Month: August 2020

Categories
мэдээ улс-төр

Төсвийн зарим тусгай шаардлагын үйлчлэлийг түр түдгэлзүүлэх тухай хуулийн төслийн анхны хэлэлцүүлгийг хийлээ

Улсын Их Хурлын Төсвийн байнгын хорооны өнөөдрийн (2020.08.25) хуралдаан гишүүдийн 57.9 хувийн ирцтэйгээр 11 цаг 27 минутад эхэлж, гурван асуудал хэлэлцэв.

Хуралдаанаар эхлээд “Монгол Улсын Засгийн газрын 2020-2024 оны үйл ажиллагааны хөтөлбөр батлах тухай” Улсын Их Хурлын тогтоолын төслийн анхны хэлэлцүүлгийг хийлээ. Төслийн анхны хэлэлцүүлэгтэй холбогдуулан асуулт асууж, тодруулга хийх шаардлагагүй хэмээн хуралдаанд оролцсон гишүүд үзсэн. Улсын Их Хурлын гишүүн Ц.Даваасүрэн, хөтөлбөрийн төсөлд хүний хөгжлийн асуудал, бүх нийтийн боловсролын чанарыг сайжруулах, боловсролын үнэлэмжийн бүх шатандаа дээшлүүлэхтэй холбоотой асуудлыг ерөнхийлөн тусгасан хэмээн шүүмжиллээ. Олон улсын түвшинд бэлтгэгдсэн өндөр боловсролтой, чадварлаг боловсон хүчнээ улс орны хөгжилд оролцуулж чадахгүй байгааг дурдав. Мөн тодорхой чиглэлд экспортыг нэмэгдүүлэх зорилт дэвшүүлэхдээ үүнээс үүдэн дотоод зах зээл үзүүлэх нөлөөллийг зохицуулах арга хэмжээг давхар тооцох шаардлагатай байдгийг сануулсан. Хөтөлбөрийн төсөл дэх арга хэмжээнд малын эрүүл мэндийн асуудлаар дэвшилт гаргах зорилт, арга хэмжээг тусгасан хэмээн үнэлж байгаагаа мөн тэрбээр хэлж байлаа.

Хүнс, хөдөө аж ахуй, хөнгөн үйлдвэрийн яам дээрх хөтөлбөрийн төсөлд 8 зорилтын хүрээнд 38 арга хэмжээ хэрэгжүүлэхээр тусгасан гэдгийг салбарын сайд З.Мэндсайхан хэллээ. Махны экспортын хувьд нэн тэргүүнд боломжоо тооцоолж, 25-26 сая толгой малыг эргэлтэд оруулах бөгөөд дотоодын хэрэгцээнд 12-14 сая толгой малыг хэрэглэх тооцоо хийсэн байна. Үлдсэн хэмжээгээр экспорт хийх бололцоо бий ч дотоодын хэрэглээг зохицуулахын тулд урамшууллын тогтолцоог хийх Ц.Даваасүрэн гишүүний саналыг дэмжиж байгаагаа Хүнс, хөдөө аж ахуй, хөнгөн үйлдвэрийн сайд хэлсэн. Сангийн яамтай энэ чиглэлээр зөвшилцөж, бүртгэлийн системтэй уялдуулж урамшууллын системээ боловсронгуй болгох асуудлыг ярилцсан гэв.

Улсын Их Хурлын гишүүн Д.Тогтохсүрэн, Б.Пүрэвдорж нар махны экспортын тооцоолол, өнөөгийн нөхцөл байдлын талаарх дэлгэрэнгүй мэдээллийг тодруулж, хариулт авсан. Хүнсний аюулгүй байдлын зөвлөмжөөр энэ онд 27.9 мянган тонн адууны мах, дулааны аргаар боловсруулсан үхрийн мах 8 мянган тонн, хонины мах 6.6 мянган тонн, ямааны мах 12 мянган тонн гээд нийтдээ 57.7 мянган тонн мах экспортлох тооцоололтой байгааг З.Мэндсайхан мэдээллээ. Төв суурин газрын махны хэрэгцээг хангах нөөцийн хэмжээг 4 мянга орчим тонноор нэмэгдүүлэн 20 мянган тонн болохоор төлөвлөсөн гэв. Дотоодын мах бэлтгэлийн тоо, хэмжээг нэмэгдүүлсэнтэй холбоотойгоор Сангийн яамтай ярилцан, төсвийн тодотголын төсөлд 4 орчим тэрбум төгрөгийг банкны зээлийн хүүгийн хөнгөлөлтийн санхүүжилт болгохоор тусгаад байгаа гэлээ. Махны экспортыг нэмэгдүүлэхийн тулд олон улсын түвшинд Монгол Улс мал аж ахуйн эрүүл, тайван бүс гэдгийг баталгаажуулах шаардлага тулгараад байгаа бөгөөд энэ чиглэлд зохих арга хэмжээнүүдийг яаралтай авч хэрэгжүүлж байгаа гэв.

Төслийн анхны хэлэлцүүлэгтэй холбогдуулан Улсын Их Хурлын гишүүн Д.Тогтохсүрэн, Ц.Даваасүрэн, Х.Булгантуяа, Ж.Батсуурь, Ж.Батжаргал, Б.Чойжилсүрэн, Ц.Анандбазар нар үг хэлж, санал гаргав. Ингээд хуралдааны үеэр Байнгын хорооны гишүүдээс гаргасан зарчмын зөрүүтэй саналын томъёолол нэг бүрээр санал хураалт явуулан шийдвэрлэсэн. Ийнхүү “Монгол Улсын Засгийн газрын 2020-2024 оны үйл ажиллагааны хөтөлбөр батлах тухай” Улсын Их Хурлын тогтоолын төслийн анхны хэлэлцүүлгийг хийсэн талаарх санал дүгнэлтээ Төрийн байгуулалтын байнгын хороонд хүргүүлэхээр боллоо.

“Монгол Улсыг 2021-2025 онд хөгжүүлэх таван жилийн үндсэн чиглэлийг батлах тухай” Улсын Их Хурлын тогтоолын төслийн анхны хэлэлцүүлгийг хийв. Төслийн анхны хэлэлцүүлэгтэй холбогдуулан асуулт асууж, үг хэлэх шаардлагагүй хэмээн хуралдаанд оролцсон гишүүд үзсэн юм. Иймд гишүүдээс гаргасан зарчмын зөрүүтэй саналын томъёолол тус бүрээр санал хураалт явуулан шийдвэрлээд, энэ талаарх санал дүгнэлтээ Эдийн засгийн байнгын хороонд хүргүүлэхээр тогтов.

Дараа нь Төсвийн зарим тусгай шаардлагын үйлчлэлийг түр түдгэлзүүлэх тухай хуулийн төслийн анхны хэлэлцүүлгээр хуралдаан үргэлжиллээ. Төслийн анхны хэлэлцүүлэгтэй холбогдуулан Улсын Их Хурлын гишүүн Ц.Даваасүрэн, Б.Чойжилсүрэн нар асуулт асууж, Сангийн сайдаас хариулт авлаа.

Улсын Их Хурлаас шинэчлэн баталсан Монгол Улсын Их Хурлын чуулганы хуралдааны дэгийн тухай хуулийн 39 дүгээр зүйлийн 39.10-т “Байнгын хороо хуулийн төслийг зүйл бүрээр хэлэлцэнэ” гэж заасны дагуу Төсвийн зарим тусгай шаардлагын үйлчлэлийг түр түдгэлзүүлэх тухай хуулийн төслийг хэлэлцэв. Төслийн хоёр дугаар зүйлтэй холбогдуулан Улсын Их Хурлын гишүүн Б.Чойжилсүрэн зарчмын зөрүүтэй санал гаргаж, шийдвэрлүүлсэн. Ингээд хуулийн төслийн анхны хэлэлцүүлгийг хийсэн талаарх санал дүгнэлтээ чуулганы нэгдсэн хуралдаанд танилцуулахаар боллоо.

Categories
мэдээ нийгэм

Бямбасүрэнгийн Энхбайгалийг Монгол Улсын Ерөнхийлөгчийн зөвлөхөөр томиллоо

Монгол Улсын Ерөнхийлөгч Халтмаагийн Баттулга захирамж гаргаж, Бямбасүрэнгийн Энхбайгалийг Монгол Улсын Ерөнхийлөгчийн Хот, бүсчилсэн хөгжил (хот, бүсчилсэн хөгжил, орон нутаг)-ийн бодлогын асуудал хариуцсан зөвлөхөөр томиллоо.

МОНГОЛ УЛСЫН ЕРӨНХИЙЛӨГЧИЙН ЗӨВЛӨХ БЯМБАСҮРЭНГИЙН ЭНХБАЙГАЛЬ:

Эдийн засгийн ухааны доктор, дэд профессор Бямбасүрэнгийн Энхбайгаль нь эдийн засаг, хөдөө аж ахуй, бүсчилсэн болон орон нутгийн хөгжил, улсын хөгжлийн бодлого, төрийн бодлого, үндэсний аюулгүй байдлын чиглэлээр олон жил ажиллаж мэргэшсэн, төрийн бодлого боловсруулах үүрэг бүхий мэргэжлийн, судалгааны байгууллагуудыг толгойлон ажиллаж байсан туршлагатай.

Боловсрол:

  • Төрийн албан хаагчдыг бэлтгэх үндсэн үүрэгтэй Удирдлагын академид олон жил багшилсан, дэд профессор цолтой. Англи, Түрэг, Франц хэлтэй.
  • Мэргэжлээрээ хэд хэдэн (БНСУ, ХБНГУ, Австри, Франц, АНУ) оронд мэргэжил дээшлүүлсэн.
  • 2003 онд “Монгол Улсын эдийн засгийн хөгжлийн бодлого, төлөвлөлтийг боловсронгуй болгох нь” сэдвээр доктор (Ph.D)-ын зэрэг хамгаалсан.
  • 2000 онд Удирдлагын академийг “Бизнесийн удирдлагын магистр” зэрэгтэй төгссөн.
  • 1997 онд БНТурк улсын Анадолу Их сургуулийг эдийн засаг, бизнесийн удирдлагын мэргэжлээр төгссөн.

Ажлын туршлага:

  • 2017-2019 онд, Монгол Улсын Үндэсний аюулгүй байдлын Зөвлөлийн Стратеги судалгааны хүрээлэнгийн Захирал
  • 2013-2016 онд, Монгол Улсын Ерөнхийлөгчийн Тамгын газрын харьяа Үндэсний хөгжлийн хүрээлэнгийн Захирал
  • 2008-2011 онд, Удирдлагын академийн Удирдахуйн ухааны хүрээлэнгийн Ахлах судлаач, Захирал, Эрдэмтэн нарийн бичгийн дарга
  • 2003-2008 онд, Удирдлагын академийн Удирдахуйн ухааны Тэнхимийн эрхлэгч
  • 2000-2003 онд, Удирдлагын академийн Удирдахуйн ухааны тэнхимд Багш

Сонгуульт ажил:

  • 2014-2015 онд, УИХ-ын Монгол Улсын урт хугацааны хөгжлийн бодлого (2040 он хүртэлх)-ыг боловсруулах Ажлын хэсгийн ахлагч
  • 2015-2016 онд, БСШУЯ-ны Дээд боловсролын Зөвлөлийн гишүүн
  • 2013-2016 онд, Шинжлэх ухааны Академийн Захирлуудын Зөвлөлийн гишүүн
  • 2003-2010 онд, Монгол Улсын Удирдахуйн ухаан, төрийн удирдлагаар Докторын зэрэг хамгаалуулах Зөвлөлийн гишүүн, Нарийн бичгийн дарга
Categories
мэдээ нийгэм

НИТХ дахь Ардчилсан намын бүлэг хуралдаж байна

Нийслэлийн Иргэдийн Төлөөлөгчдийн хурал дахь Ардчилсан намын бүлэг өнөөдөр хуралдаж байна. Хуралдааны эхэнд 2016-2020 оны нийслэлийн Засаг дарга бөгөөд Улаанбаатар хотын Захирагчийн үйл ажиллагааны хөтөлбөрийн талаар, 2020 оны нийслэлийн эдийн засаг, нийгмийг хөгжүүлэх үндсэн чиглэлийн хэрэгжилтийн явцын мэдээллийг НЗДТГ-ын Хяналт, шинжилгээ үнэлгээний хэлтсийн дарга Х.Гантулга өглөө.

Бүлгийн хуралдаанаар 2020 оны хичээлийн шинэ жилийн бэлтгэл ажил болон сургууль, цэцэрлэгийн хөрөнгө оруулалтын ажлын явц болон нийслэлийн хэмжээнд хүүхдийн хөгжил хамгааллын өнөөгийн байдал зэрэг асуудлыг хэлэлцэх юм.

Categories
мэдээ нийгэм

Залуучуудын иргэний нийгмийн IV чуулган”-аар “Цар тахал бидний амьдралд” сэдвээр ярилцлаа

Залуучууд бол асуудал дагуулсан нийгмийн эмзэг бүлэг биш. Харин бүтээлч, хариуцлагатай, эерэг өөрчлөлт авчрагч, асар том хүч, нийгмийн ижил тэнцүү, түншлэгч, оролцогч бүлэг юм гэдгийг өнөөдөр (2020.08.24) нийслэл хотноо эхэлсэн “Залуучуудын иргэний нийгмийн IV чуулган”-аар хөндөж байна.

Чуулганыг Монголын залуучуудын эвслээс өнөөдөр тохиож буй Монголын залуучуудын өдөр НҮБ-ын Хүн амын сан, Европын холбооны дэмжлэгээр хэрэгжүүлж буй “Бүгд залуусын төлөө, Залуус бүгдийн төлөө!” төслийн хүрээнд НҮБ-ын суурин төлөөлөгчийн төв байранд “Залуусаа сонсоцгооё: Цар тахал бидний амьдралд” сэдвээр зохион байгуулж байна.

Чуулганыг Европын Холбооноос Монгол Улсад суугаа Төлөөлөгчийн газрын Хамтын ажиллагааны хэлтсийн дарга Пьер-Ив Люка, НҮБ-ын Хүн амын сангийн тэргүүн Коари Ишикава, Монголын Залуучуудын Эвслийн зохицуулагч Э.Сэрээтэр нар нээлээ.

Чуулганы үндсэн илтгэлийг Монголын Залуучуудын Эвслийн зохилцуулагч Э.Сэрээтэр “Цар тахал бидний амьдралд” сэдвээр тавьж, залуучууд дэлхий нийтийг хамраад буй “Covid-19” цар тахлын халдварын нөлөөллийн нөхцөл байдалд амьдрал ахуй, ажил төрлөө цахимд шилжүүлэх замаар соёлын хандлагын өөрчлөлтийг хийх талаар хөндөв.

“Залуучуудын иргэний нийгмийн IV чуулган” нь “Эрүүл мэнд”, “Боловсрол”, “Хөдөлмөр эрхлэлт”, Иргэний орон зай-залуусын оролцоо” сэдэвчилсэн хэлэлцүүлгийг өрнүүлж, олон талын төлөөлөл оролцож байгаагаараа онцлог болж байна.

Чуулганы үеэр НҮБ-аас энэ онд эхлүүлээд буй “НҮБ-75” санаачилгын хүрээнд дэлхийн өнцөг булан бүрт болж буй “Хүсэж буй ирээдүйгээ хамтдаа бүтээн байгуулъя” уриан доорх олон талт хэлэлцүүлэгт залуучуудын байр суурийг тодотгох үйл ажиллагаа зэрэгцэн явагдаж байна.

Дашрамд мэдээлэхэд, Монголын Залуучуудын эвсэл нь 2014 онд байгуулагдан 18 ТББ-ыг эгнээндээ нэгтгэн хүний эрхийг дээдэлсэн нийгмийг бүтээхэд залуучуудын эрхэм чанарыг түгээж, бодит, ухаалаг, бүтээлч оролцоог нэмэгдүүлэхийн төлөө ажиллажээ.

Categories
мэдээ нийгэм онцлох-нийтлэл туслах-ангилал

Засгийн газрын ээлжит бус хуралдаанаар хөл хориог есдүгээр сарын 15-н хүртэл сунгалаа

КОВИД-19 цар тахлаас урьдчилан сэргийлэх, эрсдэлийг бууруулах зорилгоор өндөржүүлсэн бэлэн байдлын зэрэгт шилжүүлсэн хугацааг 2020 оны 09 дүгээр сарын 15-ны өдрийг дуустал сунгах Улсын онцгой комиссын шийдвэрийг дэмжив. Нөхцөл байдлыг харгалзан 09 дүгээр сарын 15-наас хойш зарим хязгаарлалтын дэглэмийг сулруулах, цуцлах хүртэл арга хэмжээ авахаар төлөвлөөд байна. 08 дугаар сарын 25-ны байдлаар Монгол Улсад 298 тохиолдол бүртгэгдсэн бөгөөд 289 хүн эдгэрсэн, эмчлүүлж байгаа есөн хүний нэгийнх нь бие хүндэвтэр байна. Дэлхийн 216 улсад 23.8 сая хүн халдвар авч, 817 мянга гаруй хүн нас барж, 16,4 сая хүн эдгэрсэн тухай Дэлхийн эрүүл мэндийн байгууллага мэдээлжээ. Цар тахлын улмаас 60 орчим улс онц байдал зарлаж, 50 улс хөл хорио тогтоон, 80 гаруй улс хилээ хэсэгчлэн болон бүрэн хааж, хөл хорио тогтоосон, хил хаасан хугацаагаа сунгаад байна.

Станцууд 20-иос доошгүй хоногийн нүүрсний нөөц бүрдүүлнэ

– Эрчим хүчний үйлдвэр, компаниудын үндсэн болон туслах тоноглолын засвар үйлчилгээг төлөвлөсөн хугацаанд нь хийж дуусгах

– Дулааны цахилгаан болон дулааны станцууд 20-иос доошгүй хоногийн нүүрсний нөөцтэй байх, аваар ослын үед ашиглах техник, тоног төхөөрөмж, сэлбэг хэрэгслийн нөөц бүрдүүлэх

– “Багануур”, “Шивээ-Овоо”, “Шарын гол” компанийн найдвартай ажиллагааг хангахад шаардлагатай түлш, шатахууны нөөц бүрдүүлэх, хөрс хуулалт, их засварын ажлыг хугацаанд нь хийх, нүүрсний бэлэн нөөцийг хэвийн хэмжээнд байлгах

– Аймаг, нийслэлийн орон сууц, нийтийн аж ахуйн байгууллагуудын ус хангамж, ариутгах татуургын их болон урсгал засвар, туршилт тохируулгыг хугацаанд нь чанартай хийх

– Тусгай зөвшөөрөлтэй аж ахуйн нэгжийн халаалтын уурын зуухны янданд утааны шүүлтүүр суурилуулах

– Сайжруулсан шахмал түлшний түүхий эдийн нөөцийг үйлдвэрийн хашаанд 300 мянган тонн, Төв аймаг дахь дундын агуулахад 700 мянган тонн байхаар тооцох, 120 мянган тонн сайжруулсан шахмал түлшний нөөцтэй байх зэрэг чиглэлээр ажиллахыг холбогдох сайд, агентлаг, аймаг, нийслэл, компанийн удирдлагуудад үүрэг болгов. Өвөлжилтийн бэлтгэл ажлын дүнг нэгтгэн 2020 оны 09 дүгээр сарын 15-ны дотор Засгийн газарт танилцуулахыг сайд Н.Тавинбэхэд даалгав.

Улаанбуудай, төмсний хэрэгцээг дотоодоос бүрэн хангана

2020 оны ургацын урьдчилсан балансын дүнгийн талаар сайд З.Мэндсайхан танилцуулав. Энэ онд 394 мянга гаруй га-д үр тариа, үүнээс 364 мянган га-д улаан буудай, 18.6 мянган га-д төмс, 9.6 мянган га-д хүнсний ногоо, 61.1 мянган га-д тос, 52.7 мянган га-д тэмжээлийн ургамал тариалсан байна. Урьдчилсан балансаар 513.3 мянган тонн үр тариа, үүнээс 487.6 мянган тонн буудай, 237 мянган тонн төмс, 113.6 мянган тонн хүнсний ногоо, 32.8 мянган тонн тосны ургамал, 109.4 мянган тонн тэжээлийн ургамал хураан авах төлөв гарчээ. Ингэснээр улаанбуудайн хэрэгцээг 100 хувь, төмсийг 140 хувь, хүнсний ногоог 60 хувь дотоодоос хангах боломж бүрдэж байна. Ургац хураалтыг богино хугацаанд зохион байгуулах, дараа оны тариалалтад хүрэлцэх хэмжээний үр тариа, тэжээлийн ургамлын үрийн нөөц бүрдүүлэх, төмс, хүнсний ногоо хадгалах, борлуулахад дэмжлэг үзүүлэх чиглэлээр ажиллахыг сайд З.Мэндсайханд даалгав.

Categories
мэдээ нийгэм

Хөвсгөл нуурын баруун эрэгт үйл ажиллагаа явуулдаг аж ахуйн нэгж бохир усаа нуурт цутгаж байгаа нь илэрчээ

Хөвсгөлийн Улсын тусгай хамгаалалттай газрын хамгаалалтын захиргаанаас Хөвсгөл нуурын эрэг орчимд үйл ажиллагаа эрхэлж буй аж ахуйн нэгжүүдэд хяналт, шалгалт хийж байгаа аж.

2020 оны наймдугаар сарын 25-ны өдрийн эргүүл хяналтаар Хатгал тосгон буюу Хөвсгөл нуурын баруун эрэгт үйл ажиллагаа явуулдаг нэр бүхий зочид буудал нь бохир усаа насосоор татан, урсгаж, нуурыг бохирдуулж байгаа нь илэрсэн талаар Хөвсгөлийн Улсын тусгай хамгаалалттай газрын хамгаалалтын захиргаа цахим хуудастаа мэдээлжээ.

Уг хэрэг дээр зохих арга хэмжээг авч холбогдох хуулийн байгууллагад шилжүүлэхээр тус захиргаанаас ажиллаж буй бөгөөд цаашид хяналт шалгалт үргэлжлүүлэх талаараа мөн мэдэгдсэн байна.

Categories
мэдээ нийгэм

Зам тээврийн ослоор дөрвөн сартай нярай энджээ


2020 оны наймдугаар сарын 24-ний өдрийн 19:18 цагийн орчимд Төв аймгийн Эрдэнэ сум Өгөөмөр 1-р баг “Цонжин болдог” гэх газар /Улаанбаатар хотоос зүүн тийш 52 км/ замд Toyota prius маркийн автомашины жолооч С нь Toyota prius маркийн Ш жолоочтой, автомашинтай мөргөлдөж, зорчигч 4 сартай, эрэгтэй А-н амь нас хохирч, 2 хүн гэмтсэн ноцтой осол гарсан байна.

Иймд жолооч та бүхэн орон нутгийн замд хөдөлгөөнд оролцохдоо зам, орчны байдалд хурдаа зөв тохируулах, жолооч, зорчигч нар хамгаалах бүс хэрэглэх, хүүхдийг зориулалтын суудалд тээвэрлэж байхыг Тээврийн цагдаагийн албанаас анхаарууллаа.

А.МӨНХНАРАН

Categories
мэдээ нийгэм

Би БНХАУ-ын компанид 50 га газар олгоогүй

-Сүүлийн жил хагасын хугацаанд УИХ-ын гишүүн С.Амарсайхан Нийслэлийн засаг дарга бөгөөд Улаанбаатар хотын захирагчийн үүрэг гүйцэтгэж байхдаа БНХАУ-ын компанид 50 га газар олгож, дотоодын үйлдвэрлэгч, тариаланчдын эрх ашигт ноцтойгоор халдаж байна гэсэн үндэслэлгүй мэдээлэл явж байна.

Нийслэлийн Засаг дарга бөгөөд Улаанбаатар хотын захирагчийн ажлыг 2019 оны хоёрдугаар сарын 27-нээс 2020 оны зургадугаар сарын 27 өдөр хүртэл үүрэгт ажлыг хашсан. Миний бие нийслэлийн захирагчаар ажилласан нэг жил гурван сарын хугацаанд үндсэн эрх үүргийнхээ хүрээнд газар зохион байгуулалтын асуудлыг шийдвэрлэсэн. Нийт 158 газрыг нийтийн эзэмшилд авч, тохижуулж эхэлсэн. Олон нийтийн мэдээллийн хэрэгслээр явж байгаа шиг БНХАУ-ын ямар нэгэн компанид хувийн болон хөдөө аж ахуйн ашиглалтаар ашиглах 50 га газар олгоогүй гэдгийг албан ёсоор мэдэгдэж байна. С.Амарсайханыг гүтгэж болно. Хуулийн хэмжээнд хязгаартай байх ёстой. Гэхдээ олон улсын найрсаг харилцаанд хүндэтгэлтэй хандах ёстой.

Би УИХ-ын гишүүний хувиар Нийслэлийн Засаг даргын үүрэг гүйцэтгэгч Ж.Батбаясгалан, Нийслэлийн газар зохион байгуулалтын албаны дарга А.Энхманлай нарт албан бичгээр хандсан.

Миний бие нийслэлийн Засаг даргаар ажиллах хугацаандаа 50 га газар олгосон эсэхийг албан ёсоор тодруулж хариу авсан. Хариунд “УИХ-ын гишүүн С.Амарсайхан Танаа, тус албанд танаас ирүүлсэн лавлагаа хүсэх албан бичгийг судалж үзлээ. Таны Нийслэлийн Засаг даргаар ажиллаж байх хугацаанд буюу 2019 оны хоёрдугаар сарын 27-нээс 2020 оны зургадугаар сарын 30-ны өдрийг хүртэл хугацаанд БНХАУ-ын ямар нэгэн иргэн аж ахуй нэгжид ногоо тарих зориулалттай 50 га газар олгоогүй байна” гэсэн байна. хэмээн мэдээллээ.

Categories
мэдээ нийгэм

Туул голын эрэг дээр тоглож байгаад усанд живсэн хүүхдийн цогцсыг өчигдөр олсон байна

Наймдугаар сарын 15-нд Туул голын эрэг дээр тоглож байгаад голын усанд унаж, урссан хүүхдийн цогцсыг өчигдөр олсон болохыг Онцгой байдлын ерөнхий газраас мэдээллээ.

Тодруулбал, Нийслэлийн Хан-Уул дүүргийн 20 дугаар хороонд байрлах “Мишээл-Экспо” худалдааны төвийн баруун урд талд бага насны дөрвөн хүүхэд Туул”голын эрэг дээр тоглож байгаад Хан-Уул дүүргийн 11 дүгээр хороонд оршин суух А /8 настай, эрэгтэй/ голын усанд унаж, урссан тухай дуудлага энэ сарын 15-ны өдрийн 15:25 цагт Онцгой байдлын ерөнхий газар хүлээн авсан аж.

Дуудлагын дагуу Нийслэлийн Аврах ангийн алба хаагчид аврах ажиллагаа явуулж, өчигдөр буюу наймдугаар сарын 24-ний өдрийн 06:40 цагаас эрэн хайх ажиллагааг зохион байгуулах явцад тус дүүргийн 20 дугаар хороо, “Яармагийн гүүр” болон “Сонсголонгийн гүүр”-ний дунд хэсэгт Туул голын усны мандал дээрээс 12:37 цагт цогцсыг олж, Хан-Уул дүүргийн Цагдаагийн хоёрдугаар хэлтэст шилжүүлэн өгсөн байна.

Categories
мэдээ нийгэм

Их дээд сургуулийн төлбөрийн мэдээлэл

Боловсрол шинжлэх ухааны яамнаас “2020-2021 оны хичээлийн жилд бүх сургуулиуд сургалтын төлбөрөө тогтоосон. Сургалтын төлбөр нэмэгдэхгүй” хэмээн мэдэгдсэн. Оюутан залуустаа зориулан зарим нэг их сургуулиудын 2020-2021 оны хичээлийн жилийн сургалтын төлбөрийн мэдээллийг хүргэж байна.

МУИС– Ерөнхий суурийн хичээлүүд нэг кредит нь 98’600 төгрөг. Нэг улиралд хамгийн ихдээ 21 кредит /багц цаг/ үзэх боломжтой учир улирлын төлбөр 2’070’600 /хамгийн дээд тал нь/ төгрөг болно.

ШУТИС– Элссэн салбар сургуулиасаа хамааран өөр байна.

Инженер технологийн сургуулиуд: Нэг кредит нь 90’800 төгрөг,

Нийгмийн ухааны сургуулиуд: Нэг кредит нь 88,800 төгрөг,

Хэрэглээний шинжлэх ухааны сургуулиуд: Нэг кредит нь 79’300 төгрөг,

Нэг улиралд хамгийн ихдээ 21 кредит /багц цаг/ үзэх боломжтой учир улирлын төлбөр дунджаар 1’812’300 төгрөг байна.

МУБИС- Бакалаврын түвшний нэг кредитийн төлбөр 78’000 төгрөг. Нэг улиралд хамгийн ихдээ 21 кредит үзэх боломжтой учир улирлын төлбөр 1’638’000 /хамгийн дээд тал нь/ төгрөг юм.

СЭЗИС- Бакалаврын сургалтын нэг кредитийн төлбөр 153’000 төгрөг. Нэг улиралд хэдэн ч кредит / үзэх боломжтой ч 20 кредитээс дээш бол 168’300 төгрөгөөр тооцогддог аж. Улирлын төлбөр дунджаар 3’060’000 болно.

СУИС- Нэг кредитийн төлбөр 63’700 төгрөг. Жилд 31-ээс дээш кредит /багц цаг/ үзэж байж хоёрдугаар түвшний оюутанд тооцогддог бөгөөд жилийн төлбөр дунджаар 1’974’700 төгрөг юм.