Month: July 2021

Цахим орчинд иргэдийг залилах гэмт хэрэг 2015 онд 17 бүртгэгдэж байжээ. Тэгвэл энэ оны эхний зургаан сарын байдлаар 1.700 гаруй бүртгэгдэж, иргэдэд нийт 4.9 тэрбум төгрөгийн хохирол учраад байгааг цагдаагийн байгууллагаас мэдээлэв.

ЦЕГ-ын Мөрдөн байцаах албаны Залилах гэмт хэрэг мөрдөн шалгах хэлтсийн ахлах мөрдөгч, цагдаагийн хошууч Б.Эрдэнэдэлгэр “Үйлдлийн аргыг нь авч үзвэл хамгийн түгээмэл нь цахим худалдаа. Цахимаар бараа бүтээгдэхүүн захиалахад урьдчилгаа төлбөр шаардаж байгаа ч тэр нь ирдэггүй. Иймд иргэд бараа бүтээгдэхүүнээ гар дээрээ авсны дараагаар төлбөрөө бүрэн төлж байх нь зүйтэй.

Мөн хүний цахим хаягт халдаж, ойр дотны хүнээс нь мөнгө зээлэхийг хүсэх болсон тул иргэд тухайн хүнтэйгээ холбогдож, баталгаажуулж байж үйлдэл хийх хэрэгтэй байна.

Хилийн гаднаас ч цахим гэмт үйлдэл хийсээр байна. Тодруулбал, их хэмжээний мөнгийг бага хүүтэй мөнгө зээлүүлэх олон улсын байгууллага гэсэн утгатай мэдээлэл оруулдаг. Энэ дагуу иргэд холбогдоход зээлийн урьдчилгаа барьцаа хэмээн мөнгө шилжүүлэхийг шаардана. Гэвч мөнгө шилжүүлэхэд хилийн гаднах данс руу ордог тул эргүүлэн олж авах магадлал маш бага. Иймд иргэд мэдээллийг маш сайн нягталж байх шаардлагатай” гэлээ.

Улсын Их Хурлаас Гадаадын иргэний эрх зүйн байдлын тухай хуульд нэмэлт, өөрчлөлт оруулах тухай хуулийг 2020 оны 12 дугаар сарын 31-ний өдөр баталсантай холбогдуулан Хууль зүй, дотоод хэргийн яам Гадаад харилцааны яамтай хамтран шинэчлэн боловсруулсан “Монгол Улсын виз олгох журам”, “Гадаадын иргэн Монгол Улсад оршин суух болон түүнийг бүртгэх журам”, “Гадаадын иргэнийг Монгол Улсаас албадан гаргах, албадан гаргахаас чөлөөлөх болон Монгол Улсад дахин оруулахгүй байх хугацааг тогтоох журам”-ын төслүүдийг Засгийн газар 2021 оны долдугаар сарын 07-ны өдрийн хуралдаанаар хэлэлцэн баталлаа.

Уг журмын төслүүдэд визийн ангиллыг төрөлжүүлж, гадаадын иргэдийн бүртгэл, хяналтыг сайжруулах, гадаадын иргэдэд үзүүлэх үйлчилгээг хөнгөвчлөх томоохон зохицуулалтуудыг тусгасан.

Тодруулбал, цахим визийн системийн хөгжүүлэлтийг хийж, www.evisa.mn сайтаар дамжуулан визийн хүсэлтийг хүлээн авах эхний хувилбарыг ажиллагаанд оруулсан. Ингэснээр гадаадын иргэн цахимаар 3 төрлийн виз (жуулчин ангиллын К-2, соёл, урлаг, спортын тэмцээн уралдаан, арга хэмжээнд оролцох, кино, контент бүтээхээр ирэх гадаадын иргэнд К-4, дамжин өнгөрөх гадаадын иргэнд К-6)-ийг авах боломж бүрдэнэ.

Мөн Монгол Улсын визийн ангиллыг цаг үеийн шаардлага, олон улсын жишигт нийцүүлэн төрөлжүүлж, гадаадын иргэнд олгох визийн ангиллыг 64 болгон нэмэгдүүлж, төрөлжүүлснээр статистик тоон мэдээлэл тодорхой гарах, гадаадын иргэн Монгол Улсад ирэх зорилготойгоо нийцсэн визийн ангиллаа мэдүүлдэг болно.

Түүнчлэн хуульд орсон нэмэлт, өөрчлөлтийн дагуу Гадаадын иргэнийг улсын хилээр нэвтрэх үед биеийн давхцахгүй өгөгдлийг авч, улсын хилээр нэвтэрсэн зорчигчийн мэдээллийн нэгдсэн санд бүртгэх ажлын хүрээнд хилийн боомтуудад хүний биеийн давхцахгүй өгөгдөлд суурилсан технологийг нэвтрүүлэхэд шаардагдах программ хөгжүүлэлтийг гүйцэтгэж байна. Уг ажлыг хийж гүйцэтгэснээр гадаадын иргэнийг улсын хилээр нэвтрэх үед хилийн боомтуудад биеийн давхцахгүй өгөгдлийг нь авч, улсын хилээр нэвтэрсэн зорчигчийн мэдээллийн нэгдсэн санд бүртгэж эхлэх юм.

Үүний зэрэгцээ цаашид хил орчмын нутаг дэвсгэрт богино хугацааны аялал жуулчлал хийх гадаадын иргэнд визийн нөхцөлийг хөнгөвчлөх, түргэн шуурхай байдлыг хангах зорилгоор цахимаар визийн хүсэлт авч виз олгох, хил орчмын нутаг дэвсгэрт аялах визийг тухайн боомтод олгох зэрэг зохицуулалтыг холбогдох журамд тусгалаа.

Монгол Улсын хилээр орж ирсэн гадаадын иргэнд биеийн давхцахгүй өгөгдөл /хурууны/-д суурилсан 13 орон бүхий бүртгэлийн дугаар олгох болон гадаадын иргэнийг бүртгүүлэх программ хангамжийг хөгжүүлж, улмаар энэ 06 дугаар сараас эхлэн үйлчилгээнд нэвтрүүлсэн. Энэ нь гадаадын иргэн биечлэн очиж бүртгүүлдэг байсныг хөнгөвчилж, 48 цагийн дотор гар утаснаас эсхүл цахимаар бүртгүүлдэг болгосон төдийгүй Монгол Улсад байгаа гадаадын иргэнд цахимаар бүртгэлийн дугаар олгох боломжийг бүрдүүлж өгсөн. Ийнхүү тус үйлчилгээнүүдийг нэвтрүүлснээр нэг талаас гадаадын иргэнийг таних, баталгаажуулах бүртгэл, хяналтын үйл ажиллагаа сайжирч, гадаадын иргэнд үзүүлэх үйлчилгээ илүү шуурхай, хялбар болж байгаа юм.

Дашрамд дурдахад гадаадын иргэнд бүртгэлийн дугаар олгох үйлчилгээг төрийн бүх байгууллага болон хувийн хэвшил (банк, зочид буудал, оператор компани гэх мэт)-ийнхэн ашиглах бүрэн боломжтой.

Өчигдөр буюу долдугаар сарын 7-ны өдөр Тээврийн цагдаагийн албаны жижүүрийн шуурхай удирдлагын төвд нийт 345 дуудлага мэдээлэл хүлээн авснаас зам тээврийн ослын шинжтэй 263 дуудлага мэдээлэл бүртгэгдсэн байна. Бүртгэгдсэн зам тээврийн ослын улмаас нийслэлд хоёр, орон нутагт тав хүн гэмтэж, нэг хүний амь хохирсон байна. Тухайлбал:

Нийслэлд

• 20:00 цагийн орчим Сонгинохайрхан дүүрэг товчооны замд мотоциклын жолооч суудлын автомашинтай мөргөлдөж зорчигч нэг сартай нярай хүүхэд гэмтсэн.

Орон нутагт

• 06:00 цагийн орчим Говь-Алтай аймаг Дэлгэр сумын нутагт суудлын автомашин онхолдож зорчигч 2 хүн гэмтсэн.
• 21:00 цагийн орчим Дундговь аймаг Сайнцагаан сумын нутагт суудлын автомашины жолооч нь явган зорчигч мөргөж гэмтээсэн.
• 23:00 цагийн орчим Өмнөговь аймаг Баяндалай сумын нутагт суудлын автомашин онхолдож зорчигч 1 хүн гэмтсэн.
• 17:00 цагийн орчим Сүхбаатар аймаг Түвшинширээ сумын нутагт суудлын автомашин онхолдож зорчигч 1 хүн гэмтсэн.
• 16:00 цагийн орчим Хэнтий аймаг Биндэр сумын нутагт суудлын автомашин онхолдож зорчигч 1 хүний амь хохирсон.

Гудамж замын хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодож хөдөлгөөнд оролцсон нийт 87 зөрчил илрүүлсний нийслэлд 50, орон нутагт 37 зөрчлийг илрүүлж учирч болох эрсдэлээс урьдчилан сэргийлж ажилласан байна.

Жолооч та бүхэн хөдөлгөөнд оролцохдоо тээврийн хэрэгслийн бүрэн бүтэн байдалд хяналт тавин, хөдөө орон нутгийн замд гарахдаа техникийн үзлэг оношилгоонд хамрагдаж тээврийн хэрэгслээ бэлдсэний дараа аян замд гарах, мотоциклтой хөдөлгөөнд оролцохдоо хамгаалах малгай хамгаалалтын хэрэгслийг тогтмол зүүж хэрэглэн хөдөлгөөнд оролцох, тээврийн хэрэгслийн хурдыг тогтоосон хязгаараас хэтрүүлэхгүйгээр хөдөлгөөнд оролцохыг Тээврийн цагдаагийн албанаас анхааруулж байна.

Цахимаар мөрийтэй тоглоом зохион байгуулдаг сайт өнгөрсөн оны сүүлээр 18 байжээ. Харин энэ тоо өнөөдрийн байдлаар 231 болж өссөн тухай Эрүүгийн цагдаагийн албанаас мэдээллээ.

Одоогоор цахим покер тоглоомын 68 сайт, тэдгээрийн ард буй этгээдүүдийг илрүүлэн хэрэг бүртгэлтийн хэрэг нээн, мөрдөж шалгаж байгаа аж. Мөн цахим мөрийтэй тоглоом зохион байгуулдаг 72 сайтын хандалтыг хязгаарлажээ.

Монгол Улсын Эрүүгийн хуульд 2020 оны нэгдүгээр сарын 10-нд оруулсан нэмэлт өөрчлөлтөөр цахим орчинд мөрийтэй тоглоом зохион байгуулахыг эрүүгийн гэмт хэрэгт тооцон хуульчилсан байдаг.

Эрчим хүчний яамны захилга, Европын сэргээн босголт, хөгжлийн банкны санхүүжилтээр 10 дугаар хорооллоос Сүлжмэлийн үйлдвэр хүртэлх буюу 8А магистраль шугамыг өргөтгөн, бүрэн шинэчилж, халаалтын улирлаас өмнө ашиглалтад оруулахаар ажиллаж байна. Тус 8А магистраль нь анх 1997 онд Дани Улсын буцалтгүй тусламжаар угсрагдаж байсан бөгөөд 24 жил болж буй, ашиглалтын хугацаа дууссан шугам юм. Өнгөрсөн өвөл л гэхэд 3-4 удаа том аваар гарч, тухайн үед нь шуурхай арга хэмжээ авч, засварлаж байсан.

Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр шугам сүлжээний өргөтгөлийн ажлыг эрчимжүүлэх зорилгоор Европын сэргээн босголтын банкны суурин төлөөлөгч Игор Питров болон бусад албаныхантай хэд хэдэн удаа хуралдаж, тендерийн үйл ажиллагаа, яамдуудын уялдаа холбоог хангаж ажлыг түргэвчилсэн. Үүний үр дүнд тус ажил долдугаар сарын 1-нээс эхэлж, трасст орсон талбайг чөлөөлөх, ногоон байгууламж, объектыг шилжүүлэх ажлуудыг хийгээд байна.

Шугам сүлжээг өргөтгөх ажил нийт долоон хэсгээс бүрдэх бөгөөд гүйцэтгэгчээр шалгарсан байгууллагууд долдугаар сарын 14-нд ажлаа эхлүүлнэ. Үүнтэй холбоотойгоор Баянгол дүүргийн V, VI, Сонгинохайрхан дүүргийн 12-17-р хорооны хэрэглэгчдийн халуун усыг тодорхой хугацаанд хязгаарлах юм. Захиалагчийн хяналтыг “Улаанбаатар дулааны сүлжээ” ТӨХК гүйцэтгэж байна.

24 жилийн насжилттай дулааны 8А,Б,В,Г магистраль шугамыг солих ажил долдугаар сарын 14-нд эхлэх талаар Хотын Захирагчийн ажлын албанаас мэдээллээ.

Хотын Захирагчийн ажлын алба “Эрчим хүчний яамны захилгаар, Европын сэргээн босголт хөгжлийн банкны санхүүжилтээр хийгдэх 10 дугаар хорооллоос Сүлжмэлийн үйлдвэр хүртэлх буюу 8А магистраль шугамыг нэвтрэх систем /нэг талдаа 3.3км урттай 500Ф шугам/-д оруулан 600Ф болгон өргөтгөх, бүрэн шинэчлэх ажлыг энэ онд зохион байгуулж халаалтын улирлаас өмнө ашиглалтанд оруулахаар ажиллаж байна.

8А магистраль нь анх 1997 онд Дани улсын буцалтгүй тусламжаар угсрагдаж байсан бөгөөд 24 жил ажиллаж буй, ашиглалтын хугацаа дууссан шугам юм. Өнгөрөгч өвөл гэхэд 3-4 удаагийн том аваарыг засварлаж шуурхай арга хэмжээ авч байсан.

Хотын Ерөнхий менежер шугам сүлжээний өргөтгөлийн ажлыг эрчимжүүлэх зорилгоор Европын сэргээн босголтын банкны суурин төлөөлөгч Игор Питров бусад албаныхантай хэд хэдэн удаа хуралдаж, тендерийн үйл ажиллагаа процесс, яамдуудын уялдаа холбоог хангаж ажлыг түргэвчилсний үр дүнд тус ажил долдугаар сарын 1-нээс эхэлж, трассд орсон талбайг чөлөөлөх, ногоон байгууламж, обьектыг шилжүүлэх ажлууд хийгдээд байна.

Шугам сүлжээг өргөтгөх ажил нийт 7 хэсгээс бүрдэх бөгөөд гүйцэтгэгчээр шалгарсан байгууллагууд долдугаар сарын 14-нд ажлаа эхлүүлэхтэй холбоотойгоор Баянгол дүүргийн 5,6, Сонгинохайрхан дүүргийн 12-17-р хорооны хэрэглэгчдийн халуун усыг 2021.07.14-2021.09.16-ныг хүртэл хязгаарлах юм. Захиалагчийн хяналтыг Улаанбаатар дулааны сүлжээ ТӨХК хийж байна” хэмээн мэдээллээ.