Month: December 2020

Коронавирусийн гурав дахь давлагаа Азийн орнуудад эхэлж магадгүй гэж Дэлхийн олон эрдэмтэд үзжээ.

ЭМЯ-ны Олон нийттэй харилцах, Шуурхай удирдлагын хэлтсийн дарга Д.Нарангэрэл өнөөдрийн ээлжит хэвлэлийн хурлын үеэр “Дэлхий дахинд 62.3 сая хүн коронавирус халдварласнаас 1.4 сая хүн эндэж, 43.9 хүн эдгэрч, эмнэлгээс гарсан. Дэлхий дахинд коронавирусийн өвчлөл нэмэгдэж, өвчлөлийн эрч саарахгүй байна. Сүүлийн 24 цагийн хугацаанд 790 мянган хүн шинээр өвчилсөн.

Энэ нь анх гарсан өдрөөс өнөөдрийг хүртэлх бүртгэгдсэн өвчлөлийн тооноос хамгийн их үзүүлэлт боллоо. Нийслэлийн түргэн оношилгооны цэгээр 180 734 хүн үйлчлүүлснээс 127 623 хүний шинжилгээ сөрөг гарсан. Бусад хүний шинжилгээг хийж байна. Нийслэлд ЗӨСҮТ-ийн хоёр баг халдварын голомтуудад эцсийн халдваргүйтгэл хийж байна. Өчигдөр хоёр обьектын 160 мкв талбайг ариутгаж дуусгасан. ЗӨСҮТ-ийн баг Архангай аймгийн Батцэнгэл сумын 285 хүнээс шинжилгээ авахад нэг хүний хариу эерэг буюу коронавирус илэрсэн. Харин Өмнөговь аймгийн Гашуунсухайт сумын 1003 хүнээс шинжилгээ авахад бүх хариу сөрөг гарсан. Мөн тусгай дугаарын дөрвөн утсанд 6628 хүн, ЭМЯ-ны 323002 дугаарын утсанд 1808 хүн хандаж, коронавирусээс сэргийлэх болон бусад төрлийн өвчний эмнэлзүйн зөвлөмж, зөвлөгөө авсан байна” гэлээ.

Эрүүл мэндийн яамны өнөөдрийн ээлжит мэдээллээр Дархан-Уул, Орхон аймагт “Сovid-19” халдварын шинэ тохиолдол бүртгэгдээгүй. Харин Сэлэнгэ, Архангай, Сэлэнгэ, Говьсүмбэр аймагт шинэ тохиолдол илэрчээ.

Дорноговь аймагт “Сovid-19” халдварын нийт 21 тохиолдол бүртгэгдээд байна. Сүүлийн хоёр хоногт халдварын шинэ тохиолдол илрээгүй гэж аймгийн Онцгой комиссоос мэдээлэв. Батлагдсан тохиолдлуудын хувьд Айраг суманд 5, Замын-үүдэд 16 бүртгэгджээ. Халдварын шинэ голомт үүсээгүй ба ойрын хавьтлын 449 иргэнийг илрүүлж, шинжилгээнд хамруулжээ. Мөн дам хавьтлын 2005 хүнийг илрүүлэн шинжилгээ авсан байна. Тус аймагт 542 хүнд PCR шинжилгээ хийхэд сөрөг гарсан байна. Аймгийн хэмжээнд 13 мянга гаруй иргэнийг Covid-19 илрүүлэх шинжилгээнд хамруулсан байна. Мөн аймгийн Засаг даргын захирамжаар иргэдийг буцаан болон хүлээн авах ажлын хэсэг байгуулжээ.

Өнөөдрийн байдлаар шилжилт хөдөлгөөний эрх нь нээгдээгүй долоон аймагт Дорноговь аймаг багтжээ. Тус аймгаас иргэдийн хөдөлгөөнийг нээх асуудал энэ сарын 7-ноос эхлэх тул 5-ны өдрөөс бүртгэл эхлүүлэх саналаа аймгийн Онцгой комисс, УОК-т хүргүүлжээ. Тус аймаг руу төмөр замаар болон нийтийн тээвэр болон хувийн тээврийн хэрэгслээр зорчих боломжтой юм байна. Үүнд тодорхой зохицуулалт хийхээр аймгийн Онцгой комиссоос ажиллаж байна гэдгийг мэдээллээ.

Нийслэлийн Онцгой комиссын ээлжит мэдээллээр Нийслэлийн мэргэжлийн хяналтын газраас өнөөдөр мэдэгдэл хийлээ.

НМХГ-ын дарга Л.ЭРДЭНЭЧУЛУУН “Монгол Улсын Засгийн Газрын 194 дүгээр тогтоолын дагуу бүх нийтийн бэлэн байдлын дэглэм бууруулж, Улаанбаатар хотод арванхоёрдугаар сарын 1-ний өдрөөс эхлэн 18 чиглэлийн аж ахуй нэгжийн үйл ажиллагааг нээх шийдвэр гарсан. Энэхүү тогтоолын дагуу Улаанбаатар хотод 18 чиглэлээр 13 мянга гаруй аж ахуй нэгжийн үйл ажиллагаа нээгдэж байна. Мэргэжлийн хяналтын байгууллагаас эдгээр үйл ажиллагаагаа нээж аж буй ахуй нэгжүүдэд 21 заалттай мэдэгдэл цахимаар хүргүүлсэн. Аж ахуй нэгжүүд бидний хүргүүлсэн зөвлөмжийг хэрэгжүүлж ажиллах ёстой. Хэрвээ хэрэгжүүлэхгүй байгаа бол иргэд цахимаар гомдол хүргүүлж болно. Гомдлын дагуу бид хяналт шалгалт хийнэ. Одоогоор 31 улсын байцаагч цахимаар мэдэгдлүүдээ хүргүүлж байна. Мөн ажилчдынхаа дундаас сайн дурын үндсэн дээр коронавирусийн шинжилгээнд хамруулахыг, гэрийн тусгаарлалтанд байгаа ажилчдадаа чөлөө олгохыг, ажилчдын ширээ сандлыг 1.5-2 метрийн зайтай байрлуулахыг тус тус заасан. Бид гэрийн хорооллын хүнсний дэлгүүрүүд дээр түлхүү ажиглалт хийж байна. Өнгөрсөн өдрүүдэд хугацаа нь дууссан хиам, напельон торт, хэрчсэн гурилууд ихээр илэрсэн. Бид яаралтай арга хэмжээ авч, устгалд оруулсан. Эм ханган нийлүүлэх үйлдвэрүүдийг мөн шалгаж байгаа. Улаанбаатар эмийн сангуудад мөн хяналт хийж байна. Хөдөө орон нутаг руу зорчих 22 цэг дээр, гурван автовокзал дээр хяналт шалгалтыг хийж байгаа. Маргаашнаас тусгаарлах байрууд дээр бид хяналт шалгалтыг хийх болно” гэлээ.

Архангай аймгийн Онцгой байдлын газрын Шуурхай штабаас өнөөдөр ээлжит мэдээллээ хийлээ.

Аймгийн Эрүүл мэндийн газрын дарга Р.Гандиймаа “Архангай аймагт коронавирусийн батлагдсан тохиолдол гурав боллоо. Энэ нь анхны батлагдсан тохиолдлын нэг гэр бүлийнх хүн. Түүнийг тусгаарлалтад байлгаж байсан. Ойрын хавьтлын 58 хүнийг тогтоож, тусгаарласан. Дам хавьтлын 400 гаруй хүнийг судалж, шинжилгээнд сорьц авсан. Шинжилгээ үргэлжилж байгаа. Одоогийн байдлаар 190 хүний шинжилгээний хариу гарсан байгаа. Үүнээс дээр дурдсан гурав дахь тохиолдол батлагдаад байна. Бид голомтыг хяналтандаа авч чадсан. Ихтамир сумын гурван иргэний PCR шинжилгээний хариу сөрөг гарсан” гэв.

Мөн тус аймгийн онцгой комиссоос тус аймгийн харъяалалтай иргэдийг Улаанбаатар хотоос татахгүй гэв. Цаашид өвчлөл нэмэгдэхээс урьдчилан сэргийлж Нэгдсэн эмнэлгийн Халдвартын тасгийн 30 ортой эмнэлгийг бэлтгэсэн байна.

Тэтгэврийн зээлтэй ахмадууд зээл авсан салбартаа хандан хүсэлт гаргасан тохиолдолд арванхоёрдугаар сарын тэтгэврийн мөнгөө зээлдээ суутгуулалгүй авч болно гэж Төрийн банк мэдээллээ.

Өнөөдөр нийгмийн даатгалын байгууллагаас 446.4 мянган тэтгэвэр авагчдад 185.0 тэрбум төгрөгийн тэтгэврийг арилжааны зургаан банкаар дамжуулан олгож байна. Тодруулбал, 353.5 мянган даатгуулагчид өндөр насны, 71.9 мянган даатгуулагчид тахир дутуугийн, 21.0 мянган иргэнд тэжээгчээ алдсаны тэтгэвэр олгох юм.

Улаанбаатар хот, Сэлэнгэ, Дархан-Уул, Орхон, Дорноговь, Говьсүмбэр, Архангай аймаг зэрэг коронавирусийн халдвар бүртгэгдсэн бүс нутгийн тэтгэвэр авагчидтай нэг бүрчлэн утсаар холбогдож, нийт 14911 хүнд зөвлөгөө, мэдээлэл хүргээд байна. Тэтгэвэр олгох өдөр яам, агентлагийн албан хаагчид хяналт тавьж, асуудал гарсан тохиолдолд шийдвэрлэж, газар дээр нь ажиллана” гэв.

Монгол Улсын Засгийн газрын 179 дүгээр тогтоолоор цар тахлаас урьдчилан сэргийлэх эрсдэлт нөхцөлд буюу халдварын голомтот бүсэд ажиллаж буй эрүүл мэнд, онцгой байдал, мэргэжлийн хяналт, цагдаа зэрэг холбогдох байгууллагын алба хаагчдад мөнгөн урамшуулал олгохоор болсон.

Уг урамшуулалд Онцгой байдлын байгууллагаас аймаг, нийслэлийн Онцгой комиссын шуурхай штаб, пост, эргүүл хамгаалалтад ажиллаж байгаа 2800 гаруй алба хаагчид хамрагдах юм.