Month: February 2021

2021 оны энэ сарын 11-ний өдрийн 06.00 цагаас хоёрдугаар сарын 23-ны өдрийн 06.00 цаг хүртэл нийслэлд Гамшгаас хамгаалах бүх нийтийн бэлэн байдлын зэрэгт хэсэгчлэн шилжүүлэх Улсын онцгой комиссын шийдвэр гарсан.

Бүх нийтйн бэлэн байдлын үед төвийн зургаан дүүргийн Өрхийн эрүүл мэндийн төвүүдийн иргэн танд зөвлөгөө өгөх утас, хаяг байршлын мэдээллийг хүргэж байна.

Чингэлтэй дүүрэг

Сонгинохайрхан дүүрэг

Баянгол дүүрэг

Хан-Уул дүүрэг

Баянзүрх дүүрэг

Сүхбаатар дүүрэг

Нийслэлийнхэн өнөөдөр /2021.02.11/-өөс 12 хоногийн хугацаанд хатуу хөл хорионы дэглэмд шилжиж байна. Шадар сайд С.Амарсайхан Сүхбаатар дүүрэгт хөл хорионы нөхцөл байдалтай танилцаж, алба хаагчидтай уулзлаа.

Тэрбээр УОК-ын шийдвэр төрийн албан хаагчдад хүрч буй талаар алба хаагчдын нөхцөл байдлыг тодруулсан. Энэ үеэр тус дүүрэгт эргүүлд гарч үүрэг гүйцэтгэж буй цагдаагийн албан хаагч хэлэхдээ “Бид нарт өгсөн үүрэг чиглэлээр цахилгаан түгээх болон шатахуун түгээх, хүнс хөдөө аж ахуй, шаардлагатай тохиолдолд эмнэлгийн үйлчилгээ яаралтай авах гэж буй хүмүүс бичиг баримттайгаар зорчуулж байна. Зарим иргэд хайхрамжгүй зан гаргаж, эмнэлэг явах гэж байна гэж худал ярих тохиолдол гарч байгаа учраас эмчийн онош, эмнэлгийн бичиг шалгаж байна.

Хөл хорионы дэглэмийг сахиулахаар төрийн 27 мянга гаруй алба хаагчид эргүүлд гарч ажиллаж байгаа юм. Шадар сайд С.Амарсайхан эргүүлийн үүрэг гүйцэтгэж буй алба хаагчдад иргэдэд хүндрэл учруулж болохгүй гэдгийг сануулав.

Шадар сайд С.Амарсайхан “Бие биедээ тусалж, харилцаа холбоотой байж ажлын үр дүн гарна. Алба хаагчид нэгдсэн мэдээллээ цаг тухайд нь солилцож, цаг үеийн мэдээллээ ч бас харж үүрэг гүйцэтгэх хэрэгтэй. Өглөө зарим газруудад ойлголтын зөрүү гарсан. Үүнийг алба хаагчид та бүхэн засч ажиллах ёстой.

Бид шийдвэр гаргаад байдаг. Гэтэл бодит байдал дээр хүний хүчин зүйлсээс шалтгаалсан харилцан уялдаагүй өөр өөр шийдвэр, асуудал үүсч байгаа учраас нөхцөл байдалтай газар дээр нь танилцаж байна. Ажлын зөрүү хөрсөн дээр алдаа гарч байна. Иргэдэд дэлгэрэнгүй хангалттай тайлбар өг. Өөрсдөө журамтайгаа танилц.

Бид өөрсдөөсөө эхлээд асуудлуудыг нэг нэгээр нь танилцаж байгаа. Хүн бүр ямар нэгэн ойлголтын зөрүүгүй байгаасай гэдэгт амаа чилтэл ярьж, хэрэгжилтийг биелүүлэх гэж л ядаад байна. Цаасан дээр шийдвэр гараад байдаг, хэрэгжилт хангалтгүй бол ажлын үр дүн гарахгүй. Та бүхний ямар нэг алдаанаас болж гаргасан шийдвэрийн хэрэгжилт үр дүнгүй байж болохгүй. Өнөөдрийн байдлаар 40 мянган иргэн шинжилгээ өгсөн байна. Уг нь бид өдөрт 30-35 мянган иргэн шинжилгээ өгнө гэж төлөвлөж байлаа. Тэгэхээр иргэд хариуцлагатай байгаа учраас бид бүхэн нэгдсэн мэдээлэлтэй, нэг ойлголттой байх ёстой. Маргааш шинийн нэгэн учраас айл өрхүүдийг золголт хийлгэхгүй байхад анхаарч, онцгой ач холбогдол өг. Эрсдэл хаа сайгүй байгаа учраас маргааш айл өрхүүдээр иргэд орохгүй байх, иргэд хөдөлгөөнд оролцохгүй байхад та бүхэн мэдээллээ сайн өг. Үүнд анхаарч ажилла.

Алба хаагчдын зүгээс иргэдэд ойлгомжгүй шаардлага тавьж байгаа учраас УОК-ын шийдвэр шүүмжлэл дагуулж, иргэдийг бухимдуулж байгааг Шадар сайд С.Амарсайхан эргүүлийн үүрэг гүйцэтгэж буй алба хаагчдад санууллаа. Тухайлбал, хүнсний дэлгүүр хязгаарлалтад ороогүй тул иргэд хувийн болон түгээлтийн тээврийн хэрэгслээр зорчих тул хөдөлгөөнд оролцох боломжтой.

Европын Холбооны санхүүжилттэй Дэлхийн Зөн Олон Улсын байгууллагын хэрэгжүүлж буй “Хамтдаа даван туулъя” төслийн хүрээнд Эрүүл мэндийн яаманд “Ковид-19” цар тахлын эсрэг үйл ажиллагаанд дэмжлэг үзүүлэн 370 эмнэлгийн тоноглогдсон ор хандивлалаа.

Европын Холбооноос Монгол Улсад суугаа элчид сайд ноён Траяан Христеа энэ үеэр “Өнөөдөр Европын Холбооноос Монгол Улсад үзүүлж буй тусламжийн хүрээнд “COVID-19”- өвчилсөн хүмүүсийн эрүүл мэндийн тусламж үйлчилгээнд ашиглагдах 315,000 евро буюу 1 тэрбум 74 сая төгрөгийн өртөгтэй 370 тоноглогдсон эмнэлгийн орыг хүлээлгэн өгч байна.

“COVID-19”-ийн дотоодын халдварын тохиолдол нэмэгдэж эмнэлгийн тоног төхөөрөмж, хэрэгслийн хэрэгцээ шаардлага улам бий болж буй энэ үед уг тусламжийг үзүүлж байгаадаа бид баяртай байна. Түүнчлэн, Европын Холбоо болон түүний гишүүн орнуудын томоохон санхүүжилтээр хэрэгжүүлж буй Ковакс хөтөлбөрийн хүрээнд Монгол Улс Astra Zeneca-ын 163.200 тун, Pfizer-ын 25.740 тун вакциныг тус тус хүлээн авна” гэж хэллээ.

Европын Холбооны санхүүжилттэй Дэлхийн Зөн ОУБ-ын хэрэгжүүлж буй “Хамтдаа даван туулъя” төсөл нь 2021 оны эхээр хэрэгжиж эхэлсэн. Тус төслийн үндсэн зорилго нь Ковид-19-ийн сөрөг нөлөөлөлд өртсөн эмзэг өрхүүдэд нэн яаралтай хүнс тэжээл, эрүүл мэнд, ус эрүүл ахуйн үйлчилгээний хүртээмжийг нэмэгдүүлэх замаар тэдний амьжиргааг дэмжих бөгөөд эрүүл мэндийн байгууллагуудыг цар тахлын эсрэг хариу арга хэмжээ авах, урьдчилан сэргийлэхэд шаардлагатай багаж хэрэгслээр хангаж эрүүл мэндийн тогтолцоог бэхжүүлэхэд хувь нэмрээ оруулах юм.

Монголчууд эрт дээр үеэс шинийн нэгний өглөө “Алаг мэлхий өрөх” тоглоомоор наадан ирсэн уламжлалтай билээ.

Өрж буй шагайны тооноос хамаараад Их өрөг, Бага өрөг, Дунд өрөг, Хангал өрөг гэж нэрлэдэг аж. Их өргийг зуны дэлгэр цагт, тэнгэр дуугараагүй үед гадаа ширдэгэн дээр эсвэл булгийн эхэнд мянган шагайгаар олуулаа наадан тоглож буцахдаа элэгдэж хуучирсныг нь уул усандаа өргөн үлдээдэг байжээ.

108 шагайгаар тоглодог бага өрөг “Алаг мэлхий” наадгайг битүүний шөнө багачууд өрж хоноод Шинийн нэгний өглөө идээ ундаа болохыг хүлээх зуураа тоглодог аж.

Зурхайн ухааны гол шинжүүд болох огторгуй, шороо, гал, уул, төмөр, мод зэргийг агуулдагаараа онцлог юм. Мөн зургаан шагай бүхий хүзүүгээр зургаан цагаан мэнгийг төлөөлүүлдэг гээд эрхтэн бүрт байх тоо болгон билэгдэлтэй байдаг аж.

“АЛАГ МЭЛХИЙ”-Г ӨРӨХ БОЛОН НААДГАЙГ ТОГЛОХ ЖУРАМ

Цагаан сараар тоглодог бага алаг мэлхий нь нийт 108 шагайнаас бүрдэх бөгөөд дээрх хүснэгтэнд харагдах байдлаар өрдөг аж.

Шинийн нэгэнд уламжлалт арван хоёр жилийн тоолол ёсоор учран золгож буй жилтэй ижил жилтэй хүн (жил нь орж буй хүн) буюу эс олдвол түүнтэй ивээл жилтэй хүнээс эхлэн нар зөв тойрон суусан дарааллаараа шоо хаядаг.

Нэг нүх буувал зүрх буюу давсаг,
Хоёр нүх буувал нүд, чих, бөөр гурвын аль нэгийг,
Гурван нүх буувал толгой,
Дөрвөн нүх буувал дөрвөн шилбэний аль нэгийг,
Таван нүх буувал дөрвөн сарвууны аль нэгийг,
Зургаан нүх буувал хүзүүг буюу зургаан нурууны аль нэгийг тус тус авна. Хэрэв шооны нүхний тоонд тохирсон шагайг хүн авчихсан байвал мэлхийний эх бие хэмээн өрсөн шагайнаас аль тохирох тоотойг авна.

Энэ мэтээр тоглосоор өрсөн шагайг авч дуусахад хэн олныг авсан нь хождог. Наадгайнд хожсон хүнийг тэр жилдээ аз хийморьтой байна гэж үздэг байна.

Улсын онцгой комиссоос гаргасан шийдвэрийн дагуу өнөөдрөөс буюу 2021 оны энэ сарын 11-нээс нийслэлд “Нэг хаалга-Нэг шинжилгээ” хийж эхэлсэн. Эрүүл мэндийн байгууллагын өгсөн мэдээнээс үзвэл 14:30 цагийн байдлаар 30, 474 хүн “Ковид-19”-ийн шинжилгээнд хамрагдаад байна.

Үүнээс:

• Багануур -79
• Баянзүрх -5,686
• Баянгол -4,394
• Хан-Уул -2,763
• Чингэлтэй -3,743
• Сүхбаатар -2,579
• Сонгинохайрхан -9,343
• Налайх -1,809

“Нэг хаалга-Нэг шинжилгээ”-ний хүрээнд нийслэлийн найман дүүрэгт 84 цэг, явуулын 146 багт 1,414 эмч, мэргэжилтэн ажиллаж байна. “Ковид-19” халдварыг илрүүлэх, тандах шинжилгээнд халдварын голомтын идэвхитэй бүсэд хамаарах эрсдэлтэй хороодоос сонгогдсон айл өрхийн нэг гишүүн хамрагдана.

Засгийн газрын 130 дугаар тогтоолоор батлагдсан журмын дагуу 2020 оны арванхоёрдугаар сарын сүүний урамшууллыг олгоод байна.

Сүү боловсруулах 8 үйлдвэр, цехэд арванхоёрдугаар сард 1,533,489 литр түүхий сүүг мал эмнэлгийн гарал үүслийн гэрчилгээтэй, татварын цахим төлбөрийн баримт /и-баримт/ үүсгэн баталгаажуулсан нийт 1643 малчин, 16 эрчимжсэн мал аж ахуйн эрхлэгч аж ахуйн нэгжид Хүнс, хөдөө аж ахуй, хөнгөн үйлдвэрийн сайдын 2021 оны А-11 дүгээр тушаалын дагуу 766,744,500.0 төгрөгийн мөнгөн урамшууллыг төрийн сангийн дансаар дамжуулан шилжүүлжээ.

Сүү бэлтгэн нийлүүлж буй малчин, эрчимжсэн мал аж ахуй эрхлэгчид нь Засгийн газраас баталсан журамд заасан дараах зүйлсийг анхаарах шаардлагатай байна. Үүнд:

-Нийлүүлж буй сүү нь эрүүл ахуйн шаардлагад нийцсэнийг нотлох мал эмнэлгийн гарал үүслийн гэрчилгээг заавал авсан байна.

-Сүүний үйлдвэрт сүү нийлүүлэх тухай бүр малчны иргэний үнэмлэхний QR кодыг уншуулж татварын цахим төлбөрийн баримт буюу и-баримт үүсгэх, худалдан авсан тал /үйлдвэр/, борлуулсан тал /малчин, эрчимжсэн мал аж ахуй эрхлэгч/ тал баримтыг ажлын 3 хоногийн дотор баталгаажуулсан байна.

Эх сурвалж: ХХААХҮЯам