сумын чиглэлд иргэн Б-гийн жолоодож явсан зургаан зорчигчтой “Ландкруйзер 80” загварын суудлын автомашин уруйн үерт урсаж онхолдсон байсныг татаж гаргажээ. Жолооч болон зургаан зорчигч нь эсэн мэнд автомашинаасаа гарсан байсан гэдгийг мэдээлжээ.
Монгол Улсын Ерөнхий сайдын бүрэн эрхэт төлөөлөгч Л.Алтангэрэл Замын-Үүд боомтын үйл ажиллагааг хэвийн горимд шилжүүлэх зорилготой үе шаттай ажлуудыг хийж байна.
