Month: August 2020

Энэ жил буюу 2020-2021 оны хичээлийн жилд 310 мянга орчим хүүхэд цэцэрлэгт хамрагдахаар байсан ч хоёр настнуудыг буюу 77 мянга гаруйг нь цэцэрлэгт хамруулахгүй. Мөн гурав болон дөрвөн настнуудын 60 хувь, таван настнуудыг 100 хувь цэцэрлэгт хамруулахаар болсон.

Цэцэрлэгийн хүрэлцээнээс шалтгаалаад өнгөрсөн жил цэцэрлэгийн насны хүүхдийн 84.2 хувийг цэцэрлэгт хамруулж байжээ. Харин энэ жил хүртээмжийг нэмэгдүүлэх зорилгоор цэцэрлэгийн сул орон тоог ашиглан 5087 хүүхдийг төрийн өмчийн цэцэрлэгийн зардлаар хамруулах мөн анги танхимын хүрэлцээгүй цэцэрлэгийн ойролцоох барилгуудыг түрээсэлж, цэцэрлэгийн зориулалтаар ашиглах юм байна.

Covid–тэй холбоотойгоор цэцэрлэгийн орчинд дараах журмыг мөрдөх юм.

• Нэг бүлэгт 20-25 хүүхэд байна
• Цэцэрлэгүүд ажлын тав хоног ажиллана.
• Эцэг эхчүүд олон нийтийн газраар хүүхдээ дагуулж явахгүй байх
• Гэр цэцэрлэгийн хооронд амны хаалт байнга хэрэглэх.
• Цэцэрлэгийн анги танхимд хүүхдүүд амны хаалт хэрэглэхгүй.
• Анги руу ороход нь халууныг нь хэмжиж, гарыг нь ариутгана.
• Цэцэрлэгийн хүүхдийн ариун цэврийн болон хичээлийн хэрэглэгдэхүүнийг эхний гурван сарынхаар бэлтгэнэ.

Нийслэлийн Засаг даргын орлогч, Зам тээврийн асуудал хариуцсан төслүүдийн удирдагч Б.Отгонсүх сургууль орчмын хөдөлгөөний аюулгүй байдлыг хангах ажлуудын талаар мэдээлэл өгчээ.

Тэрбээр, Нийслэлээс хүүхдийн замын хөдөлгөөний аюулгүй байдлыг хангах ажлын хүрээнд ерөнхий боловсролын сургууль, цэцэрлэг орчмын тэмдэг, тэмдэглэгээ, гарцын гэрэлтүүлгийг хийж дуусаад байна. Үүнд нийт 78 байршилд 100 ширхэг лед гэрэл гарцын босоо гэрэлтүүлгийг байршуулж, 4 байршилд хурд сааруулагч, 100 ширхэг лайт бокс буюу поспортдог тэмдэг, 1400 ширхэг зам дээрх цацруулагчийг хийж дуусаад байна. Хүүхдүүд оройн цагаар ч гарцаараа аюулгүй гарах нөхцөлийг бүрдүүлэхийн төлөө энэхүү гарцын гэрэлтүүлгийг суулгаж өгсөн юм. Нийслэлээс сургууль, цэцэрлэгийн орчмын аюулгүй байдлыг хангах тал дээр анхаарч ажиллаж байна. Тиймээс стандартын шаардлага хангасан тэмдэг, тэмдэглэгээг шинээр тавьж, зарим тэмдэгийг шинэчлэх ажлууд хийгдэж байна. Мөн судалгаа хийж жолооч нар хурд хэтрүүлдэг байршлуудад хурд сааруулагч тавьж байна. Тиймээс хүүхдүүд харанхуй оройн цагаар гарцаа хайж явалгүй гарцаараа аюулгүй гардаг, замын хөдөлгөөнд болгоомжтой ордог байх нь чухал. Энэ хүрээнд сургуулийн багш, нийгмийн ажилтан, эцэг эхчүүд тайвшралгүй хүүхдүүддээ тавих анхаарлаа нэмэгдүүлж, хүүхэдтэйгээ явах үедээ явган хүний гарцаараа гарч хэвшихийг уриалж байна. Ингэснээрээ та хүүхэддээ зөв үлгэр дууриалал үзүүлж, хүүхдийнхээ аюулгүй байдлыг хангах юм шүү.

Нийслэлийн Баянгол дүүргийн 14 хороонд “Найрамдал” бичил цэцэрлэгт хүрээлэн байгуулахаар болжээ. Уг цэцэрлэгт хүрээлэнд нийслэлийн төсвийн хөрөнгөөс 120 сая төгрөг зарцуулах аж. Тус цэцэрлэгт хүрээлэнг гуравдугаар хороолол ашиглалтад орсны 40 жилийн ойн хүрээнд иргэдийн санал хүсэлтийн дагуу байгуулахаар болсон юм.

Хотын дарга өчигдөр /2020.08.21/ Баянгол дүүргийн гуравдугаар хороолол 14 дүгээр хороо “Ачлал” их дэлгүүрийн арын нийтийн эзэмшлийн талбайд ажиллаж уг цэцэрлэгт хүрээлэнгийн газрын асуудлыг шийдвэрлэлээ. Удахгүй цэцэрлэгт хүрээлэнгийн тохижилтын ажил эхлэх аж.

УИХ-ын 2016 оны сонгуульд Сонгинохайрхан дүүргээс сонгогдсон УИХ-ын гишүүн П.Анужин өнөөдөр /2020.08.22/ Монгол Улсын Ерөнхийлөгч Х.Баттулгаас Эхийн алдар одонгоо гардан авлаа.

УИХ-ын гишүүн П.Анужин нь Эхийн алдар нэгдүгээр одонгоо 2014 онд авч байсан бөгөөд өнөөдөр ийнхүү Эхийн алдар 2 дугаар одонгоо гардаж байгаа нь энэ аж.

Чингэлтэй дүүрэгт үйл ажиллагаа явуулж буй ресторан, хоолны газрууд хүнсний органик хаягдлаа хэрхэн ангилж, хэрхэн тээвэрлэх талаар сургалтад хамрагджээ. Улмаар наймдугаао сарын 20-ноос эхлэн ангилсан хүнсний хаягдлыг тээвэрлэн компост бордоо хийх талбайд хүрдэг болсон байна.

Түүчлэн тээвэрлэх ажлыг “Чингэлтэй” тохижилт үйлчилгээний компани хариуцан ажиллаж байгаа аж.

Улаанбаатар хотын хог хаягдлын менежментийг сайжруулах зорилтын хүрээнд хоол, хүнсний үйлдвэр үйлчилгээний байгууллагуудын хүнсний органик хаягдлыг ангилан ялган компост бордоо хийж, ногоон байгууламжийн хөрсний үржил шимийг сайжруулах, нийслэл орчмын доройтсон хөрсийг нөхөн сэргээхэд ашиглахаар ажиллаж байгаа юм байна.

Монгол Улсын Ерөнхийлөгчийн зарлигаар өнөөдөр /2020.08.22/ Сонгинохайрхан дүүргийн ээжүүдэд “Эхийн алдар” одон гардуулах ажиллагаа болно. Сонгинохайрхан дүүрэг нь нийслэлийн бусад дүүргүүдээс хамгийн олон хүн амтай бөгөөд нийт 1071 ээжид Эхийн алдар одон гардуулах юм.

Дэлхийн нийтээр коронавирусийн цар тахлын улмаас Эхийн алдар одонг гардуулахгүй хойшлуулаад байсан бөгөөд өнгөрсөн долоо хоногт Ерөнхийлөгч Баянзүрх дүүргийн ээжүүдэд Эхийн алдар одонг гардуулсан юм.

Бүртгэгдсэн гэмт хэрэг өмнөх оны мөн үеэс 4,507-оор буюу 22.1%-аар буурсан болохыг Үндэсний статистикийн хорооноос танилцууллаа.

Тодруулбал, энэ оны эхний долоон сарын байдлаар бүртгэгдсэн гэмт хэрэг 15.9 мянга болж, өмнөх оны мөн үеэс 4.5 (22.1%)-мянгаар буурсан байна. Харин долдугаар сарын тухайд 2.3 мянга болж, өмнөх сараас 225 буюу 9%-аар буурчээ.

Мөн 16, түүнээс дээш насны 10,000 хүнд ногдох гэмт хэрэг улсын дунджаар 2020 оны эхний долоон сард 75 болж, өмнөх оны мөн үеэс 20 (21.1%)-иор буурсан ажээ.

Түүнчлэн гэмт хэргийн улмаас учирсан хохирол энэ оны эхний долоон сард 94.1 тэрбум төгрөг, нөхөн төлүүлсэн хохирлын хэмжээ 23.1 тэрбум төгрөг болж, өмнөх оны мөн үеэс учирсан хохирол 36.8 (28.1%) тэрбум төгрөгөөр, нөхөн төлүүлсэн хохирол 4.2 (15.6%) тэрбум төгрөгөөр тус тус буурсныг мэдээлэв.

ХӨСҮТ-ийн Тандалт судалгааны албаны дарга А.Амбасэлмаа “Өчигдөр ХӨСҮТ, Дарханд нийт 546 хүнд шинжилгээ хийхэд бүгдэд нь коронавирус илрээгүй. Мөн 21, 22, 26, 31(2) настай гээд нийт 5 энхийг сахиулагч эдгэрч дараагийн шатны хяналт руу шилжлээ. Монгол улсад зөөвөрлөгдөн орж ирсэн коронавирусийн нийт 298 тохиолдол бүртгэгдсэнээс 288 нь буюу нийт халдвар авагсдын 96,16 хувь нь эдгэрсэн.