Month: January 2021

Эрүүл мэндийн яамнаас цаг үеийн мэдээлэл хийж байна.

НЭМҮТ-ийн ОЭМА-ны дарга, тархвар судлаач Б.Сувд “Иргэд халдвар авчихна гэж бодохгүй байна, шинж тэмдэггүй халдвар тараагчид байгаа нь халдвар тархах үндсэн гурван шалтгаан болж байна. БЗД-ийн шинжилгээ авах үйл явц маш удаан явцтай байлаа. Эмнэлэг, эмийн сан, банк, худалдаа үйлчилгээний байгууллага, нийтийн тээвэр, такси, хүнсний дэлгүүр, түгээлтийн байгууллагын ажилчдад шинжилгээг хийж байгаа ба маргаашаас эхлэн шинэ жилийн үеэр ажилласан томоохон зах, худалдааны төвийн түрээслэгч, худалдагч, ажилчдаас шинжилгээ авна.

БЗД-т 85 мянган өрхөөс шинжилгээ авахад хоёр хүнд илэрсэн нь батлагдлаа. Халдварын байршил нь тодорхойлогдоход зураглалыг гаргаж, иргэдэд мэдээлнэ” гэлээ.

2020-2021 оны хичээлийн жилийн нэгдүгээр улирлын сурагчдын амралтыг үр дүнтэй өнгөрүүлэх зорилгоор ерөнхий боловсролын сургуулийн ахлах ангийн сурагчдад нэгдүгээр улирлын агуулгыг бататгах, давтах “ЦАХИМ ХИЧЭЭЛ”-ийг эхлүүлсэн.

2020 оны 12 дугаар сарын 28-аас 2021 оны нэгдүгээр сарын 1-ний 7 хоногт бүх нийтээр амрах баярын өдөр хоёр удаа тохиосон ч багш, сурагчид цахим хичээлдээ идэвхтэй оролцлоо. Нийт 548 багш цахим хичээлийг удирдан зохион байгуулж, давхардсан тоогоор 43247 сурагч оролцжээ.Мөн Монголын телевизүүдийн холбоотой хамтран 2021 оны нэгдүгээр сарын 4-ний өдрөөс бага, дунд ангийн суралцагчдад зориулсан “ТЕЛЕ ХИЧЭЭЛ КОНТЕНТ”-ийг эхлүүлэхэд бэлэн болоод байна.

Сургуулийн өмнөх боловсролын хичээл энэ сарын 8-ны баасан гарагт эхэлнэ. “Теле хичээл контент” нь нэгдүгээр улирлын хичээл, сургалтын үйл ажиллагааны агуулгыг сэргээн сануулах, бататгахад хүүхэд, багачууд, эцэг эхчүүдэд туслах, багшид дэмжлэг үзүүлэх зорилготой. Өөрөөр хэлбэл, агуулга, арга зүйн уялдаа холбоо бүхий сэдэв, хичээлүүд болон анги хоорондын агуулгын залгамж холбоо бүхий хамтын хичээлээр сурагчдын эзэмшсэн мэдлэг, чадварыг дэмжин хөгжүүлнэ.

Эцэг, эхчүүд хүүхэдтэйгээ хамтран ажиллаж хүүхдийнхээ мэдлэг, чадварыг бататгаж, өдрийн тодорхой цаг хугацааг хүүхдийнхээ хөгжилд зориулж, хамтран ажиллах боломжийг бүрдүүлэхэд орших юм.

Эрүүл мэндийн сайд Т.Мөнхсайхан цаг үеийн асуудлаар мэдээлэл хийж байна.

Тэрбээр олон нийтийн дундаас халдвар гарч буй байдал болон хавьтлын хүмүүсийг тогтоох, халдвар авсан уг шалтгаан хаанаас вэ гэдэгт хариулт өгөх юм. Мөн хөл хорионы үед “Ковид-19”-ийн халдварын эсрэг хариу арга хэмжээний гол зорилго, үр дүнгийн талаар иргэдэд мэдээлнэ.

Эрүүл мэндийн сайд Т.Мөнхсайхан “БЗД-ийн нэгдсэн эмнэлэгт том голомт үүссэнтэй холбоотойгоор өргөжүүлсэн тандалт шинжилгээг хийж байна. Тус дүүргийн 85 мянган иргэнээс шинжилгээ авахад коронавирус илрээгүй байсан бол өчигдөр, өнөөдөр тохиолдол илрээд байна. Хийсэн шинжилгээний тоотой харьцуулахад халдвар илэрч байна. Хаанаас халдвар авсан нь тодорхойгүй тохиолдлууд мөн илэрч байна. Одоогоор эх үүсвэр тодорхойгүй дөрвөн голомт гарсан. Тухайлбал, Мөнххада компани, Баянзүрх дүүрэгт хийсэн шинжилгээнд ирсэн гэр бүлийн хоёр хүн, Баянгол дүүрэгт сайн дураар шинжилгээ өгсөн хоёр хүн, Баянзүрх дүүрэгт биеийн дархлаа султай нэг хүнээс мөн халдвар илэрсэн. Иймээс ард иргэдийн дунд халдвартай хүн явж байх магадлал тун өндөр байна. Эх сурвалж нь тогтоогдоогүй хоёр голомт байна. Иргэдийн дунд халдвар алаг цоог хэлбэрээр тархаж байна. Энэ нөхцөл байдал цаашид хэрхэн үргэлжлэх үү гэдгээс их зүйл шалтгаална” гэв.

Дархан-Уул аймаг ковид цар тахлын голомтоо хумьж чадсан гэдгээ мэдэгдсэн. Тэгвэл Дарханчууд ногоон бүс болсноо батлах зорилгоор иргэдээ давтан шинжилгээнд хамруулж эхэлжээ. Тодруулбал, 2021 оны нэгдүгээр сарын 2,3-ны өдрүүдэд нийгмийн харилцаанд хамгийн их оролцдог 22 байгууллагын 11153 иргэнийг PCR-ийн шинжилгээнд хамруулахаар аймгийн Онцгой комиссын шийдвэр гарсан байна. 10 цэгт нэгэн зэрэг явагдаж буй энэхүү шинжилгээнд өнөөдөр 10 цагийн байдлаар 1000 гаруй иргэн хамрагдсан байна.

PCR-ийн шинжилгээний ажилд нийтдээ 250 гаруй төрийн албан хаагч, таван зэрэг бүртгэл, шинжилгээг авах бөгөөд нэг дор 250-300 иргэнд үйлчлэх боломжтой. Мөн ариутгал, халдвар хамгааллын дэглэмийг баримтлан оочер дараалал үүсгэлгүй ажиллаж байна.

Малч­ид, иргэд, тээвэрчдэд зориулсан мэдээ: Өнөө маргаашдаа уулархаг нутгаар ялимгүй цас орж, нутгийн өмнөд хэсгээр салхитай байна.

2021 оны 01 дүгээр сарын 02-ны 20 цагаас 2021 оны 01 дүгээр сарын 03-ны 20 цаг
хүртэлх цаг агаарын урьдчилсан мэдээ

Хур тунадас: Нутгийн зүүн хэсгээр багавтар үүлтэй, бусад нутгаар үүлшинэ. Шөнөдөө Алтай, Хангайн уулархаг нутгаар ялимгүй цас орно. Бусад нутгаар цас орохгүй.

Салхи: Ихэнх нутгаар баруун хойноос секундэд 5-10 метр, нутгийн өмнөд хэсгээр секундэд 12-14 метр хүрч ширүүснэ.

Агаарын температур: Завхан голын эх, Идэр голын хөндий, Хүрэнбэлчир орчим, Дархадын хотгороор шөнөдөө 42-47 хэм, өдөртөө 31-36 хэм, Увс нуурын хотгор болон Хангай, Хөвсгөл, Хэнтийн уулархаг нутаг, Тэс, Эг, Үүр, Хараа, Ерөө, Туул, Тэрэлж, Хэрлэн голын хөндий, Дарьгангын тал нутгаар шөнөдөө 35-40 хэм, өдөртөө 24-29 хэм, говийн бүс нутгийн цас багатай газраар шөнөдөө 20-25 хэм, өдөртөө 12-17 хэм, бусад нутгаар шөнөдөө 29-34 хэм, өдөртөө 19-24 хэм хүйтэн байна.

УЛААНБААТАР ХОТ ОРЧМООР: Үүлшинэ. Цас орохгүй. Салхи баруун хойноос секундэд 4-9 метр. Шөнөдөө Яармаг-Сонгины орчмоор 37-39 хэм, бусад хэсгээр 30-32 хэм, өдөртөө 22-24 хэм хүйтэн байна.

БАГАНУУР ОРЧМООР: Үүлшинэ. Цас орохгүй. Салхи баруун хойноос секундэд 5-10 метр. Шөнөдөө 35-37 хэм, өдөртөө 23-25 хэм хүйтэн байна.

ТЭРЭЛЖ ОРЧМООР: Үүлшинэ. Цас орохгүй. Салхи баруун хойноос секундэд 4-9 метр. Шөнөдөө 34-36 хэм, өдөртөө 22-24 хэм хүйтэн байна.

2021 оны 01 дүгээр сарын 04-нөөс 01 дүгээр сарын 08-ныг
хүртэлх цаг агаарын урьдчилсан төлөв

Нэгдүгээр сарын 4-нд баруун болон төвийн аймгуудын нутгийн хойд хэсгээр ялимгүй цас, 5-нд баруун аймгуудын нутгийн зүүн хэсэг, төв болон зүүн аймгуудын ихэнх нутгаар, 6-нд нутгийн зүүн хэсгээр, 7-нд төвийн аймгуудын нутгийн хойд хэсгээр цас орж, цасан шуурга шуурна. Салхи 5-нд ихэнх нутгаар, 6-нд нутгийн зүүн хэсгээр, 7-нд говь, талын нутгаар секундэд 15-17 метр хүрч ширүүсэж, явган шуурга шуурна. 5-нд нутгийн хойд хэсгээр, 6-нд ихэнх нутгаар хүйтний эрч чангарч, Дархадын хотгор, Завхан голын эх, Хүрэнбэлчир орчим, Идэр, Тэс голын хөндийгөөр шөнөдөө 44-49 хэм, өдөртөө 32-37 хэм, Увс нуурын хотгор болон Алтай, Хангай, Хөвсгөл, Хэнтийн уулархаг нутаг, Эг, Үүр, Орхон, Сэлэнгэ, Хараа, Ерөө, Туул, Тэрэлж, Хэрлэн голын хөндийгөөр шөнөдөө 38-43 хэм, өдөртөө 26-31 хэм, говийн бүс нутгийн цас багатай, энгэр ээвэр газраар шөнөдөө 22-27 хэм, өдөртөө 14-19 хэм, бусад нутгаар шөнөдөө 30-35 хэм, өдөртөө 22-27 хэм хүйтэн байна.

Бүх нийтийн бэлэн байдлын зэрэгт шилжсэн энэ өдрүүдэд нийтийн тээврийн үйлчилгээ энгийн цагийн хуваарийн дагуу иргэдэд үйлчилж байгаа билээ.

Өнөөдрийн /2021.01.02/ 10 цагийн байдлаар 97 чиглэлд 634 автобус, 10 аж ахуй нэгжийн 421 такси үйлчилгээнд гарсан байна. Нийтийн тээврийн автобусаар 08:00-10:00 цагийн хооронд 12831 зорчигч үйлчлүүлжээ. Тусгай зөвшөөрөл бүхий байгууллагууд 634 автобус, 61 таксинд ариутгал, халдваргүйжүүлэлтийг хийсэн байна. Төв болон хөдөлгөөнт, суурин байршилд хяналт шалгалтыг 81 ажилтан гүйцэтгэж байна. Мөн нийслэлийн хэмжээнд автобусны зорчих карт цэнэглэх 54 цэг ажиллаж байгаа бөгөөд иргэд зорчих картыг 9189 удаа уншуулжээ.