Month: December 2020

“Босоо хөх Монгол” ТББ- ын гишүүн П.Шинжээравдан, А.Дарьсүрэн нарыг шүүхээс гэм буруутайд тооцжээ.

УИХ-ын Эдийн засгийн байнгын хорооны өнөөдрийн хуралдаанаар Төмөр замын тээврийн тухай хуулийн шинэчилсэн найруулгын төслийн хэлэлцэх эсэхийг хэлэлцэж, дэмжлээ.

Хуулийн төслийг Зам, тээврийн хөгжлийн сайд Л.Халтар танилцууллаа. Тэрбээр, “Төсөл нь 11 бүлэг, 72 зүйлтэй бөгөөд төмөр замын дэд бүтцийн ангилал, өмчлөл, эзэмшил, бүтээн байгуулалт, дэд бүтцийн үйлчилгээ, төмөр замын тээврийн зориулалттай газар, хөдлөх бүрэлдэхүүн үйлдвэрлэх, угсрах, засварлах, ашиглах, төмөр замын сүлжээ байгуулахад баримтлах зарчим, тээвэрлэлтийг төрөл ангиллын дагуу зохион байгуулах зохицуулалтыг тусгасан. Энэхүү төслийг баталснаар төмөр замын тээврийн салбарт төрийн бодлогын уялдааг хангах, тээврийн сүлжээг өргөжүүлэн, олон улсын хамтын ажиллагааг хөгжүүлнэ. Мөн олон улс, бүс нутаг, гадаад орны дэвшилтэт технологи эзэмших, хөрөнгө оруулалт татах боломж бүрдэж, тээврийн үр ашгийг нэмэгдүүлэх ач холбогдолтой” гэлээ.

Хуулийн төслийг хэлэлцэхийг хуралдаанд оролцсон гишүүдийн 66.7 хувь дэмжиж, санал дүгнэлтээ УИХ-ын чуулганд танилцуулахаар тогтов. Хуулийн төслийг энэ долоо хоногийн чуулганы хуралдаанаар хэлэлцэхээр төлөвлөөд буй юм

Нийслэлийн Баянгол дүүргийн Иргэдийн Төлөөлөгчдийн хурлын ээлжит хуралдаан өчигдөр болж өнгөрлөө. Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн 20 дугаар зүйлийн 20.1.1, 22 дугаар зүйлийн 22.1.1, 25 дугаар зүйлийн 25.1, дүүргийн Иргэдийн Төлөөлөгчдийн Хурлын Хуралдааны дэгийн 4 дүгээр зүйлийн 4.1, 4.4-т заасныг үндэслэн дүүргийн иргэдийн Төлөөлөгчдийн Хурлын Тэргүүлэгчдийн 46 дугаар тогтоолоор тус хуралдааныг 2020 оны 12 дугаар сарын 07-ны өдөр хуралдуулахаар товлосон билээ.

Хурлыг БГД-ийн Иргэдийн төлөөлөгчдийн хурлын дарга Б.Сэмжидмаа нээн үг хэлж хурлын дэг, хурлаар хэлэлцэх асуудлыг танилцуулав. Хуралдаанд цахимаар 22 төлөөлөгч, танхимд 19 төлөөлөгч оролцож 100 хувийн ирцтэй хурал эхлэв.

Хэлэлцэх асуудлын дарааллын дагуу БГД-ийн Засаг даргын орлогч Д.Мөнхбаатар “Коронавирус цар тахлын халдварын тархалтыг хязгаарлах зорилгоор Бүх нийтийн бэлэн байдалд шилжсэнтэй холбогдуулан Баянгол дүүргийн Онцгой комиссоос авч хэрэгжүүлж байгаа арга хэмжээ”-г танилцууллаа.

Энэ үеэр Дүүргийн Иргэдийн хурлын дарга Б.Сэмжидмаа “ Хөл хориотой эдгээр өдрүүдэд гэр бүлийн хүчирхийлэл нэмэгдэх хандлагатай байдаг бөгөөд хамгийн сүүлд дүүргийн нутаг дэвсгэрт бага насны хүүхэд хүчирхийлэлд өртсөн харамсалтай мэдээлэлтэй танилцлаа. Иймээс цагдаагийн байгууллага болон боловсролын хэлтсийн холбогдох мэргэжилтнүүд, хороодын хамтарсан баг эрсдэлд өртөж болзошгүй хүүхэд, эмэгтэйчүүдэд анхаарч, хичээж ажиллах шаардлагатай байна. Үүнээс гадна Нийслэлийн хэмжээнд хүчирхийлэлд өртсөн хүүхэд эмэгтэйчүүдийг түр хамгаалах байр 10 байдаг хэдий ч манай дүүрэгт байхгүй байна. Иймээс бид энэ тал дээр анхаарч ажиллах хэрэгтэй байна” гэв.

Дүүргийн Засаг дарга Ө.Сумъяабаатар “Баянгол дүүргийн Засаг даргын 2017-2020 оны үйл ажиллагааны хөтөлбөрийн хэрэгжилт”-ийн талаар танилцуулав. Мөн Баянгол дүүргийн эдийн засаг нийгмийг 2020 онд хөгжүүлэх үндсэн чиглэлийн зорилтын биелэлт, дүүргийн 2019 оны төсвийн гүйцэтгэл, газар зохион байгуулалтын 2020 оны төлөвлөгөөний биелэлт, Хурлын хороод байгуулах тухай болон Баянгол дүүргийн Иргэдийн төлөөлөгчдийн хурлын дэд дарга нарыг томилох тухай асуудлыг тус тус хэлэлцэн дүгнэж баталлаа.

БНХАУ-ын Өмнөд Монголын өөртөө засах орны иргэн Х.Цанаа Улсын онцгой комиссод 40 сая төгрөг хандивлажээ.

Тэрээр Монгол Улсад ажиллаж, амьдардаг бөгөөд коронавируст халдвараас ард иргэдээ хамгаалах арга хэмжээг цаг алдалгүй авч хэрэгжүүлэн ажиллаж байгаа Монгол улсын Засгийн газар, Улсын онцгой комисс болоод нийт ажилтан, алба хаагчдад ажлын амжилт хүссэн байна.

Мөн Олон улсын Ротарийн 3450 дүүргийн харьяа Монгол Ротари байгууллагын 9 болон 10 дугаар бүсийн Ротаричууд нийт 20,2 сая төгрөгийн үнэ бүхий нэг удаагийн амны хаалт, хамгаалах хувцас хэрэгсэл, нүүрний хаалт зэрэг эд материалын тусламжийг Улсын Онцгой комиссод хүлээлгэн өгчээ.

Ротарийн гишүүд дэмжигчид коронавируст халдвартай тэмцэх үйл ажиллагаанд зориулж “Өөрөөсөө давж бусдад туслах” уриатай хүмүүнлэгийн аяныг өрнүүлсэн байна.

Хандивын аянд Монголын Ратори клубүүдээс гадна Олон Улсын Ротарийн 3450 дүүрэг, дүүргийн захирагч,удирдлагын багийн хамт олон болон Хонконг, Макао дахь Ротари клубийн гишүүд нэгдсэн гэж Онцгой байдлын ерөнхий газраас мэдээллээ.

Нийслэлийн онцгой комиссын Шуурхай штабаас 24 цагийн нөхцөл байдал, хэрэгжүүлсэн арга хэмжээнүүдийн талаар мэдээлэл өгч байна

НОК-ын Шуурхай штабын удирдлагын багийн гишүүн Э.Эрдэнэбаатар “Өнгөрсөн 24 цагийн хугацаанд Улаанбаатар хотод коронавирусийн шинэ тохиолдол нэмж бүртгэгдээгүй нийт тохиолдол 128 хэвээрээ байна. Энэ сарын 4-нөөс эхлэн Нийслэлийн хэмжээнд түргэвчилсэн оношлуурын 48 цэгээр нийт 58 мянган хүнийг шинжилгээнд хамруулаад байна. Нийт хамрагдах иргэдийн 82 хувь нь шинжилгээнд хамрагдаад байна. Өнгөрсөн хоногийн хугацаанд Улаанбаатар хотоос 19 аймаг руу 101 тээврийн хэрэгслээр 3624 иргэн нийслэлээс гарсан, мөн 55 тээврийн хэрэгслээр 475 иргэн Улаанбаатар хот руу нэвтэрсэн байна. Архангай аймгаас Улаанбаатар хот руу нэвтрэхээр Эмээлт авто тээврийн шалган нэвтрүүлэх товчоо дээр хувийн автомашинтай зургаан иргэн ирсэн. Тухайн иргэд PCR шинжилгээ хийлгээгүй байсан” гэлээ.