Month: August 2020

Фронт” хэмээн алдаршсан С.Цэгмидэд Монгол Улсын гавьяат малчин цол хүртээв

Монгол Улсын Ерөнхийлөгч Халтмаагийн Баттулга 2020 оны наймдугаар сарын 10-ны өдөр Дундговь аймагт ажиллаж, шинэ зам болон бусад бүтээн байгуулалтын ажлын явцтай танилцав. Энэ үеэрээ Монгол Улсын гавьяат цол хүртээж, “Эхийн алдар” одон гардууллаа.

Энэ жил Дундговь аймгаас нийт 161 ээжид, үүнээс Нэгдүгээр зэргийн одонг найм, Хоёрдугаар зэргийн одонг 153 ээжид хүртээж байгаа юм.

Монгол Улсын Ерөнхийлөгч Халтмаагийн Баттулга шагнал гардуулсныхаа дараа алдарт ээжүүдэд хандан үг хэлэхдээ, “Хүүхдээ эрүүл саруул өсгөн бойжуулна гэдэг бол үндэстнийхээ өмнө байгуулж байгаа эрхэм гавьяа, улсынхаа хөгжилд оруулж байгаа томоохон хөрөнгө оруулалт” болохыг онцоллоо. Мөн тэрбээр Монголын иргэдийг эрүүл саруул, цовоо цолгин, аз жаргалтай өсгөн бойжуулж байгаа ээжүүдэд халуун талархал илэрхийлж, баяр хүргэв.

Мөн энэ үеэр Дундговь аймгийн Сайхан-Овоо сумын харъяат, “Фронт” хэмээн алдаршсан С.Цэгмидэд Монгол Улсын гавьяат малчин цол хүртээлээ.

Монгол Улсын Ерөнхийлөгч Халтмаагийн Баттулга баяр хүргэж үг хэлэхдээ, “Өнөөдөр одонгоо гардаж байгаа олон эхчүүдийн хамт нэгэн буянтай бууралд Монгол Улсын гавьяат малчин цол, тэмдгийг гардууллаа. Энэ хүн бол Дундговь аймгийн Сайхан-Овоо сумын харьяат “Фронт” хэмээн алдаршсан Сүрэнхорын Цэгмид гуай юм. Тэрбээр 1942 оны 12 дугаар сард 19-хөн настайдаа Зөвлөлтийн улаан армид бэлэг хүргэх төлөөлөгчдийн бүрэлдэхүүнд орж, Свердловск орчмын фронтын тэргүүн шугам дээр очиж байсан юм. Монгол Улсаас илгээсэн бэлгийн гурав дахь цуваагаар 217 вагон бүхий дээл хувцас, арьс нэхий, мах, хүнсний зүйлс хүргэж, мөн ард түмний хөрөнгөөр боссон 40 танкийг чин сэтгэлийн дэмжлэг болгон хүлээлгэн өгч байжээ.

С.Цэгмид гуайг сар гаруйн өмнөхөн Оросын Холбооны Улсын Ерөнхийлөгчийн зарлигаар Аугаа Эх орны дайны ялалтын 75 жилийн ойн медалиар шагнасан. Үйлс буян нь дэлгэрсэн бууралдаа зуу насалж, зургаадай таяг тулахын ерөөлийг дэвшүүлье” гэлээ.

Монгол Улсын Үндсэн хуулийн 33 дугаар зүйлийн 1 дэх хэсгийн 7 дахь заалт, Монгол Улсын Ерөнхийлөгчийн тухай хуулийн 15 дугаар зүйлийн 1 дэх хэсэгт заасны дагуу олон хүүхэд төрүүлж, өсгөн хүмүүжүүлсэн эхчүүдэд “Эхийн алдар” одон гардуулах тухай Монгол Улсын Ерөнхийлөгчийн зарлиг 2020 оны тавдугаар сарын 29-ний өдөр гарсан.

“Эхийн алдар” одонг жил бүрийн Олон улсын хүүхдийн эрхийг хамгаалах өдрөөр буюу зургадугаар сарын нэгний өдөр гардуулдаг уламжлалтай боловч дэлхий даяар тарсан коронавируст цар тахлын нөхцөл байдлыг харгалзан үзэж, энэ жил одон гардуулах үйл ажиллагааг хойшлуулаад байсан билээ.

Энэ жил “Эхийн алдар” одонг улсын хэмжээнд 10,677, үүнээс Нэгдүгээр зэргийн одонг 720, Хоёрдугаар зэргийн одонг 9,957 ээжид хүртээх бөгөөд “Өндөржүүлсэн бэлэн байдлын зэрэг”-т шилжүүлсэнтэй холбогдуулан Монгол Улсын Ерөнхийлөгч Халтмаагийн Баттулга засаг, захиргааны нэгжийн түвшинд үе шаттайгаар гардуулахаар болсон юм.

УИХ-ын дарга Г.Занданшатар АНУ-аас Монгол Улсад суугаа элчин сайд М.Клеческийг өчигдөр хүлээн авч уулзав.

Уулзалтын эхэнд элчин сайд М.Клечески УИХ-ын даргаар дахин сонгогдож, ажлаа үргэлжлүүлэх болсонд баяр хүргэлээ. УИХ-ын дарга Г.Занданшатар дахин уулзаж байгаадаа баяртай байгаагаа илэрхийлж Монгол Улс, АНУ-ын харилцаа, хамтын ажиллагаа “Стратегийн түншлэл”-ийн хүрээнд COVID-19 цар тахлаас үл хамааран идэвхтэй өрнөж байгааг тэмдэглэсэн юм. Тэрбээр, “АНУ-ын Олон улсын хөгжлийн хамтын ажиллагааны агентлаг (USAID) манай улсад ажлаа сэргээж, Улаанбаатар дахь ЭСЯ-нд USAID-ийн төлөөлөгч дахин томилогдсонд баяртай байна. Тус байгууллага нь манай улсыг шилжилтийн үеэс нь эхлэн тууштай дэмжиж ирсэнд Монголын төр засаг, ард түмэн талархалтай байдаг” хэмээлээ.

Мөн УИХ-ын дарга Г.Занданшатар өнгөрсөн сард Говийн аймагт өрнөж буй үндэсний төмөр зам бүтээн байгуулах ажилтай танилцаад ирсэн талаар болон уг төслийн үр ашгийн талаар мэдээлж, санал солилцов. АНУ-аас Монгол Улсад суугаа Элчин сайд М.Клечески гуравдагч хөршийн хувьд экспортыг нэмэгдүүлэх энэхүү томоохон бүтээн байгуулалтыг олон талаар дэмжин хичээж ажиллахаа амлав. Тэрээр, зэс хайлуулах үйлдвэр барих, ногоон хүлэмж байгуулах зэрэг том төсөлд хамтран ажиллахаа илэрхийлсэн юм. Үүнээс гадна АНУ-ын Засгийн газар нь иргэний нийгэм, улс төрийн үйл явц дахь залуус, эмэгтэйчүүдийн үүрэг оролцоог бэхжүүлэх “Залуучууд, эмэгтэйчүүдийн сонгууль, улс төрийн оролцоог идэвхжүүлэх нь” хөтөлбөр албан ёсоор хэрэгжиж эхэлсэн талаар дурдлаа. Энэ үеэр УИХ-ын дарга Г.Занданшатар улс төр дахь эмэгтэйчүүдийн оролцоо жил бүр нэмэгдэж буйг онцолсон юм.

УИХ-ын ээлжит бус чуулган наймдугаар сарын 17-ноос хуралдаж төсвийн тодотгол болон Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулгын төслийг хэлэлцэхээр төлөвлөсөн гэдгийг УИХ-ын дарга Г.Занданшатар тэмдэглээд, нутгийн удирдлагын тогтолцооны асуудлаар санал солилцсон юм. Үүнтэй холбоотой хэрэгжүүлэх төсөл хөтөлбөрт дэмжин ажиллахыг хүсэв. Уулзалтын үеэр байлцсан УИХ-ын гишүүн, Аюулгүй байдал, гадаад бодлогын байнгын хорооны дарга Б.Баттөмөр, Монгол Улсын найм дахь удаагийн парламент банк санхүүгийн салбарт реформ хийх зорилттой ажиллаж буйг онцлов. У

Манай улс коронавирусийн тархалттай холбоотойгоор өнгөрсөн хугацаанд 17211 иргэнийг татан аваад байгаа талаар Улсын Онцгой Комиссын Шуурхай Штабаас мэдээллээ. Тухайлбал БНСУ-руу олон удаагийн нислэг үйлдсэнээр 3000 орчим, АНУ-аас 900 орчим, Европоос 1200 орчим, Зүүн өмнөд Азиас 500 орчим иргэдийг татаж авсан.

Түүнчлэн БНХАУ-аас нутаг буцах хүсэлтээ илэрхийлсэн манай улсын 160 иргэн байна. Тэдгээр иргэнийг ойрын хугацаанд Замын-Үүдийн боомтоор эх оронд нь авчрах ажлыг зохион байгуулна.

Урьдчилсан байдлаар БНХАУ-ын өгсөн зөвшөөрлөөр, наймдугаар сарын 18-ны өдөр Замын-Үүд боомтоор тэдгээр иргэнээ татан авахаар төлөвлөж байна.

Мөн Гадаад харилцааны яам Истанбул дахь Ерөнхий консулын газраараа дамжуулан Турк улсад гацсан, санхүүгийн хүнд байдалд ороод буй зарим иргэдэд тусламж үзүүлэх ажлыг Олон улсын шилжилт хөдөлгөөний байгууллагын Истанбул дахь салбартай хамтран ойрын хугацаанд хэрэгжүүлэхээр төлөвлөж байгаа гэдгийг мэдээллээ.

Төв аймгийн Засаг даргын А/286 тоот захирамжаар 05 дугаар сарын 12-ноос эхлэн аймгийн хэмжээнд гоц халдварт шүлхий өвчнөөс урьдчилан сэргийлэх хаврын төлөвлөгөөт дархлаажуулалтыг эхлүүлж 95.9 хувьтай гүйцэтгэлтэй байгааг аймгийн“Мал эмнэлэг”-ийн газраас мэдээллээ.

Тус дархлаажуулалтад аймгийн хэмжээнд нийт2515 айл өрхийн 579734 мал хамруулсан байна. Ийнхүү Баян, Мөнгөнморьт, Эрдэнэ, Баяндэлгэр, Зуунмод, Баянжаргалан, АрхустБорнуур, Батсүмбэр, Баянчандмань,Баянцогт, Аргалантсумдад, гоц халдварт шүлхий өвчнөөс урьдчилан сэргийлэх хаврын төлөвлөгөөт дархлаажуулалтыг эхлүүлж өнөөдрийн байдлаарнийт 27 сумын хэмжээнд шүлхий өвчний дархлаажуулалтыг хийж гүйцэтгэсэн аж.

Б.ОЮУНДАРЬ

Наймдугаар сарын 8-нд Өвөрхангай аймгийн Бат-Өлзий сумын 4-р багийн нутаг дэвсгэр “Улаан эрэг” гэх газарт автомашины дэргэд тоглож байсан 2 настай хүүхдийг жолоочхараагүйн улмаас автомашины хөдөлгөөн эхлэх үед портер маркийнавтомашинаар дайрч амь насанд нь хүрсэн хэрэг гарлаа.

Эцэг эх, асран хамгаалагч хуулиар хүлээсэн асран хамгаалах үүргээ биелүүлээгүйн улмаас бага насны хүүхэд амь нас эрүүл мэндээрээ хохирох явдал улсын хэмжээнд өндөр үзүүлэлттэй байгааг холбогдох албаныхан хэлж байна.

Д.СУВД-ЭРДЭНЭ

Цагдаагийн байгууллагад өчигдөр буюу наймдугаар сарын 10-нд нийт 1482 дуудлага мэдээлэл бүртгэгджээ. Үүнд нийслэлийн 1254, орон нутгийн 228 дуудлага байна.

Гэмт хэргийн 64, зөрчлийн 608, зам тээврийн ослын 209, бусад 601 дуудлага мэдээлэл иржээ.Гэмт хэргийн 64 дуудлага мэдээлэл дунд онцолбол хүн амины гэмт хэрэг 1 бүртгэгдсэн байна. Хэргийг тодруулбал СХД-ийн нутаг дэвсгэрт иргэд архидан согтуурч хувийн таарамжгүй харилцааны улмаас 34 настай эрэгтэй М амь насаа алдсан байна.

Хэргийг Сонгинохайрхан дүүргийн цагдаагийн гуравдугаар хэлтэст шалгаж, мөрдөн шалгах ажиллагааг үргэлжлүүлж байна.

А.МӨНХНАРАН

Прага-Улаанбаатар чиглэлийн тусгай үүргийн онгоц өнөөдөр өглөөний 06:06 цагт Буянт-Ухаа олон улсын нисэх онгоцны буудалд газардлаа.

Чех Улсын Засгийн газар, Олон улсын шилжилт хөдөлгөөний байгууллагын дэмжлэгтэйгээр хийгдэж байгаа энэ нислэгээр 250 иргэн эх орондоо ирж байгаа юм. Иргэдийг учир шалтгаанаар нь ангилан үзвэл, Олон улсын шилжилт хөдөлгөөний байгууллагын шугамаар 192 иргэн, Чех, Унгар, Австри, Польш улсуудаас бага насны хүүхэдтэй гэр бүл-21, эрүүл мэндийн шалтгаантай-3, ахмад настан-4, хүндэтгэн үзэх шалтгаантай 32 иргэн ирж байгаа юм.

Тус онгоцоор ирсэн иргэдийг “Наранбулаг”, “Майсон”, “Холидей”, “Хавана” зочид буудлууд, “Багабаян” энхийн төлөө цогцолбор, “Синдүра-Мед” эмнэлэгт тусгаарлана гэж УОК-ын Шуурхай штабаас мэдээллэж байна.

Д.СУВД-ЭРДЭНЭ

УИХ-ын ээлжит бус чуулганыг наймдугаар сарын 17-нд эхлүүлэхээр товложээ.

Чуулганаар Засгийн газрын 2024 он хүртэлх төлөвлөгөө, мөрийн хөтөлбөр, тэдгээрийн хэрэгжилтийг хэлэлцэхээс гадна 2020 оны улсын төсөвт тодотгол хийхээр хүлээгдэж байна.

Мөн ээлжит бус чуулганаар Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулгын төслийг хэлэлцэхээр болсныг УИХ-ын дарга Г.Занданшатар Дэлхийн банкны суурин төлөөлөгчтэй уулзах үеэрээ хэлжээ.

А.МӨНХНАРАН