Month: January 2021

Монгол Улсын Ерөнхий сайд Л.Оюун-Эрдэнийн тэргүүлэх шинэ Засгийн газрын Хэвлэл мэдээлэлтэй харилцах хэлтсийн даргаар Ц.Ганзориг улиран ажиллах болжээ. Тэрбээр 2017 онд У.Хүрэлсүхийг Ерөнхий сайдаар томилогдоход уг албан тушаалыг хариуцах болсон.

Тэгвэл улиран томилогдсоноор гурав дахь Засгийн газрынхаа хэвлэлийн албыг хариуцах болж байна.

Ц.Ганзориг нь инженер, сэтгүүлч мэргэжилтэй. Сэтгүүлзүйн салбарт 2008 оноос хойш “С1”, “BTV” телевизэд улс төр, эдийн засгийн сэтгүүлч, “Ийгл” телевизэд эдийн засгийн албаны дарга, тоймч, Ерөнхий продюсерээр ажиллаж байсан туршлагатай.

Харин Ерөнхий сайд У.Хүрэлсүхийн зөвлөх А.Үйлстөгөлдөр, Хэвлэлийн төлөөлөгч Ө.Золбаяр нар шилжиж буй аж. Тэд УИХ-ын гишүүн У.Хүрэлсүхтэй ажиллах юм байна. А.Үйлстөгөлдөр нь 2016 онд У.Хүрэлсүх Шадар сайдаар томилогдохоос эхлэн Хэвлэл мэдээлэл, олон нийттэй харилцах бодлогын зөвлөхөөр ажиллаж ирсэн бол Ө.Золбаяр нь 2017 оноос Ерөнхий сайдын Хэвлэлийн төлөөлөгчөөр ажилласан юм.

БЗД-ийн нэгдсэн эмнэлэг ирэх даваа гариг буюу хоёрдугаар сарын 1-нээс үйл ажиллагаагаа хэвийн явуулахаар болжээ.

Тус эмнэлэгт 2020 оны арванхоёрдугаар сарын 16-нд халдварын тохиолдол бүртгэгдсэнээс хойш үйл ажиллагаагаа хаасан. Эмнэлэгт хэвтэн эмчлүүлж байсан, сахиур, тэдний ар гэр, эмч ажилчид гээд тус эмнэлгийн голомтоос нийт 400 гаруй хүн халдвар авсан билээ.

Нийслэлийн Эрүүл мэндийн газрын мэдээлснээр, нийслэлийн хэмжээнд өнгөрсөн 24 цагийн хугацаанд коронавируст халдвар илрүүлэх, тандалт хийх шинжилгээнд 11 235 хүн хамрагджээ.

Байнгын үйл ажиллагаатай шинжилгээний 30 төв, халдварын илрүүлэг, тандалт хийх явуулын 12 багт нийт 425 эмч, эмнэлгийн мэргэжилтэн ажилласан байна.

Өнөөдрийн байдлаар, нийслэлийн хэмжээнд нийт 639 801 хүнийг шинжилгээнд хамруулснаас 567 517 хүнд ПГУ /PCR/-ийн шинжилгээ, 88 613 хүнд түргэн оношлуураар шинжилгээ хийжээ.

Үүнээс коронавируст халдварын батлагдсан тохиолдол 832, ойрын хавьтал 3976 дам хавьтал 23 920 хүн байгаа аж.

Улсын Онцгой комиссын шийдвэрийн дагуу ирэх хоёрдугаар сард БНСУ руу хоёр, Япон, Индонез руу тус бүр нэг удаа буюу нийт дөрвөн удаагийн тусгай үүргийн нислэг үйлдэхээр болсон.

Сөүлээс ирэх нислэгийн хувьд 11 дүгээр сард нислэг нь цуцлагдсан болон эрүүл мэндийн шалтгаантай иргэдийг хамруулна.

Истанбул, Сөүл /2021.02.26/ чиглэлээр тухайн улсаас нутаг буцах хүсэлтэй иргэд болон цөөн тооны транзит зорчигч хамруулна.

Харин Улаанбаатараас шууд болон гурав дахь орон руу зорчих, тухайн улсын хүчинтэй визтэй иргэд miat.com цахим хуудасны нислэгийн хүлээх хуудсанд бүртгүүлэх бөгөөд тухайн зорчигчийн нэр нислэгт багтсан тохиолдолд “Миат” ТӨХК-аас зорчигчтой холбогдож тийз бичих юм байна.