Month: July 2021

Үйлдвэрлэл, технологийн паркуудын үйл ажиллагааны чиглэлийг өөрчлөх асуудлаар албаныхан зөвлөлджээ.

Нийслэлийн үйлдвэрлэл технологийн паркуудын үйл ажиллагааны чиглэлийг шинэчлэн тодорхойлох, паркуудын хөрөнгө оруулалтын ажлуудыг эрэмбэлэх, эрчимжүүлэх, тулгамдсан асуудлыг шийдвэрлэх ажлын хүрээнд Эмээлт, Багануур, Багахангайн үйлдвэрлэл, технологийн паркуудын үйл ажиллагааны чиглэлийн асуудлаар зөвлөлдөх уулзалтыг цахимаар зохион байгууллаа.

Уулзалтад ХХААХҮЯ, БХБЯ, ЭХЯ, УУХҮЯ, БОАЖЯ, НЗДТГ, Эмээлт, Багануур, Багахангай үйлдвэрлэл, технологийн парк ОНӨТҮГ-ын холбогдох албан тушаалтан, Нийслэлийн Инноваци технологийн асуудал хариуцсан төслүүдийн удирдагч Д.Ихбаяр, Нийслэлийн Шинжлэх ухаан, үйлдвэрлэл, инновацын газрын дарга Л.Тулгабаатар нар оролцов.

Уулзалтаар үйлдвэрлэл, технологийн паркуудын танилцуулгыг хийж, үйл ажиллагааны чиглэлийн талаар байр сууриа илэрхийлж, санал солилцлоо.

Улаанбаатар хотын худалдааны танхимаас санаачлан Цар тахлын улмаас барилга, бүтээн байгуулалтын салбарт учирч буй бэрхшээл, тэдгээрийг шийдвэрлэх шийдлийг тодорхойлох зорилгоор цахим уулзалтыг зохион байгуулав.

Цахим уулзалтад Барилга, хот байгуулалтын Дэд сайд Э.Золбоо, Улаанбаатар хотын Худалдааны танхимын Ерөнхийлөгч Ч.Ганхуяг, Монголын барилгын үндэсний ассоциаци ТББ-ын Ерөнхийлөгч Д.Цэрэнжигмэд, ГХЯ-ны Гадаад худалдаа, эдийн засгийн газрын зөвлөх А.Ариунаа,Монгол Улсаас ОХУ-д суугаа ЭСЯ-ны Элчин зөвлөх бөгөөд Худалдааны төлөөлөгч Д.Хасар,Зам, тээврийн хөгжлийн яамны Авто тээврийн бодлогын хэрэгжилтийг зохицуулах газрын Тээвэр зохион байгуулалтын хэлтсийн дарга Г.Гантулга, ЗТХЯ-ны Авто тээврийн бодлогын хэрэгжилтийг зохицуулах газрын мэргэжилтэн З.Чүнсэрээ, ЗТХЯ-ны Төмөр зам, далайн тээврийн бодлогын хэрэгжилтийг зохицуулах газрын мэргэжилтэн Б.Батнасан, ЗТХЯ-ны Бодлого, төлөвлөлтийн газрын мэргэжилтэн Ц. Нэмэхжаргал, ГЕГ-ын Гаалийн хяналт шалгалтын хэлтсийн Улсын ахлах байцаагч Батболд, С.Ариунаа,Монголын ажил олгогч эздийн холбооны Гүйцэтгэх захирал Х.Ганбаатар болон барилгын салбарт үйл ажиллагаа явуулдаг 45 компанийн төлөөлөл оролцож, үүссэн нөхцөл байдлын талаар ярилцлаа.

Барилга бүтээн байгуулалтын ажил улирлын чанартай явагддаг. Барилгын ажлын хувьд газар шорооны ажил, суурийн ажлуудаа эхлүүлж, барилгын материалын татан авалтуудаа хийх цагаар хөл хорио тогтож, Эрээн-Замын-Үүд хоорондох хил хаагдсанаас шалтгаалан материалын тээвэрлэлтийн үнэ огцом өссөн. Мөн өнөөдрийн байдлаар хилээр нэвтэрч буй ачаа тээврийн нэвтрэлт багассан.

Жирийн үед нэг талдаа 250 орчим автомашин нэвтэрч байсан бол өнөөдрийн байдлаар нэг талдаа 100 машин хилээр нэвтэрч байгаа нь барилгын материал татан авалт, үнэ өсөхөд ихээхэн нөлөөлж байгааг онцоллоо. Барилгын материалын үнэ дэлхийн томоохон эдийн засагчдын тооцоогоор энэ оны сүүлээс буух үзүүлэлттэй байна гэсэн судалгаа гаргаад байна. Барилга, хот байгуулалтын яамнаас барилгын материалын үнийн өсөлтийн талаарх дэлгэрэнгүй судалгааг гаргаж холбогдох яамдад хүргүүлэн ямар боломж байгаа талаар санал солилцож байгаа аж.

Цахим уулзалтад оролцсон төлөөлөл өөр өөрсдийн саналаа илэрхийлж, цаашид ямар арга хэмжээ авах талаарх зөвлөмжийг холбогдох бүх шатны байгууллагад хүргүүллээ. Уулзалтаас гарсан зөвлөмжийг бүрэн эхээр нь хүргэж байна.

БАРИЛГА, ХОТ БАЙГУУЛАЛТЫН САЛБАРТ ХЭРЭГЖҮҮЛЭХ АРГА ХЭМЖЭЭНИЙ ЗӨВЛӨМЖ

1. Хот байгуулалт, төлөвлөлтөд орчин үеийн ухаалаг, байгальд болон оршин суугчид ээлтэй, богино зайн эргэлттэй хот болгох шийдлүүдийг ашиглаж эхлэх, хот төлөвлөлтийн бүх бодлого эдгээр шалгуурыг хангаагүй бол баталдаггүй болох.
2. Дотоодын барилгын материалын импорт, худалдааны зах зээл дээр үйл ажиллагаа явуулж байгаа бүх хувиараа бизнес эрхлэгчид буюу ченжүүд, аж ахуйн нэгжүүдийг бүртгэлтэй болгож татвар төлөгч болгон шударга өрсөлдөх боломжийг бий болгох.
3. Импортын барилгын материал, түүхий эдийн ачаа тээврийг халдвар хамгааллын журмын дагуу халдваргүйжүүлэн саадгүй оруулж ирэх тээвэрлэгчийн тоог одоо байгаагаас 2 дахин нэмэгдүүлэх, хилийн боомтууд дээрх халдваргүйжүүлэлт, хяналт шалгалтыг хэрэгжүүлэхэд зарцуулж буй цагийг 2 дахин багасгах арга хэмжээг холбогдох байгууллагуудтай хамтран хэрэгжүүлэх.
4. Барилгын материал, түүхий эд импортолдог аж ахуйн нэгжүүдийн импортлох түүхий эд, материалд тавигдах шаардлагыг нь тодорхой зааж тухайн шаардлага хангасан бүтээгдэхүүн оруулж ирэх зөвшөөрлийг авсан аж ахуйн нэгжүүдийг гаалийн “Ногоон” горимоор оруулж ирдэг болгох.
5. Барилгын салбарын аж ахуйн нэгжүүдийн татвар, нийгмийн даатгалын өглөгийг цуцлах нэг удаагийн татварын өршөөлийн хууль гаргаж хэрэгжүүлэх.
6. Барилгын салбарын бизнес эрхлэгчдийн төлбөрийн чадавхийг нэмэгдүүлэх, төлбөр түргэн гүйцэтгэх боломжийг сайжруулахын тулд эдгээр аж ахуйн нэгжүүдийг вексель гаргах, векселийг мөнгөжүүлэх эрх зүйн орчныг боловсронгуй болгох.
7. Импортоор орж ирж байгаа барилгын материалуудын стандартын шаардлагыг сайжруулж барилгад чанаргүй, хүний эрүүл мэндэд хор учруулж болзошгүй болон олон улсад хэрэглэхийг хориглосон материал ашигладгийг таслан зогсоох, барилгын ажил явагдаж байх үед эдгээрийг хянаж шалгадаг тогтолцоог бий болгох. Тухайлбал зэвэрдэг, хавдар үүсгэж буй хүнд элементтэй төмөр труба г.м.
8. БХБЯ-ыг БОСНААЯ болгон өөрчлөн зохион байгуулж барилга, хот байгуулалтын өмнө тулгамдаж байгаа боловч бусад салбарын төрийн байгууллагуудын эрх мэдлийн хүрээнд шийдэгдэх шаардлагатай болдог асуудлуудыг нэгтгэн нэгдсэн удирдлагаар бодлогыг нь тодорхойлон хэрэгжүүлдэг болох. Тухайлбал, нийтийн аж ахуй, арчлалт, сайжруулалтын асуудлууд, барилгын салбарын боловсон хүчний хөгжлийн асуудлууд г.м.
9. Барилгын тусгай зөвшөөрлийг олгох журам, шаардлагуудыг орчин цагийн технологиуд болон өнөөгийн эрхзүйн эрэлт дээр суурилснаар шинэчлэх, өөрчлөх
10. Хүрэн шийдэл ба ногоон технологиудыг өөр хооронд нь ялгаж, стандартаар нь ангилсны үндсэн дээр ногоон технологийн шийдэл бүхий тоног төхөөрөмж, материал, түүхий эдийн импортыг татвараас чөлөөлөх, хөнгөлөх. Одоо татвараас чөлөөлөгдөж байгаа тоног төхөөрөмж, бараа материалуудын жагсаалтыг дахин судалж өөрчлөх. Тухайлбал гаалийн болон НӨАТ-аас чөлөөлөх дулааны халаагуурын жагсаалт батлагдсаны дагуу сэргээгдэх эрчим хүчээр ажилладаг халаагуурыг импортлохоор гаальд мэдүүлэхэд УИХ-аас баталсан хөнгөлөлт эдлэх, татвараас чөлөөлөх жагсаалтад байхгүй байна гээд татвар авч байна.

Энэ оны зургадугаар сард нийт халдварт өвчний 63.4 мянган тохиолдол бүртгэгдсэн нь өмнөх сараас 32.8 мянга (2.1 дахин)-аар нэмэгдэхэд коронавирусийн халдвараар өвчлөгчид 33 мянга (2.1 дахин)-аар нэмэгдсэн нь нөлөөлсөн болохыг ҮСХ-ноос мэдээлэв.

Харин вируст хепатит, мөөгөнцөр болон бэлгийн замаар дамжих халдварт өвчин 7-83 тохиолдол (3.2%-77.8%)-оор буурчээ.

Улсын хэмжээнд зургадугаар сард ХДХВ/ДОХ-ын тохиолдол 2 илэрч, нийт бүртгэгдсэн тохиолдол 316 болсон байна.

Замын хөдөлгөөний дүрэм зөрчиж, цагдаагийн алба хаагчийн биед халдсан иргэн М-д алба хаагчийг үүргээ биелүүлэхэд нь хүч хэрэглэн, эсэргүүцсэн тул Баянзүрх дүүргийн цагдаагийн газарт хэрэг бүртгэлтийн хэрэг нээж, шалгаж эхэлжээ. Тодруулбал, Баянзүрх дүүргийн 14 дүгээр хорооны нутаг дэвсгэр, Нарантуул олон улсын худалдааны төвийн замын уулзвар орчимд өчигдөр буюу долдугаар сарын 20-нд “Тоёота премио” маркын тээврийн хэрэгслийн жолооч М хөдөлгөөнд оролцох үедээ Замын хөдөлгөөний дүрмийн 14.7.23-ийг зөрчсөн байна.

Улмаар тээврийн цагдаагийн алба хаагч жолооч М-д торгуулийн арга хэмжээ авахад эсэргүүцэж, цагдаагийн алба хаагчийн биед халджээ. Иймд иргэн 36 настай М-д Эрүүгийн хуулийн тусгай ангийн 23.1 дүгээр зүйлийн нэг дэх хэсэгт заасны дагуу Баянзүрх дүүргийн цагдаагийн газарт хэрэг бүртгэлтийн хэрэг нээж, мөрдөн байцаалтыг эхлүүлжээ.

Эрүүгийн хуулийн 23.1 дүгээр зүйл. Хууль сахиулагчийг эсэргүүцэх

1.Хууль сахиулагчийг албан үүргээ биелүүлэхтэй нь холбогдуулан хүч хэрэглэсэн, хүч хэрэглэхээр заналхийлж эсэргүүцсэн бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ялаар шийтгэнэ.

Замын хөдөлгөөний дүрмийн 14.7.23-т “Жолооч гэрлэн дохио эсхүл зохицуулагчийн дохиог зөрчин замын хөдөлгөөнд оролцсон бол 20 нэгжтэй тэнцэх хэмжээний төгрөгөөр торгоно” гэж заасан байна.