Month: July 2021

Өнгөрсөн 24 цагийн хугацаанд халдварын 1309 тохиолдол бүртгэгджээ. Үүний 511 нь Улаанбаатар хотод бүртгэгдсэн бол 798 тохиолдол нь орон нутагт бүртгэгджээ.

Тэгвэл халдвар авч, эмчлэгдэж байсан зургаан иргэн нас барсан байна. Тэдний гурав нь эрэгтэй, гурав нь эмэгтэй байжээ. Ингэснээр халдвараар нас барсан иргэдийн тоо 755 болж байна.

Харин өнгөрсөн хоногт 2997 хүн эдгэрчээ. Нийт эдгэрсэн хүний тоо 144.245 боллоо.

Мөн маш хүнд гэсэн оноштой 207 хүн хэвтэн эмчлүүлж байгаа юм.

Цаг уурын байгууллагын ирүүлсэн мэдээллээр өнөөдөр буюу 22-нд Хэнтий нурууны арын Улз, Хангай нурууны арын Идэр, Хойттамир өврийн Түй, Байдраг, Онги, Таац, Цагаантуруут Орхон голын нийт уртын дагууд усны түвшин өмнөх өдрийнхөөс 20-235 см нэмэгдэж Сэлэнгэ, Бэлтэс, Туул, Хараа, Хэрлэн, Улз, Шаргалжуут, Байдраг Хархираа, Ховд зэрэг голууд үерийн түвшинг 10-30 см давсан байна.

Харин Орхон, Онон, Халх, Онги, Таац гол үерийн аюултай түвшинг 5-180 см даван хүчтэй үерлэж байна. Цаашид орох хур борооны эрчимшил хэмжээнээс шалтгаалан гол мөрний усны түвшин богино хугацаанд нэмэгдэж, үерлэх, жижиг голууд болон хуурай сайраар уруйн үер буух нөхцөл бүрдэнэ.

Иймд дээр дурьдсан голуудын сав, эрэг дагуу суурьшиж, нутаглаж буй болон аялж зугаалж яваа иргэдийг үерийн аюулаас болгоомжтой байх, бага насны хүүхдийг голын ойролцоо тоглуулахгүй, хараа хяналтаа сайжруулах, баталгаатай зам гарцаар зорчихыг онцгойлон анхааруулж байна.

Боловсрол, шинжлэх ухааны сайдын тушаалаар байгуулагдсан ажлын хэсэг Ерөнхий боловсролын сургуульд сэтгэл зүйч ажиллуулах эрх зүйн орчин болон дэлхийн улс орнуудын туршлагыг харьцуулан судалж, богино, дунд хугацааны төлөвлөлтийг боловсруулсан.

“Тогтвортой хөгжлийн боловсрол II” төслийн түшиц Ерөнхий боловсролын 30 сургуульд ажиллах сэтгэл зүйчийг сонгон шалгаруулалт энэ өдрүүдэд үргэлжиллээ. Сонгон шалгаруулалтад 73 хүний материал ирж хоёр шатны шалгаруулалтын дараа 30 сэтгэлзүйчийг сонголоо. Сонгон шалгаруулалт энэ сарын 5-21-ний өдрүүдэд болсон юм.

Ерөнхий боловсролын сургуулийн сэтгэл зүйчийг мэргэшүүлэх сургалтын хөтөлбөрийг боловсруулж, баталсан бөгөөд дээрх сонгон шалгаруулалтад тэнцсэн сэтгэл зүйчдийн сургалтыг 2021 оны 7 дугаар сарын 26-ны өдрөөс эхлүүлэхээр бэлтгэл ажлыг хангаж байна.

Цаашид илүү олон сургуульд сэтгэл зүйч ажиллуулах боломжийг бүрдүүлэх болно. Сонгон шалгаруулалтын нэгдсэн дүнг хавсаргав.

Гвинейн улсын баг коронавирусийн цар тахлын улмаас олимпийн наадамд оролцохоос татгалзсан талаар AFP мэдээлэв.

“Ковид-19″-ийн халдвар нэмэгдэж байгаатай холбогдуулан Гвиней улсын Засгийн газар тамирчдынхаа эрүүл мэндэд санаа зовсны улмаас Токиогийн наадамд оролцохыг цуцлах шийдвэр гаргалаа” хэмээн Гвинейн баг мэдэгдэлдээ дурджээ.

Сүүлийн жилүүдэд Монгол орны бүх нутгаар элбэг тархсан бамбай хоншоорт хорт могой үерийн усаар дамжин нийслэлд ихээр орж ирэх болсон талаар Нийслэлийн байгаль орчны газраас мэдээллээ. Бамбай хоншоорт могой ихэвчлэн хад асгатай газраар амьдардаг.

Ерөнхий шинж:

• Биеийн урт 70 орчим см
• Биеийн ерөнхий зүс хул шарга юм уу хар хүрэн. Гэвч биеийн зүс маш хувьсамтгай. Тухайлбал ой мод бүхий нутгийнх ихэвчлэн тод хар хүрэн, говь цөлийн бүсийнх цайвар юм уу бор шарга байна.
• Нуруу ба сүүлний дагуу хөндлөн цагаан судалтай. Энэ судал заримдаа дундуураа тасархайтсан байдаг.
• Биеийн хоёр хажуугаар тууш эгнэсэн цайвар бараан толботой.
• Хүүхэн хараа нь босоо.
• Нүд хамрын хооронд гүнзгий хонхортой тул зэрвэс ажиглахад хамрын 4 сүвтэй мэт байдгаараа бусад могойгоос хялбар ялгагдана.

Могойд хатгуулсан тохиолдолд нэн яаралтай хамгийн ойр байрлах эмнэлэгт очих шаардлагатайг анхаарна уу.

Хэрэв та нийслэлд ийм могойтой таарвал ажлын цагаар Нийслэлийн Байгаль орчны газар -ын 318003, 323780 дугаарт, бусад үед Нийслэлийн шуурхай удирдлагын төвийн 310005 тоот утсаар мэдээлэл өгнө үү.