Month: July 2021

Зуны 32 дахь Олимпийн их наадам эхлэхээс хэдхэн цагийн өмнө Японы Өөрийгөө батлан хамгаалах нисэх хүчний дээд зэрэглэлийн нисгэгчдийн “Blue Impulse” баг Токио хотын шинэ Үндэсний цэнгэлдэх хүрээлэн дээгүүр нисэж, Олимпийн бэлэг тэмдэг болох таван цагиргийг хөх, шар, хар, ногоон, улаан өнгийн утаагаар дүрсэллээ.

“Blue Impulse” багийн нислэг орон нутгийн цагаар 12.45 цагт болсон ба олны бөөгнөрөл үүсгэхгүйн үүднээс ба үзүүлбэрийн цагийн хуваарийг сүүлийн мөчид зарласан байна.

Шинжүкү дүүрэгт байрлах шинэ Үндэсний цэнгэлдэх хүрээлэнд өнөөдөр /2021.07.23/ орон нутгийн цагаар 20.00 /УБ цаг: 19.00/ Олимпийн нээлтийн ажиллагаа эхлэх юм.

Японы Өөрийгөө батлан хамгаалах нисэх хүчний дээд зэрэглэлийн нисгэгчдийн баг 1964 оны Токиогийн Олимпийн их наадмын нээлтийн үеэр мөн Олимпийн бэлэг тэмдгийг агаарт дүрсэлж байсан түүхтэй.

“Blue Impulse” баг мөн ижил үзүүлбэрийг наймдугаар сарын 24-.д эхлэх Паралимпийн нээлтийн өдөр үзүүлэхээр төлөвлөж байна.

Олимпийн наадмын нээлтэд дипломат, ивээн тэтгэгч, Олон улсын Олимпийн хорооны төлөөлөгчид зэрэг албаны 950 хүн оролцож байна.

Нээлтийн ажиллагаанд мөн 15 улс, олон улсын байгууллагын тэргүүн, 70 орны спортын сайд нар оролцож байна.

Коронавирусийн халдвар хамгааллын дүрэм ёсоор “Үндэстнүүдийн парад”-ын үеэр тамирчид өөр хоорондоо хоёр метрийн зай барьж, алхана. Ингэснээр нээлтийн үйл ажиллагааны хугацаа төлөвлөгдсөнөөс 30 минут илүү уртсах аж.

Олимпийн таван цагариг энэ мөчид олимпын цэнгэлдэхэд байршлаа. Энэхүү таван цагаригыг 1964 оны олимпод оролцсон тамирчдын тарьсан модоор урлажээ. Цагариг тус бүр дөрвөн метрийн диаметртэй.

Монгол Улсын Ерөнхий сайд Л.Оюун-Эрдэнэ Япон Улсын Цог жавхлант эзэн хаан Нарүхитод Олимпийн нээлтэд оролцож буй хүндэт зочдын хамт бараалхав. Ерөнхий сайд Л.Оюун-Эрдэнэ Олимпийн наадмын нээлтийг албан ёсоор тунхаглаж буй Цог жавхлант эзэн хаанд гүн хүндэтгэл илэрхийлж баяр хүргэв. Мөн “Хэйсэй”-гийн он жилүүдэд цэцэглэн хөгжсөн манай хоёр орны Стратегийн түншлэлийн харилцаа, хамтын ажиллагаа “Рэйва”-гийн шинэ эринд улам батажна гэдэгт итгэлтэй байгаагаа илэрхийлэв.

Цог жавхлант эзэн хаан Монгол Улсын Ерөнхий сайдтай уулзаж байгаадаа баяртай байгаагаа илэрхийлж, Монгол орон, ард түмний талаарх дурсамжаа хуваалцав. Цог жавхлант эзэн хаан угсаа залгамжлах хунтайж байхдаа, 2007 онд Монгол Улсад айлчлах үеэр болсон Улсын филармонийн хамтарсан тоглолт сэтгэлд нь үлдсэн тухай, мөн монгол хаадын эртний өлгий нутаг Хархоринд зочилж байснаа дурсан ярив. Ерөнхий сайд Л.Оюун-Эрдэнэ 2022 онд болох Монгол, Японы хооронд дипломат харилцаа тогтоосны 50 жилийн ойг тохиолдуулан Цог жавхлант эзэн хааныг Монгол Улсад айлчлахыг урив.

Энэхүү арга хэмжээний үеэр Ерөнхий сайд Л.Оюун-Эрдэнэ АНУ-ын тэргүүн хатагтай Жил Байден, Франц Улсын Ерөнхийлөгч Э.Макрон нартай уулзаж, хоёр талын харилцаа болон өргөн хүрээтэй сэдвээр элэгсэг дотно ярилцав.

Ерөнхий сайд Л.Оюун-Эрдэнэ маргааш Япон Улсын Эдийн засгийн сэргээн босголт, “COVID-19” цар тахалтай тэмцэх асуудал эрхэлсэн сайд Я.Нишимура, Японы ХӨСҮТ-ийн удирдлагатай уулзаж, цар тахлын эсрэг хариу арга хэмжээний асуудлаар санал солилцоно.

Эх хэлээ аваръя! хөдөлгөөн нь 2020 оноос Өмнөд Монголд хэрэгжиж эхэлсэн “Хос хэлний бодлого” –ын үндсэн дээр бий болсон дэлхий даяар Монгол хэл, соёл, элэг нэгт ахан дүүсийнхээ төлөө нэгдсэн Монгол үндэстний 16 мянган гишүүд дэмжигчид бүхий нийгмийн хэрэгцээ шаардлагаар үүсэн бий болсон хөдөлгөөн юм.