Month: July 2021

Афганистан Улсын Засгийн газар хүн ам төвлөрсөн гурван хотоос бусад суурин газруудад оршин суудаг иргэдээ гэрээсээ гарахыг нь хоригложээ.

Талибаны бүлэглэлийн мэдэлд орсон хотуудаа эргүүлэн авах, хүчирхийллийг зогсоохын тулд иргэдийг 22:00 цагаас 04:00 цаг хүртэл гэрээс нь гарахыг хориглосон шийдвэр гаргасан байна.

НАТО, АНУ, Их Британи зэрэг холбоотон орнууд Афганистанаас цэргийн хүчээ татаж эхэлснээс хойш Талибаны бүлэглэл Афганистаны 100 гаруй хотыг эзлээд байгаа юм

Австралийн дугуйчин Анна Кизенхофер “Токио-2020” олимпийн замын дугуйн уралдаанд алтан медаль хүртлээ.

Тэрбээр 137 км зайг гурван цаг 52 минут 45 секундэд туулж, ийн ялалт байгуулав. Хоёрт Нидерландын тамирчин Аннемик ван Флойтен /+1 минут 15 секунд/ барианд орж ирсэн бол хүрэл медалийг Италийн дугуйчин Элиза Лонго Боргини /+1.29/ хүртлээ.

Одоогийн байдлаар, Австрали, Итали улс тус бүр нэг алт, нэг мөнгө, нэг хүрэл медальтай байгаа бол Нидерланд хоёр мөнгөн медаль хүртээд байна.

Японоос орогнол хүссэн Мьянмарын үндэсний хөлбөмбөгийн багийн хаалгач Пяе Лян Аун Ёкохамагийн хөлбөмбөгийн клубт дадлагажигчаар элссэн талаар Японы хэвлэлүүд мэдээлжээ. Тэрбээр Японы хөлбөмбөгийн лигийн “YSCC Yokohama” клубт тоглохоор болсон байна.

Өдгөө 27 настай хаалгач тус улсад зургаан сарын хугацаанд амьдарч, ажиллах виз аваад байгаа бөгөөд тавдугаар сард Японд ирсэн юм.

Пяе Лян Аун тавдугаар сарын сүүлээр Япон, Мьянмарын хооронд болсон тэмцээний эхэнд Мьянмарын төрийн дуулал эгшиглэх үеэр “Бид шударга ёсыг хүсч байна” гэх үгийг англиар гарын гурван хуруун дээрээ бичиж, өргөж байв.

Энэ ёслолыг Мьянмарт цэргийн эргэлтийг эсэргүүцэгчид хэрэглэдэг.

Мьянмарын баг зургадугаар сарын дундуур буцах үеэр тэр Осака дахь Кансай нисэх онгоцны буудлын цагаачлалын албад хандан, тус ёслолыг үйлдсэний төлөө амь нас нь аюулд орж болзошгүй тул тус улсад үлдэх хүсэлт тавьж, улмаар орогнол хүссэн ажээ.

Европийн эмийн агентлаг Модернагийн Spikevax вакциныг 12-17 настай хүүхдүүдэд хийхийг зөвшөөрөв. Энэ насны 3732 хүүхдэд хийсэн судалгааны үр дүн эерэг гарсан тул ийм шийдвэр гаргажээ. Тус вакцин ковид-19 вирусний эсрэг дархлаа тогтоож байгааг судалгаагаар баталсан байна.

АНУ-д төвтэй Модерна компаниас өмнө Pfizer-BioNTech компанид хүүхдүүдэд тарихыг зөвшөөрлийг олгосон юм.

Амстердам хотод төвтэй Европын эмийн агентлаг Spikevax вакциныг хүүхдүүдээс гадна насанд хүрэгчдэд тарихыг ч зөвшөөрчээ. Тун хоорондын зай дөрвөн долоо хоног байна.

Moдернагийн вакцин тариулсан 2163 хүүхдээс халдвар авсан тохиолдол гараагүй аж. Харин вакцин тариулсны дараа хүүхдүүд ч халуурах, гар хүндрэх, хавдах, ядрах, толгой, булчин, гэдэс өвчих, чичрэх, бөөлжих гэх мэт зовуур илэрчээ. Эдгээр зовуур тариулснаас хэд хоногийн дараа арилна.

Гэвч судалгааг өргөн хүрээнд хийгээгүй тул хүүхдүүдийн зүрхний булчинд үзүүлэх сөрөг нөлөө (ийм сөрөг нөлөөний магадлал маш бага)-г хэмжих боломжгүй байжээ. Европын орнуудаас Голландад 12-16 насны хүүхдүүдэд Pfizer – BioNTEch вакциныг тарьж байна. Дельта хувилбар олон оронд хурдацтай тархсаар байгаа тул Европын орнууд хүүхдүүдээ дархлаажуулахаар төлөвлөж байгаа юм.

Вакцин биднийг хэрхэн хамгаалдаг вэ?

Spikevax вакцин RNA (mRNA) хэмээн нэрлэдэг молекул агуулдаг. Ковид-19-ийн вирус хүний биеийн эсэд нэвтрэхдээ гадаргуу дээрх уургаа ашигладаг байна. Хүний биед вакцин тарихад тухайн хүний зарим эс RNA (mRNA) молекулыг таньж, түр хугацаагаар уураг ялгаруулдаг. Энэ үед бидний дархлаа тэрхүү уургийг гаднын биет гэж үзэн, эсрэг биетүүд ялгаруулан, түүн рүү дайрахаар цусны цагаан эсүүдийг хөдөлгөөнд оруулдаг. Вакцин тариулсан хүн халдвар авбал түүний дархлааны систем вирусийг таньж, биеийг түүний эсрэг хамгаалалтад бэлтгэдэг. RNA (mRNA) молекул тариулсан хүний биед үлддэггүй, хэсэг хугацааны дараа задран, биеэс гадагшилдаг аж.