Month: December 2020

Монгол Улсын Засгийн газрын хуралдаанаас гарсан шийдвэрийн дагуу нийслэлийн есөн дүүргийн хэмжээнд өчигдрөөс эхлэн 30 цэг дээр “Нэг өрх-Нэг иргэн” гэсэн зарчмаар иргэдээс тандалтын зорилгоор шинжилгээ авах ажлыг зохион байгуулж эхэлсэн. Шинжилгээг энэ сарын 11-н хүртэл 70 мянган иргэнээс авах юм.

Иргэдийг шинжилгээнд хамруулахдаа дүүргийн онцгой комиссоос хороо, өрхийн эмнэлэгтэй хамтран халдвар голомтлон гарсан хороо болон эрсдэл өндөртэй хороодын өрхүүдээс нэг хүн сонгох хэлбэрээр жагсаалтаа гаргажээ. Өөрөөр хэлбэл, олон ам бүлтэй, хөдөлгөөнт ажил эрхэлдэг, нэг хашаанд эсвэл байранд олноороо амьдардаг, үйлчилгээний газарт ажилладаг болон ажиллуулдаг, мөн бусад эрсдэлтэй байдлыг тооцон шинжилгээнд хамруулахаар болсон байна. Улмаар жагсаалтад багтсан иргэдэд шинжилгээ өгөх цаг болон байршлыг урьдчилан мэдэгдэх бөгөөд шинжилгээний хариу сэжигтэй гарвал PCR шинжилгээгээр баталгаажуулах юм.

Түүнчлэн шинжилгээнд орохын өмнөх хоёр цагийн турш бохь зажлахгүй, тамхи татахгүй, юм идэж уухгүй байх, мөн шинжилгээ өгөхийн өмнө хамрын хөндийгөө цэвэрлэх хэрэгтэйг мэргэжилтнүүд зөвлөж байна гэж Онцгой байдлын ерөнхий газраас мэдээллээ.

Баянгол дүүргийн Цагдаагийн газрын нэгдүгээр хэлтсийн алба хаагчид борлуулалтын автомашинаар архи, согтууруулах ундаа зарж байсан этгээдийг илрүүллээ.

Тодруулбал, Баянгол дүүргийн III дугаар хороонд байрлах “Нарны хороолол”-ын байрны гадаа иргэн Х нь “Ус Ундаа” гэсэн борлуулалтын тээврийн хэрэгслийг ашиглан цахим сүлжээгээр архи, согтууруулах ундааг, хорио цээрийн дэглэм зөрчиж, нууцаар тээвэрлэн худалдан борлуулсаныг тогтоожээ. Зөрчлийн тэмдэглэл үйлдэн, тээврийн хэрэгслийг нь журамлаж, дүүргийн Цагдаагийн газрын нэгдүгээр хэлтэст шалгалтын ажиллагаа явуулж эхэлсэн байна.

ХӨСҮТ-ийн Тандалт, судалгааны албаны дарга А.Амбасэлмаагийн мэдээллийг хүргэж байна.

Тэрээр “Өчигдөр 20240 хүнд шинжилгээ хийсэн. 800 нь хавьтлын хяналтын шинжилгээ. Шинээр 11 хүний шинжилгээнд халдвар илэрсэн. Тодруулбал, Улаанбаатарт 3, Сэлэнгэд 4, Дорноговь аймагт 4 шинэ тохиолдол илэрсэн. Улаанбаатар хотод илэрсэн 3 тохиолдлын хоёр нь өмнөх хавьтлын давтан шинжилгээнд коронавирус илэрсэн. Харин нэг хүн нь автобус баазын жолоочийн ойрын хавьтал байна. Энэ хүн халдвартай жолоочтой нэг унаагаар явдаг байсан. Тус автобус баазын 512 хүнийг PCR шинжилгээнд хамруулсан ба бусад хүнээс коронавирус илрээгүй” гэв.

ЭМЯ-ны ээлжит хэвлэлийн хурлын үеэр ХӨСҮТ-ийн Тандалт, судалгааны албаны дарга А.Амбасэлмаа “Сэлэнгэ аймгийн нэгдсэн эмнэлэг коронавирусийн халдвар авсан иргэдийг хүлээн авч эмчилж эхэлжээ. Одоогийн байдлаар Сэлэнгэ аймгийн нэгдсэн эмнэлэгт дөрвөн хүн эмчлэгдэж байгаа бөгөөд өвчтөнүүдийн биеийн байдал хөнгөн байна” хэмээлээ.

Манай улсад батлагдсан тохиолдол өнөөдрийн байдлаар 842 болоод байгаа бөгөөд үүнээс 368 нь эдгэрчээ. Эмчлэгдэж байгаа иргэдийн

-377 иргэн хөнгөн

-76 иргэн хүндэвтэр

-6 иргэн хүнд

-2 иргэн маш хүнд байна.

Имарт Хайпермаркетийн зүгээс нийгмийн хариуцлагын хүрээнд “Ковид-19” цар тахлын яг голомтонд, халдварын эрсдэл өндөртэй нөхцөлд, өвчтөнтэй нүүр тулан ажиллаж буй эмч, сувилагч нарт шаардлагатай хэрэгсэл бүхий аранзыг бэлтгэв.

Эхний ээлжинд дотоодын халдвар эрчимтэй тархаад буй нөхцөл байдал хүндрэлтэй орон нутгууд болох Дархан-Уул аймаг, Орхон аймаг, Сэлэнгэ аймгуудын Эрүүл мэндийн газруудад өчигдөр Монгол шуудангаар илгээмжээ явууллаа. Дараагийн ээлжинд мөн адил онцгой нөхцөл байдалд ажиллаж буй ажилтан, албан хаагчдад хүргэхээр төлөвлөж байгаа бөгөөд тусламжийн эд зүйлсээ бэлтгэж эхлээд байна.

Дэлхий нийтэд хурдацтайгаар тархаад буй “Ковид-19” цар тахлын эрсдэл өндөр хэвээр байгаа бөгөөд халдварын тархалтыг дотооддоо алдахгүй байх, түүнийг таслан зогсоох үйлсэд бид хамтдаа хүчээ нэгтгэн тэмцвэл, удахгүй үүсээд буй цар тахлыг зогсоож чадна гэдэгт итгэлтэй байна.