Month: April 2021

Говь-Алтай аймгийн Есөнбулаг сумандхалдварын сэжигтэй нэг тохиолдол бүртгэгдэж, аймгийн хэмжээнд хатуу хөл хорио тогтоосон тухай өчигдөр /2021.04.24/ тус аймгийн ЗДТГ-аас мэдээлсэн. Халдварын сэжигтэй тохиолдол бүртгэгдсэнтэй холбоотой аймгийн Шуурхай штабаас тодруулахад “Аймгийн хэмжээнд сэжигтэй 12 тохиолдол бүртгэгдсэн. Эдгээр иргэдийн шинжилгээний сорьцыг ХӨСҮТ-рүү илгээсэн. Шинжилгээний хариу одоогоор эцэслэн гараагүй байна. Одоогоор аймгийн хэмжээнд тандалт судалгааны ажил үргэлжилж байгаа” гэсэн юм.

Өчигдөр аймгийн хэмжээнд 11 мянга гаруй иргэнийг түргэвчилсэн шинжилгээ, 1200 гаруй хүнийг PCR шинжилгээнд хамруулсан талаар Говь-Алтай аймгийн эрүүл мэндийн газрын дарга Ц.Туяа мэдээлсэн юм. Мөн халдварын сэжигтэй тохиолдол бүртгэгдсэнтэй холбоотойгоор аймгийн хэмжээнд бүх хөдөлгөөнийг бүрэн зогсоож, Есөнбулаг, Баян-Уул суманд тэг зогсолт хийгээд буй.

Өнөөдөр буюу дөрөвдүгээр сарын 25-ны өдөр ажиллах дархлаажуулалтын цэгийг дүүрэг бүрээр танилцуулж байна.

Нийслэлийн хэмжээнд өчигдөр дархлаажуулалтын I тунд 5,665, II тунд 59970, нийт 65635 иргэнийг хамруулсан бөгөөд тус өдрийн байдлаар нийт вакцинд хамруулах ёстой хүн амын 31.4 хувь нь вакцинаа хийлгээд буйг Эрүүл мэндийн яамнаас мэдээлсэн билээ.

Нийслэлийн удирдах ажилтнуудын шуурхай зөвлөгөөнөөр Нийслэлийн Засаг дарга бөгөөд Улаанбаатар хотын Захирагч Д.Сумъяабазар хөл хорионы хугацаанд хот нийтийн аж ахуйн ажлуудыг эрчимжүүлэх үүрэг өгсөн. Тэгвэл энэ дагуу Улаанбаатар хотын Захирагчийн ажлын албанаас олон ажил зохион байгуулж байна.

Тус албаны Хог хаягдлын удирдлага, зохицуулалтын хэлтсийн дарга С.Аригуун “Жил бүр тухайн жилд хийх бүх нийтийн их цэвэрлэгээний хуваарь гардаг. Жилд 6-7 удаа бүх нийтийн их цэвэрлэгээ хийдэг. Улаанбаатар хотын Захирагчийн ажлын албанаас цэвэрлэгээний ажлын хүрээнд дөрвөн төрлийн ажил хийж байна. Үүний нэг нь Туул гол дагуух цэвэрлэгээ. Захирагчийн ажлын алба, Иргэдийн бүлгийн 50 гаруй ажилтан, “Өнөр бүл” хүүхдийн төвийн 40 гаруй хүн хамтран Туул гол дагуух цэвэрлэгээг хийлээ. Мөн мананцар үүсгэгч машинаар халдваргүйтгэлийг өнгөрсөн гуравдугаар сарын 30-наас хуваарийн дагуу дүүргүүдэд хийж байгаа.

Нийт долоон машин ариутгал, халдваргүйтгэл хийж байгаагаас өнөөдөр Хан-Уул дүүргийн нутаг дэвсгэрт халдваргүйтгэл хийж байна. Гуравдугаарт, автобусны буудлыг угааж, цэвэрлэх ажлыг мэргэжлийн ариутгал, халдваргүйтгэл хийх тусгай зөвшөөрөлтэй компанийн долоон бригад хийж байгаа юм. Түүнчлэн үйл ажиллагаа явуулж байгаа хүнсний худалдаа, үйлчилгээний төвүүд ойр орчмынхоо 50 метрт үүссэн хог хаягдлыг цэвэрлэж, хаалга, хашлагыг угааж, цэвэрлэх ажил үргэлжилж байна” гэлээ.

Өнөөдрийн цэвэрлэгээний ажилд “Өнөр бүл” хүүхдийн төвийн хамт олон сайн дураараа нэгдэж, Туул гол дагуух хогийг цэвэрлэлээ. Тэд жил бүр 2-3 удаа Туул гол дагуух эргийг цэвэрлэдэг байна. Мөн тус төвийн ажилтнууд сайн дураараа мөнгө цуглуулж, нэг сая гаруй төгрөгөөр ариутгалын бодис худалдаж авсан гэдгээ хэлж байлаа.

Эх сурвалж: Нийслэлийн ЗДТГ-ын Хэвлэл мэдээлэлтэй харилцах хэлтэс

Эрүүл мэндийн яамнаас коронавирусийн халдварын нөхцөл байдлын талаарх өнөөдрийн ээлжит мэдээллийг хүргэж байна. (2021.04.25)

Сүүлийн 24 цагт улсын хэмжээнд 1264 хүнээс коронавирусийн халдвар илэрч, 4 хүн нас баржээ. Батлагдсан тохиолдлуудын 1127 нь Улаанбаатар хотоос, 137 нь орон нутагт бүртгэгдлээ. Улсын хэмжээнд халдвар авсан нийт тохиолдлын тоо 30.483 боллоо.

Эмчилгээ, эмнэлзүйн мэдээллийг авч үзвэл:

• 2562 иргэний биеийн байдал хөнгөн
• 1456 иргэний биеийн байдал хүндэвтэр
• 359 иргэний биеийн байдал хүнд
• 81 иргэний биеийн байдал маш хүнд

Коронавируст халдварын нөхцөл байдлын талаар Эрүүл мэндийн яамнаас ээлжит мэдээллээ хүргэж байна.

ЭМЯ-ны Хэвлэлийн төлөөлөгч Б.Ууганбаяр “Сүүлийн 24 цагт хүнд 13000 PCR шинжилгээ хийхэд 1264 хүнээс халдвар илэрлээ. Эдгээрийн 1127 нь Улаанбаатар хотод, орон нутагт 137 нь байна.

Ингэснээр улсын хэмжээнд нийт батлагдсан тохиолдол 30484 боллоо.

Халдвар авсан 4 хүн нас барсан байна. Нийт нас баралт 86 боллоо. 70 настай эмэгтэй, 57 настай эмэгтэй, 66 настай эрэгтэй, 68 настай эмэгтэй коронавирусийн нэн хүнд хэлбэрээр нас барлаа.

Сүүлийн 24 цагт 658 хүн эмчлэгдэж, эмнэлгээс гарлаа. Ингэснээр нийт эдгэрсэн хүний тоо 15403 болов.

Өнөөдрийн байдлаар 4457 хүн эмчлэгдэж байна.

Нийслэлийн хэмжээнд Covid-19-ийн халдвараас урьдчилан сэргийлэх дархлаажуулалтын ажлыг эрчимжүүлж, вакцины эхний тунд хамрагдсан иргэдийн хоёр дахь тунг хийж эхлээд байна. Тэгвэл өчигдөр /2021.04.24/ нийслэлд нийт 64397 хүн Covid-19-ийн эсрэг вакцинд хамрагджээ. Ингэснээр вакцины эхний тунд 660.548, хоёр дахь тунд 178.021 хүн хамрагдаад байна. Харин өнөөдөр /2021.04.25/ хуваарийн дагуу энэ сарын 14, 15, 16, 17, 25-нд хоёрдугаар тунгаа хийлгэх ёстой иргэд вакцинаа тариулах юм. Мөн 55-аас дээш насныхныг хамруулах аж.

Эрүүл мэндийн яамны зүгээс тавдугаар сарын 10-н гэхэд Улаанбаатарын иргэдийг нэгдүгээр тунгаар бүрэн дархлаажуулж дуусах бол зургадугаар сарын 10-н гэхэд хоёрдугаар тунд бүрэн хамруулна хэмээн мэдээлсэн. Одоогийн байдлаар Монгол Улсад зорилтот бүлгийн 32 хувь нь нэгдүгээр тун, 8.6 хувь нь хоёрдугаар тундаа бүрэн хамрагдаад байна.

Covid-19-ийн эсрэг вакциндаа бүрэн хамрагдсанаас хойш 14 хоногт дархлаа тогтоно гэдгийг мэргэжилтнүүд хэлж буй. Гэхдээ вакцины хоёр тунгаа бүрэн хийлгэсэн ч вирусээр хөнгөн өвчилж, бусдад халдвар тараах эрсдэлтэй тул халдвар хамгааллын дэглэмээ тогтмол барих шаардлагатай гэдгийг ЭМЯ анхааруулсаар байна.