Month: December 2020

Шүүхийн ерөнхий зөвлөлийн нэгэн ажилтнаас “Covid-19”-ийн халдвар илэрсэн тул тус газрыг хамгаалалтад авч, зарим ажилтныг тусгаарлан, шинжилгээ авч эхэлсэн гэх мэдээлэл өчигдөр /2020.12.02/ үдээс хойш хэвлэлээр цацагдсан.

Албан эх сурвалжаас “Шүүхийн ерөнхий зөвлөлийн байранд ариутгал хийгдсэн. Олонх нь гэрээсээ ажлаа хийж байгаа. Халдвар хамгааллын дэглэмээ сайн сахиж байсан” гэх тайлбар хийгээд буй.

“Covid-19” халдвартай холбоотой мэдээллийг өдөр бүрийн 11 цагт Эрүүл мэндийн яам, Халдварт өвчин судлалын үндэсний төвөөс хийж буй. Иймээс өнөөдрийн хуралдаанаар халдвар тээгч нь Шүүхийн ерөнхий зөвлөлийн ажилтан байсан уу, эсвэл үйлчлүүлэгч нь байсан уу гэдэгт тодорхой мэдээлэл өгөх шаардлагатай болж байгаа юм.

Монгол Улсын хэмжээнд дотоодоос “Covid-19” халдвар авсан нь батлагдсан тохиолдол өчигдөр 396-д хүрээд буй. Үүнд:

Сэлэнгэ-183

Улаанбаатар-90

Дархан-Уул-44

Орхон-24

Дорноговь-21

Говьсүмбэр-4

Архангай-3 тохиолдол тус тус бүртгэгдсэн юм.

Шүүхийн ерөнхий зөвлөлийн ажилтан коронавирусийн халдвар авсан байж болзошгүй гэсэн мэдээлэл өчигдөр орой гарч, тус байгууллагад тусгаарлалт хийсэн. Гэтэл энэ байгууллагад тухайн үед ажиллаж байсан 50 гаруй хүнээс дарга нар нь тусгаарлагдаагүй гэсэн гомдол ирсэн гэсэн сэтгүүлчийн асуултад ХӨСҮТ-ийн Тандалт, судалгааны албаны дарга А.Амбасэлмаа хариуллаа.

Тэрбээр, Коронавирусийн батлагдсан тохиолдлын хавьтлуудыг илрүүлэх тандалт судалгааны явцад ШЕЗ-ийн ажилтныг илрүүлэн, шинжилгээ хийхэд коронавирус илэрсэн. Энэ хүн тус байгууллагад үйлчлэгч хийдэг. Энэ хүн тухайн албан газрын хоёрдугаар давхарт ажилладаг учир ойрын болон дам хавьтлын 50 гаруй хүнийг тусгаарласан. Ойрын хавьтлыг эмнэлэгт, дам хавьтлыг гэрт нь тусгаарлах арга хэмжээ авсан. Хавьтал болсон хүнийг албан тушаалаар ялгаварлан тусгаарлана гэж байхгүй. Өнөөдрийн байдлаар тус байгууллагын 37 хүний шинжилгээний хариу гарсан, коронавирус илрээгүй гэв.

Цагдаагийн байгууллагад өчигдөр өдрийн байдлаар нийт 920 гомдол, мэдээлэл ирсэн байна.

Нийт дуудлагын 367 нь зөрчлийнх бол,

хулгайлах 5,

гэр бүлийн хүчирхийллийн 59,

гэмт хэргийн шинжтэй 32 дуудлага мэдээлэл тус тус ирсэн байна. Бүх нийтийн бэлэн байдлын зэрэгт шилжүүлсэн энэ үед архи, согтууруулах ундаа зарахыг хориглосон ч 114 хүн эрүүлжүүлэгдэж, согтуугаар тээврийн хэрэгсэл жолоодсон есөн зөрчил гарчээ. Мөн 12 хүн гэмтэж, олон нийтийн газар зүй бусаар биеэ авч явах, танхайрсан 65, оршин суугчдын аюулгүй байдлыг алдагдуулсан 53 дуудлага 102 дугаарт иржээ.

Архангай аймгийн Батцэнгэл суманд коронавирусийн халдвар бүртгэгдсэн хоёр иргэний ойрын хавьтлаас дахин вирус илэрч нийт тохиолдлын тоо гурав боллоо. Анх халдвар авсан нь батлагдсан иргэний гэр бүлийн хүн тул шуурхай штаб дуудлага авсан эхний өдрөө тусгаарлалтад аваад байжээ.

Үргэлжлүүлэн мэргэжлийн шуурхай баг болон тандалт судалгааны баг голомтод ажиллаж байна. Одоогийн байдлаар ойрын хавьтлын 60 орчим иргэн, дам хавьтлын 400 гаруй иргэнийг тодорхойлж тусгаарлалтад авсан. Арванхоёрдугаар сарын 02-ноос тав хоногийн хугацаанд Батцэнгэл сумын 3771, Ихтамир сумын 5200 иргэнийг нэг иргэн-нэг шинжилгээ хэлбэрээр буюу бүх хүнийг нэг бүрчлэн шинжилгээнд хамруулахаар төлөвлөж байна хэмээн Архангай аймгийн онцгой комиссоос мэдээллээ.

Засгийн газрын шийдвэрээр сайжруулсан түлшийг өнөөдрөөс эхлэн нэг шуудайг нь 1875 төгрөгөөр худалдана. Сайжруулсан түлшний үнийг 50 хувиар бууруулах шийдвэрээ Ерөнхий сайд өчигдөр танилцуулсан.

Нэг шуудай сайжруулсан түлш 3750, 1 тонн нь 150 мянган төгрөгийн үнэтэй байсан. Харин өнөөдрөөс гэр хорооллын иргэд тал үнээр нь авах боллоо. Нийслэлийн гэр хороололд 220 мянган өрх бий. Тэд өвөл өдөрт 4,000 тонн, сард 120 мянга орчим тонн сайжруулсан түлш хэрэглэдэг байна. Дээрх шийдвэр хэрэгжих дөрвөн сарын хугацаанд Засгийн газраас иргэдэд 30 гаруй тэрбум төгрөгийн бодит дэмжлэг үзүүлэх тооцоог хийжээ. Энэ санхүүжилтийг төрийн өмчит “Эрдэнэс таван толгой” ХК гаргахаар болжээ.

50 хувийн үнийн хөнгөлөлт зөвхөн иргэдэд хамааралтай бөгөөд ААН-үүдэд үйлчлэхгүй. Түүнчлэн Байгаль орчин, аялал жуулчлалын сайдын багцаас амьдралын бололцоо тааруу 10 мянган өрхөд тус бүр 37 шуудай сайжруулсан түлш үнэ төлбөргүй олгох санхүүжилтийг шийдвэрлэсэн. Одоогийн байдлаар 7500 айл, өрх түлшээ хүлээн аваад байна.

Ус цаг уур, орчны судалгаа, мэдээллийн хүрээлэнгээс арваннэгдүгээр сарын 20-ны байдлаар гаргасан зудын эрсдэлийн зурагт нийт нутгийн 40 гаруй хувьд их (нэн их 6.0 хувь, их 30,4 хувь), 30 орчим хувьд нь (28.2 хувь) дунд зэрэг эрсдэлтэй байгааг мэдээлжээ.

Үүнээс Баянхонгор аймгийн нутагт зудын эрсдэл нэн их, Говь-Алтайн зүүн, Өвөрхангай, Дундговийн нутаг бүхэлдээ, Өмнөговь, Дорноговь, Төв, Сүхбаатар аймгийн зарим нутгаар эрсдэл их зэрэглэлтэй байна. Өөрөөр хэлбэл, эдгээр нутгаар өвөл, хавар цаг агаар хүндрэх нөхцөл бүрджээ.

Энэ талаар Улсын Их Хурлын дарга Г.Занданшатар өчигдөр Баянхонгор аймгийн сум, багийн удирдлагуудтай өвөлжилтийн нөхцөл байдлын талаар цахим уулзалт хийлээ. Уулзалтад Засгийн газрын гишүүн, Хүнс, хөдөө аж ахуй, хөнгөн үйлдвэрийн сайд З.Мэндсайхан оролцож, мэдээлэл өгсөн юм. Өнгөрсөн зун гантай байсан Баянхонгор аймгийн нутгаар өвс ургамлын гарц муу, га-гийн ургац бага, бэлчээрийн даац хэтэрсэн, малын тарга хүч муу, усан хангамж хүрэлцээгүй, отор нүүдэл хийж туйлдсан, өвс тэжээлийн нөөц хүрэлцээ хомс, зах зээлийн үнэ өндөр байгаа нь зудын эрсдэлийг нэмж байгааг сумын удирдлагууд хэлж байна. Энэ жил ихэнх сумдад зуншлага оройтсон, одоогоор нийт нутгаар цасан бүрхүүл тогтож, дунджаар 5-10 см, хонхор жалга газарт 20-60 см хүртэл зузаан цастай байгаа аж. Нийт сумдад өвс, тэжээлийн хомсдол үүсжээ. Өвөлжилт хүндрэх сургаар хивэг тэжээлийн үнэ өсөж, шуудай нь 22-23 мянган төгрөгт хүрснийг сумын удирдлагууд цахим уулзалтын үеэр хэлж байлаа.

Өвөлжилт хүндрэх эрсдэлтэй 6 аймагт 40 мянган тонн экспортын мах бэлтгэх тусгай эрхийг 14 аж ахуйн нэгжид олгосон байна. Одоогийн байдлаар 16.5 мянган тонныг бэлджээ. Салбарын яамнаас экспортод гаргах хугацааг сунгах талаар дэмжлэг үзүүлэх бөгөөд орон нутгийн удирдлагууд мах бэлтгэлийн ажилд анхаарал хандуулах хэрэгтэйг сануулсан юм.

Засгийн газраас отор нүүдлийн асуудлыг зохицуулж, 11 дүгээр сарын 15-ны өдрөөр отор нүүдлийг хаах шийдвэр гаргасан байна. Иймээс отроор очсон малчдад тухайн сумын удирдлагууд дэмжлэг үзүүлж, шаардлагатай тусламж үйлчилгээг үзүүлэхийг салбарын сайд хэллээ.

Улсын Их Хурлын дарга Г.Занданшатар ихэнх нутгаар өвөлжилт хүндрэх эрсдэл нэгэнт үүссэн, цар тахлын нөхцөл байдал, зудын эрсдэл иргэдэд давхар шок үүсгэж байгаад онцгой анхаарч, орон нутгийн удирдлагууд мах бэлтгэл, өвс тэжээлийн нөөцийг бэлтгэх, хуваарилах оновчтой зохион байгуулалт хийж ажиллахыг үүрэг болголоо.

Улсын онцгой комиссын шийдвэрээр энэ сарын 1-нээс хөл хорионд гацсан орон нутгийн иргэдээ нийслэлээс гаргаж эхлээд байна.Үүнтэй холбоотойгоор Хөвсгөл аймгийн Шуурхай штабаас өчигдөр мэдээлэл хийж, эрсдэлт бүсээс ирж буй иргэдийн шинжилгээний бичгийг тусгай багажаар шалгаж буйг онцлов.

Эрүүл мэндийн газрын дарга М.Үүрийнбаяр “Халдварын голомттой бүсээс ирсэн иргэдийн дунд шинжилгээ өгөөгүй, шинжилгээний хугацаа 48 цаг өнгөрсөн тохиолдлууд байсан тул бид давтан шинжилгээг авсан. Цаашид эрсдэлт бүс нутаг Улаанбаатар, Дархан-Уулаас ирж буй иргэдийг бид онцгойлон анхаарч, хяналт тавьж ажиллана. Явцын дунд шинжилгээг давтан авах, гэрийн хяналтыг сайжруулах зэрэг арга хэмжээ авна”

Зорчигчдын шинжилгээний дүгнэлтийг цагдаагийн байгууллагын шалгах багажаар уншуулан оруулж байгаа гэнэ. Хөвсгөлд өчигдөр Улаанбаатар хотоос 12, Дарханаас 8 нийт 20 автобус, 200 орчим жижиг тэрэгтэй нийт 1600 орчим иргэн иржээ. Энэ үеэр шинжилгээ өгөөгүй иргэн ирсэн байсныг илрүүлж, түргэвчилсэн оношлуураар шинжилгээ авсан аж.