Month: January 2021

Аймгийн Засаг даргын орлогч И.Доржсүрэнгээр ахлуулсан ажлын баг Булган аймгийн Гурванбулаг, Хишиг-Өндөр, Орхон, Могод суманд оторлож буй аймгийнхаа малчдыг эргэж, нөхцөл байдалтай нь биечлэн танилцлаа. Тухайн сумдад тус аймгийн 209 малчин өрх отроор яваа бөгөөд өвөлжөө, бууцнаасаа хөөгдөх, татвар хураамж төлөх, адуу малаа хөөлгөх зэрэг асуудал бэрхшээлүүд тулгамдаж байгааг малчид хэлж байв. Ажлын багаас тухайн сумдын удирдлагуудтай уулзаж, малчдыг дөрөвдүгээр сарын 1 хүртэл тав тухтай өвөлжүүлж, хаваржуулахаар гэрээ хэлцэл хийсэн бөгөөд малчдынхаа нийгмийн үйлчилгээний зардалд зориулж, сум бүрт 10 сая төгрөгийн дэмжлэгийг аймгаас олгохоор шийдвэрлээд байна.Мөн отрын 209 малчин өрх тус бүрт 200 кг нүүрс болон эмийн багц олгож, эрүүл мэндийн үйлчилгээ үзүүллээ. Ажлын багийн бүрэлдэхүүнд аймгийн Хүнс, хөдөө аж ахуйн газрын мэргэжилтэн, БОЭТ-ийн эмч, Хархорин, Хужирт, Зүүнбаян-Улаан сумын Засаг дарга, хөдөө аж ахуйн тасгийн болон эмнэлгийн алба хаагчид хамтран ажиллалаа. Аймгаас томилогдсон ажлын дөрвөн баг Булган, Сэлэнгэ, Төв аймгийн 16 суманд оторлож буй 789 малчин өрхөд 188 тонн нүүрсний дэмжлэг үзүүлж, нийгмийн асуудлыг нь шийдвэрлээд байна.

Улсын Онцгой комиссын шийдвэрээр өнгөрсөн сарын 23-ны өдрөөс эхлэн Цагааннуур боомтоор зөвхөн шатахуун ачсан тээврийн хэрэгслүүдийг нэвтрүүлж эхэлсэн. Өнгөрсөн нэг сарын хугацаанд хилийн шалган нэвтрүүлэх боомтоор 4553 тонн газрын тосны бүтээгдэхүүн тээвэрлэсэн 190 машин нэвтэрчээ. Эдгээр тээврийн хэрэгслүүдэд Мэргэжлийн хяналтын газрын ариутгагч нар ариутгал халдваргүйжүүлэлт хийн нэвтрүүлж, эрх бүхий байгууллагууд ачаа буулгах ажилд хяналт тавьж, тухайн өдөртөө багтаан буцаах арга хэмжээ авч ажиллажээ.

Сэлэнгэ аймгийн хэмжээнд 2020 онд “Мал эмнэлгийн нэгдсэн цахим систем”-ээр мал, амьтан, тэдгээрийн гаралтай түүхий эд, бүтээгдэхүүнд нийт мал эмнэлгийн 16613 гэрчилгээг олгожээ. Энэхүү үйлчилгээг Мал эмнэлгийн Ерөнхий газрын даргын 01/1312, Сэлэнгэ аймгийн Засаг даргын А|309 тоот захирамжийн хүрээнд үзүүлсэн аж. Гэрчилгээг олгохдоо хүнсний хэрэглээ, худалдаа, үржлийн зориулалтаар, отор нүүдэл, шилжилт хөдөлгөөн зэрэгт бүрэн хяналт тавьж, баталгаажуулалт хийн олгосон байна. Энд адуу 49183, үхэр 21512, тэмээ 49, хонь 69731, ямаа 42618, гахай 517, тахиа 68, нохой 3, туулай 4 буюу нийт 183694 толгой мал, амьтан байна. Мөн 588249 кг мах, махан бүтээгдэхүүн, 792469 л сүү, сүүн бүтээгдэхүүн, өндөг 14 ш, зөгийн бал 2520 кг, арьс шир, түүхий эд бүтээгдэхүүн 84068 ш гээд бүгд 1467320 кг/ш бүтээгдэхүүнийг тус тус хянан баталгаажуулсан байна.

Энэ сарын 28-нд орон нутгийн цагаар 4 цаг 21 минутад Наранбулаг сумаас зүүн хойд зүгт 20 км-т 4,3 магнитудын хүчтэй газар хөдөллөө. Газар хөдлөлтийн чичирхийлэл Наранбулаг, Хяргас сумын иргэдэд мэдрэгдсэн бөгөөд ямар нэг хохирол учраагүй байна. Энэхүү газар хөдлөлт нь 2020 он гарсаар Увс аймагт бүртгэгдсэн найм дахь удаагийн газар хөдлөлт байна. Эдгээр найман удаагийн газар хөдлөлтийн чичирхийллийн гурав нь иргэдэд мэдрэгджээ.