Month: February 2021

Хоёрдугаар сарын 15-наас 597 жижиг хүнсний үйлдвэрийн ажилчдын 10-15 хувь ажиллаж эхлэх бол 16-наас 49 жижиг, том зах худалдааны төвүүдийг нээнэ гэдгийг Нийслэлийн Засаг дарга Д.Сумъяабазар мэдээллээ.

Тэрбээр өнөөдөр Нийслэлийн шуурхай штабт ажиллаж, цаг үеийн нөхцөл байдлын мэдээлллийг авч, үүрэг даалгавар өгсөн байна.

Маргаашаас эхлэн зөвшөөрөгдсөн 14 салбар, чиглэлийн үйл ажиллагаа эхэлж байгаатай холбоотойгоор тухайн байгууллагаас зайлшгүй шаардлагаар ажиллаж буй ажилтнуудаас PCR шинжилгээний хариу нэхэхгүй болсон гэдгийг НЭМГ-ын дарга хэллээ.

Нийслэлийн шуурхай штабаас ажиллуулж буй 1800-1200 дугаарын утсанд ирж буй дуудлагын дийлэнх нь мэдээллийн чанартай тэр дундаа нэг өрх нэг шинжилгээний авах байршилтай холбоотой мэдээлэл байгаа тул дүүргүүдэд иргэдэд зориулсан мэдээллээ сайтар өгөхийг даалгасан юм.

Нийслэлийн Засаг дарга бөгөөд Улаанбаатар хотын захирагч Д.Сумъяабазар өнөөдөр нийслэлийн шалган нэвтрүүлэх “Эмээлт” товчоон дээр ажиллаж, хатуу хөл хорионы үеийн нөхцөл байдал болон тус товчоон дээр үүрэг гүйцэтгэж байгаа алба хаагчдын ажлын байрны орчинтой танилцан, санал хүсэлтийг нь сонслоо.

Товчоодоор зайлшгүй орж, гарах шаардлагатай иргэдээс PCR шинжилгээний хариу, иргэний үнэмлэх, ажлын газрын тодорхойлолт зэрэг дээр үндэслэн түргэн шуурхай нэвтрүүлж ажиллахыг Нийслэлийн Засаг дарга тус товчоон дээр үүрэг гүйцэтгэж буй алба хаагчдад санууллаа.

Мөн “Эмээлт” товчооны цаана байрлах суурьшлын бүсийн иргэдийг ч мөн оршин суугаа газрын тодорхойлолт, иргэний үнэмлэх дээр үндэслэн чирэгдэлгүй нэвтрүүлэхийг үүрэг болгов.

“Эмээлт” нь нийслэлээс баруун чиглэл рүү гарах хамгийн ачаалалтай товчоо бөгөөд ямар нэгэн тодорхой бус байдал, байгууллага хоорондын уялдаа холбоогүй байдлаас болж иргэд, аж ахуйн нэгжүүдэд хүндрэл, түвэг учруулж хэрхэвч болохгүйг Хотын дарга онцолсон юм. Мөн тус товчоон дээр үүрэг гүйцэтгэж байгаа дээрх байгууллагын алба хаагчдын ажлын байрны нөхцөл ялангуяа дулаацах байр, бие засах газар зэргийг ая тухтай байлгах чиглэлд холбогдох албаныханд үүрэг өгч, асуудлыг шийдвэрлүүлнэ гэлээ.

НЗДТГ-ын Хэвлэл мэдээлэлтэй харилцах хэлтэс

ҮСХ-ны мэдээгээр хэрэглээний бараа, үйлчилгээний үнэ энэ оны 1 дүгээр сард улсын хэмжээнд өмнөх оны мөн үеэс 2.4 хувь, өмнөх сараас 1.0 хувиар тус тус өсчээ.

Энд хүнсний бараа, ундаа, усны бүлгийн үнэ дүнгээрээ 8.4 хувь (согтууруулах бус ундааны дэд бүлгийн үнэ 5.1 хувь), согтууруулах ундаа, тамхины бүлгийн үнэ дүнгээрээ 4.2 хувь, хувцас, бөс бараа, гутлын бүлгийн үнэ дүнгээрээ 3.4 хувь, эм тариа, эмнэлгийн үйлчилгээний бүлгийн үнэ дүнгээрээ 3.8 хувиар өссөн нь голлон нөлөөлжээ.

Гэсэн хэдий ч орон сууц, ус, цахилгаан, хийн болон бусад түлшний бүлгийн үнэ дүнгээрээ 6.3 хувь (цахилгаан, хийн болон бусад түлшний дэд бүлгийн үнэ 12.3 хувь), тээврийн бүлгийн үнэ 5.2 хувиар буурсан байна.

Хэрэглээний бараа, үйлчилгээний үнэ өмнөх сараас 1.0 хувиар өсөхөд хүнсний бараа, ундаа, усны бүлгийн үнэ дүнгээрээ 2.8 хувь ( мах, махан бүтээгдэхүүний дэд бүлгийн үнэ 4.4 хувь), хувцас, бөс бараа, гутлын бүлгийн үнэ 0.1 хувь, эм тариа, эмнэлгийн үйлчилгээний бүлгийн үнэ 0.3 хувь, орон сууц, ус, цахилгаан, хийн болон бусад түлшний бүлгийн үнэ дүнгээрээ 1.5 хувиар (цахилгаан, хийн болон бусад түлшний дэд бүлгийн үнэ 2.3 хувь) өссөн нь голлон нөлөөлсөн байна.

Хөл хорионы үеэр дайчлагдаж байгаа төрийн албан хаагчдын ар гэрийн нөхцөлийг сайтар судалж байж эргүүлд гаргахыг Шадар сайд, Улсын онцгой комиссын дарга С.Амарсайхан анхаарууллаа.

Хоёрдугаар сарын 11-нээс эхлэн төрийн албан хаагчдыг эргүүлд гаргаж, хэв журам сахиулах ажилд дайчилж буй. Энэ ажилтай холбоотойгоор эмэгтэйчүүдийг шөнийн цагаар эргүүлд гаргасан, жирэмсэн эмэгтэй болон хүүхэд харах хүнгүй хүмүүс хүүхдээ дагуулж явсан гэх мэт асуудлууд гарсан. Үүнтэй холбоотойгоор УОК-оос эмэгтэй албан хаагчдыг эргүүлийн ажлаас чөлөөлсөн юм.

Шадар Сайд С.Амарсайхан “Шаардлагатай хүн хүчийг яам, тамгын газраас гаргуулахаар ажлын хэсэг дээр ярилцсан. Алдаа гаргахгүй байх боломж байсан. Алба хаагчдаа дайчлахдаа ар гэрийн нөхцөл байдлыг сайн судлах ёстой. Ар гэрт нь нялх хүүхэд байгаа, хөгшин настай хүн асардаг, хань ижил нь өвдсөн, хавдартай, элдэв гачигдалтай хүмүүсийг эргүүлд гаргаж болохгүй.

Хоёр хоногийн өмнөх албан ёсны заавар зөвлөгөө өгсөөр байтал найман сартай жирэмсэн эмэгтэйг Чингэлтэй дүүрэгт эргүүлд гаргасан байсан. Юу хийх талаараа мэдээлэлгүй очсон байна. Цагдаагийн алба хаагчид хүч, нөөц нь дутагдаж байна. Тиймээс бид дайчлан ажиллуулж байна. Гэхдээ ард нь хүн хохирч болохгүй” гэдгийг мөн хэлсэн юм.

УОК-оос өгсөн мэдээллээр 11 мянган төрийн албан хаагч хөл хорионы үеэр ажиллах тооцоотой байсан бөгөөд эхний өдөр ажилласны дараа эмэгтэйчүүдийг энэ ажлаас чөлөөлсөн байна. Нийт 4700 орчим төрийн эмэгтэй албан хаагчийг хөл хорионы үеэр хэв журам сахиулах ажлаас чөлөөлж, өнөөдрийн байдлаар цагдаа, дотоодын цэрэг, төрийн албан хаагч гээд нийт 10 мянган хүн хөл хориог сахиулахаар ажиллаж байна гэлээ.

Цаг уурын байгууллагын ирүүлсэн мэдээллээр энэ сарын 11-ний өдрийн байдлаар Монгол орны ихэнх гол мөрөн, нууранд тогтвортой мөсөн бүрхүүл тогтож, жижиг голууд ёроолдож хөлдсөн ба мөсний зузаан өмнөх арав хоногийн зузаанаас 5-30 см нэмэгдсэн байна.

Эг, Бэлтэс, Шишхэд, Идэр, Хануй, Чулуут, Хүдэр, Хараа, Ерөө, Сэлэнгэ, Орхон, Эг, Онон, Балж, Хэрлэн голын эх, Халх, Ховд, Турган, Буянт, Заг, Шаргалжуут, Цагаантуруут, Онги, Хархираа зэрэг голуудын мөсний зузаан өмнөх оны мөн үеийнхээс 15-50 см нимгэн мөсөн бүрхүүлтэй.

Хэдийгээр ихэнх гол мөрөн, нуур битүү мөсөн бүрхүүлтэй болсон мөс улам зузаарах хандлагатай байгаа хэдий ч зарим гол мөрний мөсний зузаан өмнөх арав хоногийнхоос 5-20 см нимгэрч мөс хэврэгшиж, мөсний нягт багассан байна.

Иймд нуурын толио болон гол мөрний нийт уртын дагууд мөсний зузаан харилцан адилгүй, мөсний даац хүн, мал, машин тэрэг явахад аюулгүй хэмжээнд хүрч бэхжээгүй тул цаг хожих, зам товчлох зэргээр мөсөн дээгүүр явах болон авто тээвэр хийхгүй байхыг онцгойлон анхааруулж байна.