Month: January 2021

УИХ дахь АН-ын бүлгийн дарга Д.Ганбат Ерөнхий сайдыг томилох асуудалд тав хоногийн завсарлага авах санал гаргав. Тэрбээр “АН-ын бүлэг Монгол Улсын Ерөнхий сайдад нэр дэвшигчид хэлэх, захих, асуух зүйл байна. Бидэнд цаг гаргах ёстой” хэмээн тайлбарласан.

Харин УИХ-ын дарга Г.Занданшатар “Энэ долоо хоногт багтаан Засгийн газраа яаралтай бүрдүүлэх хэрэгтэй байна. Намрын чуулган завсарлаж, гишүүд тойрогтоо ажиллах шаардлагатай байгаа. Тиймээс нэг цагийн завсарлага өгье” гэв.

Ийнхүү АН-ын бүлэгт нэг цагийн завсарлага өгсөн учир бусад асуудлыг үргэлжлүүлэн хэлэлцэж байна.

Монгол Улсын 32 дахь Ерөнхий сайдыг томилохоор УИХ-ын чуулганы хуралдаан үргэлжилж байна.

Засгийн газрын хэрэг эрхлэх газрын даргын үүрэг гүйцэтгэгч Л.Оюун-Эрдэнийг Ерөнхий сайдад нэр дэвшүүлэн, гишүүд асуулт асууж үг хэлж байна.

Гишүүдийн 2+1 буюу нийт гурван минутаар үг хэлж, асуулт асууж байгаа бөгөөд хугацаа хангалтгүй байгааг нэлээд гишүүд шүүмжилсэн юм. Харин УИХ-ын гишүүн Б.Пүрэвдорж өнөөдрийн хэлэлцэж байгаа асуудалтай холбоотой хамгийн богино үгийг хэллээ.

УИХ-ын гишүүн Б.Пүрэвдорж “Манай Херо Б.Баатарын дүү Ерөнхий сайд боллоо. Та амласан ёсоор 400 сая жуулчнаа Монголд авчраарай, амжилт хүсье” гэсэн юм.

2020 оны дөрөвдүгээр сард УИХ-ын гишүүн, ЗГХЭГ-ын дарга Л.Оюун-Эрдэнэ Хэнтий аймагт ажиллах үеэрээ манай улс 400 сая жуулчин хүлээн авах боломжтой талаар мэдээлсэн нь шүүмж дагуулсан. Энэ тоог тэрбээр санаанаасаа зохиогоогүй, алдаж хэлээгүй гэдгийг УИХ-ын чуулганы хуралдааны үеэр хэлж байсан бөгөөд ийм боломж бийг онцолж байв.

УИХ-ын чуулганы хуралдаанаар Монгол Улсын Ерөнхий сайдыг томилох асуудлыг хэлэлцэж байна. Ерөнхий сайдаар Л.Оюун-Эрдэнийг томилох төслийг Ерөнхийлөгч өнөөдөр УИХ-д өргөн мэдүүлсэн юм.

Хуралдааны үеэр УИХ-ын гишүүд үг хэлж, асуулт асууж байна.

Ж.Мөнхбат “Дубайн гэрээний талаар асууя. Ч.Сайханбилэг Ерөнхий сайдын үед байгуулсан Дубайн гэрээ бол ард иргэдэд хохиролтой болсон. Энэ бол гэрээ ч биш. Засгийн газар, УИХ-аар ч хэлэлцээгүй. Дубайн гэрээг цуцлах ёстой гэдэг байр суурьтай гишүүдийн нэг нь би. Л.Оюун-Эрдэнэ Дубайн гэрээг цуцлах шаардлага хүргүүлсэн байна лээ. Энэ байр сууринаасаа битгий ухраарай. Хоёрдугаарт, ажлын байрыг дэмжиж, хувийн хэвшлээ анхаарах шаардлага үүслээ. Үүнд хэрхэн анхаарах вэ. Гуравдугаарт, төрийн албаны дунд шатанд байгаа хариуцлагагүй, сэтгэлгүй хүмүүсийг хэрхэн цэгцлэх вэ?

Л.Оюун-Эрдэнэ “Дубайн гэрээг цуцлах санал өгсөн. Амаргүй нөхцөл байдал үүсдэг нь үнэн. Үндсэндээ Дубайн гэрээтэй холбоотой асуудлыг шийдэхдээ олон улсын банк санхүүгийн байгууллагаас санхүүжилт босгосон. Энэ асуудлыг хөндөхөд тэнд байгаа татвар төлөгчдийн мөнгө хөндөгддөг. Тэгэхээр энэ нь геополитикийн асуудал болдог. Оюутолгойтой холбоотой асуудлаар Н.Алтанхуяг даргын Засгийн газар нэлээд сайд ажилласан байна лээ. Би бүх бичиг баримтыг үзэж танилцсан. Энэ Засгийн газар унасны дараа 7-8 саналыг хөрөнгө оруулагч талаас тавьсан байна. Өөрөөр хэлбэл, тухайн үед эдийн засаг хүндрэлтэй байсан учраас хөрөнгө оруулагч талаас тавьсан саналуудыг хүлээн зөвшөөрчихсөн. Тиймээс энэ асуудлыг засах асуудалд анхаарч байгаа. Ажлын хэсэгтэй холбоотой зарим баримт бичиг алдагдсан байна лээ. Нийслэлийн прокуророос гарсан гэж ойлгож байгаа. Тэр хүнтэй хатуу хариуцлага тооцно” гэлээ.

УИХ-ын гишүүн Ц.Даваасүрэн “Л.Оюун-Эрдэнэ сайдыг дэмжиж байгаа. Ах хүний хувиар хэдэн зүйл захья. Ямар хариуцлага үүрэх гэж байгаагаа ойлгож байгаа гэж бодож байна. Төрийг залуу насны ааг омгоор удирдахгүй. Туршлага, чин сэтгэл, зүтгэл хэрэгтэй. Дээр нь дутууг чинь нөхөх баг хэрэгтэй. Хэрэв чи өөрийгөө пялдагуудаар хүрээлүүлэх юм бол улс төрийн насыг чинь богиносгоно.

Олон нийт өнөөдөр Оюунтолгойн асуудал ард түмний эрх ашгаас урвасан хүмүүсийг хэрхэн шийтгүүлэхийг харж байгаа. С.Ганбаатар гишүүний амь насаа эрсдэлд оруулж байгаа асуудлыг нэн яаралтай шийдэх ёстой гэж үзэж байна. Миний дүү үүнийг хурдан шийдээрэй” гэв.