Month: December 2020

Нийслэлд жилд дунджаар 26 мянга гаруй иргэн цусаа хандивладаг ч энэ тоо хөл хорионы үед багасчээ.

Цус сэлбэлт судлалын үндэсний төвийн мэдээлснээр цус цуглуулалт 50 хувиар буурсан байна. Тодруулбал, 2019 оны арванхоёрдугаар сард цуглуулсан цусны нөөцийг энэ оны мөн үетэй харьцуулахад 50 хувиар буурсан аж. Ялангуяа цус алдалт хавдрын эмчилгээ зэрэг олон тохиолдолд хэрэглэдэг ялтаст эсийн бүтээгдэхүүн үйлдвэрлэхэд цаашид хүндрэл учирч болзошгүй байгаа аж. Цус сэлбэлт судлалын үндэсний төв одоогоор сийвэнгийн бүтээгдэхүүний нэг жилийн нөөцтэй байгаа бол улаан эсийн 10 хоногийн нөөцтэй байгаа аж.

Харин цусны нөөц буурч байгаа нь цусан бүтээгдэхүүнийг тогтмол хангахад хөл хорионоос үүдэн тодорхой хэмжээний эрсдэл үүсээд байгаа юм байна. Иймд доноруудыг цусаа хандивлахыг уриалжээ. Учир нь цусаа өгөх иргэд багасч, цус цуглуулалт буурсан бол эсрэгээрээ эмнэлгүүдийн цус цусан бүтээгдэхүүний хэрэглээ буураагүй гэнэ. Иймд тус төвөөс шаардлагатай цусан бүтээгдэхүүнийг хангахын тулд доноруудад урилга илгээх ажлыг зохион байгуулж байгаа аж. Хэрэв тус төвөөс уриалга хүлээн авсан бол тухайн урилгаа үзүүлэн зорчиж цусаа бэлэглэх боломжтой аж.

Соёлын сайд С.Чулууныг Монгол Улсын их сургуулийн Удирдах зөвлөлөөс чөлөөлжээ. МУИС-ийн Түүхийн тэнхимийн багш нар нэгдэн 2019 онд С.Чулууныг тус сургуулийн Удирдах зөвлөлөөс гаргах шаардлага хүргүүлж байжээ. Түүнчлэн энэ онд ахин шаардлага хүргүүлэхээр зэхэж байсан тухайгаа мэдээлэв.

Харин өнөөдөр буюу арванхоёрдугаар сарын 29-нд МУИС-ийн Удирдах зөвлөлийг шинэчлэн байгуулснаа зарласан бөгөөд Соёлын сайд С.Чулууныг зөвлөлөөс хассан аж.

МУИС-ийн Удирдах зөвлөлийн төрийн төлөөллийн нэрс:

1. С.Наранцогт, СЯ
2. Б.Ганбат, ЗГХЭГ
3. Л.Өлзийсайхан, УИХ ТГ
4. Л.Баасандорж, ХЗЯ
5. Ганбаатар БШУЯ
6. С.Мөнхбат БШУЯ
7. Г.Чулуунбаатар ШУА
8. Г.Батнэмэх БШУЯ
9. Ш.Одонбаатар ГХЯ

Улсын хэмжээнд өнгөрөгч долоо хоногт буюу энэ сарын 21-27-ны өдрүүдэд нийслэлийн 8 дүүрэг, 11 аймгийн 17 суманд нийт 215 удаагийн аюулт үзэгдэл, ослын дуудлага бүртгэгдсэн байна.

Үүний

биологийн гаралтай аюулт үзэгдэл-160

гал түймэр-45

хүний үйл ажиллагаатай холбоотой осол-8

геологийн гаралтай аюулт үзэгдэл-2 байна.

Аюулт үзэгдэл, ослын улмаас нас барсан, гэмтсэн бэртсэн тохиолдол бүртгэгдээгүй гэж Онцгой байдлын ерөнхий газраас мэдээллээ.

Нийслэлийн суурьшлын бүсэд 2020 оны арваннэгдүгээр сарын 29-ний өдөр олон тооны цагаан зээр орж ирсэн тухай бид мэдээлсэн.

Байгаль орчны газраас шинэ нисэх буудлын хурдны зам болон орон нутгийн авто замд хашигдан үлдсэн цагаан зээрийн сүргийг эх сүрэгт нийлүүлж, 400-500 орчим тоо толгойг нь ХУД-ийн 12,13,14-р хороодын нутаг дэвсгэрт түр хугацаагаар хамгаалалтад аваад байсан юм.

Түүнчлэн зээрийн сүрэг авто машин болон хүнээс үргэх явцдаа олон хэсэг хуваагдах, төмөр торон хашаанд сүлбэгдэх зэрэг эрсдэлүүд тулгарч энэ сарын 24-нд мэргэжилтнүүд, байгаль хамгаалагчид хамгаалалтад байсан 300 гаруй цагаан зээрийг суурьшлын бүсээс гаргажээ.

Хотын суурьшлын бүсийн тэлэлт, өвөлжилт хүндэрсэнтэй холбоотойгоор зэрлэг амьтдын хоол тэжээлийн хомстол үүсэж суурьшлын бүс рүү орж ирэх өндөр эрсдэлтэй тул зэрлэг амьтан чөлөөтэй нүүдэллэх боломжийг бүрдүүлэх зорилгоор Байгаль орчны газраас “Нийслэл хотыг ирэх 5 жилд хөгжүүлэх үндсэн чиглэл”-д Зэрлэг амьтны экологийн гарцыг 7 байршилд байгуулахаар тусгажээ.

Зээрийн сүргийг хамгаалах шаардлагатай арга хэмжээг Байгаль орчны газар, БОАЖЯ, Богдхан уулын дархан цаазат газрын хамгаалалтын захиргаа, “Амьтны эрх хамгаалах” ТББ болон судлаачдын зохион байгуулан, авто замын тэмдэг тэмдэглэгээ байршуулах, эргүүл шалгалтыг тогтмол явуулах, зэрлэгшсэн нохдыг устгах зэрэг ажлыг шат дараатай хэрэгжүүлэх шийдвэр гаргасан.

Банкууд орон сууцны ипотекийн зээлийн эргэн төлөлтийг хойшлуулах хүсэлтийг 11 дүгээр сараас цахимаар авч байгаа.

Энэ сарын 25-ны байдлаар нийт 3.2 их наяд төгрөгийн 58,328 хүсэлт ирснээс 57,456-г нь буюу 99 хувийг нь шийдвэрлэж, эргэн төлөлтийг хойшлуулжээ. Ингэснээр зээл авсан өрх бүрт дунджаар нийт 7.7 сая төгрөгийн зээлийн төлбөрийн зардал хэмнэж, энэ хэрээр иргэдийн амьжиргаа, худалдан авалтад эерэгээр нөлөөлж байгааг Монголбанк мэдээллээ.

Монголбанк, банкуудын эх үүсвэрээр энэ оны эхний 9 сарын хугацаанд 8 хувийн хүүтэй ипотекийн зээлд 290 тэрбум төгрөгийг 4.0 мянган зээлдэгчид олгов.

Иргэдийн зээлийн төлбөрийн дарамтыг бууруулахаар өнгөрсөн 10 дугаар сарын 1-нээс зээлийн хүүг жилийн 6 хувь болгон бууруулж, 120 тэрбум төгрөгийн зээлийг 1.8 мянган зээлдэгчид олголоо. Ингэснээр энэ онд нийт 410 орчим тэрбум төгрөгийн зээлийг 5.8 мянган өрхөд олгожээ.

Мөн эрсдэл бүхий нөхцөлд үүрэг гүйцэтгэж байгаа төрийн жинхэнэ болон үйлчилгээний албан хаагчдад зориулсан түрээслээд өмчлөх хэлбэртэй ипотекийн зээлийн хөтөлбөрийг талуудтай хамтран зохион байгуулж, цар тахлын халдварын голомтод ажиллаж буй 1050 төрийн албан хаагчийг түрээслээд өмчлөх хэлбэрээр орон сууцтай болох боломж бүрдүүллээ.

Монгол Улсын хэмжээнд Коронавируст халдвар төмөр замын албан хаагчдаас дамжин тархах эрсдэл үүссэнтэй холбогдуулан энэ оны 11 дүгээр сарын 17-оос 18-ны өдрүүдэд Дорноговь аймгийн Замын-Үүд, Айраг сумуудаас төмөр замын албан хаагчдад түргэвчилсэн тест болон PCR шинжилгээ хийхэд 14 хүний хариу эерэг гарч батлагдсан. Халдварын голомтыг хязгаарлах, хариу арга хэмжээг шуурхай хэрэгжүүлэх зорилгоор ЭМЯ, УОК-оос хоёр баг томилон ажиллууллаа.

Эрүүл мэндийн сайдын А/539 тоот тушаалаар “Шуурхай Удирдлагын Нэгж”-ээс талбарын тархвар судлаач Г.Болдмаа, Б. Чинчулуун, ХӨСҮТ-ийн Сүрьеэгийн тандалт судалгааны албаны лабораторийн эмч Э. Баасансүрэн нар Дорноговь аймгийн голомтод ажиллахаар томилогдсон.

ЭМЯ-аас ХӨСҮТ, ЗӨСҮТ-ийн талбарын тархвар судлаач 3, лабораторийн эмч 2, явуулын лаборатори ажиллуулж, мэргэжил арга зүйн зөвлөгөө дэмжлэг тогтмол өгч хамтран ажиллаа.

Дорноговь аймгийн Замын-Үүд, Айраг сумуудаас 11 дүгээр сарын 18-ны өдрөөс 12 дугаар сарын 18-ны өдрийг хүртэлх хугацаанд PCR шинжилгээгээр халдвар авсан нь батлагдсан нийт 32 тохиолдлыг тусгаарлан ХӨСҮТ-д хүргүүлсэн. Эдгээр тохиолдлууд нь Дархан-Уул аймагт 2020 оны 11 сарын 6-ны өдөр зохион байгуулагдсан төмөр замын ажилчдын “Нэгдсэн ээлжийн зохион байгуулалт ур чадвар-2020” тэмцээнд оролцож халдвар авсан Замын-Үүд сумын нэг, Айраг сумын хоёр ажилтан болон түүний ойрын хавьтлуудын дунд бүртгэгдсэн.

Дорноговь аймгаас Замын-Үүд, Айраг сумуудад бүх нийтийн хөл хориог тогтоож, Сумын цагдаагийн хэлтэс, Хилийн 0108 дугаар анги, Онцгой байдлын хэлтсийн албан хаагчдыг томилон хөдөлгөөнд хязгаарлалт тавьж ажиллажээ. Батлагдсан тохиолдлуудын ойрын хавьтлын 470, дам хавьтлын 1459 хүнийг тандалтын багийн тархвар судлаачид сум дундын цагдаагийн хэлтэс болон тагнуулын газартай хамтран илрүүлсэн. Ойрын болон хоёрдогч хавьтлуудыг гэрээр болон эмнэлэгт тусгаарлаж шуурхай хариу арга хэмжээг авсан. Харин төмөр замын зангилааны болон гаалийн байгууллага, хилийн цэргийн алба, мэргэжлийн хяналтын хэлтсийн ажилтнуудыг ажлын байран дээр тусгаарлажээ. Мөн Замын-Үүд сумын нэгдсэн эмнэлэгт молекул биологийн лабораторийг шинээр нээж, PCR шинжилгээний аппаратыг 11 дүгээр сарын 22-ны өдөр суурилуулан, орон нутгийн эмч, лаборантуудыг сурган, дадлагажуулж, сорьц шинжлэх ажлыг 24 цагийн хугацаанд тасралтгүй явуулж байна.

Аймгийн хэмжээнд өдөр бүр лабораторийн 15-20 цэгт 30-38 эмч мэргэжилтэн ажиллаж, нийтдээ 24532 хүнийг / түргэвчилсэн болон PCR/ шинжилгээнд хамруулсан нь аймгийн нийт хүн амын 35 хувь, Замын үүдийн хүн амын 61,3 хувь, Айраг сумын хүн амын 55,4 хувь, Сайншанд сумын хүн амын 27.3 хувийг тус тус хамруулсан байна. Нийт давхардсан тоогоор 47836 шинжилгээ хийсний 29252 нь PCR, 18584 нь түргэвчилсэн шинжилгээ байв.
Айраг суманд коронавируст халдварын шинэ тохиолдол 2020 оны 11 дүгээр сарын 27-ны өдрөөс хойш бүртгэгдээгүй 32 хоног харин Замын-Үүд суманд коронавируст халдварын шинэ тохиолдол сүүлийн 14 хоног бүртгэгдээгүй байна.