Month: February 2021

Нийслэлийн Онцгой комиссын Шуурхай штабаас Цагдаагийн Ерөнхий газар болон дүүргийн Засаг дарга нар, нийслэлийн нутгийн захиргааны байгууллагуудад хотын нийтийн бие засах газруудыг хөл хорионы хугацаанд нээж үнэ төлбөргүй ажиллуулах чиглэлийг өчигдөр хүргүүлжээ.

2021 оны хоёрдугаар сарын 11-ний 06:00 цагаас хоёрдугаар сарын 23-ны 06:00 цаг хүртэлх хугацаанд Гамшгаас хамгаалах Бүх нийтийн бэлэн байдлын зэрэгт шилжүүлэн ажиллаж байгаа юм.

Энэ хугацаанд “Нэг өрх-Нэг шинжилгээ” арга хэмжээг дүүрэг бүрт зохион байгуулж байгаа бөгөөд энэхүү үйл ажиллагаанд нийслэлийн нутгийн захиргааны байгууллагуудын албан хаагч нар нийтийн хэв журмыг сахиулан хяналт тавин ажиллаж байна.

Тиймээс эдгээр ажилтан албан хаагчдад зориулж хотын нийтийн бие засах газрыг нээн үнэ төлбөргүй ажиллуулж байна гэж НЗДТГ-ын ХМХХ-ээс мэдээллээ.

Говь-Алтай аймгийн Чандмань сумын Өлзийбулаг багийн “Алагийн гол” гэдэг газар /аймгийн төвөөс зүүн урд зүгт 216 км, сумын төвөөс баруун зүгт 27 км-т, 2020.02.12-ны өдрийн 00:06 цагт 3.6 магнитутын хүчтэй газар хөдлөлт болжээ.

Улаанбаатар хотын авто тээврийн шалган нэвтрүүлэх 9 товчоогоор өнгөрсөн 24 цагийн хугацаанд албан ажил, эмнэлэг, эрүүл мэнд, ахуйн гачигдал, оршин суух гэрийн хаягаар, хүнс, шатахуун тээвэрлэлт хийх зорилгоор 900 иргэн орж, гарсан байна.

Тухайлбал, 324 тээврийн хэрэгслээр 453 зорчигч хот руу нэвтэрч, 286 тээврийн хэрэгслээр 447 зорчигч хотоос гарсан байна. Авто тээврийн шалган нэвтрүүлэх есөн товчоонд Эрүүл мэнд, Онцгой байдал, Цагдаа, Мал эмнэлэг, Мэргэжлийн хяналтын 76 ажилтан, алба хаагч үүрэг гүйцэтгэсэн бөгөөд хяналт шалгалтын үед сэжигтэй тохиолдол бүртгэгдээгүй.

Гамшгаас хамгаалах бүх нийтийн бэлэн байдлын зэрэгт шилжсэнтэй холбогдуулан өнөөдрөөс эхлэн нийслэлийн амаржих газруудад амаржсан эх, нярайг Нийслэлийн Түргэн тусламжийн төвийн автомашинаар эмч нар гэрт нь гаргаж байна.

Энэ дагуу өчигдөр нийслэлийн Өргөө, Хүрээ амаржих газраас нийт 56 эх, нярайг халдвар хамгааллын дэглэмийг чанд баримтлан, аюулгүй байдлыг нь бүрэн хангаж, гэрт нь тээвэрлэн хүргэж өглөө гэж НЭМГ мэдээлэв.

УОК, НОК-ын хуралдаан өнөөдөр 16.00 цагт Төрийн ордонд болж, цаг үеийн асуудлыг хэлэлцэнэ.

Улсын хэмжээнд 2-р сарын 11-23-ныг хүртэл Бүх нийтийн бэлэн байдлын зэрэг буюу хатуу хөл хорионы дэглэмд шилжиж, нийслэлийн хэмжээнд коронавирусийн халдварын тархалтыг тандалт хийх “Нэг өрх- Нэг хаалга” шинжилгээг эхлүүлсэн.

Шинжилгээнд өчигдрийн байдлаар45351 хүн хамрагдсанаас 29664 хүний хариу гарчээ. Коронавирусийн халдвар илрээгүй гэж өнөөдөр 11.00 цагт ХӨСҮТ-өөс мэдээлээд байна.

Улаанбаатар хотод 19 цэгт 1160 иргэн тусгаарлалтад байна. Үүнд ХӨСҮТ-ийн зөвлөмжөөр коронавирусний батлагдсан тохиолдлын ойрын хавьтлын хүмүүсийг оруулснаас гадна гадаадаас эх орондоо ирсэн иргэд багтаж байгааг УОК-ын Шуурхай штабын дарга Б.Ууганбаяр ЭМЯ-ны өнөөдрийн ээлжит мэдээллийн үеэр онцлов.

Орон нутагт 124 иргэнийг тусгаарласан байна. Одоогоор улсын хэмжээнд иргэдийг тусгаарлах 1500 өрөө бэлэн байгаа аж. Иргэдийг тусгаарлах, дэглэм сахиулах ажилд онцгой байдлын 41 алба хаагч, цагдаагийн 81 алба хаагч, эрүүл мэндийн байгууллагын 190 албан хаагч оролцож байна.

УОК-ын Шуурхай штабын дарга Б.Ууганбаяр, “Өнөөдрийн байдлаар гамшгаас хамгаалах албад, төрийн цэргийн байгууллага, нутгийн захиргааны байгууллага, улсын онц чухал обьекьууд байнгын бэлэн байдалд ажиллаж байна. Мөн орон нутгийн онцгой комиссууд бэлэн байдалд байгаа” хэмээв.

УОК-ын шийдвэрийн дагуу энэ сард 319 иргэнийг Япон, БНСУ-аас татан авсан бөгөөд дараагийн нислэгүүдийг хуваарийн дагуу авахаар ажиллаж буйг онцолсон юм.