Month: December 2020

Эрүүл мэндийн сайдын 2020 оны арваннэгдүгээр сарын 12-ний өдрийн “Эрүүл мэндийн байгууллагуудын бүх нийтийн бэлэн байдалд шилжүүлэх тухай” А/520 дугаар тушаалын хүрээнд бүх нийтийн бэлэн байдалд шилжин тусламж үйлчилгээг үзүүлж байна. Төвийн гамшгаас хамгаалах штаб “Коронавируст халдварын цар тахлын хариу арга хэмжээний төлөвлөгөөг тодотгож ГҮТ-ийн захирлын 2020 оны арваннэгдүгээр сарын 16-ны өдрийн А/80 тоот тушаалаар батлан тохиолдлын удирдлагын тогтолцооны багт хуваагдан ажиллаж байна. Геронтологийн үндэсний төв бүх нийтийн бэлэн байдлын зэрэгт шилжсэнтэй холбоотойгоор дараах үйл ажиллагаануудыг зохион байгуулж байна.

1.Төвийн байранд үйл ажиллагаа явуулдаг хувийн хэвшлийн эмнэлгүүдэд үйл ажиллагааг түр зогсоох албан шаардлага хүргүүлж үйл ажиллагааг нь зогсоож төвийн эмч мэргэжилтнүүдийг хариуцлагатай жижүүрээр томилон ажиллуулж төвөөр үйлчлүүлж байгаа үйлчлүүлэгчдээс тандалт судалгааны асуумж авч коронавирусын сэжигтэй тохиолдлын тандалт хийн ажиллаж байна. Үйлчлүүлэгчдийн аюулгүй байдлыг хангахын тулд үйлчлүүлэгчийн халуун хэмжиж, амны хаалтны хэрэглээг хянан, гарыг халдваргүйжүүлж, хүн хоорондын зайг бариулан үйлчилж байна.

2.Коронавируст халдвараас сэргийлэх талаар нийт хүн амд чиглэгдсэн сурталчилгааг төвийн вэб хуудсаар сурталчилж төвийн эмч, мэргэжилтнүүдэд коронавируст халдвартай холбоотойгоор гарсан сайдын тушаал, түр заавруудын дагуу эмнэлзүйн болон халдвараас сэргийлэх сургалт сурталчилгааг хийж байна.

3.Бүх нийтийн хөл хориотой холбоотойгоор үйлчлүүлэгчид амбулаторийн тусламж үзүүлэхээс гадна утсаар болон цахимаар эрүүл мэндийн зөвлөгөө зөвлөмжийг өгч ажиллаж байна.

4.Геронтологийн үндэсний төв нь Эмгэг судлалын үндэсний төвтэй хамтран Нийслэлийн эрүүл мэндийн газрын захирамж, Сүхбаатар дүүргийн Эрүүл мэндийн нэгдлийн мэргэжил арга зүйн зөвлөгөөний дагуу Сүхбаатар дүүргийн 58 дугаар дунд сургууль дээр зорилтот хүн амаас коронавирус илрүүлэх шинжилгээний сорьц цуглуулах түр лабораторийг байгуулж, 8 эмч, мэргэжилтний бүрэлдэхүүнтэй хариу арга хэмжээний 1–р багийг томилон ажиллуулж байна. Түр лабораторид шинжилгээний сорьц авах үйл ажиллагааг халдвар хамгааллын чанд дэглэмийн дор зохион байгуулж, үйл ажиллагааг 2020 оны 11 дүгээр сарын 25-наас эхлүүлэн түргэвчилсэн оношлуураар коронавирус илрүүлэн оношлох болон PCR шинжилгээний сорьц цуглуулах ажлыг гүйцэтгэн ажиллаж байна.

5.Бүх нийтийн хөл хорио тогтоосонтой холбогдуулан нийслэл хотод амьдарч байгаа тусламж үйлчилгээ нэн хэрэгцээтэй эмзэг бүлгийн настнуудын судалгааг шинэчлэн гаргаж ДЭМБ-ын дэмжлэгээр ахмад настнуудад эрүүл мэндийн болон хүмүүнлэгийн тусламж үйлчилгээг үзүүлэхээр бэлтгэл ажлыг ханган ажиллаж байна. Энэхүү үйл ажиллагааны хүрээнд нийслэл хотод амьдарч буй 2500 ахмад настан болон Увс, Баян-Өлгий, Сэлэнгэ аймагт амьдарч буй 450 гаруй харж асрах хүнгүй, хавсарсан архаг хууч өвчтэй, эмзэг бүлгийн ахмад настанд гериатрийн төрөлжсөн мэргэжлийн эрүүл мэндийн тусламж үйлчилгээг гэрээр хүргэж хүмүүнлэгийн тусламж үзүүлэн сэтгэлзүйн дэмжлэг үзүүлэхээр бэлтгэл ажлыг хангаж ажиллаж байна.

Эрүүл байхын үндэс амин дэмээр баялаг хоол хүнс хэрэглэх билээ. Тэгвэл танд зориулан дархлаа дэмжих чадвартай хүнсний бүтээгдэхүүний талаар зөвлөмжийг хүргэж байна.

1. Исгэлэн төрлийн жимснүүд: Нимбэг, киви, жүрж гээд C витаминаар баялаг бүхий л төрлийн жимсийг өргөн хэрэглэх нь дархлаагаа дэмжих хамгийн найдвартай арга юм.

2. Амтат чинжүү: Томхон хэмжээтэй нэг амтат чинжүүнд 209 мг “С” амин дэм агуулагдах ба энэ нь дундаж хэмжээтэй нимбэгэн агуулах“С” амин дэмийн агууламжаас даруй 3 дахин их гэсэн үг юм.

3. Брокли: Навчит ногоон ургамлын төрөл болох брокли нь дархлаа сайжруулахад хэрэгцээт глютаминыг ихээр агуулж байдаг бөгөөд өвөл цагт түлхүү хэрэглэх нь хамгийн тохиромжтой байдаг.

4. Тахианы шөл: Ханиад томуутай тэмцэх хамгийн хялбар арга болно тахианы халуун шөл уух юм. Тахианы шөлөнд энгийн хоолонд агуулагддагаас 40 хувиар илүү В6 витамин агуулагддаг бөгөөд энэ нь дархаа сайжруулж, цусны улаан эсийг нөхөн төлжихөд чухал үүрэгтэй. Мөн олон цаг ястай нь буцалгасан тахианы шөлөнд кальци, төмөр зэрэг олон төрлийн уураг нэмэгддэг нь дархлааг дэмжихийн хажуугаар ходоодны үйл ажиллагааг сайжруулдаг аж.

5. Сармис: Сармисанд агуулагдах олон төрлийн эрдэс нь хүний зүрхний болон ходоодны үйл ажиллагаанд эерэгээр нөлөөлдөг. Өдөр бүр хамгийн багадаа ядаж нэг хумс сармисыг тогтмол хэрэглэх нь таны биеийн өвчин эсэргүүцэх буюу бактерийн эсрэг дархлаа тогтож, биеэс хортой бодисыг гадагшлуулахад чухал үүрэг гүйцэтгэдэг байн.

Энэ жил самар их ургасан тул Сэлэнгэ аймаг руу самар түүхээр явсан олон хүн тус аймагт хөл хорионд орсон талаар Шадар сайд Я.Содбаатар өмнө нь мэдээлэхдээ Хүдэр суманд 680 гаруй, Мандал суманд 1600 гаруй самарчин хөл хорионд гацсаныг мэдээлсэн юм. Эдгээр иргэнийг шинжилгээнд хамруулж, нутагт нь буцаах ажлыг үе шаттайгаар зохион байгуулахыг мэдэгдсэн билээ.

Тэгвэл Сэлэнгэ аймаг руу самар түүхээр яваад хөл хорионд орсон 500 орчим иргэнийг Улсын онцгой комиссоос өгсөн үүрэг чиглэлийн дагуу хот руу нэвтрүүлжээ. Үүнээс өмнө Баруун түрүүн товчоонд дүүргийн онцгой комиссын алба хаагчид иргэдийг 24 цагийн турш иргэдийг PCR шинжилгээнд хамруулах, ариутгал халдваргүйжүүлэлтийн дэглэм сахиулах ажил зохион байгуулжээ. Сонгинохайрхан дүүргийн онцгой комиссоос нийт иргэдийг Улсын онцгой комиссоос өгсөн зөвлөмжийг мөрдөж өөрийн амь нас эрүүл мэндийг эрсдэлд оруулахгүй байхыг анхааруулсан байна.

Дэлхийн хүн ам илүү идэвхтэй хөдөлгөөнтэй байсан бол жилд 5 сая нас баралтаас урьдчилан сэргийлэх боломжтой юм. “COVID-19” цар тахлын улмаас олон хүн гэртээ байгаа энэ үед Дэлхийн эрүүл мэндийн байгууллагаас дасгал хөдөлгөөн болон суугаа зан үйлийн талаар шинэ удирдамж гаргалаа. Өнгөрсөн сарын 26-ны өдөр албан ёсоор гарсан уг удирдамжид бүх насны хүн ам бие бялдрын байдлаас үл хамааран идэвхтэй байх боломжтой, хөдөлгөөн бүр чухал болохыг онцолжээ.

Шинэ удирдамж нь бүх насны хүн ам, түүний дотор архаг хууч өвчтэй, хөгжлийн бэрхшээлтэй хүмүүс долоо хоногт багадаа 150-300 минут дунд зэргийн болон өндөр эрчимтэй дасгал хөдөлгөөн хийх, хүүхэд, өсвөр насныхан өдөрт дунджаар 60 минут дасгал хөдөлгөөн хийхийг зөвлөж байна. Эмэгтэйчүүдийг жирэмсэн үед болон төрсний дараа дасгал хөдөлгөөн тогтмол хийхийг зөвлөжээ. Хөгжлийн бэрхшээлтэй хүмүүсийн хувьд дасгал хөдөлгөөн нь эрүүл мэндэд чухал ач тустай болохыг онцолсон байна. Ахмад настнуудын хувьд (65 ба түүнээс дээш настай хүмүүс) унахаас урьдчилан сэргийлэх, эрүүл мэндээ дэмжихэд тэнцвэр, булчингийн дасгал хийхийг зөвлөж байна.

Биеийн тамирын дасгал хөдөлгөөнийг тогтмол хийх нь зүрх судасны өвчин, чихрийн шижингийн 2-р хэв шинж, хорт хавдраас урьдчилан сэргийлэх, сэтгэл санааны хямрал, айдас түгшүүрийн шинж тэмдгийг бууруулах, ой санамж муудах эрсдэлээс сэргийлэх, ой тогтоолтыг сайжруулах, тархины үйл ажиллагааг дэмжихэд чухал ач холбогдолтой.

ДЭМБ-ын Ерөнхий захирал Др Тедрос Адханом Гебрейесус, “Хөдөлгөөнтэй байх нь эрүүл мэнд, сайн сайхан байдалд чухал үүрэг гүйцэтгэдэг. Хөдөлгөөн бүр чухал, ялангуяа коронавируст халдварын цар тахлын энэ үед бид бүгд аюулгүй, бүтээлчээр өдөр бүр хөдөлж байх хэрэгтэй” хэмээв.

Бүх төрлийн дасгал хөдөлгөөн нь эрүүл мэндэд ашиг тустай. Ажлын байранд, спорт зааланд, чөлөөт цагаараа эсвэл алхах, дугуй унах, гэрийн ажил хийх, бүжиглэх, тоглох, цэвэрлэгээ хийх зэргээр хаана ч, хэзээ ч идэвхтэй хөдөлгөөнтэй байж болно.

Коронавируст халдварын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн арваннэгдүгээр зүйлийн тав дахь хэсэгт заасны дагуу дээрх хуулийн хэрэгжилтэд Хүний эрхийн үндэсний комисс өөрийн чиг үүрэг, бүрэн эрхийн хүрээнд хяналт тавьж ажиллаж байна.

Энэ оны арваннэгдүгээр сарын 28-30-ны өдрүүдэд нийслэлээс гарах, орох авто тээврийн шалган нэвтрүүлэх товчоод буюу СХД-ийн Эмээлт, Баруунтуруун, ХУД-ийн Өлзийт, Налайх, Багахангай дүүрэгт, иргэдээс шинжилгээ авах цэгүүд болох СХД-ийн 8-р хороо, нийслэлийн 67 дугаар сургууль, БГД-ийн 4-р хороо, нийслэлийн 38 дугаар сургууль, БЗД-ийн 16-р хороо, нийслэлийн 44 дүгээр сургууль, ЧД-ийн 4-р хороо, нийслэлийн 5 дугаар сургууль, ХУД-ийн 11-р хороо, нийслэлийн 32 дугаар сургууль зэрэг нийт 20 байршилд ажиллаж, нөхцөл байдалтай танилцлаа. Мониторинг үргэлжилж байна. Хүний эрхийн зөрчилтэй холбоотой гомдол, мэдээллийг Хүний эрхийн Үндэсний Комисс 24 цагийн турш хүлээн авч байна.

Утас: 7000-0222

Цахим гомдол хүлээн авах: info@nhrcm.gov.mn

Арванхоёрдугаар сарын 3-ны шөнийн 02:30 цагийн орчим ХУД-ийн 1-р хороо Чингисийн өргөн чөлөө Энхтайваны гүүрний гэрлийн шон, бетон хашлагыг мөргөсөн осол гарчээ.

Тухайн автомашиныг барьж явсан жолооч согтууруулах ундааны зүйл хэрэглээгүй байсан ба хурдаа тохируулж яваагүйн улмаас осол гаргасан аж.

Монгол Улсын Замын хөдөлгөөний дүрэмд жолооч нь зам болон цаг агаарын нөхцөл байдлаас шалтгаалан тээврийн хэрэгслийг зогсоох боломжтой бага хурдтай зорчих ёстой. Гэтэл хөл хорионы дэглэмтэй холбоотойгоор хөдөлгөөн сийрэг үед жолооч нар хурд хэтрүүлэх, улирал, цаг агаарын нөхцөлд тохироогүй зуны дугуйтай хөдөлгөөнд оролцож яваад зам, замын байгууламж мөргөж гэмтээх, бусдын болон өөрийн эд хөрөнгөнд хохирол учруулах явдал гарсаар байна хэмээн ТЦА-аас мэдээллээ.

Өнөөдөр бүртгэгдсэн ослоос дурдвал:

2020.12.03-ны өглөө 08:00 цагийн орчим ХУД-ийн 1-р хороо Чингисийн өргөн чөлөө Энхтайваны гүүрэн дээр Toyota Highlander маркийн автомашин гүүрний гэрлийн шон мөргөсөн.

2020.12.03-ны өглөө 08:10 цагийн орчим ХУД-ийн 11-р хороо уулын замд Toyota Prius маркийн автомашин замын хашлага мөргөн онхолдож, жолооч 42 настай, эрэгтэй Б гэмтсэн байна.